Pengadai Isa
2
Nadai lamaꞌ udah pengadai Yohanes, Kaisar Agustos pemimpen te paleng tingeꞌ de bansa Ruma, ya mrintah isaꞌ ugaꞌ urang de ugaꞌ bansa te de baroh pemerintah ya dasinsos.a
2 Nyaꞌ mah sinsos te semaru tengan Kirenios jadi gubernor de propinsi Siria.
3 Ugaꞌ urang angkat naptar direꞌ ke kuta asal puyang jagang sidaꞌ.
4-5 Nema Yusop pureh raja Daod, ya abaꞌ tunangcb ya Maria te tengan nganong, angkat ari kuta Nasaret te de wilayah Galelia ke kuta Betlehem te de wilayah Yudia, teban raja Daod adai dulau. Diyaꞌ Yusop abaꞌ Maria naptar direꞌ.
6 Tengan snikoꞌ de Betlehem, nyaꞌ mah senta Maria branak.
7 Diyaꞌ Maria branak ke miyak laki, nyaꞌ mah anak ya te tuai. Miyak nyaꞌ dabungkos ngau ampen, dapegaleꞌ de atau rumpot te de alam teban jalai nepoꞌ umpan kebala te daidop.d Sidaꞌ bemalam de kanang nyaꞌ nema teban jalai urang bemalam nyau penoh ugaꞌ.
Mlikat madah pengadai Isa ke kebala urang te ngintu dumba
8 Malam nyaꞌ, nadai jaoh ari kuta Betlehem adai kebala urang te tengan ngintu kebala dumba de padang rumpot.
9 Nadai mang-mang sikoꞌ mlikat Tuhan Allah nganyaꞌ direꞌ nyemak sidaꞌ abaꞌ sinar ari Tuhan Allah bedawar mancak sidaꞌ, sidaꞌ ma mah takot.
10 Baroꞌ mlikat Tuhan Allah madah ke sidaꞌ: “Nang kitaꞌ takot! Ku madah brita bayek ari Tuhan Allah ke kitaꞌ, te nyuroh gaga ugaꞌ bansa.
11 Malam toꞌ de kuta Daode udah adai Penyelamat kitaꞌ, Al Maseh Raja te dedanyi Tuhan Allah, nyaꞌ mah Tuhan.
12 Abaꞌ toꞌ mah kelaiꞌ, ilaꞌ kitaꞌ nemu miyak dabungkos ngau ampen, dapegaleꞌ de atau rumpot teban jalai nepoꞌ umpan kebala te daidop.”
13 Nadai mang-mang adai mayoh kebala mlikat Tuhan Allah menanyi muji Tuhan Allah, jakoꞌ sidaꞌ:
14 “Puji Tuhan Allah de sruga
abaꞌ idop penoh damai ke urang te degaga Tuhan Allah.”
15 Udah nyaꞌ kebala mlikat Tuhan Allah nudi sidaꞌ pulai ke sruga. Kebala urang te ngintu kebala dumba madah ke pangan bukai: “Boh kita angkat ke Betlehem medaꞌ apa te adai den, upa te depadah Tuhan Allah ke kita.”
16 Udah nyaꞌ, sidaꞌ beburoh angkat ke kuta Betlehem. Udah sidaꞌ ngigaꞌ baroꞌ sidaꞌ nemu Yusop abaꞌ Maria, sidaꞌ medaꞌ gaꞌ Miyak nyaꞌ tengan dapegaleꞌ de atau rumpot teban jalai nepoꞌ umpan kebala te daidop.
17 Pas kebala urang te ngintu dumba medaꞌ Miyak nyaꞌ, sidaꞌ nusoi Miyak nyaꞌ ke urang te adai diyaꞌ munyi te dadinga sidaꞌ ari mlikat Tuhan Allah.
18 Ugaꞌ urang te diyaꞌ ampal ninga apa te datusoi kebala urang te ngintu dumba nyaꞌ.
19 Uleh Maria ngingat abaꞌ ngerakau alam ati apa te udah ya dinga abaꞌ te udah ya asa kah.
20 Kebala urang te ngintu dumba nyaꞌ pulai, blumaꞌ sidaꞌ muji Tuhan Allah abaꞌ madah lampar pemayek Tuhan Allah nema apa te udah sidaꞌ dinga abaꞌ pedaꞌ kah, ugaꞌ nyaꞌ sama upa te depadah mlikat Tuhan Allah ke sidaꞌ.
Isa daserah ke Tuhan Allah
21 Pas Miyak nyaꞌ umor lapan ari, Ya dasunatf abaꞌ dabereꞌ nama Isa,g nama te depadah mlikat Tuhan Allah ke Maria sebedau ya nganong.
22 Empat puloh ari udah Isa adai, Yusop abaꞌ Maria angkat ke Yerosalem, diyaꞌ snikoꞌ ngemaiꞌ pesemah ngau tana Maria mreseh direꞌ nunaꞌ printah Tuhan Allah te datules Musa. Abaꞌ snikoꞌ ngemaiꞌ gaꞌ Miyak nyaꞌ ke Rumah Kudos Tuhan Allah, Rumah te kusos teban ngau mereꞌ pesemah abaꞌ kurban ke Tuhan Allah. Diyaꞌ snikoꞌ kaꞌ nyerah Isa ke Tuhan Allah.
23 nema adai de alam printah Tuhan Allah te datules Musa: “Ugaꞌ kebala miyak laki te tuai alah daserah ke Tuhan Allah.”h
24 Snikoꞌ ngemaiꞌ gaꞌ kurban pesemah ke Tuhan Allah, upa te depadah de alam printah Tuhan Allah te datules Musa. Diyaꞌ depadah urang tauꞌ ngemaiꞌ sepasang burong kukor uleh enteꞌ niseꞌ, urang tauꞌ gaꞌ ngemaiꞌ dua ikoꞌ anak burong dara.i
25 De Yerosalem adai Semion urang tuai te dapenoh Roh Kudos. Ya urang bayek abaꞌ patoh ke Tuhan Allah, abaꞌ ya ngentang Tuhan Allah nyelamat urang Israel.
26 Abaꞌ Roh Kudos udah nanyi ke Semion, ya nadai mati sebedau medaꞌ Al Maseh Raja Penyelamat te dedanyi Tuhan Allah.
27 Ya datai ke laman Rumah Kudos Tuhan Allah, dapimpen Roh Kudos. Tengan nyaꞌ Yusop abaꞌ Maria tamaꞌ ke laman Rumah Kudos Tuhan Allah, kaꞌ nyerah Isa ke Tuhan Allah upa te depadah de alam printah Tuhan Allah te datules Musa.
28 Ya ngameꞌ abaꞌ megai Miyak nyaꞌ blumaꞌ ya muji Tuhan Allah, jakoꞌ ya:
29 “Tuhan Allah, entoꞌ ku udah siap mati ngau ati lantang
nema Wan udah nepat danyi Wan,
30 nema mata ku kedireꞌ udah medaꞌ
Penyelamat te Wan utos.
31 Penyelamat nyaꞌ udah deamoꞌ Wan ngau ugaꞌ bansa.
32 Ya jadi terang ngau kebala bansa te kebukai datai ngusong Tuhan Allah
abaꞌ ngangkat nama bayek urang Israel te Wan empu.”j
33 Yusop abaꞌ Maria ampal ninga apa te depadah Semion ke anak snikoꞌ.
34 Semion bradua mintaꞌ ke Tuhan Allah mereꞌ berkat ngusong snikoꞌ abaꞌ madah ke Maria inai Miyak nyaꞌ: “Miyak toꞌ dautos Tuhan Allah, isaꞌ uleh Miyak toꞌ mayoh urang Israel te daselamat, abaꞌ uleh Miyak toꞌ gaꞌ mayoh urang Israel te daukom; Ya kaꞌ jadi tana ari Tuhan Allah, uleh mayoh urang te ngai ke Ya.
35 Nema Ya, ugaꞌ iseꞌ ati sidaꞌ te nadai daketauꞌ urang nyaꞌ daketauꞌ. Abaꞌ ati deꞌ Maria asa ancor jemah lah.”
36 Tengan nyaꞌ gaꞌ adai Hana nabi inoꞌ, ya udah tuai amat, ya anak Panuel ari suku Asyer. Ya sejalai abaꞌ laki ya selamaꞌ tujoh taon, udah nyaꞌ laki ya mati,
37 belaboh ari nyaꞌ ya jong idop balu. Umor ya lapan puloh empat taon, ya nadai kalaꞌ nudi Rumah Kudos Tuhan Allah abaꞌ tawas malam ya muji nyemah Tuhan Allah ngau cara bradua abaꞌ puasa.k
38 Tengan Semion becakap abaꞌ Yusop abaꞌ Maria, Hana datai kiyaꞌ betrimaꞌ kaseh ke Tuhan Allah, ya madah Miyak nyaꞌ ke ugaꞌ urang te ngentang danyi Tuhan Allah ngau ngelepas urang Yerosalem.
39 Udah Yusop abaꞌ Maria mulah apa te alah dapulah snikoꞌ tengan nyaꞌ nunaꞌ printah Tuhan Allah te datules Musa, sidaꞌ pulai ke Nasaretl ke kuta sidaꞌ de wilayah Galelia.
40 Miyak nyaꞌ betamah besai, Ya angas regas, Ya lampar panai abaꞌ Ya ma mah dekaseh Tuhan Allah.
Isa de Rumah Kudos Tuhan Allah
41 Ngenap taon apai inai Isa ke Yerosalem abaꞌ ngeraya ari Paskahm urang Yahudi, ngau ngingat puyang jagang sidaꞌ dalepas ari bansa Meser.
42 Pas umor Isa dua belas taon, sidaꞌ ke kuta Yerosalem ngeraya ari besai nyaꞌ upa sengket nunaꞌ te dapulah urang Yahudi selamaꞌ toꞌ.
43 Udah temoꞌ ari besai nyaꞌ snikoꞌ pulai, uleh Isa kenaꞌ dudi de Yerosalem nadai daketauꞌ apai inai Ya,
44 nema snikoꞌ ngira Ya nerudi kebala urang te suteꞌ pejalai abaꞌ sidaꞌ. Udah seari snikoꞌ bejalai, baroꞌ snikoꞌ tauꞌ badaꞌ Isa niseꞌ, snikoꞌ ngigaꞌ Ya de kebala keluarga abaꞌ ugaꞌ urang te deklala.
45 Uleh snikoꞌ nadai nemu Ya, kebaꞌ snikoꞌ bebalek ke Yerosalem ngigaꞌ Ya.
46 Ari ketiga baroꞌ snikoꞌ nemu Isa de Rumah Kudos Tuhan Allah. Ya tengan dudok de tengah kebala guru agama Yahudi ninga sidaꞌ ngajar abaꞌ Ya betanyaꞌ gaꞌ ke sidaꞌ.
47 Abaꞌ ugaꞌ urang te diyaꞌ ma ampal ninga apa te jakoꞌ Ya abaꞌ medaꞌ pemanai Ya.
48 Pas apai inai Isa medaꞌ Ya snikoꞌ teblanga, jakoꞌ inai Ya: “Nak, ngapa Meh mulah ulah piyaꞌ ke kemua? Kemua saban ke Meh, kemua udah kiyaꞌ kitoꞌ ngigaꞌ Meh.”
49 Sawot Isa: “Ngapa snikoꞌ ngigaꞌ Ku, snikoꞌ alah tauꞌ badaꞌ enteꞌ Ku alah adai alam Rumah Apai Ku.”
50 Uleh snikoꞌ nadai nyarok apa te jakoꞌ Ya ke snikoꞌ.