Kisah empama dumba te lenyau
15
Ari suteꞌ, upa sengket mayoh kebala penageh pajak abaꞌ urang te dusa datai ngusong Isa ninga Ya ngajar.
2 Kebaꞌ kebala urang ari kelumpok Parisi abaꞌ kebala urang te ahli de alam kitab te datules Musa merunya ke Isa, jakoꞌ sidaꞌ: “Ensia toꞌ, nerimaꞌ kebala urang te dusa abaꞌ makai berama abaꞌ sidaꞌ.”
3 Kebaꞌ nyaꞌ nyuroh Isa nusoi kisah empama ke sidaꞌ upa pitoꞌ:
4 “Enteꞌ de entara kitaꞌ empu seratos ikoꞌ dumba, abaꞌ kitaꞌ tauꞌ badaꞌ sikoꞌ udah lenyau, apa te kitaꞌ kaꞌ pulah kah? Kitaꞌ pesti nudi dumba te semilan puloh semilan ikoꞌ nyaꞌ de padang rumpot, abaꞌ ngigaꞌ dumba te lenyau nyaꞌ sampai temu.
5 Abaꞌ enteꞌ kitaꞌ udah nemu dumba nyaꞌ, baroꞌ kitaꞌ nangong ya pulai ngau ati gaga.
6 Breta kitaꞌ datai ke rumah, kitaꞌ ngumai kebala kawan abaꞌ kebala urang te semak rumah kitaꞌ, blumaꞌ madah ke sidaꞌ: ‘Boh datai kitoꞌ, berami abaꞌ ku, nema dumba ku te lenyau nyaꞌ udah temu ageꞌ.’
7 Dinga kah ku madah ke kitaꞌ: Upa piyaꞌ gaꞌ Tuhan Allah abaꞌ kebala mlikat lebeh gaga enteꞌ sikoꞌ urang te dusa nudi dusa, ari pada te semilan puloh semilan urang te kenaꞌ te nadai perlu nudi dusa.”
Kisah empama duet kereng dirham te lenyau
8 Baroꞌ Isa madah ageꞌ: “Adai sikoꞌ inoꞌ te empu sepuloh duet kereng dirham,a enteꞌ suteꞌ de entara duet kereng dirham nyaꞌ lenyau, apa te dapulah ya? Ya pesti ngidop kelita abaꞌ nepau rumah ngigaꞌ bamat-amat sampai ya nemu nyaꞌ.
9 Breta ya udah nemu nyaꞌ, ya ngumai kebala kawan abaꞌ kebala urang te semak rumah ya, blumaꞌ madah ke sidaꞌ: ‘Boh datai kitoꞌ, berami abaꞌ ku, nema duet kereng dirham ku te udah lenyau nyaꞌ udah temu ageꞌ.’
10 Dinga kah ku madah ke kitaꞌ: Upa piyaꞌ gaꞌ pengaga kebala mlikat Tuhan Allah nema sikoꞌ urang te dusa, nudi dusa ya.”
Kisah empama anak te lenyau
11 Isa madah ageꞌ: “Adai sikoꞌ apai te empu dua ikoꞌ anak laki.
12 Jakoꞌ te bunsu madah ke apai ya: ‘Apai, bereꞌ ke ku entoꞌ, pemagi reta bena empu kita te jatah empu ku.’ Baroꞌ apai ya beduaꞌ reta pengaya sidaꞌ ke dua ikoꞌ anak ya.
13 Nadai lamaꞌ udah nyaꞌ, anak te bunsu nyaꞌ nyual ugaꞌ te daempu ya, baroꞌ ya angkat ke menua te jaoh. Den ya ngeruaꞌ duet ya nyaꞌ ngau idop berami sengabot.
14 Senta duet ya mes piyaꞌ, timol rama lapar te rat amat de menua nyaꞌ, abaꞌ ya sigeꞌ ma pedeh niseꞌ kebala utai ageꞌ.
15 Baroꞌ ya angkat abaꞌ ngenyak direꞌ ke urang de menua nyaꞌ, isaꞌ ya tauꞌ bekreja. Baroꞌ urang nyaꞌ nyuroh ya ngintu kebala babib ya.
16 Diyaꞌ anak bunsu nyaꞌ ma mah lapar sampai ya kaꞌ makai umpan babi nyaꞌ, uleh niseꞌ urang mereꞌ te depakai ke ya.
17 Kepanyai ya ngasa pemedeh idop direꞌ baroꞌ mah ya sadar. Jakoꞌ alam ati ya: ‘Kebala urang te bekreja ke apai ku den nyangkaꞌ em te depakai, uleh ku ditoꞌ nyau kaꞌ mati lapar.
18 Ku kaꞌ angkat ngusong apai ku abaꞌ madah ke ya: Apai, ku udah dusa ke Tuhan Allah abaꞌ ke wan,
19 ku nadai patot ageꞌ depadah anak wan. Ku kaꞌ mintaꞌ ke wan isaꞌ mah ku jadi urang te bekreja ke wan.’
20 Kebaꞌ ya diri, ya angkat ngusong apai ya.
Ageꞌ jaoh ya ari rumah, abaꞌ breta apai ya medaꞌ ya, timol pengaseh alam ati apai ya. Apai ya beguai ngusong ya, sintak mangkap abaꞌ nyiom ya.
21 Jakoꞌ anak ya: ‘Apai, ku udah dusa ke Tuhan Allah abaꞌ ke wan. Ku nadai patot ageꞌ depadah anak wan.’
22 Uleh apai ya madah ke kebala pemantoꞌ ya: ‘Lekas! Baiꞌ kitoꞌ baju panyai te paleng bayek, kenaꞌ kah nyaꞌ ke ya. Abaꞌ kenaꞌ kah tincem ke tunyok ya, abaꞌ sepatu ke kaki ya.
23 Tangkap, bunoh kah sapi te gemoꞌ, ngau kita makai berami abaꞌ ya.
24 Nema anak ku toꞌ kebarat udah mati uleh idop ageꞌ, ya te udah lenyau uleh temu ageꞌ. Kebaꞌ nyaꞌ, boh kita berami abaꞌ ya.’
25 Tengan nyaꞌ, anak ya te tuai ageꞌ de uma, pas ya pulai udah semak rumah, ya ninga goꞌ musek abaꞌ kebala urang bejuget.
26 Baroꞌ Ya ngumai sikoꞌ pemantoꞌ abaꞌ betanyaꞌ ke ya: ‘Apa te dapulah urang diyaꞌ?’
27 Jakoꞌ pemantoꞌ nyaꞌ: ‘Menyadeꞌ wan udah pulai, abaꞌ apai wan udah nyuroh munoh sapi te gemoꞌ nema udah buleh anak ya ageꞌ, abaꞌ ya pulai angas.’
28 Anak tuai nyaꞌ ma ranseng, ya ngai tamaꞌ ke rumah. Baroꞌ apai ya pansot ngusong anak tuai ya, becakap abaꞌ ngumok isaꞌ kaꞌ tamaꞌ.
29 Uleh ya nyawot apai ya, jakoꞌ ya: ‘Udah betaon-taon ku bekreja ke wan, abaꞌ bedau kalaꞌ ku ngelawan printah wan. Uleh bedau kalaꞌ wan nyuaꞌ sikoꞌ anak kameng ngau ku berami abaꞌ kebala kawan ku.
30 Uleh anak wan nyaꞌ, udah mames reta pengaya wan abaꞌ kebaꞌ inoꞌ te kanyi, abaꞌ breta ya pulai, wan munoh sapi te gemoꞌ nyaꞌ ke ya.’