Isa ngajar kebala muret Ya bradua
11
Adai sekaleꞌ Isa bradua, udah Ya bradua sikoꞌ muret Ya mintaꞌ ke Isa, jakoꞌ ya: “Guru, ajar kah kami bradua upa Yohanes ngajar kebala muret ya bradua.”
2 Sawot Isa ke sidaꞌ: “Enteꞌ kitaꞌ bradua padah ke upa pitoꞌ:
‘Tuhan Allah Apai kami te de sruga, kami bradua isaꞌ ugaꞌ urang ngangkoꞌ Wan mah Tuhan Allah te Kudos;
Kami mintaꞌ isaꞌ Wan datai jadi Raja mrintah alam idop ugaꞌ urang.
3 Bereꞌ kah ke kami pemakai te cukop ngenap ari.
4 Ampon kah dusa kami,
nema kami ngampon gaꞌ ugaꞌ urang te udah mulah penyalah ke kami;
Nang Wan ngengaꞌ kami mulah dusa enteꞌ kami tengan dacuba.’ ”
5 Baroꞌ Isa madah ke kebala muret Ya: “Empama teh adai de entara kitaꞌ angkat ke rumah kawan kitaꞌ tengah malam abaꞌ madah ke ya: ‘Kawan, ku kaꞌ nangkap tiga igeꞌ ruti ke meh, asa anoꞌ lah ku malas ke meh,
6 tauꞌ badaꞌ adai kawan ku te bejalai jaoh bemalam de rumah ku, uleh ku niseꞌ utai te datemu ya.’
7 Empama teh, kawan meh nyaꞌ nyawot ari alam bilek: ‘Nang rinah ngaru ku, pintu kami udah despak, ku abaꞌ kebala anak ku nyau tinok, ningkoh ku angkat mereꞌ utai ke meh.’
8 Ku madah ke kitaꞌ: Semaru ngai mah ya mereꞌ utai ke urang nyaꞌ amat nyaꞌ kawan ya, uleh nema urang nyaꞌ tengek nadai malu mintaꞌ sengabot, kebaꞌ nyaꞌ nyuroh ya angkat abaꞌ mereꞌ apa te daperlu urang nyaꞌ.
9 Kebaꞌ nyaꞌ Ku madah ke kitaꞌ: Mintaꞌ jaꞌ ke Tuhan Allah, pesti Tuhan Allah mereꞌ ke kitaꞌ, gigaꞌ jaꞌ pesti kitaꞌ nemu, ketok jaꞌ pesti pintu dabukaꞌ ke kitaꞌ.
10 Nema ugaꞌ urang te mintaꞌ pesti mah ya nerimaꞌ, ugaꞌ urang te ngigaꞌ pesti mah ya nemu, abaꞌ ugaꞌ urang te ngetok pesti mah pintu dabukaꞌ ke ya.
11 Pesti niseꞌ de entara kitaꞌ kebala apai te rinah kaꞌ mereꞌ ular ke anak ya enteꞌ anak ya mintaꞌ ikan
12 abaꞌ mereꞌ kala enteꞌ anak ya mintaꞌ teloꞌ.
13 Enteꞌ kitaꞌ te nadai bayek jaꞌ tauꞌ mereꞌ utai te bayek ke anak kitaꞌ, apa klageꞌ Apai kitaꞌ te de sruga. Ya kaꞌ mereꞌ Roh Kudos ke urang te mintaꞌ ke Ya.”
Kuasa Isa lebeh kuat ari kuasa Besebol
14 Adai sekaleꞌ Isa muru sitan te nyuroh urang nyaꞌ bisoꞌ. Breta sitan nyaꞌ rari, urang nyaꞌ sintak tauꞌ becakap, kebaꞌ mayoh urang diyaꞌ ampal.
15 Uleh adai de entara sidaꞌ te diyaꞌ madah: “Ya tauꞌ muru sitan nema Besebola Kepalaꞌ bala sitan te mereꞌ kuasa ke Ya.”
16 Adai gaꞌ kedaꞌ sidaꞌ te encuba Ya, sidaꞌ mintaꞌ tana enteꞌ Ya amat buleh kuasa ari Tuhan Allah.
17 Uleh Isa tauꞌ badaꞌ apa te adai de piker sidaꞌ, kebaꞌ Ya madah: “Enteꞌ alam suteꞌ pemerintah kebala urang te diyaꞌ bemunsoh bunoh pesti mah pemerintah nyaꞌ nadai betan lamaꞌ, abaꞌ enteꞌ alam keluarga kebala urang te diyaꞌ areh ke pangan pesti keluarga nyaꞌ ancor.
18 Upa piyaꞌ mah gaꞌ alam pemerintah Kepalaꞌ bala sitan, enteꞌ bala sitan te diyaꞌ bemunsoh bunoh pesti mah pemerintah ya nadai betan lamaꞌ. Ku madah piyaꞌ nema kitaꞌ madah Ku muru bala sitan ngau kuasa Besebol.
19 Abaꞌ enteꞌ Ku muru bala sitan ngau kuasa Besebol, ngau kuasa sapa kebala muret kitaꞌ muru sitan? Ku madah ke kitaꞌ apa te udah dapulah kebala muret kitaꞌ kedireꞌ mah te ngau bukti enteꞌ te datudoh kitaꞌ ke Ku toꞌ salah.
20 Uleh nema Ku muru sitan ngau kuasa Tuhan Allah, nyaꞌ ngau bukti Pemerintah Tuhan Allah adai de tengah kitaꞌ.”
21 Baroꞌ Isa nyamong ageꞌ cakap Ya: “Kepalaꞌ bala sitan nyaꞌ kebarat urang te kuat. Enteꞌ urang te kuat nyaꞌ abaꞌ kebala alat perang ya adai ugaꞌ ngau ya nyaga rumah ya, aman kebala utai te daempu ya.
22 Uleh enteꞌ urang te lebeh kuat ageꞌ ari urang nyaꞌ datai, nyerang abaꞌ ngalah urang nyaꞌ. Urang te lebeh kuat ngameꞌ kebala alat perang te deagam urang nyaꞌ tauꞌ nyaga ya. Baroꞌ urang te lebeh kuat nyaꞌ magi kebala barang te derampas ya ke urang bukai.
23 Sapa te nadai abaꞌ Ku, bereti ngelawan Ku. Sapa nadai ngumpol dumba abaꞌ Ku, bereti ya nyuroh kebala dumba pamar piyar.”
Sitan bebalek ageꞌ
24 Baroꞌ Isa madah: “Enteꞌ sitan rari ari ensia, ya angkat ke teban tanah te rangkai, ngigaꞌ teban te jalai belepa. Uleh nema ya nadai nemu teban jalai ya belepa kebaꞌ jakoꞌ alam ati ya: ‘Ku kaꞌ bebalek ageꞌ ke rumah ku, ke ensia te udah jalai ku diyau.’
25 Pas ya bebalek, sitan nyaꞌ medaꞌ rumah nyaꞌ nyau breseh abaꞌ udah delagaꞌ.
26 Baroꞌ ya angkat abaꞌ ngemaiꞌ tujoh sitan te kebukai te lebeh jaiꞌ ageꞌ ari ya, sidaꞌ tamaꞌ ke rumah nyaꞌ, ke ensia te udah jalai ya diyau. Kebaꞌ idop urang nyaꞌ lebeh parah ageꞌ ari ya te semaru.”
Urang te paleng betuah
27 Tengan Isa ageꞌ becakap, begoꞌ sikoꞌ urang inoꞌ ari entara urang banyau te diyaꞌ, jakoꞌ ya: “Betuah amat inai Wan te udah ngadai abaꞌ ngintu Wan.”
28 Isa madah: “Amat mah, uleh urang te lebeh betuah, urang te ninga jakoꞌ Tuhan Allah abaꞌ nunaꞌ te depadah Ya.”
Urang mintaꞌ tana ari Isa
29 Tengan nyaꞌ adai lebeh mayoh ageꞌ urang datai ninga Isa, Ya madah: “Urang te idop de jaman toꞌ lampar jaiꞌ. Sidaꞌ niseꞌ pemadoꞌ mintaꞌ tana,b uleh ke sidaꞌ sama sekaleꞌ nadai dabereꞌ tana bukai ari tana nabi Yunus.
30 Upa medaꞌ nabi Yunus ngau tana urang Niniwi dulau teh, upa piyaꞌ mah Ensia te datai ari Tuhan Allah ngau tana urang te de jaman toꞌ.
31 Jemah lah senta Tuhan Allah ngukom ugaꞌ urang, ratu ari selatanc bangket abaꞌ kitaꞌ te de jaman toꞌ, ya kaꞌ madah penyalah kitaꞌ. Nema ratu nyaꞌ sangop datai ari ujong bumi kaꞌ ninga pemanai raja Salomo, uleh Ku madah ke kitaꞌ urang te adai ditoꞌ bah lebeh ageꞌ ari raja Salomo, uleh kitaꞌ ngai ninga Ya.
32 Jemah lah senta Tuhan Allah ngukom ugaꞌ urang, urang Niniwi bangket abaꞌ kitaꞌ te de jaman toꞌ, sidaꞌ kaꞌ madah penyalah kitaꞌ. Nema kebala urang Niniwi nyaꞌ nudi kebala dusa sidaꞌ jalai sidaꞌ ninga kotbah Yunus, uleh Ku madah ke kitaꞌ entoꞌ urang te adai ditoꞌ bah lebeh ageꞌ ari nabi Yunus, uleh kitaꞌ ngai nudi kebala dusa kitaꞌ.”
Kelita tuboh
33 Udah nyaꞌ Isa nyamong pengajar Ya ageꞌ: “Niseꞌ urang te nungon kelita rinah nepoꞌ de teban te linong, abaꞌ nungon kelita rinah datungkop ngau kulak. Ya pesti nepoꞌ de atau teban te tingeꞌ isaꞌ urang te tamaꞌ tauꞌ medaꞌ te tampak.d
34 Mata toꞌ kelita tuboh kitaꞌ, enteꞌ mata kitaꞌ bayek tampak gaꞌ ugaꞌ tuboh. Uleh enteꞌ mata kitaꞌ jaiꞌ petang gaꞌ tuboh kitaꞌ.
35 Kebaꞌ nyaꞌ prati amat kah isaꞌ terang te adai de direꞌ kitaꞌ nyaꞌ, bukai petang.
36 Enteꞌ ugaꞌ tuboh kitaꞌ tampak abaꞌ niseꞌ teban te petang, idop kitaꞌ tampak sama upa medaꞌ kelita nerang ngau sinar ya ke kitaꞌ.”
Isa mejah urang te ahli alam Printah Tuhan Allah abaꞌ urang Parisi
37 Pas Isa udah ngajar, sikoꞌ urang ari kelumpok Parisi ngunang Isa makai de rumah ya. Udah nyaꞌ Isa angkat ke rumah nyaꞌ, diyaꞌ Ya dudok makai.
38 Urang Parisi nyaꞌ ampal medaꞌ Isa sebedau makai nadai masok jari nunaꞌ perator agama Yahudi.
39 Uleh Tuhan madah ke ya: “Kitaꞌ urang Parisi, kitaꞌ masok luar pingan abaꞌ cawan, uleh de alam direꞌ kitaꞌ haja rugoꞌ pemenyat abaꞌ kitaꞌ tamaꞌ.
40 Kitaꞌ urang budu! Tuhan Allah nadai peroꞌ mulah tuboh te de luar, Ya mulah gaꞌ te de dalam.
41 Uleh bereꞌ kah ari iseꞌ ati kitaꞌ kebala pemereꞌ ke urang misken. Enteꞌ kitaꞌ mulah upa piyaꞌ, kitaꞌ jadi breseh de mua Tuhan Allah.”
42 Isa madah ageꞌ: “Rugi amat kitaꞌ urang Parisi! Amat mah kitaꞌ mereꞌ perpulohan ari telaseh, inggu,e abaꞌ brena leman rempah, uleh kitaꞌ nyemeh mipeh urang, abaꞌ nadai kaseh ke Tuhan Allah. Tunaꞌ kitaꞌ alah kaseh ke Tuhan Allah abaꞌ nadai nyemeh mipeh urang, abaꞌ selareh mereꞌ perpulohan.
43 Rugi amat kitaꞌ urang Parisi! Nema kitaꞌ keran dudok de mua de alam rumah teban te jalai kita nyemah Tuhan Allah, abaꞌ kitaꞌ keran nerimaꞌ hormat de teban urang te ramai.
44 Rugi amat kitaꞌ urang Parisi! Nema kitaꞌ upa kubor te nadai ngau tana; kebala urang te bejalai de atau nyaꞌ nitauꞌ badaꞌ apa te tengan sidaꞌ tijak.”
45 Sikoꞌ ari entara urang te ahli de alam kitab te datules Musa te adai diyaꞌ madah, jakoꞌ ya: “Guru, Wan becakap munyi piyaꞌ bereti Wan mejah kami gaꞌ.”
46 Isa nyawot ya: “Rugi amat gaꞌ kitaꞌ kebala urang te ahli de alam kitab te datules Musa! Nema kebala utai te berat kitaꞌ tepoꞌ de bau urang, uleh kitaꞌ kedireꞌ datai ke siket mah ngai mantoꞌ urang nangong nyaꞌ isaꞌ sidaꞌ nunaꞌ jakoꞌ Tuhan Allah.
47 Rugi amat kitaꞌ nema kitaꞌ mulah kubor kebala nabi te dulau, bataꞌ puyang jagang kitaꞌ kedireꞌ mah te udah munoh sidaꞌ.
48 Nyaꞌ reti kitaꞌ belaꞌ, kitaꞌ ngamat te dapulah puyang jagang kitaꞌ. Nema sidaꞌ munoh kebala nabi, abaꞌ kitaꞌ udah mulah kubor sidaꞌ.
49 Kebaꞌ nyaꞌ Tuhan Allah dulau teh madah ngau kebala pemanai Ya: ‘Ku kaꞌ ngutos ke urang Israel kebala nabi abaꞌ kebala rasol. Adai kedaꞌ ari entara sidaꞌ dabunoh abaꞌ adai kedaꞌ ageꞌ sidaꞌ prisa.’
50 Nyaꞌ nyuroh urang te de jaman toꞌ datuntot nema darah ugaꞌ nabi te udah te tepanset breta dunia dapulah,
51 belaboh ari darah Habel sampai ke darah Sakaria te udah dabunoh de alam Rumah Kudos Tuhan Allah entara mesbah abaꞌ de Teban te Ma Suci. Ku madah ke kitaꞌ, ugaꞌ nyaꞌ kaꞌ datuntot ari urang te de jaman toꞌ.
52 Rugi amat kitaꞌ kebala urang te ahli de alam kitab te datules Musa! Nema kitaꞌ udah ngameꞌ kunci te ngau mukaꞌ pintu jalai urang ngelala Tuhan Allah; uleh kitaꞌ kedireꞌ nadai tamaꞌ ke alam nyaꞌ, abaꞌ urang te berusaha kaꞌ tamaꞌ ke alam nyaꞌ kitaꞌ aru kah.”