Kati gaya idop direꞌ
17
Isa madah ke kebala muret Ya: “De dunia toꞌ pesti mah adai kebala utai te nyuroh urang laboh ke alam dusa, uleh rugi amat mah urang te nyuroh urang bukai laboh ke alam dusa.
2 Ageꞌ kasa enteꞌ batu besaia detamet ke ler ya baroꞌ ya datibar ke laot, ari pada ya nyuroh urang te lemah iman toꞌ laboh ke alam dusa.
3 Kebaꞌ nyaꞌ kitaꞌ alah ati-ati nyaga direꞌ isaꞌ kitaꞌ nadai nyuroh urang mulah dusa. Enteꞌ kawan seiman mulah te nadai bayek ke kitaꞌ rara ke ya, enteꞌ ya nesal ampon ke ya.
4 Abaꞌ misal teh ya mulah te nadai bayek ke kitaꞌ tujoh kaleꞌ sari, abaꞌ tujoh kaleꞌ ya datai ngusong kitaꞌ abaꞌ madah: ‘Ku nesal.’ Kitaꞌ alah ngampon ya.”
5 Baroꞌ kebala rasol nyaꞌ madah ke Tuhan Isa: “Tuhan, tulong kami isaꞌ kami lebeh pecayaꞌ ke Tuhan Allah.”
6 Tuhan Isa nyawot: “Enteꞌ iman kitaꞌ ke Tuhan Allah pemesai igeꞌ ensawi, kitaꞌ tauꞌ madah ke pon kayu te besai toꞌ: ‘Tecabot ari toꞌ pinah ke laot.’ Pesti pon kayu nyaꞌ nunaꞌ printah kitaꞌ.”
Gaya ulon te patoh ke tuan ya
7 Isa nyamong cakap Ya: “Empama teh adai ulon kitaꞌ ngreja uma ke kitaꞌ abaꞌ ngintu kebala te daidop kitaꞌ. Pas ya pulai ari uma, pesti kitaꞌ nadai sintak ngemaiꞌ ya: ‘Boh makai!’
8 Empala kitaꞌ nyuroh ulon nyaꞌ: ‘Ageh ke pemakai ke ku, begareꞌ kah ngau baju te breseh abaꞌ layan ke ku datai ke ku udah makai. Udah nyaꞌ baroꞌ meh tauꞌ makai.’
9 Ulon nyaꞌ nadai alah dapuji nema udah patoh ke printah tuan ya weh?
10 Piyaꞌ gaꞌ kitaꞌ enteꞌ kitaꞌ udah mulah apa te udah Tuhan printah ke kitaꞌ, kitaꞌ alah madah: ‘Kami toꞌ bayah ulon mah, nadai patot dapuji; kami peroꞌ ngreja apa te alah kami pulah kah.’ ”
Urang te tauꞌ betrimaꞌ kaseh
11 Jalai Isa abaꞌ kebala muret Ya mansang ke Yerosalem, sidaꞌ niti batas wilayah Samaria abaꞌ wilayah Galelia.
12 Pas Isa nyau kaꞌ tamaꞌ ke suteꞌ kampong adai sepuloh urang te kenaꞌ penyaket kulet kusta kaꞌ betemu abaꞌ Ya. Sidaꞌ diri mereꞌ jaoh
13 abaꞌ ngangau: “O Guru, Isa, kaseh ke kami, semoh kah kami!”
14 Baroꞌ Isa nilek sidaꞌ abaꞌ madah: “Angkat, anyaꞌ direꞌ kitaꞌ ke kebala imam, isaꞌ sidaꞌ medaꞌ kitaꞌ abaꞌ madah ke urang enteꞌ kitaꞌ amat-amat nyau semoh.” Tengan sidaꞌ bejalai ngusong kebala imam sidaꞌ sintak semoh.
15 Sikoꞌ urang ari sidaꞌ pas medaꞌ direꞌ udah dasemoh bebalek ageꞌ ngusong Isa, blumaꞌ muji Tuhan Allah ngau goꞌ te kaya.
16 Baroꞌ ya tesungkor de kaki Isa abaꞌ ya betrimaꞌ kaseh ke Ya, urang nyaꞌ urang Samaria.
17 Baroꞌ Isa madah ke kebala urang te adai diyaꞌ: “Piyaꞌ ni adai sepuloh urang te udah dasemoh? Kikai sidaꞌ te semilan?
18 Ngapa peroꞌ urang te ukai urang Yahudi toꞌ te bebalek betrimaꞌ kaseh ke Tuhan Allah?”
19 Baroꞌ Isa madah ke urang nyaꞌ: “Diri abaꞌ angkat, nema meh udah pecayaꞌ ke Ku kebaꞌ meh udah dasemoh.”
Pemerintah Tuhan Allah alam idop urang
20 Dua tiga ikoꞌ urang ari kelumpok Parisi betanyaꞌ ke Isa: “Kmaya bah Pemerintah Tuhan Allah belaboh de dunia toꞌ?”
Sawot Isa: “Pemerintah Tuhan Allah toꞌ niseꞌ pengelaiꞌ te tauꞌ dapedaꞌ urang.
21 Kebaꞌ niseꞌ urang te tauꞌ madah: ‘Ya adai den, ya adai ditoꞌ!,’ nema Pemerintah Tuhan Allah udah adai de tengah kitaꞌ.”
22 Udah nyaꞌ Isa madah ke kebala muret Ya: “Adai senta pagi lah kitaꞌ kaꞌ amat ngasa suteꞌ ari de senta Ensia te datai ari Tuhan Allah kaꞌ mrintah, uleh kitaꞌ nitauꞌ ngasa ari nyaꞌ.
23 Abaꞌ adai urang kaꞌ madah ke kitaꞌ: ‘Pedaꞌ Ya adai ditoꞌ! Pedaꞌ Ya adai den!’ Uleh nang kitaꞌ angkat nerudi sidaꞌ.
24 Nema upa kilat bedawar mancar ari ujong langet ke ujong langet, upa nyaꞌ gaꞌ jemah, senta penatai Ensia te datai ari Tuhan Allah.
25 Uleh Ya alah dulau nangong pemedeh abaꞌ nadai datrimaꞌ kebala urang de jaman toꞌ.
26 De senta penatai Ensia te datai ari Tuhan Allah sama upa de jaman Nohb meliyaꞌ.
27 Urang de jaman Noh idop upa sengket makai nginom abaꞌ belaki bini, datai ke Noh tamaꞌ ke prau te besai amat. Tengan nyaꞌ nadai mang-mang datai ujan parah sampai ngapot ugaꞌ tanah, abaꞌ urang mati ugaꞌ.
28 Piyaꞌ gaꞌ de jaman Lot meliyaꞌ, urang kuta Sudom makai nginom abaꞌ bejual beli, sidaꞌ betamak abaꞌ berumah.
29 Uleh jalai Lot keluar ari kuta nyaꞌ, nadai mang-mang api abaꞌ belerang turon ari langet munas ugaꞌ sidaꞌ.
30 Upa piyaꞌ mah jemah lah senta penatai Ensia te datai ari Tuhan Allah.
31 Senta nyaꞌ urang te tengan adai de atau atap rumah, nang ya turon ngameꞌ kebala utai te adai de alam rumah nyaꞌ abaꞌ piyaꞌ gaꞌ urang te tengan de uma, nang ya pulai.
32 Ingat apa te nacah bini Lot!c
33 Urang te kaꞌ ngintu idop direꞌ de dunia toꞌ, ya nitauꞌ jong idop abaꞌ Tuhan Allah sengabot; uleh sapa urang te kaꞌ nyerah idop ya, ya pesti tauꞌ jong idop abaꞌ Tuhan Allah sengabot.
34 Ku madah ke kitaꞌ, pas Ensia te datai ari Tuhan Allah datai, adai dua urang te tengan tinok de suteꞌ peninok, te sikoꞌ kaꞌ debaiꞌ abaꞌ te sikoꞌ kaꞌ dadudi.
35 Adai dua ikoꞌ urang inoꞌ te tengan ngisar ganom, te sikoꞌ kaꞌ debaiꞌ, te sikoꞌ ageꞌ dadudi.
37 Baroꞌ kebala muret Isa nanyaꞌ ke Ya: “Dini te jakoꞌ Wan kaꞌ tejadi Tuhan?” Isa nyawot sidaꞌ ngau sempang upa pitoꞌ: “Dini adai bangkai, diyaꞌ mah adai burong pemakai bangkai begugoꞌ. Upa piyaꞌ mah lah kaꞌ pedaꞌ pengelaiꞌ sebedau Ensia te datai ari Tuhan Allah datai ageꞌ.”