Yohanes 1

KITAB INYEL

YOHANES

Pemadah Tuhan Allah te udah jadi ensia

Ari semaru, Pemadah Tuhan Allah udah adai; Ya abaꞌ Tuhan Allah, abaꞌ Ya nyaꞌ Allah. 2 Sebedau dunia depulah, Ya adai abaꞌ Tuhan Allah. 3 Ugaꞌ kebala utai depulah Tuhan Allah ari Ya. Abaꞌ datai ke suteꞌ mah niseꞌ utai te nadai depulah enteꞌ nadai ari Ya. 4 Pemadah Tuhan Allah nyaꞌ te mereꞌ idop, abaꞌ idop nyaꞌ mereꞌ terang ke ensia. 5 Terang nyaꞌ bedawar sengabot de teban te petang, abaꞌ petang nadai tekalah ke terang nyaꞌ.

6 Tuhan Allah ngutos sikoꞌ urang te nama Yohanes. 7 Yohanes alah besaksi upa kati terang nyaꞌ, isaꞌ ugaꞌ urang tauꞌ pecayaꞌ ke Ya. 8 Yohanes, ukai terang nyaꞌ, uleh ya alah besaksi ke kebala urang upa kati terang nyaꞌ. 9 Terang te bamat-amat nyaꞌ, te nerang ugaꞌ ensia tengan datai ke dunia toꞌ.

10 Pemadah Tuhan Allah nyaꞌ udah adai de dunia toꞌ, abaꞌ dunia toꞌ depulah Ya, uleh kebala urang te de dunia toꞌ nadai ngelala Ya. 11 Ya datai ke kebala urang de bansa Ya, uleh sidaꞌ ngai nerimaꞌ Ya. 12 Uleh ugaꞌ urang te nerimaꞌ Ya debereꞌ kuasa isaꞌ jadi kebala anak Tuhan Allah, nyaꞌ mah sidaꞌ te pecayaꞌ ke Ya. 13 Sidaꞌ jadi kebala anak Tuhan Allah ukai deperanak ari apai inai abaꞌ ukai gaꞌ kedekaꞌ ensia. Uleh Tuhan Allah kedireꞌ mah te nyuroh sidaꞌ jadi kebala anak Ya. 14 Pemadah Tuhan Allah nyaꞌ udah jadi ensia, abaꞌ diyau de entara kita, abaꞌ kita udah medaꞌ lampar besai kuasa Ya. Lampar besai kuasa Anak tungal Apai, besai pemayek ati abaꞌ kenaꞌ amat pengajar Ya. 15 Yohanes besaksi ke kebala urang upa kati Pemadah Tuhan Allah nyaꞌ, ya madah ngau goꞌ te sareng, “Toꞌ mah Ya, te ku padah ke dulau teh, Ya te datai udah ku lah lebeh penteng ari ku, nema Ya udah adai sebedau ku deadai.” 16 Tegal besai pemayek ati Ya, nyaꞌ nyuroh Ya mereꞌ kita kebala tuah te datai ke menatai. 17 Tuhan Allah mereꞌ Printah Ya ke kita ari Musa, uleh Tuhan Allah nganyaꞌ pemayek ati Ya abaꞌ pengajar te kenaꞌ ke kita ari Isa Al Maseh. 18 Niseꞌ urang te kalaꞌ medaꞌ Tuhan Allah; bukai ari Anak tungal Apai te paleng semak abaꞌ Apai. Ya mah Allah, Ya mah te nganyaꞌ ke kita sapa Tuhan Allah nyaꞌ.

Yohanes besaksi sapa Isa nyaꞌ

(Mat. 3:1-12; Mrk. 1:1-8; Luk. 3:3-6, 15-17)

19 Toꞌ mah te desaksi Yohanes Pemaneꞌ, jalai kebala pemimpen sidaꞌ Yahudi te de Yerosalem ngutos kebala imam abaꞌ kebala urang Liwi ngusong Yohanes. Sidaꞌ nanyaꞌ ya, “Sapa meh toꞌ?”

20 Baroꞌ Yohanes madah pengamat, “Ku toꞌ ukai Al Maseh.”

21 Sidaꞌ nanyaꞌ ya, “Enteꞌ piyaꞌ, sapa meh, ukai meh nabi Elia?”

Sawot Yohanes, “Ukai!”

Sidaꞌ nanyaꞌ ageꞌ, “Ukai meh nabi te kaꞌ datai lah?”

Sawot Yohanes, “Ukai!”

22 Baroꞌ sidaꞌ madah, “Enteꞌ piyaꞌ sapa pengamat meh toꞌ? Isaꞌ kami nyamai madah ke kebala urang te nyuroh kami. Enteꞌ jakoꞌ meh, sapa meh toꞌ?”

23 Yohanes madah, “Ku mah urang te madah ngau goꞌ te sareng de tanah luah te beengkrangan: Bujor ke jalai ke Tuhan! upa te detules de kitab nabi Yesaya.”

24 Kebala urang te deutos datai ngusong Yohanes nyaꞌ adai kedaꞌ sidaꞌ Parisi. 25 Sidaꞌ nanyaꞌ Yohanes, “Enteꞌ meh ukai Al Maseh, ukai Elia, abaꞌ ukai nabi te kaꞌ datai, ngapa meh maneꞌ urang?”

26 Sawot Yohanes, “Ku maneꞌ urang ngau aiꞌ, uleh de tengah kitaꞌ adai sikoꞌ urang te bedau kitaꞌ kelala. 27 Ya te datai udah ku lah, datai ke mukaꞌ tali sepatu Ya mah, ku nadai patot.”

28 Ugaꞌ nyaꞌ tejadi de Betania de seberang sungai Yordan, teban Yohanes mayoh maneꞌ urang.

Yohanes Pemaneꞌ madah sapa pengamat Isa

29 Sari suteꞌ, Yohanes Pemaneꞌ medaꞌ Isa datai ngusong ya. Baroꞌ Yohanes madah, “Pedaꞌ kah Anak Dumba Tuhan Allah, Ya mah te ngapos dusa ensia de dunia. 30 Ya mah urang te ku padah ke datai udah ku lah. Ya jaoh lebeh penteng ari ku, nema sebedau ku naꞌ adai, Ya udah adai. 31 Semaru ku kedireꞌ nadai gaꞌ ngelala Ya. Uleh Tuhan Allah nyuroh ku maneꞌ kebala urang ngau aiꞌ isaꞌ sidaꞌ Israel tauꞌ ngelala Ya.”

32 Baroꞌ Yohanes besaksi ke apa te udah ya pedaꞌ. Ya madah, “Ku medaꞌ Roh Kudos turon ari langet upa burong dara, abaꞌ Roh nyaꞌ diyau abaꞌ Ya. 33 Tengan nyaꞌ ku bedau ngelala Ya. Uleh Tuhan Allah te udah nyuroh ku maneꞌ urang ngau aiꞌ, madah ke ku upa pitoꞌ, ‘Enteꞌ meh medaꞌ Roh Kudos turon ke sikoꞌ urang abaꞌ diyau abaꞌ Ya, nyaꞌ mah Ya te kaꞌ maneꞌ urang ngau Roh Kudos.’ 34 Ku kedireꞌ udah medaꞌ Ya abaꞌ ku besaksi enteꞌ Ya mah Anak Tuhan Allah.”

Isa mileh kebala muret Ya te semaru

35 Ari suteꞌ, Yohanes Pemaneꞌ abaꞌ dua ikoꞌ muret ya diri de Betania de seberang sungai Yordan. 36 Pas ya medaꞌ Isa mansaꞌ, ya madah, “Pedaꞌ kah Anak Dumba Tuhan Allah!”

37 Dua ikoꞌ muret Yohanes ninga apa te depadah ya, baroꞌ senikoꞌ angkat nerudi Isa. 38 Pas Isa malek ke belakang Ya medaꞌ senikoꞌ nerudi Ya, baroꞌ Isa nanyaꞌ senikoꞌ, “Apa te kaꞌ senikoꞌ gigaꞌ kah?” Baroꞌ senikoꞌ nyaꞌ nyawot, “Rabi (reti nyaꞌ Guru), dini bah Wan diyau?”

39 Ya madah ke senikoꞌ, “Boh abaꞌ Ku isaꞌ senikoꞌ medaꞌ.” Baroꞌ senikoꞌ nyaꞌ nerudi abaꞌ medaꞌ dini Ya diyau. Sari nyaꞌ senikoꞌ diyau abaꞌ Ya nema nyaꞌ nyau kurang lebeh jam empat ujong ari. 40 Nama sikoꞌ urang te ninga jakoꞌ Yohanes abaꞌ te nerudi Isa nyaꞌ Andrias. Andrias toꞌ menyadeꞌ Simon Petros. 41 Andrias beburoh ngusong Simon, menyadeꞌ ya, blumaꞌ madah, “Kemua udah betemu abaꞌ Mesias.” (Mesias toꞌ sama mah abaꞌ Al Maseh, reti nyaꞌ Raja Penyelamat te dedanyi Tuhan Allah.) 42 Baroꞌ Andrias ngemaiꞌ Simon ngusong Isa. Isa nilek Simon abaꞌ madah, “Meh Simon, anak Yohanes, meh kaꞌ degelar Kepas.” (Kepas toꞌ sama mah abaꞌ Petros, reti nyaꞌ batu besai.)

43 Ari suteꞌ Isa mutos angkat ke Galelia. Ya betemu abaꞌ Pelipos, abaꞌ madah, “Boh nerudi Ku!” 44 Pelipos nyaꞌ sidaꞌ Betsaida, sekampong abaꞌ Andrias abaꞌ Petros. 45 Udah nyaꞌ Pelipos betemu abaꞌ Natanel abaꞌ madah ke ya, “Kami udah betemu abaꞌ Ya te detules alam Prator Musa abaꞌ kebala nabi, Ya mah Isa, anak Yusop sidaꞌ Nasaret.”

46 Uleh Natanel nyawot, “Tauꞌ weh utai te bayek datai ari Nasaret?” Baroꞌ Pelipos madah, “Boh tua medaꞌ!”

47 Pas Isa medaꞌ Natanel ngusong Ya, Isa madah sapa Natanel nyaꞌ, jakoꞌ Ya “Pedaꞌ kitaꞌ, ya toꞌ te patot dekumai sidaꞌ Israel, ya toꞌ nadai gaꞌ kalaꞌ nipu urang.”

48 Ninga piyaꞌ Natanel nanyaꞌ Isa, “Kati Wan tauꞌ ngelala ku?”

Baroꞌ Isa nyawot ya, “Sebedau Pelipos ngumai meh, Ku lamaꞌ udah medaꞌ meh de baroh pon ara.”

49 Udah nyaꞌ Natanel madah ke Isa, “Guru, Wan mah Anak Tuhan Allah, Wan mah Raja sidaꞌ Israel!”

50 Baroꞌ Isa madah, “Meh pecayaꞌ ke Ku, tegal Ku madah, Ku udah medaꞌ meh de baroh pon ara? Meh kaꞌ medaꞌ kebala utai te jaoh lebeh besai ari nyaꞌ.” 51 Baroꞌ Isa madah ageꞌ “Ku kaꞌ madah ngau pengamat ke meh, kitaꞌ kaꞌ medaꞌ langet tebukaꞌ abaꞌ kebala mlikat Tuhan Allah turon nikeꞌ ke atau Anak Ensia.”