Enteꞌ kitaꞌ nadai nudi dusa, jemah lah kitaꞌ ngasa pemedeh
13
Tengan nyaꞌ adai dua tiga ikoꞌ urang nusoi ke Isa kebala urang Galelia mati dabunoh kebala prajuret te dasuroh Pelatos. Sidaꞌ dabunoh tengan sidaꞌ mereꞌ kurban pesemah ke Tuhan Allah.
2 Isa nyawot sidaꞌ: “Piker kitaꞌ dusa sidaꞌ nyaꞌ lebeh besai ari urang Galelia te kebukai tegal sidaꞌ mati dabunoh upa piyaꞌ?
3 Ku madah ke kitaꞌ, sama sekaleꞌ nadai piyaꞌ! Enteꞌ kitaꞌ nadai nudi kebala dusa kitaꞌ, ugaꞌ kitaꞌ seꞌ mati upa sidaꞌ.
4 Kitaꞌ ingat lapan belas urang te mati datingang menara te semak Seluam, piker kitaꞌ dusa sidaꞌ lebeh besai ari urang te diyau de Yerosalem?
5 Uleh sekaleꞌ ageꞌ Ku madah ke kitaꞌ, nadai piyaꞌ! Enteꞌ kitaꞌ nadai nudi kebala dusa kitaꞌ, kitaꞌ seꞌ sama gaꞌ mati upa sidaꞌ.”
Kisah empama pon ara te nadai kalaꞌ bebuah
6 Udah nyaꞌ Isa nusoi suteꞌ kisah empama upa pitoꞌ: “Adai urang te empu kebon angor. De tengah kebon nyaꞌ adai sepon pon ara, uleh ngenap kaleꞌ urang nyaꞌ datai ke kebon angor nyaꞌ ya nadai kalaꞌ nemu pon ara nyaꞌ bebuah.
7 Udah nyaꞌ, ya madah ke urang te ngintu kebon angor nyaꞌ: ‘Tiga taon bejurot ku kitoꞌ nadai kalaꞌ ku nemu pon ara toꞌ bebuah. Tebang jaꞌ, papal kah datai ke urat-urat, niseꞌ guna ya idop nema ya semoꞌ nginsap penyubor tanah toꞌ.’
8 Uleh urang te ngintu kebon nyaꞌ nyawot: ‘Pak, isaꞌ mah pon ara nyaꞌ ageꞌ idop setaon lai, ku kaꞌ nyangkol kelileng pon nyaꞌ udah nyaꞌ ku kaꞌ mereꞌ pupok.
9 Engkremaꞌ taon mua lah ya kaꞌ bebuah. Enteꞌ ya ngai bebuah baroꞌ mah ku nebang lah, mapal datai ke urat-urat ya.’ ”
Isa nyemoh urang inoꞌ te pedeh ari Sabat
10 Pas ari Sabat, Isa tengan ngajar de rumah te jalai urang Yahudi nyemah Tuhan Allah.
11 Diyaꞌ adai sikoꞌ urang inoꞌ te udah lapan belas taon desarong sitan, nyaꞌ nyuroh ya pedeh pungong sampai bungkok.
12 Breta Isa medaꞌ urang inoꞌ nyaꞌ, Ya ngumai ya abaꞌ madah: “O boꞌ, penyaket wan semoh.”
13 Abaꞌ Isa ngeletak jari de atau urang inoꞌ nyaꞌ, breta piyaꞌ urang inoꞌ nyaꞌ teka diri tegap abaꞌ ya muji Tuhan Allah.
14 Uleh kepalaꞌ rumah te jalai urang Yahudi nyemah Tuhan Allah nyaꞌ sau medaꞌ Isa nyemoh urang ari Sabat. Baroꞌ ya madah ke urang banyau te diyaꞌ: “Adai nam ari te deageh ke kita ngau bekreja, kitaꞌ tauꞌ datai ngusong Isa ari bukai mintaꞌ Ya nyemoh kitaꞌ uleh nang ari Sabat.”
15 Uleh Tuhan Isa nyawot ya: “Eh, kitaꞌ urang te budi-budi bayek, ni gah piyaꞌ adai urang de entara kitaꞌ te gah ngelepas kebala te daidop kitaꞌ ari kanang abaꞌ mereꞌ sidaꞌ nginom aiꞌ ari Sabat?
16 Nah, iboꞌ toꞌ pureh Abraham udah lapan belas taon ya detamet Kepalaꞌ bala sitan. Nadai piyaꞌ Ya perlu gaꞌ dalepas ari te namet ya de ari Sabat?”
17 Pas Isa madah piyaꞌ, ugaꞌ urang te areh ke Isa ma malu. Uleh urang mayoh te diyaꞌ gaga medaꞌ ugaꞌ te nyaroh ari Tuhan Allah te udah dapulah Isa.
Kisah empama igeꞌ ensawi abaꞌ ragi
18 Baroꞌ Isa madah: “Upa kati Pemerintah Tuhan Allah? Ngau apa weh Ku tauꞌ nyemaꞌ Pemerintah Ya nyaꞌ?
19 Nyaꞌ upa igeꞌ ensawi te engkaꞌ met detamak urang de kebon. Igeꞌ nyaꞌ tumoh galak jadi pon te besai abaꞌ kebala burong besarang de dan ya.”a
20 Baroꞌ Isa madah ageꞌ: “Ngau apa weh Ku tauꞌ nyemaꞌ Pemerintah Tuhan Allah?
21 Nyaꞌ upa ragi te deameꞌ urang inoꞌ datunyau kamoh aiꞌ abaꞌ tiga guni besai tepong sampai ya ngeremai ugaꞌ.”
Sapa te daselamat
22 Isa bejalai kaꞌ mansang ke Yerosalem, Ya mansaꞌ kebala kuta abaꞌ kebala kampong blumaꞌ Ya ngajar.
23 Tengan Ya ngajar adai urang nanyaꞌ: “Tuhan, siket mah weh urang te daselamat Tuhan Allah?”
24 Isa nyawot sidaꞌ diyaꞌ: “Berusaha jaꞌ kitaꞌ tamaꞌ ari pintu te met te pedeh jalai urang tamaꞌ nyaꞌ. Ku madah ke kitaꞌ mayoh urang te kaꞌ ngelaba tamaꞌ uleh sidaꞌ nitauꞌ tamaꞌ.
25 Senta nyaꞌ mah urang te empu rumah nutop pintu, abaꞌ kitaꞌ diri de luar lah. Baroꞌ kitaꞌ belaboh ngetok pintu abaꞌ madah: ‘Pak, bukaꞌ kah pintu ke kami!’ Uleh Ya kaꞌ nyawot kitaꞌ: ‘Ku nitauꞌ badaꞌ ari ni penatai kitaꞌ, ku nadai ngelala kitaꞌ.’
26 Kitaꞌ kaꞌ nyawot Ya: ‘Kami te udah makai nginom abaꞌ Wan, abaꞌ Wan te udah ngajar de kuta kami.’
27 Uleh Ya madah ageꞌ ke kitaꞌ: ‘Ku nitauꞌ badaꞌ ari ni kitaꞌ datai, kebaꞌ angkat, rari kitaꞌ ari mua Ku, kitaꞌ te mulah pemenyat!’
28 Den lah kitaꞌ kaꞌ nyabak abaꞌ ma nesal pas kitaꞌ medaꞌ Abraham, Isak, Yakob, abaꞌ ugaꞌ nabi diyau de teban Pemerintah Tuhan Allah, uleh kitaꞌ kaꞌ datesar ke luar.
29 Kebala urang kaꞌ datai ari ugaꞌ ujong dunia, ugaꞌ sidaꞌ makai berama de teban Pemerintah Tuhan Allah.
30 Ku madah ke kitaꞌ, urang te deangap urang nadai gulong penteng entoꞌ, jemah lah nyaꞌ mah te jadi urang te paleng penteng de mua Tuhan Allah, abaꞌ urang te deangap urang paleng penteng entoꞌ, jemah lah nyaꞌ mah jadi urang te nadai penteng de mua Tuhan Allah.”
Isa kaseh badaꞌ ke urang Yerosalem
31 Udah nyaꞌ, datai dua tiga ikoꞌ urang ari kelumpok Parisi ngusong Isa abaꞌ madah: “Angkat jaꞌ Wan ari toꞌ nema Herodes Antipas kaꞌ munoh Wan.”
32 Isa nyawot sidaꞌ: “Angkat ken padah ke serigalab nyaꞌ: ‘Sari toꞌ abaꞌ pagi Ku ditoꞌ muru sitan abaꞌ nyemoh urang, baroꞌ ari ketiga lah udah mah kreja Ku.’ ”
33 Isa madah ke sidaꞌ: “Uleh amat piyaꞌ, sari toꞌ, pagi, abaꞌ lusaꞌ Ku alah angkat ageꞌ, nema lamaꞌ nadai mah nabi dabunoh de luar Yerosalem.
34 O sidaꞌ Yerosalem, kitaꞌ gah munoh kebala nabi abaꞌ nikam urang te dautos ngusong kitaꞌ ngau batu. Tunaꞌ kepaꞌ Ku kaꞌ ngumpol abaꞌ ngelinong kitaꞌ, upa inoꞌ manok ngumpol abaꞌ ngeram kebala anak de baroh sayap ya, uleh kitaꞌ te ngai.
35 Dinga kah, kuta kitaꞌ toꞌ kaꞌ sunyeꞌ nema Tuhan Allah nadai abaꞌ kitaꞌ ageꞌ. Abaꞌ Ku madah ke kitaꞌ, kitaꞌ nadai medaꞌ Ku ageꞌ datai ke senta kitaꞌ madah: ‘Puji ke Ya te datai dautos de alam nama Tuhan Allah.’ ”