Pesemah inoꞌ balu te misken
21
Tengan Isa adai de alam Rumah Kudos Tuhan Allah, Ya mrati kebala urang kaya majak duet pesemah sidaꞌ ke alam badah pesemah.
2 Tengan nyaꞌ gaꞌ, Ya mrati sikoꞌ inoꞌ balu te ma misken majak duet kereng dua kepeng te nilai paleng engkaꞌ met ke alam badah pesemah nyaꞌ.
3 Baroꞌ Isa madah: “Ku madah ke kitaꞌ, pemereꞌ inoꞌ balu te ma misken toꞌ lebeh mayoh ari kebala urang kaya nyaꞌ.
4 Nema sidaꞌ mereꞌ ari pelebeh duet sidaꞌ. Uleh inoꞌ balu toꞌ, amat ya ma misken ya mereꞌ ugaꞌ duet empu ya.”
Rumah Kudos Tuhan Allah kaꞌ daruboh
5 Tengan nyaꞌ adai dua tiga ikoꞌ urang te muji pemayek Rumah Kudos Tuhan Allah. Sidaꞌ madah enteꞌ Rumah Kudos Tuhan Allah toꞌ lampar bayek, nema dapulah ngau batu te bayek abaꞌ ngau brena macam bena te dapesemah ke Tuhan Allah.
Ninga piyaꞌ Isa madah:
6 “Ugaꞌ te kitaꞌ pedaꞌ toꞌ kaꞌ daruboh ugaꞌ mah lah, datai ke sigeꞌ mah batu niseꞌ te dengaꞌ ageꞌ betipan.”
Kebala utai te kaꞌ datai sebedau penatai Isa
7 Baroꞌ kebala muret Isa nanyaꞌ Ya: “Guru, kmaya te jakoꞌ Wan nyaꞌ kaꞌ datai abaꞌ apa tana enteꞌ senta nyaꞌ nyau kaꞌ datai?”
8 Sawot Ya: “Ati-ati jaꞌ isaꞌ kitaꞌ nadai kenaꞌ akal. Nema mayoh urang kaꞌ datai abaꞌ madah direꞌ Al Maseh, Raja Penyelamat te dedanyi Tuhan Allah abaꞌ sidaꞌ madah pemadoꞌ dunia toꞌ nyau datai. Uleh nang kitaꞌ pecayaꞌ ke sidaꞌ.
9 Nang kitaꞌ takot enteꞌ kitaꞌ ninga brita perang abaꞌ adai te meruntak diyaꞌ ditoꞌ, nema ugaꞌ utai nyaꞌ alah dulau datai. Amat piyaꞌ, nyaꞌ ukai gaꞌ bereti senta pemadoꞌ dunia toꞌ nyau semak.”
10 Baroꞌ Isa nyamong cakap Ya: “Suku te suteꞌ kaꞌ beperang ngelawan suku te kebukai, abaꞌ negara te suteꞌ kaꞌ nyerang negara te kebukai.
11 Diyaꞌ ditoꞌ kaꞌ kenaꞌ gempa bumi, mayoh urang niseꞌ te depakai, abaꞌ penyaket sampar nacah diyaꞌ ditoꞌ. Abaꞌ kaꞌ tejadi de langet kebala tana utai te nyaroh abaꞌ te ngasoh urang takot.
12 Uleh sebedau ugaꞌ nyaꞌ datai, kebala urang kaꞌ nangkap abaꞌ mrisa kitaꞌ. Kitaꞌ kaꞌ debaiꞌ sidaꞌ ke rumah te jalai kita nyemah Tuhan Allah abaꞌ diyaꞌ kitaꞌ datudoh urang salah. Udah nyaꞌ baroꞌ kitaꞌ depajak sidaꞌ ke alam penyara. Kitaꞌ kaꞌ dairet ke mua kebala pemerintah abaꞌ kebala pemimpen te kebukai, nema kitaꞌ muret Ku.
13 Uleh nyaꞌ mah senta ngau kitaꞌ nusoi Ku ke sidaꞌ.
14 Pas tengan kitaꞌ nusoi Ku ke sidaꞌ, putos ke de alam ati kitaꞌ kedireꞌ isaꞌ nadai saban ke apa te kaꞌ kitaꞌ padah ngau kitaꞌ nyawot sidaꞌ.
15 Nema Ku kedireꞌ kaꞌ mereꞌ pemenauꞌ ngau kitaꞌ madah jakoꞌ te menan, isaꞌ kebala lawan kitaꞌ nitauꞌ nyawot abaꞌ ngelawan kitaꞌ.
16 Datai ke kebala apai inai kitaꞌ, kebala menyadeꞌ, kebala ayong, abaꞌ kebala kawan kitaꞌ mah kaꞌ nyerah kitaꞌ ke munsoh kitaꞌ isaꞌ kitaꞌ dapenyara. Abaꞌ adai dua tiga ikoꞌ de entara kitaꞌ te dabunoh sidaꞌ.
17 Kitaꞌ kaꞌ dekareh ugaꞌ urang nema kitaꞌ muret Ku.
18 Uleh datai ke selemar mah bok de palaꞌ kitaꞌ niseꞌ lenyau.
19 Enteꞌ kitaꞌ betan pecayaꞌ ke Ku, kitaꞌ tauꞌ jong idop abaꞌ Tuhan Allah jemah lah.”
Yerosalem kaꞌ daruboh
20 Baroꞌ Isa nyamong cakap Ya ageꞌ: “Asa kitaꞌ medaꞌ kuta Yerosalem dakepong kebala prajuret bansa bukai, nyaꞌ mah kelaiꞌ nadai lamaꞌ ageꞌ kuta nyaꞌ nyau kaꞌ ancor.
21 Pas tengan nyaꞌ, kebala urang te adai de wilayah Yudia alah ngrari direꞌ selabok ke buket. Kebala urang te adai de alam kuta alah angkat ari kuta nyaꞌ, abaꞌ kebala urang te adai de luar kuta nang rinah tamaꞌ ke alam kuta nyaꞌ.
22 Nema senta nyaꞌ mah jaman Tuhan Allah ngukom urang Yerosalem nemoꞌ apa te datules kebala nabi.
23 Rugi amat kebala urang inoꞌ te tengan nganong, abaꞌ inoꞌ te anak ya ageꞌ tengan nusu rama nyaꞌ! Nema ugaꞌ urang kaꞌ ngasa pemedeh senta Tuhan ngukom bansa Israel.
24 Adai urang Israel te kaꞌ dabunoh ngau pedang, adai gaꞌ sidaꞌ te kaꞌ detangkap debaiꞌ ke bansa te kebukai. Bansa te kebukai kaꞌ ngalah abaꞌ nguasai Yerosalem, datai ke senta penemoꞌ te udah deatoh Tuhan Allah ke sidaꞌ.”
Tana penatai Ensia te datai ari Tuhan Allah
25 Isa madah ageꞌ: “Adai lah kebala utai te nyaroh pedaꞌ de mata ari, bulan abaꞌ kebala piyanau. Abaꞌ kebala bansa de dunia toꞌ takot abaꞌ ampal ngadap glumang laot te beguroh.
26 Kebala urang kaꞌ mati takot medaꞌ apa te nacah dunia toꞌ, nema kebala utai de langet toꞌ nyau bebaleꞌ nadai tentu rudu.
27 Pas tengan nyaꞌ mah ugaꞌ urang medaꞌ Ensia te datai ari Tuhan Allah, Ya kaꞌ datai de atau awan ngau kuasa te lampar besai abaꞌ besinar terang.
28 Enteꞌ kebala utai nyaꞌ nyau belaboh datai, kuat ke ati kitaꞌ abaꞌ diri tegap, nema nadai lamaꞌ ageꞌ Tuhan Allah kaꞌ nyelamat kitaꞌ.”
29 Baroꞌ Isa nusoi kisah empama ke sidaꞌ: “Prati kah pon kayu ara abaꞌ ugaꞌ pon kayu te kebukai.
30 Asa kitaꞌ medaꞌ pon kayu nyaꞌ nyau bebunga, tauꞌ mah kitaꞌ badaꞌ nadai lamaꞌ ageꞌ rama buah nyau kaꞌ semak.
31 Upa piyaꞌ mah gaꞌ enteꞌ kitaꞌ medaꞌ kebala utai nyaꞌ datai, nyaꞌ tana nadai lamaꞌ ageꞌ Pemerintah Tuhan Allah nyau semak.
32 Ku madah ke kitaꞌ, kebala urang te idop de jaman toꞌ nadai mati sebedau ugaꞌ utai toꞌ datai.
33 Langet abaꞌ bumi toꞌ punas lah, uleh apa te Ku padah nadai ngamoꞌ punas.”
Isa ngajar isaꞌ selareh nyaga direꞌ
34 “Kitaꞌ alah ati-ati nyaga direꞌ isaꞌ kitaꞌ nadai selareh miker gawai sengabot abaꞌ nginom arak beram sampai mabok, abaꞌ nang kitaꞌ selareh saban ke pengidop kitaꞌ. Asa pemiker kitaꞌ jong upa piyaꞌ kitaꞌ nadai siap nerimaꞌ penatai Ensia te datai ari Tuhan Allah te datai nadai mang-mang.
35 Nema senta penatai Ya nyaꞌ upa medaꞌ ringkap nguleh jelu nadai mang-mang ngenaꞌ urang de dunia toꞌ.
36 Kitaꞌ alah selareh siap abaꞌ bradua isaꞌ talah ngadap ugaꞌ kebala utai te kaꞌ datai, isaꞌ jemah lah kitaꞌ tauꞌ diri entap de mua Ensia te datai ari Tuhan Allah.”