Isa debaiꞌ ngusong Pelatos
23
Udah nyaꞌ ugaꞌ urang ari Pengadel Agama Yahudi diri abaꞌ ngemaiꞌ Isa ngusong Pelatos.
2 Diyaꞌ sidaꞌ belaboh nudoh Ya, jakoꞌ sidaꞌ: “Kami udah nemu urang toꞌ tengan nyabong bansa kami, abaꞌ ngerot urang mayar pajak ke Kaisar, abaꞌ Ya ngangkoꞌ direꞌ Ya Al Maseh, Raja urang Yahudi.”
3 Udah nyaꞌ Pelatos nanyaꞌ ke Isa: “Amat mah Direꞌ Raja urang Yahudi?” Sawot Isa: “Wan mah te madah piyaꞌ.”
4 Baroꞌ Pelatos madah ke kebala kepalaꞌ imam agama urang Yahudi abaꞌ ke kebala urang banyau te diyaꞌ: “Ku datai ke siket mah niseꞌ nemu penyalah Urang toꞌ.”
5 Uleh sidaꞌ tengek madah penyalah Isa ke Pelatos, jakoꞌ sidaꞌ: “Ya nyabong urang banyau ngau pengajar Ya de ugaꞌ wilayah Yudia. Ya belaboh ngajar ari Galelia abaꞌ entoꞌ nyau datai kitoꞌ.”
6 Breta Pelatos ninga piyaꞌ, ya nanyaꞌ: “Piyaꞌ Ya toꞌ sidaꞌ Galelia?”
7 Breta ya tauꞌ badaꞌ Isa urang ari wilayah te de baroh pemerintah Herodes Antipas, ya nyuroh sidaꞌ ngemaiꞌ Isa ke Herodes te tengan nyaꞌ gaꞌ adai de Yerosalem.
Isa debaiꞌ ngusong Herodes
8 Breta Herodes Antipas medaꞌ Isa, ya ma gaga nema udah lamaꞌ ya kaꞌ medaꞌ Isa. Herodes gah ninga te dapulah Isa, nyaꞌ nyuroh ya ngagam medaꞌ Isa mulah utai te nyaroh ari Tuhan Allah.
9 Herodes mayoh betanyaꞌ ke Isa, uleh Isa niseꞌ nyawot ya.
10 Kebala kepalaꞌ imam agama Yahudi abaꞌ urang te ahli de alam kitab te datules Musa, maju ke mua becakap tengek nudoh Isa.
11 Baroꞌ Herodes abaꞌ prajuret ya belaboh ngelujeꞌ abaꞌ melicak Isa. Sidaꞌ ngenaꞌ jubah raja ke Isa, baroꞌ Herodes nyuroh ngemaiꞌ Ya bebalek ageꞌ ke Pelatos.
12 Belaboh ari sari nyaꞌ mah Herodes abaꞌ Pelatos bekawan, sebedau nyaꞌ snikoꞌ bemunsoh.
Isa debaiꞌ bebalek ngadap Pelatos
13 Udah nyaꞌ Pelatos ngumpol kebala kepalaꞌ imam agama Yahudi, kebala urang tuai bansa Yahudi, abaꞌ kebala urang banyau.
14 Pelatos madah ke sidaꞌ: “Kitaꞌ ngemaiꞌ urang toꞌ ngusong ku, abaꞌ madah urang toꞌ gah nyabong urang banyau. Kitaꞌ kedireꞌ medaꞌ ku udah mersa Ya, abaꞌ ku niseꞌ nemu kebala penyalah te datudoh kitaꞌ ke Ya.
15 Piyaꞌ gaꞌ Herodes niseꞌ nemu penyalah Ya, kebaꞌ nyaꞌ nyuroh ya ngemaiꞌ Isa bebalek ke kami. Tunaꞌ des niseꞌ penyalah te dapulah Ya te nyuroh Ya patot daukom mati.
16 Kebaꞌ nyaꞌ, ku peroꞌ nyuroh urang mrisa Ya baroꞌ ku ngelepas Ya.” [
17 Pelatos madah piyaꞌ nema upa sengket ngenap ari besai Paskah, Pelatos alah ngelepas sikoꞌ urang te de penyara.]
18 Uleh ugaꞌ urang te diyaꞌ madah ngau goꞌ te sareng: “Bunoh kah Ya nyaꞌ, abaꞌ lepas kah Barabas ke kami.” (
19 Barabas toꞌ depajak ke penyara nema tegal ya meruntak abaꞌ munoh urang alam kuta).
20 Nema Pelatos tengek kaꞌ ngelepas Isa, kebaꞌ nyaꞌ ya becakap ageꞌ ngau goꞌ te sareng ke sidaꞌ.
21 Uleh sidaꞌ empala sareng madah: “Saleb kah Ya! Saleb kah Ya!”
22 Nyau ketiga kaleꞌ Pelatos madah ke sidaꞌ, ya nanyaꞌ: “Pemenyat apa te udah dapulah urang toꞌ? Ku niseꞌ nemu kebala penyalah urang toꞌ te tauꞌ ngasoh Ya daukom mati. Ku peroꞌ kaꞌ nyuroh urang mrisa Ya, baroꞌ ku ngelepas Ya.”
23 Uleh sidaꞌ tengek madah ngau goꞌ te sareng isaꞌ Isa desaleb, kepanyai menang mah sidaꞌ.
24 Kebaꞌ nyaꞌ Pelatos mutos ngukom mati Isa nunaꞌ pemintaꞌ sidaꞌ.
25 Ya ngelepas Barabas urang te dapenyara tegal meruntak abaꞌ munoh, abaꞌ nyerah Isa ke sidaꞌ isaꞌ sidaꞌ mulah nunaꞌ penekaꞌ ati sidaꞌ.
Isa debaiꞌ prajuret kaꞌ desaleb
26 Pas kebala prajuret ngemaiꞌ Isa ke teban jalai nyaleb Ya, de tengah jalai sidaꞌ ngetan Simon sidaꞌ Kirene te baroꞌ datai ari luar kuta, sidaꞌ ngasoh ya nangong saleb nyaꞌ nganti Isa abaꞌ nerudi Ya.
27 Tengan nyaꞌ kebala urang mayoh nerudi Isa, de entara sidaꞌ mayoh urang inoꞌ te nyabak abaꞌ ngenang Ya.
28 Isa malek ke sidaꞌ blumaꞌ madah: “O kebala urang inoꞌ sidaꞌ Yerosalem, nang kitaꞌ nyabak ke Ku, uleh sabak kah kitaꞌ kedireꞌ abaꞌ kebala anak kitaꞌ.
29 Nema kaꞌ datai senta urang ngasa pemedeh sampai urang madah: ‘Betuah amat inoꞌ te manol abaꞌ inoꞌ te nadai kalaꞌ branak, abaꞌ tusu te nadai kalaꞌ datusu.’
30 Nema pemedeh urang tengan nyaꞌ rat amat, kebaꞌ sidaꞌ sampai madah ke buket te tingeꞌ: ‘Tingang kah kami!,’ abaꞌ ke buket te baroh: ‘Timon kah kami!’
31 Nema enteꞌ urang mulah te upa toꞌ ke kayu te idop, apa klageꞌ ke kayu te nyau mati?”
32 Adai gaꞌ dua ikoꞌ urang te mulah pemenyat, debaiꞌ prajuret kaꞌ daukom mati breta Isa.
Isa desaleb
33 Breta sidaꞌ datai ke teban te dasebot Keruntok, diyaꞌ sidaꞌ nyaleb Isa abaꞌ dua ikoꞌ urang te mulah pemenyat. Sikoꞌ de sepiyak kanan Isa, abaꞌ sikoꞌ de sepiyak kibaꞌ Isa.
34 Isa madah: “Apai ampon kah sidaꞌ, nema sidaꞌ nitauꞌ badaꞌ apa te sidaꞌ pulah kah.” Kebala prajuret cabot undi ngigaꞌ sapa te buleh baju Isa.a
35 Tengan nyaꞌ adai mayoh urang diri diyaꞌ medaꞌ ugaꞌ utai te tengan tejadi. Abaꞌ kebala urang tuai bansa Yahudi ngelujeꞌ Isa, jakoꞌ sidaꞌ: “Urang bukai jaꞌ Ya selamat kah. Enteꞌ Ya amat Al Maseh urang te dapileh Tuhan Allah, isaꞌ mah Ya nyelamat Direꞌ Ya kedireꞌ,”
36 Kebala prajuret sigeꞌ melicak Isa, abaꞌ sidaꞌ mereꞌ aiꞌ angor masam ke Ya,
37 abaꞌ sidaꞌ madah: “Enteꞌ Meh amat Raja urang Yahudi, selamat kah direꞌ Meh kedireꞌ”
38 Adai datules gaꞌ de atau palaꞌ Ya: “Toꞌ mah Raja urang Yahudi.”
39 Sikoꞌ urang te desaleb abaꞌ Isa nganoꞌ Ya, jakoꞌ ya: “Piyaꞌ Meh ni Al Maseh? Cuba selamat kah Meh abaꞌ kemua!”
40 Uleh te sikoꞌ ageꞌ ngerara ya, jakoꞌ ya: “Nadai weh meh takot ke Tuhan Allah? Ya nerimaꞌ ukom te sama abaꞌ tua.
41 Tua toꞌ patot daukom, nema tua toꞌ nerimaꞌ balas nunaꞌ te dapulah tua, uleh Ya toꞌ niseꞌ mulah penyalah.”
42 Udah nyaꞌ ya madah ageꞌ: “Isa, ingat ke ku senta Wan datai ngau Raja.”
43 Isa nyawot ya: “Ku madah ke meh, sari toꞌ meh udah abaꞌ Ku de alam sruga.”
Isa mati
44 Sekitar jam dua belas tengah ari, daerah nyaꞌ sintak petang datai ke jam tiga ujong ari,
45 nema mata ari badoꞌ besinar. Tengan nyaꞌ gaꞌ tirai de Rumah Kudos Tuhan Allah carek tebelah dua ari atau datai ke baroh.
46 Baroꞌ Isa ngangau ngau goꞌ te sareng, jakoꞌ Ya: “O Apai, Ku serah ke idop Ku ke Wan.”b Udah madah piyaꞌ, Ya mati.
47 Breta kepalaꞌ prajuret medaꞌ ugaꞌ nyaꞌ ya muji Tuhan Allah, jakoꞌ ya: “Amat mah Ya toꞌ Urang te kenaꞌ.”
48 Adai mayoh urang te datai begugoꞌ medaꞌ Isa desaleb. Udah sidaꞌ medaꞌ ugaꞌ te tejadi, sidaꞌ pulai blumaꞌ manom dada direꞌc tana sidaꞌ nesal.
49 Ugaꞌ urang te ngelala Isa abaꞌ kebala inoꞌ te nerudi Ya ari Galelia, diri jaoh medaꞌ ugaꞌ utai nyaꞌ.
Isa dakubor
50-51 Adai sikoꞌ urang te nama Yusop, ya sidaꞌ Arimatia salah suteꞌ kampong te adai de wilayah Yudia. Ya urang te awas abaꞌ kenaꞌ, abaꞌ ya ngentang Pemerintah Tuhan Allah. Yusop toꞌ salah sikoꞌ anggota Pengadel Agama Yahudi, uleh ya nadai setuju ke apa te daputos Pengadel Agama nyaꞌ abaꞌ ke apa te dapulah sidaꞌ ke Isa.
52 Yusop angkat ngusong Pelatos mintaꞌ bangkai Isa.
53 Baroꞌ ya abaꞌ kebala urang nuron bangkai Isa. Yusop malot ngau kaen puteh. Baroꞌ ya mengaleꞌ bangkai Isa alam kubor te datebok de buket batu, diyaꞌ bedau kalaꞌ datepoꞌ bangkai urang.
54 Ari nyaꞌ ari Jumat abaꞌ ugaꞌ urang ngageh kebala utai te kaꞌ dengau sidaꞌ pas ari Sabat. Tengan nyaꞌ setegal ageꞌ ari Sabat.
55 Kebala inoꞌ te datai breta Isa ari Galelia abaꞌ ke kubor, sidaꞌ medaꞌ kubor nyaꞌ abaꞌ medaꞌ kati bangkai Isa dapegaleꞌ.
56 Udah nyaꞌ sidaꞌ pulai, sidaꞌ ngageh kebala binyak wangi abaꞌ kebala utai te tauꞌ nyuroh bangkai Isa nadai bau. Abaꞌ pas ari Sabat sidaꞌ belepa nunaꞌ printah Tuhan Allah te datules Musa.