Brita Yohanes
3
Pas kelimaꞌ belas taon Kaisar Tiberius pemimpen te paleng tingeꞌ de Ruma mrintah, Pontios Pelatos tengan jadi gubernor wilayah Yudia, abaꞌ Herodes mrintah de wilayah Galelia, tengan nyaꞌ Plipos menyadeꞌ ya mrintah de wilayah Iturea abaꞌ wilayah Trakonitis, abaꞌ Lisanias mrintah wilayah Abilene.
2 Tengan nyaꞌ Hanas abaꞌ Kayapas jadi Imam Besai agama Yahudi. Tengan nyaꞌ gaꞌ, Tuhan Allah madah ke Yohanes anak Sakaria tengan ya adai de tanah luah te beengkrangan.
3 Udah nyaꞌ, Yohanes nekap daerah sungai Yordan madah pesau ari Tuhan Allah, isaꞌ kebala urang depaneꞌ ngau tana sidaꞌ nudi kebala dusa sidaꞌ abaꞌ bebalek ke Tuhan Allah, isaꞌ Tuhan Allah ngampon kebala dusa sidaꞌ.
4 Te dapulah Yohanes nyaꞌ nunaꞌ te datules alam kitab nabi Yesaya:
“Adai urang te madah ngau goꞌ te sareng de tanah luah te beengkrangan
‘Ageh kah jalai ngau Tuhan Allah,
bujor kah jalai ngau Ya.
5 Ugaꞌ darong kaꞌ datimon,
ugaꞌ buket bayek tingeꞌ, bayek baroh kaꞌ derata,
jalai te bingkok liok kaꞌ dabujor,
te tingeꞌ baroh kaꞌ derata,
6 abaꞌ ugaꞌ urang kaꞌ medaꞌ cara Tuhan Allah nyelamat urang.’ ”a
7 Udah nyaꞌ Yohanes madah ke urang banyau te kaꞌ depaneꞌ te datai ngusong ya, jakoꞌ ya: “Oi kitaꞌ kebala urang te jat upa ular, sapa te madah kitaꞌ tauꞌ rari ari ukom Tuhan Allah te kaꞌ datai?
8 Pulah kah kebala te bayek ngau tana kitaꞌ nudi kebala dusa abaꞌ nang miker alam ati kitaꞌ kedireꞌ: ‘Kami tauꞌ selamat nema Abraham puyang jagang kami!’ Ku madah ke kitaꞌ: Tuhan Allah tauꞌ mulah ucoꞌ icet ke Abraham ari kebala batu toꞌ.
9 Tuhan Allah kaꞌ ngukom kebala urang te ngai nudi kebala dusa sidaꞌ, upa medaꞌ urang nebang kayu te rumau ngau kapak udah nyaꞌ depanok ke alam api.”
10 Urang banyau nanyaꞌ ke Yohanes: “Enteꞌ piyaꞌ, apa te alah kami pulah kah?”
11 Sawot ya: “Sapa te adai dua uteꞌ baju, ya alah mereꞌ ke te niseꞌ baju, abaꞌ sapa kitaꞌ adai te depakai ya alah mereꞌ ke urang bukai te niseꞌ.”
12 Adai gaꞌ datai kiyaꞌ penageh pajak te kaꞌ depaneꞌ abaꞌ sidaꞌ nanyaꞌ ke ya: “Guru, apa te alah kami pulah?”b
13 Sawot ya: “Nang kitaꞌ nageh lebeh ari te udah deatoh.”
14 Abaꞌ kebala prajuret nanyaꞌ ke ya gaꞌ: “Kati kami, apa te alah kami pulah?” Sawot Yohanes ke sidaꞌ: “Nang kitaꞌ maksa, nang ngerampas duet urang, cukop mah direꞌ ngau gajeh kitaꞌ kedireꞌ.”
15 Pas tengan nyaꞌ kebala urang mayoh tengan nungoꞌ abaꞌ belaboh miker alam ati sidaꞌ kedireꞌ, ni naꞌ Yohanes nyaꞌ mah Al Maseh Raja te dedanyi Tuhan Allah, te tengan daentang sidaꞌ.
16 Kebaꞌ Yohanes madah ke ugaꞌ urang te diyaꞌ: “Ku maneꞌ kitaꞌ ngau aiꞌ, uleh Ya te kaꞌ datai nyaꞌ lebeh bekuasa ari ku. Mukaꞌ tali sepatu Ya ku nadai patot. Ya kaꞌ maneꞌ kitaꞌ ngau Roh Kudos abaꞌ ngau api.
17 Ya kaꞌ ngadel ugaꞌ ensia, Ya kaꞌ nyemeh urang te kaꞌ nudi kebala dusa ari urang te ngai nudi kebala dusa. Ya upa urang te beuma nyemeh ganom te beiseꞌ ari ampaꞌ. Ganom te beiseꞌ kaꞌ Ya pajak ke alam durong Ya, uleh ampaꞌ kaꞌ datunu alam api te nitauꞌ padam.”
18 Piyaꞌ mah Yohanes ngajar brena macam pengajar ke urang banyau blumaꞌ ya nusoi brita bayek ari Tuhan Allah ke sidaꞌ.
19 Tengan nyaꞌ, Yohanes ngerara Herodes Antipas te mrintah de wilayah Galelia nema ya jadi ke Herodias,c bini menyadeꞌ direꞌ. Abaꞌ Yohanes ngerara gaꞌ ugaꞌ pemenyat te kebukai te dapulah Herodes.
20 Uleh Herodes empala namah pemenyat direꞌ, ya majak Yohanes ke alam penyara.d
Isa depaneꞌ
21 Sebedau Yohanes dapenyara ya maneꞌ urang banyau, Isa sigeꞌ depaneꞌ ya, abaꞌ tengan Isa bradua langet tebukaꞌ.
22 Tengan nyaꞌ turon Roh Kudos upa burong dara ke atau Ya, abaꞌ tedinga goꞌ Tuhan Allah madah ari langet: “Meh mah Anak Ku te Ku kaseh, Ku aja gaga amat mah ke Meh.” e
Tuson pureh puyang jagang Isa
23 Pas Isa kira-kira umor tiga puloh taon, Ya belaboh ngajar urang banyau. Jakoꞌ urang Ya anak Yusop. Yusop anak Ili,
24 Ili anak Matat, Matat anak Liwi, Liwi anak Malki, Malki anak Yanai, Yanai anak Yusop,
25 Yusop anak Matica, Matica anak Amos, Amos anak Nahum, Nahum anak Hesli, Hesli anak Nagai,
26 Nagai anak Maat, Maat anak Matica, Matica anak Simei, Simei anak Yosek, Yosek anak Yuda,
27 Yuda anak Yohanan, Yohanan anak Risa, Risa anak Serubabel, Serubabel anak Sealtiel, Sealtiel anak Neri,
28 Neri anak Malki, Malki anak Adi, Adi anak Kosam, Kosam anak Elmadam, Elmadam anak Er,
29 Er anak Yesua, Yesua anak Eliser, Eliser anak Yurim, Yurim anak Matat, Matat anak Liwi,
30 Liwi anak Simeon, Simeon anak Yehuda, Yehuda anak Yusop, Yusop anak Yunam, Yunam anak Elyakim,
31 Elyakim anak Melea, Melea anak Mina, Mina anak Matata, Matata anak Natan, Natan anak Daod,
32 Daod anak Isai, Isai anak Ubed, Ubed anak Buas, Buas anak Salmon, Salmon anak Nahason,
33 Nahason anak Aminadap, Aminadap anak Admin, Admin anak Arni, Arni anak Hesron, Hesron anak Pires, Pires anak Yehuda,
34 Yehuda anak Yakob, Yakob anak Isak, Isak anak Abraham, Abraham anak Terah, Terah anak Nahor,
35 Nahor anak Serug, Serug anak Rehu, Rehu anak Pelek, Pelek anak Iber, Iber anak Salmon,
36 Salmon anak Kenan, Kenan anak Arpaksat, Arpaksat anak Sem, Sem anak Noh, Noh anak Lamek,
37 Lamek anak Metusalah, Metusalah anak Henok, Henok anak Yaret, Yaret anak Mahalaleel, Mahalaleel anak Kenan,
38 Kenan anak Inos, Inos anak Set, Set anak Adam, Adam anak Tuhan Allah.