Kisah empama benahara te nadai bujor
16
Isa madah ke kebala muret Ya: “Adai sikoꞌ urang kaya te empu sikoꞌ benahara. Benahara nyaꞌ, kreja ya nguros ugaꞌ reta bena urang kaya nyaꞌ. Adai urang te madah ke urang kaya nyaꞌ, enteꞌ benahara ya begasak gila ngeruaꞌ reta bena urang kaya nyaꞌ.
2 Baroꞌ urang kaya nyaꞌ ngumai benahara ya abaꞌ madah: ‘Ku ninga, adai urang te madah enteꞌ meh toꞌ begasak gila ngeruaꞌ reta bena ku, nyaꞌ nyuroh ku kaꞌ mecat meh kreja abaꞌ ku. Uleh sebedau meh badoꞌ, meh alah ngelapor kati cara meh nguros ugaꞌ reta bena ku te ku pecayaꞌ ke meh.’
3 Baroꞌ jakoꞌ alam ati benahara nyaꞌ: ‘Tuan ku toꞌ kaꞌ mecat ku, kati akal ku lah weh? Enteꞌ ku kreja nyangkol lah, ku nadai talah, enteꞌ mintaꞌ ke urang, malu gaꞌ asa.
4 Uleh toꞌ lah te kaꞌ ku pulah, isaꞌ asa ku dapecat adai urang bukai te nyadi ku diyau de rumah sidaꞌ.’
5 Baroꞌ ya ngumai kebala urang te berutang ke tuan ya. Ke te semaru ya nanyaꞌ: ‘Brapa pemayoh ugaꞌ utang meh de tuan ku?’
6 Urang nyaꞌ nyawot ya: ‘Tiga ribu litera binyak saiton.’
Benahara nyaꞌ madah: ‘Toꞌ bukoꞌ utang meh, buroh geꞌ kah, tules jaꞌ de bukoꞌ utang meh te baru seribu limaꞌ ratos liter.’b
7 Udah nyaꞌ, ke te sikoꞌ ageꞌ ya nanyaꞌ: ‘Brapa ugaꞌ utang meh de tuan ku?’
Urang nyaꞌ nyawot ya: ‘Adai tiga puloh ton ganom.’c
Baroꞌ ya madah: ‘Tules jaꞌ de bukoꞌ utang meh te baru dua puloh empat ton.’d
8 Breta urang kaya nyaꞌ ninga apa te udah dapulah benahara nyaꞌ, ya muji benahara te nadai bujor nyaꞌ, nema ya panai miker utai te tauꞌ nguntong ya.”
Baroꞌ Isa madah ke kebala muret Ya: “Kebala anak dunia toꞌ lebeh panai nguros reta bena abaꞌ sama direꞌ ari pada kebala anak terang.
9 Dinga kah, ku madah ke kitaꞌ kebaꞌ ngau kah reta dunia toꞌ ngau kitaꞌ ngigaꞌ kawan. Jemah lah enteꞌ reta dunia toꞌ nitauꞌ nulong kitaꞌ ageꞌ, Tuhan Allah nerimaꞌ kitaꞌ de teban te kekal.”
Urang te setia ngintu reta bena
10 Asa urang setia abaꞌ utai te engkaꞌ met, ya tauꞌ dapecayaꞌ ke utai te besai. Uleh asa urang nadai setia abaꞌ utai te engkaꞌ met, ya nitauꞌ gaꞌ dapecayaꞌ ke utai te besai.
11 Abaꞌ enteꞌ urang nadai setia ngintu reta bena dunia toꞌ, pesti ya nadai dapecayaꞌ ngintu reta rohani.
12 Enteꞌ kitaꞌ nadai bujor ngintu reta bena urang bukai, kitaꞌ nadai gaꞌ dapecayaꞌ ngintu reta bena kitaꞌ kedireꞌ.
13 Ku madah ke kitaꞌ pemantoꞌ toꞌ nitauꞌ kreja ke dua tuan. Nema enteꞌ ya kreja ke dua tuan, pesti mah ya lebeh kaseh abaꞌ setia ke tuan te sikoꞌ ari pada ke tuan ya te kebukai. Upa piyaꞌ mah gaꞌ kitaꞌ nitauꞌ blumaꞌ setia ke duet blumaꞌ setia ke Tuhan Allah.
14 Kebala urang ari kelumpok Parisi te sayang ke duet, ketawaꞌ ninga apa te depadah Isa.
15 Kebaꞌ Isa madah ke sidaꞌ: “Kitaꞌ selareh berusaha isaꞌ dapedaꞌ urang bayek, uleh Tuhan Allah tauꞌ badaꞌ pengamat iseꞌ ati kitaꞌ. Nema apa te dapedaꞌ urang dunia penteng, dekareh Tuhan Allah.
16 Ugaꞌ printah Tuhan Allah te datules Musa abaꞌ kitab kebala nabi, deajar datai ke jaman Yohanes Pemaneꞌ. Belaboh ari nyaꞌ, brita bayek Pemerintah Tuhan Allah niseꞌ pemadoꞌ dasebar, abaꞌ ugaꞌ urang berusaha kaꞌ tamaꞌ ke alam Pemerintah Tuhan Allah.
17 Lebeh mudah langet abaꞌ bumi toꞌ lenyau, ari pada setitek ari printah Tuhan Allah te datules Musa balang.”
Cuntoh printah te ageꞌ dengau
18 Sapa jaꞌ urang laki te nyuwayak bini ya, baroꞌ jadi ke inoꞌ te kebukai snikoꞌ besinah. Abaꞌ sapa jaꞌ urang te jadi ke inoꞌ te dasuwayak laki nyaꞌ, snikoꞌ nyaꞌ sigeꞌ besinah.
Urang kaya abaꞌ Lasaros te misken
19 Baroꞌ Isa nusoi ageꞌ kisah empama upa pitoꞌ: “Adai sikoꞌ urang kaya te selareh ngau baju panyai te bayek abaꞌ mahal, ngenap ari ya idop nyamai.
20 De mua pintu gerbang rumah urang kaya nyaꞌ adai Lasaros te ma misken. Tuboh ya meres abaꞌ ya tengan galer ke galer.
21 Ya lapar abaꞌ ngagam makai apa te laboh ari mija urang kaya nyaꞌ. Tengan nyaꞌ kebala ukoi datai nilat tuboh ya.
22 Baroꞌ urang te misken nyaꞌ mati, ya debaiꞌ kebala mlikat ke sruga dudok nungaꞌ Abraham.
23 Udah nyaꞌ urang kaya nyaꞌ sigeꞌ mati, abaꞌ dakubor. Ya ma mah ngasa pemedeh de neraka. Breta urang kaya nyaꞌ engkadah ke atau, ari jaoh ya medaꞌ Abraham abaꞌ Lasaros. Lasaros tengan dudok nungaꞌ Abraham.
24 Baroꞌ ya ngangau, jakoꞌ ya: ‘Pak Abraham, tulong kaseh ke ku toꞌ, ku ma mah pedeh kenaꞌ api ditoꞌ. Asoh kah Lasaros encalop ujong tunyok ya ke aiꞌ, abaꞌ nitek ke dilah ku nema ku ditoꞌ ma em pedeh.’
25 Uleh Abraham madah: ‘Ingat kah nak, meh udah nerimaꞌ kebala utai te bayek jalai meh idop de dunia, uleh Lasaros buleh kebala utai te jaiꞌ. Entoꞌ Lasaros ngasa penyamai, uleh meh ma ngasa pemedeh.
26 Bukai ari nyaꞌ gaꞌ, de entara kami abaꞌ meh adai darong te luah abaꞌ dalam te nadai talah semerang, isaꞌ kita toꞌ nitauꞌ begusong pangan.’
27 Jakoꞌ urang kaya nyaꞌ madah ke Abraham: ‘Enteꞌ piyaꞌ, ku mintaꞌ ke wan isaꞌ nyuroh Lasaros ke rumah apai ku.
28 Nema adai ageꞌ limaꞌ menyadeꞌ ku den, isaꞌ Lasaros ngingat ke sidaꞌ nudi kebala dusa sidaꞌ. Isaꞌ asa sidaꞌ mati sidaꞌ nadai tamaꞌ ke teban te pedeh toꞌ.’
29 Uleh jakoꞌ Abraham nyawot ya: ‘De sidaꞌ adai kitab te datules Musa abaꞌ kebala nabi te kebukai, isaꞌ mah sidaꞌ medaꞌ abaꞌ nunaꞌ apa te deajar alam kebala kitab nyaꞌ.’
30 Jakoꞌ urang nyaꞌ: ‘Nadai wan! Kebala menyadeꞌ ku nadai kaꞌ medaꞌ abaꞌ nunaꞌ apa te udah deajar alam kebala kitab nyaꞌ. Uleh enteꞌ adai urang te udah mati idop ageꞌ datai ngusong sidaꞌ, pesti sidaꞌ kaꞌ nudi kebala dusa sidaꞌ.’
31 Baroꞌ jakoꞌ Abraham: ‘Enteꞌ sidaꞌ ngai ninga apa te udah deajar alam kitab te datules Musa abaꞌ kebala kitab nabi te kebukai, biar mah urang te idop ageꞌ datai ke sidaꞌ, sidaꞌ nadai ngamoꞌ kaꞌ nudi dusa sidaꞌ.’ ”