Sekios
19
Isa abaꞌ kebala muret Ya tamaꞌ ke kuta Yeriko abaꞌ bejalai mansaꞌ kuta nyaꞌ.
2 Diyaꞌ adai Sekios, ya kepalaꞌ penageh pajak abaꞌ ya urang te kaya amat.
3 Sekios kaꞌ amat medaꞌ kati upa Isa nyaꞌ. Uleh Sekios nitauꞌ medaꞌ Isa nema tuboh ya baroh abaꞌ Isa kenaꞌ linong urang banyau.
4 Kebaꞌ nyaꞌ nyuroh ya beguai ngilah urang banyau, baroꞌ ya nikeꞌ pon ara isaꞌ tauꞌ medaꞌ Isa te kaꞌ mansaꞌ teban nyaꞌ.
5 Pas Isa mansaꞌ pon ara nyaꞌ, Ya engkadah ke atau abaꞌ madah: “Sekios, lekas turon nema sari toꞌ Ku alah bemalam de rumah meh.”
6 Baroꞌ Sekios beburoh turon ari pon ara nyaꞌ abaꞌ nerimaꞌ Isa de rumah ya ngau ati gaga.
7 Uleh ugaꞌ urang te medaꞌ Isa angkat abaꞌ Sekios ke rumah ya merunya-runya, jakoꞌ sidaꞌ: “Ya bemalam de rumah urang te dusa.”
8 Udah nyaꞌ Sekios diri abaꞌ madah ke Tuhan: “Tuhan ku kaꞌ madah ke Wan, setengah ari te daempu ku kaꞌ ku bereꞌ ke urang misken abaꞌ sapa te udah ku kelakar kah kaꞌ ku pulai ke ageꞌ empat kaleꞌ lipat.”a
9 Baroꞌ jakoꞌ Isa: “Sari toꞌ Tuhan Allah udah nyelamat urang de bilek toꞌ, nema urang toꞌ upa puyang jagang ya Abraham pecayaꞌ ke Tuhan Allah.
10 Nema Ensia te datai ari Tuhan Allah datai ngigaꞌ abaꞌ nyelamat urang te idop tesat.”
Pemantoꞌ te setia abaꞌ pemantoꞌ te nadai setia
11 Tengan urang banyau ninga apa te depadah Isa, Ya nyamong cakap Ya ageꞌ ngau suteꞌ kisah empama. Isa nusoi kisah empama nyaꞌ nema Ya nyau kaꞌ semak Yerosalem, abaꞌ sidaꞌ miker enteꞌ Ya nyau datai ke Yerosalem Pemerintah Tuhan Allah nyau kaꞌ belaboh.
12 Isa madah: “Adai sikoꞌ urang pureh raja kaꞌ angkat ke suteꞌ menua te jaoh kaꞌ delantek jadi raja, baroꞌ udah delantek ya pulai jadi raja diyaꞌ.
13 Sebedau angkat, ya ngumai sepuloh urang pemantoꞌ ari ugaꞌ kebala pemantoꞌ ya abaꞌ mereꞌ ke sidaꞌ sepuloh duet kereng mas, ya mereꞌ sidaꞌ suteꞌ-suteꞌ. Jakoꞌ ya: ‘Ngau kah duet kereng mas toꞌ ngau bedagang sampai ku datai ageꞌ.’
14 Uleh urang de bansa nyaꞌ areh ke pureh raja nyaꞌ. Kebaꞌ sidaꞌ ngutos kebala urang nerudi ya ke menua te jaoh nyaꞌ isaꞌ madah ke urang te kaꞌ ngelantek pureh raja nyaꞌ: ‘Kami ngai urang nyaꞌ jadi raja kami.’
15 Amat piyaꞌ, ya matang delantek jadi raja abaꞌ pulai ke menua ya. Breta ya datai, ya lansong nyuroh ngumai kebala pemantoꞌ ya te udah dabereꞌ ya duet kereng mas isaꞌ ya tauꞌ badaꞌ brapa asel dagang sidaꞌ.
16 Pemantoꞌ te semaru datai abaꞌ madah: ‘Tuan, duet kereng mas wan te suteꞌ nyaꞌ udah ngasel sepuloh duet kereng mas.’
17 Jakoꞌ raja nyaꞌ madah ke pemantoꞌ ya nyaꞌ: ‘Bayek amat te dapulah meh nyaꞌ. Pemantoꞌ ku te bayek, meh udah setia alam tugas te met. Kebaꞌ nyaꞌ ku ngasoh meh jadi kepalaꞌ pemimpen de sepuloh kuta.’
18 Udah nyaꞌ datai gaꞌ pemantoꞌ te kedua abaꞌ ya madah: ‘Tuan, duet kereng mas wan te suteꞌ nyaꞌ udah ngasel limaꞌ duet kereng mas.’
19 Jakoꞌ raja nyaꞌ madah ke pemantoꞌ ya nyaꞌ: ‘Auꞌ, ke meh ku kaꞌ ngasoh jadi kepalaꞌ pemimpen de limaꞌ kuta.’
20 Udah nyaꞌ datai pemantoꞌ te kebukai blumaꞌ madah: ‘Tuan, toꞌ duet kereng mas wan te suteꞌ nyaꞌ, ku udah napok alam bungkos kaen.
21 Nema ku takot ke wan, nema wan urang te garang, wan ngameꞌ apa te nadai kalaꞌ wan taroh abaꞌ wan ngetau apa te nadai wan tamak.’
22 Jakoꞌ raja nyaꞌ madah ke pemantoꞌ ya nyaꞌ: ‘Eh, pemantoꞌ ku te nadai bayek, ku kaꞌ ngukom meh nunaꞌ pemadah meh. Meh udah tauꞌ badaꞌ ku urang te garang, ngameꞌ apa te nadai ku taroh abaꞌ ngetau te nadai ku tamak.
23 Enteꞌ meh miker ku piyaꞌ, ngapa duet kereng mas ku nadai meh pinyau ke urang te kaꞌ ngemunga duet nyaꞌ? Isaꞌ pas ku pulai ku tauꞌ ngameꞌ duet nyaꞌ abaꞌ bunga duet nyaꞌ.’
24 Baroꞌ jakoꞌ raja madah ke kebala pemantoꞌ te diri diyaꞌ: ‘Ameꞌ kah duet kereng mas suteꞌ nyaꞌ ari ya abaꞌ bereꞌ kah ke urang te empu sepuloh duet kereng mas.’
25 Jakoꞌ sidaꞌ madah ke ya: ‘Tuan, ya udah empu sepuloh duet kereng mas.’
26 Sawot ya: ‘Ku madah ke kitaꞌ, ugaꞌ urang te setia apa te dasuroh ke ya, kaꞌ dabereꞌ lebeh mayoh ageꞌ, uleh sapa te nadai setia ke apa te dasuroh ke ya, apa te adai de ya kaꞌ deameꞌ.’
27 Udah nyaꞌ raja madah ageꞌ: ‘Baiꞌ kitoꞌ ugaꞌ kebala munsoh Ku te ngai ke Ku jadi raja sidaꞌ, abaꞌ bunoh kah sidaꞌ de mua Ku.’ ”
Isa tamaꞌ ke Yerosalem
28 Udah nusoi kisah empama nyaꞌ, Isa bejalai ageꞌ ke Yerosalem. Ya bejalai de mua, abaꞌ sidaꞌ te bukai nerudi Ya.
29 Pas Ya udah nyemak kampong Betpage abaꞌ Betania te adai de Buket Saiton, Isa ngutos dua ikoꞌ muret Ya
30 abaꞌ madah ke snikoꞌ: “Angkat ke snikoꞌ ke kampong te de mua kita toꞌ. Pas senta snikoꞌ tamaꞌ kiyaꞌ, snikoꞌ nemu sikoꞌ keledai te bedau tuai te tengan detancang te bedau kalaꞌ datumpang urang. Lepas kah keledai nyaꞌ abaꞌ baiꞌ kitoꞌ.
31 Enteꞌ adai urang nanyaꞌ ke snikoꞌ: ‘Ngapa snikoꞌ ngelepas keledai nyaꞌ?’ Sawot jaꞌ: ‘Tuhan perlu ngau ya.’ ”
32 Baroꞌ udah nyaꞌ snikoꞌ angkat nunaꞌ te dasuroh Isa, abaꞌ snikoꞌ nemu kebala utai upa te udah depadah Ya.
33 Pas snikoꞌ ngelepas keledai nyaꞌ, betanyaꞌ mah urang te empu keledai nyaꞌ: “Ngapa snikoꞌ ngelepas keledai ku nyaꞌ?”
34 Sawot snikoꞌ ke ya: “Tuhan merlu keledai toꞌ.”
35 Baroꞌ snikoꞌ ngemaiꞌ keledai nyaꞌ ngusong Isa. Udah nyaꞌ snikoꞌ nyelap keledai nyaꞌ ngau kaen baju snikoꞌ abaꞌ mantoꞌ Isa nikeꞌ ke atau keledai nyaꞌ.
36 Tengan Isa de atau keledai bejalai mansang ke Yerosalem, sidaꞌ ngancau kaen baju sidaꞌ de jalai.
37 Pas Isa nuron buket Saiton nyemak Yerosalem, belaboh mah ugaꞌ muret te nerudi Ya gaga abaꞌ muji Tuhan Allah ngau goꞌ te sareng nema kebala te nyaroh ari Tuhan Allah te udah sidaꞌ pedaꞌ kah.
38 Jakoꞌ sidaꞌ:
“Puji ke Ya te datai ngau Raja de alam nama Tuhan Allah.b
Sruga abaꞌ bumi udah bedamai. Puji Tuhan Allah de teban te Ma Tingeꞌ.”c
39 Uleh dua tiga ikoꞌ urang ari kelumpok Parisi te abaꞌ urang banyau nyaꞌ madah ke Isa: “Guru, suroh kah kebala muret Direꞌ nyaꞌ sunyeꞌ, isaꞌ sidaꞌ nadai madah piyaꞌ!”
40 Sawot Isa: “Ku madah ke kitaꞌ enteꞌ sidaꞌ nyaꞌ sunyeꞌ, kebala batu toꞌ te begoꞌ.”
41 Breta Isa nyemak kuta Yerosalem Ya medaꞌ kuta nyaꞌ, Ya nyabak ke urang abaꞌ kuta nyaꞌ,
42 jakoꞌ Ya: “O sidaꞌ Yerosalem, tunaꞌ sa lampar bayek enteꞌ kitaꞌ nyarok apa te ngasoh kitaꞌ tauꞌ idop penoh damai. Uleh toꞌ berubah nyau lat, abaꞌ utai toꞌ detapok ari pemiker kitaꞌ.
43 Nema kaꞌ datai senta, kebala munsoh kaꞌ ngelileng kitaꞌ abaꞌ sidaꞌ kaꞌ mulah pagar te tegoh ngau ngurong kitaꞌ. Sidaꞌ kaꞌ nyerbu abaꞌ nacah kitaꞌ ari kebala tisi,
44 abaꞌ sidaꞌ kaꞌ ngancor kuta abaꞌ munas kitaꞌ te diyau diyaꞌ abaꞌ sidaꞌ nadai kaꞌ ngengaꞌ kebala batu ageꞌ betipan. Ugaꞌ toꞌ kaꞌ ngenaꞌ kitaꞌ nema kitaꞌ nadai tauꞌ badaꞌ kmaya senta Tuhan Allah datai nyelamat kitaꞌ.”
Isa nganoꞌ urang te bejual de Rumah Kudos Tuhan Allah
45 Baroꞌ udah nyaꞌ Isa tamaꞌ ke laman Rumah Kudos Tuhan Allah abaꞌ belaboh nesar ugaꞌ urang te bejual diyaꞌ,
46 jakoꞌ Ya madah ke sidaꞌ: “Adai datules alam Kitab Suci: ‘Rumah Ku toꞌ, rumah ngau urang bradua. Uleh kitaꞌ mulah toꞌ jalai sarang pencuri.’ ”d
47 Udah nyaꞌ ngenap ari Ya ngajar alam Rumah Kudos Tuhan Allah. Uleh kebala kepalaꞌ imam agama Yahudi abaꞌ kebala urang te ahli de alam kitab te datules Musa abaꞌ kebala urang tuai bansa Yahudi ngigaꞌ akal kati cara munoh Isa,
48 uleh sidaꞌ nitauꞌ badaꞌ kati cara, nema ugaꞌ urang ma gaga ninga pengajar Ya.