Kebala pemimpen agama Yahudi bepekat kaꞌ munoh Isa
22
Tengan nyaꞌ nyau semak ari Paskah urang Yahudi, ari ngingat puyang jagang sidaꞌ keluar ari Meser. Ari besai nyaꞌ dasebot gaꞌ ari besai Ruti te nadai Beragi.
2 Kebala kepalaꞌ imam agama Yahudi abaꞌ kebala urang te ahli de alam kitab te datules Musa ngigaꞌ akal isaꞌ sidaꞌ tauꞌ munoh Isa, uleh sidaꞌ ngai daketauꞌ, nema sidaꞌ takot ke urang banyau.
Yudas Iskariot nyual Isa
3 Baroꞌ Ibles Kepalaꞌ bala sitan ngaru pemiker Yudas te dagelar Iskariot, salah sikoꞌ ari dua belas muret Isa.
4 Baroꞌ Yudas angkat ngusong kebala kepalaꞌ imam abaꞌ kepalaꞌ penyaga Rumah Kudos Tuhan Allah. Sidaꞌ bepekat abaꞌ Yudas kati cara ya nyerah Isa ke sidaꞌ.
5 Sidaꞌ ma gaga abaꞌ bedanyi kaꞌ mereꞌ duet ke ya.
6 Yudas kaꞌ, abaꞌ belaboh ari nyaꞌ ya ngigaꞌ senta te pas jalai ya nyerah Isa ke sidaꞌ, pas tengan urang banyau nadai abaꞌ Ya.
Isa nyuroh muret Ya ngageh pemakai ngau sidaꞌ de ari Paskah urang Yahudi
7 Pas nyau senta ari besai Ruti te nadai Beragi te dasebot ari besai Paskah, upa sengket ari besai nyaꞌ urang nyemeleh dumba ngau kurban pesemah ke Tuhan Allah.
8 Baroꞌ Isa madah ke Petros abaꞌ Yohanes: “Angkat, ageh ke pemakai ke kita isaꞌ kita tauꞌ makai berama de ari Paskah.”
9 Sawot snikoꞌ: “Guru, dini kami ngageh?”
10 Sawot Isa: “Tamaꞌ jaꞌ snikoꞌ ke alam kuta Yerosalem, diyaꞌ lah snikoꞌ betemu abaꞌ urang laki te nangong labah te beiseꞌ aiꞌ, terudi jaꞌ urang nyaꞌ ke rumah te detamaꞌ ya,
11 abaꞌ padah kah ke urang te empu rumah te detamaꞌ snikoꞌ nyaꞌ: ‘Guru nanyaꞌ, dini teban te tauꞌ ngau Ku abaꞌ muret Ku makai berama de ari Paskah toꞌ?’
12 Baroꞌ urang te empu rumah nyaꞌ lah nunyok ke snikoꞌ teban te lantang de atau te udah lengkap kebala utai te dengau kita makai berama, diyaꞌ mah snikoꞌ ngageh lah.”
13 Udah nyaꞌ snikoꞌ angkat, snikoꞌ medaꞌ ugaꞌ utai nyaꞌ munyi te depadah Isa ke snikoꞌ. Baroꞌ snikoꞌ ngageh pemakai Paskah diyaꞌ.
Isa abaꞌ kebala muret Ya makai jalai ari Paskah urang Yahudi
14 Pas nyau senta sidaꞌ makai de ari Paskah, Isa abaꞌ kebala muret Ya dudok singet blumaꞌ makai berama.
15 Ya madah: “Ku kaꞌ amat mah makai berama abaꞌ kitaꞌ de ari Paskah toꞌ, sebedau Ku naꞌ ngasa pemedeh.
16 Ku madah ke kitaꞌ, Ku nadai makai ageꞌ upa pitoꞌ datai ke reti pengamat utai toꞌ deanyaꞌ de alam Pemerintah Tuhan Allah.”
17 Baroꞌ Isa ngameꞌ sigeꞌ cawan te beiseꞌ aiꞌ angor, Ya bradua ngucap sukor ke Tuhan Allah, baroꞌ Ya madah: “Nah, ameꞌ ke toꞌ abaꞌ bagikah ke sidaꞌ nyaꞌ.
18 Ku madah ke kitaꞌ, belaboh ari udah Paskah toꞌ lah Ku nadai ageꞌ nginom angor datai ke senta Pemerintah Tuhan Allah datai.”
19 Baroꞌ Isa ngameꞌ ruti, Ya bradua ngucap sukor ke Tuhan Allah, Ya mungaꞌ ruti nyaꞌ abaꞌ mereꞌ ke sidaꞌ, jakoꞌ Ya: “Toꞌ kebarat tuboh Ku te daserah ngau nyelamat kitaꞌ, pulah ke upa toꞌ ngau kitaꞌ ngingat Ku.”
20 Udah sidaꞌ makai ruti baroꞌ Ya ngameꞌ cawan abaꞌ madah: “Cawan toꞌ danyi baru Tuhan Allah abaꞌ ensia te dakelaiꞌ ngau darah Ku te dasioh ngau nyelamat kitaꞌ.”
21 Uleh dinga kah, urang te kaꞌ nyerah Ku ke munsoh Ku adai dudok makai abaꞌ kita ditoꞌ.
22 Amat mah Ensia te datai ari Tuhan Allah alah mati upa medaꞌ te udah deamoꞌ Tuhan Allah, uleh merinsaꞌ amat mah urang te nyerah Ku ke munsoh Ku.
23 Baroꞌ sidaꞌ nanyaꞌ pangan bukai: “Sapa weh te kaꞌ nyerah Ya?”
Isa ngajar muret Ya tengan sidaꞌ makai
24 Kebala muret Isa belayaꞌ abaꞌ sama direꞌ. Sidaꞌ betengek ke sapa de entara sidaꞌ te paleng penteng.
25 Nyaꞌ nyuroh Isa madah ke sidaꞌ: “Kebala raja de dunia toꞌ te nadai ngelala Tuhan Allah mrintah kebala rakyat sidaꞌ penekaꞌ ati sidaꞌ, abaꞌ kebala penguasa kaꞌ isaꞌ kebala rakyat sidaꞌ madah sidaꞌ urang te mangah nulong.
26 Uleh kitaꞌ nang piyaꞌ. Te paleng penteng de entara kitaꞌ alah upa urang te nadai penteng, abaꞌ pemimpen alah upa pemantoꞌ.
27 Nema sapa piyaꞌ te lebeh penteng, te dudok makai sekaleꞌ ke pemantoꞌ? Pesti mah kitaꞌ miker urang te dudok makai. Uleh Ku de tengah kitaꞌ upa pemantoꞌ.
28 Amat Ku mayoh ngasa pemedeh, uleh kitaꞌ nadai kalaꞌ nudi Ku.
29 Kebaꞌ nyaꞌ Ku kaꞌ mereꞌ kuasa ngau kitaꞌ mrintah jadi raja, sama upa medaꞌ kuasa te dabereꞌ Apai Ku ke Ku.
30 Nyaꞌ mah te nyuroh kitaꞌ tauꞌ dudok makai nginom suteꞌ mija abaꞌ Ku de alam Pemerintah Ku. Abaꞌ kitaꞌ lah kaꞌ dudok mrintah jadi raja de alam dua belas suku bansa Israel.”a
31 Baroꞌ Isa madah: “Simon, Simon dinga kah, Kepalaꞌ bala sitan nyau desadi nguji kitaꞌ, nyemeh urang te setia abaꞌ te nadai, upa urang te beuma nyemeh ampaꞌ ari iseꞌ.
32 Uleh Ku udah bradua isaꞌ meh selareh pecayaꞌ ke Ku. Abaꞌ enteꞌ meh udah sadar abaꞌ bebalek ke Ku, meh alah nguat kebala kawan meh.”
33 Sawot Petros: “Tuhan, ku siap mah tamaꞌ penyara mati abaꞌ Wan.”
34 Uleh Isa madah: “Petros dinga kah, sebedau manok engkukok sari toꞌ, tiga kaleꞌ meh madah direꞌ nadai ngelala Ku.”
35 Baroꞌ Isa madah ke sidaꞌ: “Jalai Ku ngutos kitaꞌ nadai ngemaiꞌ duet, tas bekal, abaꞌ sepatu, adai nadai te kurang?” “Niseꞌ,” jakoꞌ sidaꞌ.
36 Baroꞌ Isa madah: “Entoꞌ sapa te adai duet abaꞌ tas bekal alah debaiꞌ, abaꞌ sapa te niseꞌ pedang jual ke baju panyai ngau meli pedang.
37 Ku madah ke kitaꞌ adai datules alam Kitab Suci:
‘Ya deangap urang mulah te jaiꞌ.’b
Abaꞌ te datules ke Ku tengan datemoꞌ.”
38 Baroꞌ kebala muret Isa madah: “Tuhan, ditoꞌ adai dua bilah pedang.” Sawot Isa: “Udah mah deh.”
Isa bradua de kebon Getsemani
39 Udah nyaꞌ Isa angkat ari kuta nyaꞌ upa sengket Ya nikeꞌ ke Buket Saiton daterudi kebala muret Ya.
40 Pas nyau datai kiyaꞌ Ya madah ke sidaꞌ: “Bradua kah kitaꞌ isaꞌ kitaꞌ nadai laboh enteꞌ dacuba.”
41 Udah nyaꞌ Isa mamar direꞌ ari sidaꞌ sepenikam batu, baroꞌ Ya belutot abaꞌ bradua, jakoꞌ Ya:
42 “O Apai, enteꞌ Wan kaꞌ, ameꞌ ke pemedehc toꞌ ari Ku, uleh nang nunaꞌ kedekaꞌ Ku, pulah jaꞌ nunaꞌ kedekaꞌ Wan.”
43 Adai sikoꞌ mlikat Tuhan Allah datai nguat Ya.
44 Isa ma mah pedeh ngerakau utai te kaꞌ nacah Ya, kebaꞌ Ya lebeh ageꞌ bamat-amat bradua sampai peloh Ya nerutoꞌ ke tanah upa medaꞌ darah.
45 Udah Ya bradua, Isa ngusong kebala muret Ya. Ya medaꞌ sidaꞌ tengan tinok nema sidaꞌ ma riyu.
46 Baroꞌ Ya madah ke sidaꞌ: “Ngapa bah kitaꞌ tinok? Angkat abaꞌ bradua kah isaꞌ kitaꞌ nadai laboh enteꞌ dacuba.”
Isa detangkap
47 Tengan Isa ageꞌ becakap, datai mah kebala urang te dapimpen Yudas. Yudas toꞌ salah sikoꞌ ari dua belas muret Isa. Yudas datai ngusong Isa, baroꞌ nyiyom Ya.
48 Uleh Isa madah ke ya: “Yudas, toꞌ weh cara ngau meh nyerah Ensia te datai ari Tuhan Allah?”
49 Breta kebala muret Isa medaꞌ piyaꞌ, sidaꞌ madah: “Tuhan tauꞌ weh kami nyerang sidaꞌ ngau pedang?”
50 Baroꞌ salah sikoꞌ ari sidaꞌ mantap peneng kanan pemantoꞌ Imam Besai agama Yahudi, nyaꞌ nyuroh putos.
51 Uleh Isa madah: “Jadi mah!” Baroꞌ Ya nyamah peneng ensia nyaꞌ abaꞌ nyemoh eh.
52 Baroꞌ Isa madah ke kebala kepalaꞌ imam, kebala penyaga Rumah Kudos Tuhan Allah, abaꞌ ke kebala urang tuai bansa Yahudi te datai kaꞌ nangkap Ya: “Sangkaꞌ kitaꞌ Ku toꞌ perampok weh nyuroh kitaꞌ datai ngemaiꞌ kebala pedang abaꞌ kayu?
53 Ngenap ari Ku adai de Rumah Kudos Tuhan Allah, uleh kitaꞌ nadai nangkap Ku. Uleh toꞌ mah senta kitaꞌ nangkap Ku, tengan kuasa Kepalaꞌ bala sitan bekreja.”
Petros madah direꞌ nadai ngelala Isa
54 Sidaꞌ nangkap Isa abaꞌ ngemaiꞌ Ya ke rumah Imam Besai agama Yahudi. Petros nerudi sidaꞌ ari jaoh.
55 De tengah laman rumah nyaꞌ, urang ngidop api abaꞌ dudok ngelileng api ungon nyaꞌ. Petros sigeꞌ dudok abaꞌ sidaꞌ.
56 Salah sikoꞌ urang inoꞌ te bekreja de rumah nyaꞌ medaꞌ Petros dudok de tisi api ungon nyaꞌ, ya mrati Petros. Baroꞌ ya madah: “Urang toꞌ sigeꞌ gah abaꞌ Isa.”
57 Uleh Petros madah: “Ku sama sekaleꞌ nadai ngelala Ya boꞌ.”
58 Nadai lamaꞌ udah nyaꞌ urang te kebukai medaꞌ Petros abaꞌ madah: “Meh sigeꞌ muret Ya!”
Uleh Petros madah: “Nadai, ukai ku Pak!”
59 Sekitar sejam udah nyaꞌ, urang te kebukai madah ageꞌ: “Amat mah, urang toꞌ muret Isa nema ya toꞌ sidaꞌ Galelia!”
60 Uleh Petros nyawot: “Beapa te jakoꞌ meh, ku nadai nyarok te meh padah kah!” Tengan Petros madah piyaꞌ, manok engkukok.
61 Udah nyaꞌ Isa malek medaꞌ Petros. Baroꞌ Petros ingat apa te udah depadah Tuhan ke ya: “Sebedau manok engkukok sari toꞌ, tiga kaleꞌ meh madah direꞌ nadai ngelala Ku.”
62 Baroꞌ Petros angkat ari nyaꞌ blumaꞌ nyabak sikok-sikok.
Isa de mua Pengadel Agama Yahudi
63 Kebala urang te nyaga Isa mengurau abaꞌ mangkong-maloꞌ Ya.
64 Sidaꞌ namet mata Ya ngau kaen, abaꞌ madah: “Enteꞌ Meh amat nabi sebot kah! Sapa te mangkong-maloꞌ Meh?”
65 Abaꞌ mayoh gaꞌ kebala umong sidaꞌ te nadai bereti ngau sidaꞌ nganoꞌ Isa.
66 Nyau lam kebala Pengadel Agama Yahudi begugoꞌ. Isa debaiꞌ kebala penyaga ke mua Pengadel Agama Yahudi nyaꞌ. Pengadel Agama nyaꞌ kebala urang tuai bansa Yahudi, kebala kepalaꞌ imam, abaꞌ kebala urang te ahli de alam kitab te datules Musa.
67 Jakoꞌ sidaꞌ: “Padah ke kami, Wan piyaꞌ Al Maseh Raja Penyelamat te dedanyi Tuhan Allah?”
Sawot Isa: “Enteꞌ Ku madah ke kitaꞌ, naꞌ mah kitaꞌ pecayaꞌ.
68 Upa piyaꞌ mah gaꞌ enteꞌ Ku nanyaꞌ kitaꞌ, kitaꞌ nadai ngamoꞌ kaꞌ nyawot.
69 Belaboh ari toꞌ, Ensia te datai ari Tuhan Allah udah dudok de sepiyak kanan Tuhan Allah te Ma Kuasa.”
70 Ugaꞌ sidaꞌ madah: “Enteꞌ piyaꞌ Wan toꞌ Anak Tuhan Allah?”
Sawot Isa: “Kitaꞌ mah te madah piyaꞌ.”
71 Baroꞌ jakoꞌ sidaꞌ: “Engkapaꞌ kita perlu ngigaꞌ saksi ageꞌ, ya toꞌ patot daukom mati nema kita udah ninga Ya nyama direꞌ abaꞌ Tuhan Allah.”d