Pengajar kusos ke kebala muret
12
Tengan nyaꞌ beribu urang begugoꞌ sampai bekeneꞌ. Isa dulau ngajar kebala muret Ya, jakoꞌ Ya: “Ati-ati kitaꞌ ke ragi urang ari kelumpok Parisi, maksot Ku, ati-ati kitaꞌ ke sipat budi-budi bayek sidaꞌ.
2 Nang kitaꞌ upa sidaꞌ nema jemah lah niseꞌ utai te datutop te nadai dabukaꞌ, abaꞌ niseꞌ utai te detapok te nadai ketauꞌ.
3 Nema apa te kitaꞌ padah de teban te petang kaꞌ tinga ari teban te tampak, abaꞌ apa te kitaꞌ gisek ke peneng de pangkin, kaꞌ depadah de mua urang banyau lah.
4 Ku madah ke kitaꞌ, o kebala kawan Ku, nang kitaꞌ takot ke urang te peroꞌ tauꞌ munoh kitaꞌ gena, nema udah nyaꞌ sidaꞌ nitauꞌ mulah apa-apa ageꞌ.
5 Uleh Ku madah ke kitaꞌ, Tuhan Allah te alah kitaꞌ takot kah, nema Ya nadai peroꞌ bekuasa munoh kitaꞌ, uleh Ya bekuasa gaꞌ muai sapa jaꞌ ke alam api neraka. Sekaleꞌ ageꞌ Ku madah ke kitaꞌ, Ya te alah kitaꞌ takot kah.
6 Limaꞌ ikoꞌ burong pipet enteꞌ dajual brapa mah rega, uleh amat piyaꞌ datai ke sikoꞌ mah niseꞌ te nadai daintu Tuhan Allah.
7 Bok de palaꞌ kitaꞌ jaꞌ udah daitong Ya ugaꞌ. Kebaꞌ nang kitaꞌ takot, kitaꞌ bah jaoh lebeh berega ari kebala burong pipet.
8 Ku madah ke kitaꞌ, ugaꞌ urang te kaꞌ ngangkoꞌ direꞌ muret Ku de mua urang banyau, Ensia te datai ari Tuhan Allah sigeꞌ kaꞌ lah ngangkoꞌ urang nyaꞌ muret Ya de mua kebala mlikat Tuhan Allah.
9 Uleh sapa jaꞌ te nadai kaꞌ ngangkoꞌ direꞌ muret Ku de mua urang banyau, Ku sigeꞌ nadai kaꞌ ngangkoꞌ ya muret Ku de mua kebala mlikat Tuhan Allah.
10 Enteꞌ urang melicak Ensia te datai ari Tuhan Allah, ageꞌ ya tauꞌ deampon. Uleh enteꞌ adai urang melicak Roh Kudos, ya nadai ageꞌ tauꞌ deampon.
11 Enteꞌ kitaꞌ detangkap abaꞌ kitaꞌ daserah ke kebala pemimpen agama Yahudi, ke kebala pemerintah, abaꞌ pemimpen te kebukai, nang kitaꞌ saban kati gaya kitaꞌ nyawot apa te datudoh urang ke kitaꞌ.
12 Nema pas tengan nyaꞌ Roh Kudos ngajar ke kitaꞌ apa te alah kitaꞌ padah kah.”
Urang kaya te budu
13 Sikoꞌ urang ari entara urang banyau te diyaꞌ madah ke Isa: “Guru, padah kah ke menyadeꞌ ku isaꞌ ya kaꞌ magi kebala reta bena te dadudi apai kemua ke ku.”
14 Uleh Isa nyawot ya: “Ku nadai kalaꞌ deangkat nguros magi kebala reta bena de entara snikoꞌ.”
15 Baroꞌ Isa madah ageꞌ ke urang banyau te diyaꞌ: “Ati-ati kitaꞌ nyaga direꞌ, nang sampai kitaꞌ tamaꞌ, nema amat mah urang mayoh reta, uleh idop ensia nadai tegantung ke pengaya ya.”
16 Baroꞌ Isa nusoi ageꞌ ke sidaꞌ suteꞌ kisah empama upa pitoꞌ: “Adai sikoꞌ urang kaya te empu tanah, kebala utai te detamak de tanah ya ma mah mayoh asel.
17 Baroꞌ jakoꞌ alam ati ya: ‘Niseꞌ ageꞌ teban ngau ku nepoꞌ asel tanah ku, kati weh akal ku?
18 Ha... toꞌ te kaꞌ ku pulah kah: Ku kaꞌ nyuroh urang ngancai kebala gudang ku te toꞌ, baroꞌ ku mulah gudang baru te lebeh besai ageꞌ, isaꞌ bayah ngau ku nepoꞌ ganom abaꞌ kebala reta ku te kebukai.
19 Enteꞌ nyaꞌ nyau udah, baroꞌ mah ku puas abaꞌ madah, ku toꞌ haja kaya amat, reta ku bayah ngau betaon-taon. Entoꞌ tauꞌ mah ku belepa, makai nginom abaꞌ gaga sengabot.’
20 Baroꞌ Tuhan Allah madah ke ya: ‘Meh budu! Malam toꞌ penyuan meh kaꞌ deameꞌ ari meh. Ke sapa ugaꞌ pengaya meh te udah meh timon kah?’
21 Baroꞌ Isa nyamong cakap ya ageꞌ, piyaꞌ mah penyadi idop urang te berusaha nimon reta ngau ya kedireꞌ uleh nadai kaya de mua Tuhan Allah.”
Nang saban
22 Baroꞌ Isa madah ke kebala muret Ya: “Kebaꞌ nyaꞌ nang kitaꞌ saban ke idop kitaꞌ, apa te kaꞌ kitaꞌ pakai abaꞌ nang kitaꞌ saban ke kaen baju te kaꞌ kitaꞌ ngau kah.
23 Nema idop kitaꞌ toꞌ lebeh penteng ari apa te depakai abaꞌ tuboh kitaꞌ toꞌ lebeh penteng ari kaen baju te kaꞌ kitaꞌ ngau kah.
24 Cuba kitaꞌ pedaꞌ kebala burong. Amat sidaꞌ nadai namak abaꞌ ngetau, abaꞌ niseꞌ durong abaꞌ gudang uleh dabereꞌ Tuhan Allah makai. Kitaꞌ bah jaoh lebeh berega ari kebala burong nyaꞌ.
25 Sapa piyaꞌ de entara kitaꞌ te tauꞌ namah umor kitaꞌ panyai geꞌ, tegal saban?
26 Kebaꞌ, enteꞌ utai te engkaꞌ met upa nyaꞌ kitaꞌ nitauꞌ mulah, niseꞌ guna kitaꞌ saban ke utai te kebukai.
27 Cuba kitaꞌ pedaꞌ kebala bunga bakong te tumoh kedireꞌ, niseꞌ sidaꞌ bekreja abaꞌ nenun. Uleh Ku madah ke kitaꞌ raja Salomo amat kaya nadai ngau baju te pemayek upa bunga bakong nyaꞌ.
28 Enteꞌ kebala bunga bakong te sari toꞌ adai abaꞌ pagi datibar ke alam api Tuhan Allah lagaꞌ, apa klageꞌ kitaꞌ. Uleh kitaꞌ nadai gulong pecayaꞌ ke Ya.
29 Kebaꞌ nyaꞌ Ku madah, nang kitaꞌ saban abaꞌ gadoh ke apa te kaꞌ kitaꞌ pakai abaꞌ inom.
30 Nema peroꞌ kebala urang te nadai ngelala Tuhan Allah mah te selareh ngigaꞌ ugaꞌ nyaꞌ. Uleh kitaꞌ nang upa piyaꞌ, nema Apai kitaꞌ te de sruga tauꞌ badaꞌ enteꞌ kitaꞌ perlu ugaꞌ nyaꞌ.
31 Kebaꞌ nyaꞌ kitaꞌ alah bamat-amat ngigaꞌ kedekaꞌ Tuhan Allah Raja kitaꞌ nyaꞌ, abaꞌ Ya mereꞌ gaꞌ apa te daperlu kitaꞌ.
32 Nang kitaꞌ takot kebala muret Ku amat kitaꞌ siket, nema Apai kitaꞌ te de sruga Raja te gaga mereꞌ berkat ke kitaꞌ.
33 Jual kah reta bena kitaꞌ abaꞌ duet bereꞌ ke urang misken, nema enteꞌ kitaꞌ mulah piyaꞌ, kitaꞌ mulah reta te betan lamaꞌ. Reta te detaroh de sruga nadai ngamoꞌ mes, abaꞌ niseꞌ pencuri te tauꞌ ngameꞌ, abaꞌ niseꞌ sampok te tauꞌ makai.
34 Nema dini reta kitaꞌ adai, diyaꞌ mah ati abaꞌ pemiker kitaꞌ adai.”
Selareh siap
35 Isa madah ageꞌ: “Kitaꞌ alah selareh siap betawas malam ngelayan Tuhan Allah.
36 Kitaꞌ alah selareh siap upa medaꞌ kebala pemantoꞌ nungoꞌ urang te empu rumah pulai ari acara gawai. Enteꞌ urang te empu rumah nyaꞌ datai nyuroh mukaꞌ pintu ke ya, sidaꞌ beburoh mukaꞌ pintu.
37 Betuah amat kebala pemantoꞌ te selareh siap pas urang te empu rumah nyaꞌ datai. Ku madah ke kitaꞌ, urang te empu rumah nyaꞌ kaꞌ nyuroh kebala pemantoꞌ ya dudok, udah nyaꞌ ya kaꞌ ngageh abaꞌ mereꞌ sidaꞌ makai.
38 Amat mah urang te empu rumah nyaꞌ datai entah ke tengah malam, entah dina ari, betuah amat kebala pemantoꞌ nema sidaꞌ selareh siap.
39 Kitaꞌ alah ingat, enteꞌ urang te empu rumah tauꞌ badaꞌ jam brapa urang te kaꞌ encuri datai, pesti ya siap isaꞌ rumah ya nadai daselungkar.
40 Upa piyaꞌ mah gaꞌ kitaꞌ alah selareh siap nema Ensia te datai ari Tuhan Allah kaꞌ datai de senta te nadai kitaꞌ sangka.”
41 Udah nyaꞌ Petros nanyaꞌ: “Tuhan, pengajar Wan nyaꞌ, Wan ajar ke kami sekaleꞌ ke ugaꞌ urang?”
42 Sawot Ya: “Sapa kepalaꞌ pemantoꞌ te setia abaꞌ panai? Ya urang te deangkat urang te empu rumah nyaꞌ, ngatoh ugaꞌ kebala pemantoꞌ te kebukai, abaꞌ nguros kebala pemakai senta sidaꞌ makai.
43 Betuah amat kepalaꞌ pemantoꞌ nyaꞌ enteꞌ urang te empu rumah, nemu ya tengan ngreja tugas ya pas urang te empu rumah nyaꞌ datai.
44 Ku madah ke kitaꞌ, urang te empu rumah nyaꞌ kaꞌ ngangkat ya jadi urang te tukang nguros kebala reta ya.
45 Uleh jakoꞌ alam ati kepalaꞌ pemantoꞌ nyaꞌ asa ya nadai bayek: ‘Urang te empu rumah toꞌ jong nitauꞌ datai-datai.’ Baroꞌ kepalaꞌ pemantoꞌ nyaꞌ belaboh mangkong malok kebala pemantoꞌ beinoꞌ laki te de baroh ya, abaꞌ ya nginom sampai mabok.
46 Pas senta te nadai desangka kepalaꞌ pemantoꞌ nyaꞌ sama sekaleꞌ, urang te empu rumah nyaꞌ kaꞌ datai abaꞌ kaꞌ ngukom kepalaꞌ pemantoꞌ te jaiꞌ nyaꞌ sampai mati. Ya daukom belaꞌ abaꞌ urang te nadai setia.
47 Asa pemantoꞌ tauꞌ badaꞌ apa te dakedekaꞌ urang te empu rumah, uleh ya nadai siap abaꞌ nadai mulah apa te dakedekaꞌ urang te empu rumah nyaꞌ, pemantoꞌ nyaꞌ lebeh mayoh depangkong paloꞌ.
48 Uleh sapa jaꞌ pemantoꞌ te nitauꞌ badaꞌ apa te dakedekaꞌ urang te empu rumah, uleh ya mulah utai te nyuroh ya alah depangkong paloꞌ, ya lebeh siket depangkong paloꞌ. Ugaꞌ urang te mayoh dabereꞌ, mayoh gaꞌ datuntot ari ya, abaꞌ ke sapa jaꞌ te mayoh dapecayaꞌ, ari ya lebeh mayoh ageꞌ datuntot.”
Pemedeh urang te nunaꞌ Isa
49 Isa madah ageꞌ ke muret Ya: “Ku datai ngemaiꞌ api ke dunia toꞌ abaꞌ Ku ngarap api nyaꞌ nyau udah idop.
50 Uleh sebedau utai nyaꞌ datai, Ku lampar mayoh ngasa pemedeh. Uleh aja tusah ati Ku nema ugaꞌ nyaꞌ bedau datai ke Ku.
51 Sangkaꞌ kitaꞌ Ku datai ke dunia toꞌ ngemaiꞌ damai? Ku madah ke kitaꞌ, ukai damai te Ku baiꞌ uleh pelayaꞌ.
52 Nema belaboh ari entoꞌ, kaꞌ adai pelayaꞌ entara limaꞌ urang alam sigeꞌ rumah, tiga ngelawan dua abaꞌ dua ngelawan tiga.
53 Apai kaꞌ ngelawan anak ya te laki, abaꞌ anak ya te laki ngelawan apai, inai kaꞌ ngelawan anak ya te inoꞌ abaꞌ anak ya te inoꞌ ngelawan inai ya, entua te inoꞌ kaꞌ ngelawan menantu te inoꞌ abaꞌ menantu te inoꞌ ngelawan entua ya te inoꞌ.”
Ngelala tana jaman
54 Isa madah ageꞌ ke urang mayoh te diyaꞌ: “Enteꞌ kitaꞌ medaꞌ mua ari mayoh bong ke mata ari padam pesti lansong kitaꞌ madah: ‘Kaꞌ ujan ari toꞌ.’ Abaꞌ tulu mah ari ujan.
55 Abaꞌ enteꞌ kitaꞌ medaꞌ ribot ari selatan pesti kitaꞌ madah: ‘Kaꞌ legaꞌ ari toꞌ.’ Abaꞌ tulu mah ari legaꞌ.
56 Oi kitaꞌ urang te budi-budi panai, kitaꞌ tauꞌ ngira cuaca abaꞌ medaꞌ apa te tejadi de alam toꞌ. Uleh ngapa kitaꞌ nitauꞌ ngira kebala tana te adai tengan toꞌ?
57 Abaꞌ ngapa kitaꞌ nitauꞌ mutos kedireꞌ apa te kenaꞌ?
58 Enteꞌ adai urang te nuntot kitaꞌ ke pengadel, berusaha kah isaꞌ kitaꞌ abaꞌ lawan kitaꞌ udah bedamai de tengah jalai, isaꞌ kitaꞌ nadai dairet ya ke akim. Akim nyerah kitaꞌ ke pelisi, abaꞌ pelisi majak kitaꞌ ke alam penyara.
59 Ku madah ke kitaꞌ, kitaꞌ pesti nadai desadi keluar ari penyara sampai kitaꞌ mayar ugaꞌ utang kitaꞌ.”