Pemimpen agama nanyaꞌ ke Isa ari ni kuasa Ya
20
Sekaleꞌ pas Isa ngajar urang mayoh de Rumah Kudos Tuhan Allah abaꞌ madah brita bayek ari Tuhan Allah, datai kebala kepalaꞌ imam agama Yahudi abaꞌ kebala urang te ahli de alam kitab te datules Musa abaꞌ kebala urang tuai bansa Yahudi.
2 Sidaꞌ madah ke Isa: “Padah ke kami ari kuasa apa Direꞌ mulah kebala utai toꞌ, abaꞌ sapa te mereꞌ kuasa nyaꞌ ke Direꞌ?”
3 Sawot Isa ke sidaꞌ: “Ku sigeꞌ kaꞌ gaꞌ betanyaꞌ ke kitaꞌ, padah ke Ku:
4 Yohanes maneꞌ urang ngau kuasa ari sruga apa ari ensia?”
5 Sidaꞌ bepekat kati nyawot Ya abaꞌ madah: “Enteꞌ kita madah kuasa ari sruga Isa pesti madah: ‘Ngapa kitaꞌ nadai pecayaꞌ ke Yohanes?’
6 Uleh enteꞌ kita madah kuasa ari ensia, ugaꞌ kebala urang banyau pesti nikam kita ngau batu, nema sidaꞌ pecayaꞌ Yohanes toꞌ nabi.”
7 Udah nyaꞌ baroꞌ sidaꞌ nyawot Ya, sidaꞌ madah: “Kami nitauꞌ badaꞌ ari ni kuasa Yohanes maneꞌ urang.”
8 Isa nyawot sidaꞌ: “Enteꞌ kitaꞌ ngai madah, Ku sigeꞌ ngai gaꞌ madah ke kitaꞌ ari ni kuasa Ku mulah kebala utai toꞌ.”
Kisah empama urang te ngintu kebon angor
9 Udah nyaꞌ Isa madah kisah empama ke urang banyau diyaꞌ: “Adai sikoꞌ urang mulah kebon, de kebon nyaꞌ ya namak angor. Udah nyaꞌ ya nyuroh kebala urang ngintu kebon ya, baroꞌ ya angkat ke menua bukai buti pelamaꞌ.
10 Pas senta buah angor mudoh, urang te empu kebon angor nyaꞌ nyuroh sikoꞌ pemantoꞌ ya ngusong kebala urang te ngintu kebon angor nyaꞌ, isaꞌ sidaꞌ nyerah pemagi ari asel kebon angor nyaꞌ ke ya. Uleh kebala urang nyaꞌ mangkong-maloꞌ pemantoꞌ nyaꞌ abaꞌ nyuroh ya pulai puang.
11 Udah nyaꞌ urang te empu kebon angor nyaꞌ nyuroh sikoꞌ pemantoꞌ te kebukai, uleh pemantoꞌ nyaꞌ gaꞌ depangkong paloꞌ abaꞌ dapegurau sidaꞌ, baroꞌ dasuroh pulai puang.
12 Udah nyaꞌ ya nyuroh ageꞌ pemantoꞌ te ketiga, uleh ya nyaꞌ sigeꞌ daprisa sampai bakal, baroꞌ dabuai sidaꞌ ari kebon nyaꞌ.
13 Baroꞌ jakoꞌ urang te empu kebon angor nyaꞌ: ‘Apa te alah ku pulah weh? Ku kaꞌ nyuroh anak ku te sikoꞌ-ikoꞌ nyaꞌ te ma ku kaseh kah, pesti sidaꞌ ngrega ya.’
14 Uleh breta kebala urang te ngintu kebon angor nyaꞌ medaꞌ anak ya nyaꞌ, sidaꞌ bepekat, jakoꞌ sidaꞌ: ‘Jemah lah ya te empu kebon toꞌ, boh kita munoh ya isaꞌ kebon toꞌ empu kita lah.’
15 Udah nyaꞌ sidaꞌ ngerantak ya ke luar kebon angor nyaꞌ abaꞌ munoh ya.” Isa nanyaꞌ kebala urang te diyaꞌ: “Entoꞌ apa te kaꞌ dapulah urang te empu kebon angor nyaꞌ ke sidaꞌ?
16 Ku madah ke kitaꞌ, ya kaꞌ datai kiyaꞌ ngukom abaꞌ munoh kebala urang te ngintu kebon angor nyaꞌ, abaꞌ nyerah kebon angor nyaꞌ ke urang bukai.” Ninga piyaꞌ urang te ninga Isa, madah: “Nang sampai piyaꞌ!”
17 Uleh Isa nilek ke sidaꞌ abaꞌ nyamong cakap Ya: “Enteꞌ kitaꞌ madah: ‘Nang sampai piyaꞌ!’ Entoꞌ Ku nanyaꞌ ke kitaꞌ apa reti te udah datules alam Kitab Suci?
‘Tianga te dabuai kebala tukang rumah
udah jadi tiang tengah.bc
18 Ugaꞌ urang te tepangkaꞌ ke tiang nyaꞌ, ya pesti patah pungah abaꞌ urang te datingang tiang nyaꞌ pesti rincet.’ ”
19 Kebala urang te ahli de alam kitab te datules Musa abaꞌ kebala kepalaꞌ imam agama Yahudi tauꞌ badaꞌ sidaꞌ mah te demaksot Isa ngau kisah empama nyaꞌ. Kebaꞌ nyaꞌ sidaꞌ kaꞌ nangkap Ya, uleh sidaꞌ takot ke urang banyau.
Kebala pemimpen nanyaꞌ Isa ke sapa alah mayar pajak
20 Kebaꞌ kebala urang te ahli de alam kitab te datules Musa abaꞌ kebala kepalaꞌ imam agama Yahudi mrati Isa. Baroꞌ sidaꞌ mayar kebala urang abaꞌ nyuroh sidaꞌ ngigaꞌ penyalah Isa. Sidaꞌ budi-budi bayek ke Isa abaꞌ nanyaꞌ Ya, isaꞌ enteꞌ Isa salah cakap sidaꞌ tauꞌ nyerah Ya ke gubernor isaꞌ daukom.
21 Kebala urang te udah debayar nyaꞌ madah munyi pitoꞌ ke Ya: “Guru, kami tauꞌ badaꞌ kebala te jakoꞌ Wan abaꞌ pengajar Wan nyaꞌ kenaꞌ abaꞌ Wan nadai nyemeh mipeh urang. Wan ngajar pengamat nunaꞌ kedekaꞌ Tuhan Allah.
22 Padah ke kami enteꞌ nunaꞌ perator agama kita urang Yahudi, kami alah mayar pajak ke Kaisar Ruma sekaleꞌ ke nadai?”
23 Uleh Isa tauꞌ badaꞌ maksot jaiꞌ sidaꞌ nanyaꞌ upa piyaꞌ, kebaꞌ Ya madah ke sidaꞌ:
24 “Anyaꞌ ke Ku duet kereng dinar nyaꞌ, gamar abaꞌ nama sapa toꞌ?” Sawot sidaꞌ: “Gamar abaꞌ nama Kaisar.”
25 Baroꞌ Isa madah ke sidaꞌ: “Enteꞌ piyaꞌ, bereꞌ kah ke Kaisar apa te daempu Kaisar abaꞌ ke Tuhan Allah apa te daempu Tuhan Allah!”
26 Sidaꞌ teblanga ninga sawot Isa, kebaꞌ sidaꞌ sunyeꞌ. Abaꞌ sidaꞌ niseꞌ nemu cakap Ya te salah de mua urang banyau.
Urang Saduki nanyaꞌ ke Isa kati urang tauꞌ idop ageꞌ
27 Udah nyaꞌ datai mah ngusong Isa kebala urang ari kelumpok Saduki, sidaꞌ nadai pecayaꞌ urang mati tauꞌ idop ageꞌ. Sidaꞌ madah ke Ya:
28 “Guru, Musa nules printah toꞌ ke kita: ‘Enteꞌ urang laki bebini uleh ya mati bedau naꞌ adai anak, menyadeꞌ urang laki nyaꞌ alah jadi ke balu menyadeꞌ ya, isaꞌ menyadeꞌ ya te mati nyaꞌ adai keturon.’
29 Misal teh adai tujoh urang menyadeꞌ. Te tuai jadi ke sikoꞌ inoꞌ, laki inoꞌ nyaꞌ mati uleh snikoꞌ bedau branak.
30 Baroꞌ menyadeꞌ te kedua nyaꞌ jadi ke balu menyadeꞌ te tuai, uleh laki nyaꞌ mati gaꞌ.
31 Piyaꞌ mah gaꞌ te ketiga bejurot-jurot sampai te ketujoh mati sebedau branak.
32 Pemadoꞌ eh inoꞌ nyaꞌ sigeꞌ mati.
33 Kati inoꞌ nyaꞌ jemah lah? Nema sidaꞌ tujoh menyadeꞌ nyaꞌ udah jadi ke inoꞌ nyaꞌ ugaꞌ. Sapa lah de entara sidaꞌ menyadeꞌ nyaꞌ te ngau laki ya senta Tuhan Allah ngidop urang ageꞌ?”
34 Isa nyawot sidaꞌ: “De dunia toꞌ amat mah urang belaki bebini.
35 Uleh sidaꞌ te Tuhan Allah angap patot daidop ageꞌ ari entara urang mati abaꞌ diyau de dunia te baru, sidaꞌ nadai belaki abaꞌ bebini ageꞌ.
36 Nema sidaꞌ nadai mati ageꞌ, sidaꞌ sama upa kebala mlikat abaꞌ sidaꞌ toꞌ anak Tuhan Allah, nema Tuhan Allah ngidop sidaꞌ ageꞌ.
37 Musa sigeꞌ udah madah urang te mati kaꞌ daidop ageꞌ upa te datules alam kisah jalai Tuhan Allah nganyaꞌ direꞌ alam resam te beapi. Diyaꞌ Tuhan Allah kedireꞌ te madah: ‘Ku mah Allah puyang jagang meh, Allah Abraham, Allah Isak, abaꞌ Allah Yakob.’
38 Tuhan Allah madah piyaꞌ, nema Ya Tuhan Allah urang te idop bukai Tuhan Allah urang mati, nema de pemedaꞌ Ya ugaꞌ urang idop sengabot.”
39 Ninga piyaꞌ dua tiga ikoꞌ urang te ahli de alam kitab te datules Musa madah: “Guru, kenaꞌ amat te jakoꞌ Wan nyaꞌ.”
40 Kebaꞌ udah nyaꞌ niseꞌ ageꞌ urang te berani nanyaꞌ kebala utai ageꞌ ke Isa.
Al Maseh abaꞌ raja Daod
41 Udah nyaꞌ baroꞌ Isa nanyaꞌ ke urang banyau te diyaꞌ: “Kati urang tauꞌ madah Al Maseh nyaꞌ pureh raja Daod?
42 Nema raja Daod kedireꞌ nules tentang Al Maseh alam kitab Masmur:
‘Tuhan Allah udah madah ke Tuhan ku:
Dudok kah Direꞌ de sepiyak kanan Ku,d
43 datai ke senta Ku mulah kebala munsoh Direꞌ
ngau pangal kaki Direꞌ.’ ”
44 Baroꞌ Isa nanyaꞌ ageꞌ: “Enteꞌ raja Daod nyebot Al Maseh Tuhan ya, kati ya tauꞌ depadah pureh raja Daod?”
Isa ngajar urang isaꞌ ati-ati ke kebala urang te ahli de alam kitab te datules Musa
45 Pas urang banyau ninga nyaꞌ, Isa madah ke kebala muret Ya:
46 “Kitaꞌ alah ati-ati ke kebala urang te ahli de alam kitab te datules Musa. Nema sidaꞌ keran bejalai ngau jubah abaꞌ gaga dakenoh-noh urang de teban urang ramai. Sidaꞌ keran dudok de mua de alam rumah teban te jalai kita nyemah Tuhan Allah, abaꞌ mangah dudok de teban te penteng de teban urang gawai.
47 Sidaꞌ ngameꞌ reta bena kebala inoꞌ te balu, abaꞌ sidaꞌ bradua panyai-panyai isaꞌ sidaꞌ deangap urang bayek. Jemah lah sidaꞌ pesti mah nerimaꞌ ukom te lebeh berat.”