Isa nyemoh urang te pedeh busong aiꞌ ari Sabat
14
Ari Sabat bukai, Isa datai ke rumah sikoꞌ urang ari kelumpok Parisi. Urang nyaꞌ ma mah depanang urang. Diyaꞌ Isa makai. Ugaꞌ urang te adai diyaꞌ mrati Isa amat-amat, sidaꞌ kaꞌ medaꞌ apa te kaꞌ dapulah Ya.
2 Nadai mang-mang datai urang te pedeh busong aiꞌ, nyaꞌ nyuroh kaki jari ya bengkak. Ensia nyaꞌ diri de mua Isa.
3 Baroꞌ Isa nanyaꞌ kebala urang te ahli de alam kitab te datules Musa abaꞌ ke kebala urang Parisi, jakoꞌ Ya: “Enteꞌ alam kitab te datules Musa tauꞌ nadai nyemoh urang Ari Sabat?”
4 Uleh sidaꞌ te diyaꞌ ngai nyawot Ya. Baroꞌ Isa megai urang te pedeh nyaꞌ abaꞌ Isa nyemoh ya. Baroꞌ nyuroh ya angkat.
5 Udah nyaꞌ Isa madah ke sidaꞌ: “Entah kah anak kitaꞌ, entah kah sapi kitaꞌ enteꞌ teprasok ke alam sumor pas ari Sabat pesti kitaꞌ kaꞌ narek ke luar weh?”
6 Uleh sidaꞌ te diyaꞌ niseꞌ te berani ngelawan Ya.
Nang ngangap direꞌ lebeh penteng ari urang bukai
7 Isa medaꞌ kebala temuai mileh dudok de teban te paleng penteng abaꞌ nyamai. Nyaꞌ nyuroh Isa nusoi kisah empama ke sidaꞌ upa pitoꞌ:
8 “Enteꞌ urang ngunang kitaꞌ gawai belaki bini, nang kitaꞌ dudok de teban te penteng abaꞌ nyamai. Nema mali urang nyaꞌ udah ngunang urang te lebeh penteng ari kitaꞌ.
9 Ilaꞌ urang te ngunang kitaꞌ datai ngusong kitaꞌ abaꞌ madah: ‘Upa te jaiꞌ mah toꞌ deh, teban toꞌ udah ku ageh ke urang nyaꞌ.’ Baroꞌ kitaꞌ malu lah bepinah dudok ke belakang amat.
10 Uleh enteꞌ kitaꞌ daunang pileh ke dudok de teban paleng belakang. Isaꞌ asa urang te ngunang kitaꞌ datai ngusong kitaꞌ, ya madah: ‘Kawan, ken dudok ke mua bah.’ Abaꞌ asa piyaꞌ kitaꞌ kaꞌ depanang de mata ugaꞌ temuai te bukai.
11 Kebaꞌ sapa jaꞌ urang te ningeꞌ direꞌ, Tuhan Allah kaꞌ ngemaroh ya. Uleh urang te ngemaroh direꞌ, Tuhan Allah kaꞌ ningeꞌ ya.”
Sapa te alah daunang
12 Baroꞌ Isa madah gaꞌ ke urang te ngunang Ya: “Enteꞌ direꞌ nyamu urang makai berama, nang bah direꞌ ngunang kebala manal menyadeꞌ, kebala keluarga, kebala kawan, kebala urang te kaya te semak rumah direꞌ. Nema sidaꞌ tauꞌ malas ngunang direꞌ, abaꞌ ngau cara nyaꞌ direꞌ nerimaꞌ sidaꞌ malas.
13 Uleh enteꞌ direꞌ kaꞌ nyamu urang, unang kah kebala urang misken, kebala urang cacat, kebala urang lumpoh abaꞌ kebala urang butaꞌ.
14 Nema niseꞌ te ngau sidaꞌ malas pemayek direꞌ entoꞌ, uleh direꞌ aja betuah amat. Jemah lah Tuhan Allah kaꞌ malas kedireꞌ, senta Ya ngidop ageꞌ kebala urang te patoh ke Ya.”
Kisah empama urang te ngai daunang
15 Ninga piyaꞌ adai sikoꞌ temuai te abaꞌ makai diyaꞌ madah ke Isa: “Betuah amat mah urang te makai berama de alam Pemerintah Tuhan Allah jemah lah.”
16 Uleh Isa madah ke ya: “Adai urang nyamu urang makai abaꞌ ya ngunang urang mayoh.
17 Pas te depakai udah deageh, ya nyuroh pemantoꞌ ya madah ke kebala urang te daunang ya: ‘Datai kitoꞌ mah, te depakai udah deageh.’ Baroꞌ pemantoꞌ nyaꞌ angkat bepadah.
18 Uleh ugaꞌ sidaꞌ berama mintaꞌ ampon nema sidaꞌ nitauꞌ datai kiyaꞌ. Te sikoꞌ madah ke ya: ‘Ku mintaꞌ ampon lai ku baroꞌ udah meli tanah abaꞌ ku kaꞌ angkat masau.’
19 Te kebukai madah: ‘Ku mintaꞌ ampon lai, ku udah meli limaꞌ pasang lembu abaꞌ ku kaꞌ angkat ngelaba lah.’
20 Te kebukai ageꞌ madah: ‘Ku toꞌ baroꞌ udah bebini, nyaꞌ nyuroh ku nitauꞌ datai.’
21 Baroꞌ pemantoꞌ nyaꞌ pulai, abaꞌ nusoi ugaꞌ nyaꞌ ke urang te ngunang sidaꞌ. Ninga piyaꞌ ranseng mah urang te ngunang sidaꞌ, abaꞌ madah ke pemantoꞌ ya: ‘Angkat direꞌ entoꞌ, baiꞌ jaꞌ kebala urang te de sepiyak jalai te direꞌ pansaꞌ de kuta toꞌ. Kebala urang misken, kebala urang cacat, kebala urang butaꞌ, abaꞌ kebala urang lumpoh.’
22 Baroꞌ udah nyaꞌ pemantoꞌ nyaꞌ ngelapor: ‘Pak, apa te udah wan suroh ke ku nyaꞌ udah ku kreja, uleh amat piyaꞌ ageꞌ adai teban te puang.’
23 Baroꞌ urang te empu rumah nyaꞌ madah: ‘Angkat ageꞌ direꞌ ke kebala jalai besai abaꞌ jalai te met te de semak kuta toꞌ, pukong kah kebala urang te adai diyaꞌ tamaꞌ, nema rumah ku alah penoh.
24 Dinga kah ku madah ke kitaꞌ datai ke sikoꞌ mah, ari kebala urang te udah daunang nyaꞌ nadai kaꞌ ngasa peramai gawai te Ku pulah.’ ”
Ugaꞌ utai alah dadudi asa kaꞌ nerudi Isa
25 Udah nyaꞌ mayoh urang nerudi pejalai Isa. Blumaꞌ Ya malek ke belakang Ya madah ke sidaꞌ:
26 “Enteꞌ sikoꞌ urang datai ngusong Ku, uleh ya lebeh kaseh ke apai inai, bini anak ya, kebala menyadeꞌ te laki abaꞌ te inoꞌ abaꞌ idop ya kedireꞌ ari pada kaseh ke Ku, ya nitauꞌ jadi muret Ku.
27 Sapa te nadai siap nangong saleb ya abaꞌ nerudi Ku, ya nitauꞌ jadi muret Ku.
28 Sapa piyaꞌ de entara kitaꞌ enteꞌ kaꞌ niri suteꞌ menara nadai dudok dulau miker cukop nadai duet ngau ngudah?
29 Isaꞌ enteꞌ ya udah ngentak tiang nyaꞌ, abaꞌ nadai talah ngudah, nang-nang ugaꞌ urang te medaꞌ nyaꞌ, ngelujeꞌ ya,
30 blumaꞌ madah: ‘Urang nyaꞌ belaboh ngentak, uleh ya nadai talah ngudah.’
31 Ni piyaꞌ, raja te enteꞌ kaꞌ angkat beperang ngelawan raja te bukai nadai dulau dudok miker: Apa ngau sepuloh ribu prajuret, ya talah ngadap lawan ya te pemayoh dua puloh ribu prajuret?
32 Enteꞌ ya nadai talah, ya kaꞌ ngutos urang ngusong raja musoh ya nyaꞌ, panyong ageꞌ jaoh ya kaꞌ nanyaꞌ apa sarat damai.
33 Piyaꞌ gaꞌ enteꞌ kitaꞌ kaꞌ jadi muret Ku, kitaꞌ alah nyerah ugaꞌ te kitaꞌ empu.