Isa idop ageꞌ
24
Lam-lam panam ari mingu, kebala urang inoꞌ te gah nerudi Isa angkat ke kubor Ya. Sidaꞌ ngemaiꞌ kebala binyak wangi abaꞌ kebala utai te tauꞌ nyuroh bangkai Ya nadai bau.
2 Breta sidaꞌ datai ke kubor, sidaꞌ medaꞌ batu besai penutop kubor lamaꞌ nyau udah begansat.
3 Udah nyaꞌ sidaꞌ tamaꞌ ke alam kubor, uleh sidaꞌ niseꞌ ageꞌ medaꞌ bangkai Tuhan Isa diyaꞌ.
4 Tengan sidaꞌ diri blumaꞌ ampal medaꞌ bangkai Isa niseꞌ diyaꞌ, nadai mang-mang dua ikoꞌ urang mlikat te ngau baju puteh bedawar nganyaꞌ direꞌ semak sidaꞌ.
5 Sidaꞌ ma takot sampai tesungkor ke tanah, uleh snikoꞌ nyaꞌ madah ke sidaꞌ: “Ngapa bah kitaꞌ ngigaꞌ urang te idop de teban urang mati?
6 Ya niseꞌ ditoꞌ, Ya nyau idop ageꞌ. Ingat kitaꞌ te udah depadah Ya tengan kitaꞌ de Galelia!
7 Ya madah Ensia te datai ari Tuhan Allah alah daserah ke urang te dusa, desaleb, abaꞌ ari ketiga Ya idop ageꞌ.”
8 Ninga piyaꞌ baroꞌ sidaꞌ ingat apa te udah depadah Isa ke sidaꞌ.
9 Udah nyaꞌ sidaꞌ pulai ari kubor, sidaꞌ nusoi apa te udah sidaꞌ pedaꞌ abaꞌ dinga de kubor ke sebelas muret Isa abaꞌ ke urang bukai.
10 Kebala urang inoꞌ te nusoi ugaꞌ utai nyaꞌ, Maria ari kampong Magdala, Yohana, Maria inai Yakubos, abaꞌ kebala urang inoꞌ te kebukai te lamaꞌ abaꞌ sidaꞌ.
11 Uleh kebala muret Ya nadai pecayaꞌ ke utai te datusoi kebala urang inoꞌ nyaꞌ, nema sidaꞌ miker utai nyaꞌ nadai masok akal.
12 Baroꞌ Petros angkat beburoh arah beguai ke kubor nyaꞌ. Breta ya nyengok ke alam kubor, ya medaꞌ peroꞌ kaen puteh mah te ageꞌ diyaꞌ. Petros ma mah ampal, blumaꞌ ya pulai ya ngerakau kati utai nyaꞌ tauꞌ piyaꞌ.
Isa nganyaꞌ direꞌ ke dua ikoꞌ muret Ya de jalai mansang ke kampong Emaus
13 Sari nyaꞌ gaꞌ adai dua ikoꞌ muret Isa te kebukai angkat ke kampong Emaus, kampong nyaꞌ sekitar sebelas kilomiter mah penyaoh ari kuta Yerosalem.
14 Blumaꞌ bejalai snikoꞌ becakap ke kebala utai te udah nacah Isa.
15 Tengan snikoꞌ becakap abaꞌ betengek, Isa datai bejalai abaꞌ snikoꞌ.
16 Uleh snikoꞌ nitauꞌ badaꞌ nyaꞌ Isa, nema adai utai te nyuroh snikoꞌ nadai ngelala Ya.
17 Isa nanyaꞌ: “Apa te tengan snikoꞌ tengek ke de jalai toꞌ?” Ninga piyaꞌ snikoꞌ mentan abaꞌ mata mua snikoꞌ ma mah riyu.
18 Kliopas nyawot Ya: “Amang ku peroꞌ Wan kedireꞌ mah Pak urang te bekunyong ke kuta Yerosalem te nitauꞌ badaꞌ kebala utai te udah nacah kuta nyaꞌ dua tiga ari te udah teh.”
19 Jakoꞌ Isa: “Apa piyaꞌ?”
Sawot snikoꞌ: “Kebala utai te udah nacah Isa sidaꞌ Nasaret nyaꞌ bah. Isa nyaꞌ nabi, apa te dapulah abaꞌ te depadah Ya lampar bekuasa de pemedaꞌ Tuhan Allah abaꞌ de pemedaꞌ ensia.
20 Uleh kebala kepalaꞌ imam abaꞌ kebala urang tuai bansa kita nyerah Ya ke pemimpen bansa Ruma isaꞌ daukom mati abaꞌ sidaꞌ udah nyaleb Ya.
21 Tunaꞌ des dulau teh kami ngagam Ya mah te datai ngelepas kita bansa Israel. Uleh kati mah ngatoh deh, toꞌ nyau tiga ari Ya udah mati.
22 Te nyuroh kami ampal gaꞌ, lam-lam tadeꞌ teh adai dua tiga ikoꞌ kebala kawan kami te inoꞌ ke kubor Isa.
23 Uleh sidaꞌ madah niseꞌ sidaꞌ medaꞌ bangkai Isa ageꞌ diyaꞌ. Sidaꞌ pulai abaꞌ nusoi ke kami enteꞌ sidaꞌ medaꞌ kebala mlikat, abaꞌ kebala mlikat nyaꞌ madah ke sidaꞌ Isa nyau idop ageꞌ.
24 Ninga piyaꞌ dua tiga ikoꞌ kawan kami angkat ke kubor nyaꞌ, sidaꞌ medaꞌ amat mah kubor nyaꞌ nyau puang munyi te depadah kebala urang inoꞌ nyaꞌ. Uleh amat piyaꞌ niseꞌ gaꞌ sidaꞌ medaꞌ Isa diyaꞌ.”
25 Baroꞌ Isa madah: “Kitaꞌ toꞌ lampar budu, abaꞌ lat amat mah pecayaꞌ ke apa te depadah kebala nabi.
26 Tunaꞌ des tauꞌ kitaꞌ badaꞌ enteꞌ Al Maseh Raja te dedanyi Tuhan Allah, alah ngasa pemedeh nyaꞌ sebedau Ya dajunyong tingeꞌ.”
27 Baroꞌ Isa nyelas ke snikoꞌ apa te datules ke Ya de alam Kitab Suci. Ya nyelas ke snikoꞌ belaboh ari kitab te datules Musa datai ke kebala kitab nabi te kebukai.
28 Nyau sidaꞌ kaꞌ semak kampong te snikoꞌ gusong, Isa upa te tubah kaꞌ bejalai juros.
29 Kebaꞌ snikoꞌ ngetan Ya, jakoꞌ snikoꞌ: “Singah mbah, bemalam abaꞌ kemua, pedaꞌ Wan ari nyau kaꞌ malam.” Baroꞌ Isa tamaꞌ ke rumah bemalam abaꞌ snikoꞌ.
30 Pas Isa dudok makai abaꞌ snikoꞌ, Ya nyamah ruti, bradua betrimaꞌ kaseh ke Tuhan Allah, baroꞌ Ya mungaꞌ ruti nyaꞌ abaꞌ mereꞌ ke snikoꞌ.
31 Tengan nyaꞌ mah gaꞌ snikoꞌ tauꞌ badaꞌ nyaꞌ Isa, uleh Isa niseꞌ diyaꞌ ageꞌ.
32 Jakoꞌ snikoꞌ: “Ingat de tengah jalai tadeꞌ teh lampar gaga ati tua weh, jalai Isa becakap abaꞌ nyelas reti Kitab Suci ke tua.”
33 Baroꞌ snikoꞌ angkat ari nyaꞌ pulai ke Yerosalem. De Yerosalem snikoꞌ betemu abaꞌ sebelas muret Isa te tengan begugoꞌ abaꞌ kebala kawan te kebukai.
34 Sidaꞌ te diyaꞌ madah ke snikoꞌ nyaꞌ: “Auꞌ, amat mah Tuhan nyau idop ageꞌ, Ya udah nganyaꞌ direꞌ ke Simon!”
35 Baroꞌ snikoꞌ nusoi ke sidaꞌ tengan snikoꞌ de jalai abaꞌ kati snikoꞌ tauꞌ badaꞌ nyaꞌ Isa jalai snikoꞌ medaꞌ Ya mungaꞌ ruti.
Isa nganyaꞌ direꞌ ke kebala muret Ya
36 Tengan dua ikoꞌ muret Isa nyaꞌ nusoi utai te snikoꞌ pedaꞌ, nadai mang-mang Isa diri nganyaꞌ direꞌ de tengah sidaꞌ abaꞌ madah: “Idop penoh damai ke kitaꞌ.”
37 Sidaꞌ tekanyat abaꞌ takot nema sidaꞌ miker Ya antu.
38 Uleh Ya madah ke sidaꞌ: “Ngapa bah kitaꞌ takot abaꞌ bedau pecayaꞌ amat?
39 Pedaꞌ ke jari abaꞌ kaki Ku, Ku mah toꞌ. Gau ke uleh kitaꞌ abaꞌ pedaꞌ mah, nema antu niseꞌ iseꞌ abaꞌ tulang, upa te kitaꞌ pedaꞌ de Ku.”
40 Blumaꞌ Ya madah piyaꞌ, Ya nganyaꞌ jari abaꞌ kaki ke sidaꞌ.
41 Uleh sidaꞌ bedau pecayaꞌ nema sidaꞌ ampal abaꞌ ma gaga medaꞌ Isa. Medaꞌ sidaꞌ bedau pecayaꞌ, Isa nanyaꞌ sidaꞌ: “Adai te depakai kitaꞌ ditoꞌ?”
42 Baroꞌ sidaꞌ mereꞌ ikan te udah datunu ke Ya.
43 Ya ngameꞌ abaꞌ Ya makai de mua sidaꞌ.
44 Udah nyaꞌ Ya madah ke sidaꞌ: “Toꞌ mah te jakoꞌ Ku te udah Ku padah ke kitaꞌ jalai Ku ageꞌ abaꞌ kitaꞌ, ugaꞌ te datules ke Ku alam kitab te datules Musa, kitab kebala nabi abaꞌ Masmur alah temoꞌ.”
45 Baroꞌ Ya nyelas iseꞌ Kitab Suci nyaꞌ ke sidaꞌ, nyaꞌ nyuroh sidaꞌ nyarok apa reti te depadah alam Kitab Suci.
46 Ya madah ke sidaꞌ: “Adai datules upa pitoꞌ: ‘Al Maseh alah nangong pemedeh sampai mati, abaꞌ ari ketiga Ya idop ageꞌ.
47 Abaꞌ brita toꞌ alah depadah ke ugaꞌ bansa alam kuasa nama Ya, urang alah nudi kebala dusa, isaꞌ Tuhan Allah ngampon dusa sidaꞌ.’ Brita toꞌ alah depadah belaboh ari Yerosalem.
48 Kitaꞌ mah saksi ari ugaꞌ toꞌ, kebaꞌ kitaꞌ alah madah ugaꞌ toꞌ ke urang bukai.
49 Abaꞌ Ku kaꞌ ngutos Roh Kudos ke kitaꞌ upa te udah dedanyi Apai Ku. Uleh kitaꞌ alah betan de Yerosalem, nungoꞌ kuasa te ari sruga nyaꞌ datai menoh kitaꞌ.”
Isa trangkat ke sruga
50 Udah nyaꞌ Isa ngemaiꞌ kebala muret Ya abaꞌ urang te gah nerudi Ya sengabot keluar ari Yerosalem nyemak kampong Betania, diyaꞌ Ya ngangkat jari ke atau sidaꞌ mintaꞌ ke Tuhan Allah mereꞌ berkat ke sidaꞌ.
51 Pas Isa tengan bradua ke sidaꞌ, Isa trangkat ke sruga nudi sidaꞌ.
52 Sidaꞌ nyungkon nyemah Ya, baroꞌ sidaꞌ pulai ke Yerosalem ngau ati gaga.
53 Udah nyaꞌ sidaꞌ selareh muji Tuhan Allah de Rumah Kudos Tuhan Allah.