Tuhan Allah nyawot pradua urang te pecayaꞌ ke Ya
18
Udah nyaꞌ Isa nusoi suteꞌ kisah empama ngau ngajar kebala muret Ya, isaꞌ sidaꞌ selareh bradua abaꞌ nadai mudah nyerah.
2 Isa madah: “De suteꞌ kuta adai sikoꞌ akim te nadai patoh ke Tuhan Allah abaꞌ nadai iboh ke urang bukai.
3 De kuta nyaꞌ gaꞌ adai sikoꞌ inoꞌ balu te selareh ngadap akim nyaꞌ, mintaꞌ akim nyaꞌ mutos te kenaꞌ, abaꞌ ya madah: ‘Pak, peroꞌ wan mah te tauꞌ malu ari ku isaꞌ lawan ku mulah te kenaꞌ ngusong ku.’
4 Semaru akim nyaꞌ ngai mantoꞌ inoꞌ te balu nyaꞌ. Uleh nyau kelamaꞌ jakoꞌ alam ati ya: ‘Amat ku nadai patoh ke Tuhan Allah abaꞌ nadai iboh ke urang bukai,
5 uleh inoꞌ te balu toꞌ temoꞌ ngaru ku, isaꞌ mah ku malu ari ya, isaꞌ ya nadai selareh ngusong ku abaꞌ nyuroh palaꞌ ku pedeh sengabot.’ ”
6 Baroꞌ Tuhan Isa madah: “Prati kah apa te udah depadah akim te nadai bayek nyaꞌ!
7 Enteꞌ akim te nadai bayek nyaꞌ jaꞌ malu ari inoꞌ te balu nyaꞌ apa klageꞌ Tuhan Allah pesti kaꞌ malu ari kebala urang te dapileh Ya, te betawas malam selareh bradua ngemon ke Ya. Abaꞌ Ya pesti nadai nungoꞌ lamaꞌ kaꞌ malu ari sidaꞌ.
8 Ku madah ke kitaꞌ, Tuhan Allah kaꞌ beburoh mutos te adel ke sidaꞌ. Uleh senta Ensia te datai ari Tuhan Allah datai ageꞌ, bedau pesti Ya nemu kebala urang te ageꞌ pecayaꞌ ke Ya de dunia toꞌ.”
Kisah empama urang Parisi abaꞌ penageh pajak
9 Isa nusoi suteꞌ kisah empama ke kebala urang te menadai urang bukai abaꞌ ngangap direꞌ awas:
10 “Adai dua urang angkat ke Rumah Kudos Tuhan Allah kaꞌ bradua; te sikoꞌ urang ari kelumpok Parisi abaꞌ te sikoꞌ ageꞌ penageh pajak.
11 Urang Parisi nyaꞌ diri abaꞌ bradua upa pitoꞌ: ‘O Tuhan Allah, ku betrimaꞌ kaseh ke Wan, nema ku nadai upa urang bukai, ku ukai pencuri, ukai urang te gah mulah te jat, ukai urang te gah besinah, abaꞌ ukai gaꞌ upa penageh pajak nyaꞌ.
12 Ku bradua puasa dua kaleꞌ semingu abaꞌ ku ngemaiꞌ perpulohan ari asel pengerja ku.’
13 Uleh penageh pajak nyaꞌ diri jaoh abaꞌ ya nadai berani engkadah ke langet, blumaꞌ manom dada direꞌ, ya madah: ‘O Tuhan Allah kaseh ke ku toꞌ urang te dusa!’
14 Ku madah ke kitaꞌ, pas penageh pajak nyaꞌ pulai ke rumah, ya te deangap Tuhan Allah urang te kenaꞌ, ukai urang Parisi. Nema ngenap urang te kaꞌ ningeꞌ direꞌ, Tuhan Allah kaꞌ ngemaroh ya abaꞌ ngenap urang te kaꞌ ngemaroh direꞌ kaꞌ datingeꞌ Tuhan Allah.”
Isa iboh ke kebala miyak
15 Adai datai kebala apai inai ngemaiꞌ kebala anak sidaꞌ te ageꞌ biyak ngusong Isa, isaꞌ Ya ngeletak jari de atau sidaꞌ abaꞌ mereꞌ berkat ke kebala miyak nyaꞌ. Medaꞌ piyaꞌ kebala muret Isa nganoꞌ apai inai kebala miyak nyaꞌ.
16 Uleh Isa ngumai kebala miyak nyaꞌ, baroꞌ Ya madah: “Isaꞌ mah kebala miyak datai ngusong Ku, abaꞌ nang kitaꞌ ngerot sidaꞌ, nema urang te upa toꞌ mah te idop de alam Pemerintah Tuhan Allah.
17 Ku madah ke kitaꞌ, sapa te nadai nerimaꞌ Pemerintah Tuhan Allah upa miyak, nitauꞌ tamaꞌ ke alam Pemerintah Ya.”
Isa abaꞌ urang kaya
18 Adai sikoꞌ urang pemimpen Yahudi nanyaꞌ ke Isa: “Pak Guru te bayek, apa te alah ku pulah isaꞌ ku tauꞌ jong idop abaꞌ Tuhan Allah?”
19 Isa nyawot ya: “Ngapa direꞌ madah Ku bayek? Datai ke sikoꞌ niseꞌ urang te bayek, peroꞌ Tuhan Allah mah te bayek.
20 Direꞌ pesti tauꞌ badaꞌ kebala printah Tuhan Allah: ‘Nang besinah, nang munoh, nang encuri, nang madah utai te bulaꞌ tentang urang, abaꞌ patoh ke apai inai kitaꞌ.’ ”
21 Jakoꞌ urang nyaꞌ: “Ugaꞌ nyaꞌ udah ku tunaꞌ kah belaboh ari ku ageꞌ biyak teh.”
22 Ninga piyaꞌ Isa madah ke ya: “Ageꞌ suteꞌ te bedau direꞌ pulah kah, jual kah ugaꞌ reta bena direꞌ, duet nyaꞌ bereꞌ ke urang misken, abaꞌ direꞌ kaꞌ buleh reta de sruga. Udah nyaꞌ datai kitoꞌ abaꞌ terudi ke Ku.”
23 Pas urang nyaꞌ ninga te jakoꞌ Isa, ya tusah nema ya kaya amat.
24 Isa tauꞌ badaꞌ urang nyaꞌ tusah ati, baroꞌ Ya madah: “Ma mah pedeh urang kaya tamaꞌ ke alam Pemerintah Tuhan Allah.
25 Lebeh mudah sikoꞌ unta tamaꞌ lubang jarom, ari pada urang kaya tamaꞌ ke alam Pemerintah Tuhan Allah.”
26 Kebala urang te ninga nyaꞌ madah: “Enteꞌ piyaꞌ sapa te tauꞌ selamat?”
27 Isa nyawot sidaꞌ: “Apa te nitauꞌ dapulah ensia, Tuhan Allah tauꞌ mulah ugaꞌ nyaꞌ.”
Upah nerudi Isa
28 Udah nyaꞌ baroꞌ Petros madah: “Kami toꞌ udah nudi kebala utai te daempu kami, abaꞌ nerudi Wan.”
29 Jakoꞌ Isa: “Ku madah ke kitaꞌ ngenap urang te tegal Pemerintah Tuhan Allah udah nudi rumah, bini, anak, menyadeꞌ abaꞌ apai inai sidaꞌ,
30 urang nyaꞌ kaꞌ nerimaꞌ belipat-lipat de dunia toꞌ, abaꞌ jemah sidaꞌ jong idop abaꞌ Tuhan Allah sengabot.”
Isa madah apa te kaꞌ nacah Ya
31 Isa ngumai dua belas muret Ya isaꞌ sidaꞌ jaoh geꞌ ari urang banyau, baroꞌ madah ke sidaꞌ: “Dinga kah! Entoꞌ kita alah angkat ke Yerosalem. Den ugaꞌ utai te udah datules kebala nabi ke Ensia te datai ari Tuhan Allah kaꞌ temoꞌ.
32 Nema Ya kaꞌ daserah ke urang te ukai urang Yahudi, sidaꞌ melicak, mejaiꞌ abaꞌ ngeludah Ya.
33 Sidaꞌ kaꞌ mrisa abaꞌ munoh Ya, uleh ari ketiga Ya kaꞌ idop ageꞌ.”
34 Uleh kebala muret nadai nyarok apa te jakoꞌ Ya nema reti nyaꞌ ageꞌ detapok ari sidaꞌ. Kebaꞌ sidaꞌ nitauꞌ badaꞌ apa te depadah Ya.
Isa nyemoh urang butaꞌ
35 Pas Isa nyau kaꞌ datai ke Yeriko, adai sikoꞌ urang butaꞌ te dudok mintaꞌ-mintaꞌ de tisi jalai.
36 Pas urang butaꞌ nyaꞌ ninga urang banyau mansaꞌ, ya nanyaꞌ ke sidaꞌ: “Ngapa piyaꞌ?”
37 Jakoꞌ kebala urang madah ke ya: “Isa sidaꞌ Nasaret mansaꞌ.”
38 Kebaꞌ urang butaꞌ nyaꞌ ngangau kaya: “Isa, pureh raja Daod! Tulong kaseh ke ku toꞌ!”
39 Kebala urang te bejalai de mua nganoꞌ ya, abaꞌ nyuroh ya sunyeꞌ. Uleh ya empala sareng: “Pureh raja Daod! Kaseh ke ku toꞌ!”
40 Isa mentan abaꞌ nyuroh urang ngemaiꞌ urang butaꞌ nyaꞌ ngusong Ya. Pas urang nyaꞌ datai semak Isa, Ya nanyaꞌ:
41 “Apa te direꞌ kedekaꞌ Ku pulah kedireꞌ?”
Jakoꞌ urang butaꞌ nyaꞌ: “Tuhan, ku kaꞌ tauꞌ medaꞌ.”
42 Baroꞌ Isa madah: “Enteꞌ piyaꞌ, medaꞌ mah! Nema direꞌ pecayaꞌ ke Ku direꞌ udah dasemoh.”
43 Tengan nyaꞌ gaꞌ urang nyaꞌ teka tauꞌ medaꞌ, baroꞌ ya nerudi Isa blumaꞌ ya muji Tuhan Allah. Ugaꞌ urang te medaꞌ utai nyaꞌ, sidaꞌ muji gaꞌ Tuhan Allah.