KITAB INYEL
MARKOS
Yohanes maneꞌ urang
(Luk. 3:3-6, 15-17)
1
Toꞌ mah semaru Brita Bayek tentang Isa Al Maseh, Anak Tuhan Allah. 2 Brita Bayek toꞌ nunaꞌ te datules alam Kitab nabi Yesaya.Nabi Yesaya nules apa te Tuhan Allah padah ke Anak Ya, upa pitoꞌ jakoꞌ Ya:
“Ku kaꞌ ngutos sikoꞌ urang te dulau ari Meh,
abaꞌ ya dulau ngageh jalai ngau Meh;a
3 urang nyaꞌ madah upa pitoꞌ ngau goꞌ te sareng de tanah luah te baengkerangan:
‘Ageh kah jalai ngau Tuhan Allah,
bujor kah jalai ngau Ya.’ ” b
4 Upa pitoꞌ jakoꞌ Yohanes Pemaneꞌ madah ngau goꞌ te sareng de tanah luah te baengkerangan, “Dudi kebala dusa kitaꞌ abaꞌ kitaꞌ alah depaneꞌ, isaꞌ Tuhan Allah kaꞌ ngampon dusa kitaꞌ.” 5 Kebala urang ari ugaꞌ wilayah Yudia abaꞌ kuta Yerosalem datai ngusong Yohanes kaꞌ medaꞌ abaꞌ kaꞌ ninga te depadah ya. Sidaꞌ gaꞌ ngakoꞌ kebala dusa sidaꞌ, abaꞌ sidaꞌ depaneꞌ Yohanes de sungai Yordan. 6 Yohanes Pemaneꞌ ngau selawar baju te dapulah ari bulu unta, sementeng ya ari kulet jelu, pemakai ya buntak abaꞌ ilap. 7 Yohanes madah pitoꞌ gaꞌ, “Nadai lamaꞌ ageꞌ te lebeh bekuasa ari ku kaꞌ datai; datai ke nensam mukaꞌ tali sepatu Ya mah ku nadai patot. 8 Ku maneꞌ kitaꞌ ngau aiꞌ, uleh Ya kaꞌ maneꞌ kitaꞌ ngau Roh Kudos.”
Isa depaneꞌ
9 Tengan nyaꞌ datai mah Isa ari Nasaret de wilayah Galelia, abaꞌ Ya depaneꞌ Yohanes de sungai Yordan. 10 Breta Isa pansot ari aiꞌ, Ya medaꞌ langet tebelah, abaꞌ Roh Kudos upa burong dara turon ke atau Ya. 11 Abaꞌ tedinga goꞌ Tuhan Allah ari sruga madah, “Meh mah Anak Ku te Ku kaseh, Ku aja gaga amat ke Meh.”
Ibles Kepalaꞌ bala sitan encuba Isa
12 Breta udah nyaꞌ Roh Kudos ngemaiꞌ Isa ke tanah luah te baengkerangan. 13 Diyaꞌ Ya dacuba Ibles Kepalaꞌ bala sitan slamaꞌ empat puloh ari. Ya diyaꞌ diyau daentara kebala jelu te ganas abaꞌ kebala mlikat ngintu Ya.
Isa ngajar urang banyau
14 Udah Yohanes detangkap, Isa datai ageꞌ ke Galelia madah Brita Bayek ari Tuhan Allah. 15 Jakoꞌ Ya, “Entoꞌ Pemrintah Tuhan Allah nyau kaꞌ blaboh. Dudi kah kebala dusa kitaꞌ abaꞌ pecayaꞌ kah ke Brita Bayek ari Tuhan Allah!”
Isa mileh kebala muret Ya te semaru
16 Tengan Isa bejalai da tisi danau besai Galelia, Ya medaꞌ Simon abaꞌ Andrias menyadeꞌ ya. Snikoꞌ tengan nyala ikan de danau nyaꞌ, nema nyaꞌ mah kreja snikoꞌ ngenap ari. 17 Isa madah ke snikoꞌ, “Boh abaꞌ Ku, blaboh ari sari toꞌ snikoꞌ nadai bekreja ngigaꞌ ikan ageꞌ, uleh Ku kaꞌ nyuroh snikoꞌ ngigaꞌ kebala urang isaꞌ pecayaꞌ ke Ku.” 18 Ninga piyaꞌ snikoꞌ sintak nudi jala abaꞌ nrudi Isa. 19 Udah nyaꞌ Isa bejalai ageꞌ, nadai jaoh ari teban nyaꞌ, Ya medaꞌ Yakubos abaꞌ Yohanes, anak Sibedios, tengan nyemayek jala alam prau. 20 Isa sintak ngumai snikoꞌ abaꞌ snikoꞌ nudi Sibedios apai snikoꞌ alam prau abaꞌ kebala anak buah, baroꞌ udah nyaꞌ snikoꞌ nrudi Isa.
Isa muru sitan de Kapernaom
21 Isa abaꞌ kebala muret Ya datai ke Kapernaom. Lam ari Sabat, sidaꞌ tamaꞌ ke alam rumah te jalai sidaꞌ Yahudi nyemah Tuhan Allah abaꞌ Isa ngajar diyaꞌ. 22 Sidaꞌ ampal ninga jakoꞌ Ya, nema Ya ngajar upa urang te adai pengaroh; nadai upa kebala urang te ahli de alam kitab te datules Musa. 23 Tengan nyaꞌ de alam rumah nyaꞌ adai sikoꞌ urang te desarong sitan, urang nyaꞌ enciak encrabak blumaꞌ madah: 24 “Isa sidaꞌ Nasaret, ngapa Wan kalot ke kami? Wan datai kaꞌ munas kami? Ku tauꞌ badaꞌ Wan sapa. Wan te suci te deutos Tuhan Allah.” 25 Uleh Isa merak ya, “Sunyeꞌ, rari kah ari ya!” 26 Sitan nyaꞌ nguncang tuboh urang nyaꞌ abaꞌ blumaꞌ enciak encrabak, sitan nyaꞌ rari ari urang nyaꞌ. 27 Ugaꞌ urang ampal, blumaꞌ nanyaꞌ ke pangan bukai, “Ngapa pitoꞌ weh? Lampar bekuasa te jakoꞌ Ya sampai bala sitan rari nunaꞌ printah Ya.” 28 Nyaꞌ mah nyuroh brita te udah dapulah Isa deras amat datinga ugaꞌ urang de wilayah Galelia.
Isa nyemoh entua Simon abaꞌ urang bukai
29 Udah Isa, Yakubos abaꞌ Yohanes kluar ari rumah te jalai sidaꞌ Yahudi nyemah Tuhan Allah, sidaꞌ angkat ke rumah Simon abaꞌ Andrias. 30 Diyaꞌ entua Simon te inoꞌ tengan kredan. Abaꞌ sidaꞌ sintak madah ke Isa. 31 Isa ngusong entua Simon abaꞌ megai jari ya blumaꞌ mantoꞌ ya angkat, tengan nyaꞌ kredan nyaꞌ semoh. Breta ya nyau semoh beburoh mah ya angkat ngadoh pemakai ke sidaꞌ te diyaꞌ. 32 Pas slepat petang, adai kebala urang datai ngemaiꞌ urang te pedeh tacah brena macam penyaket abaꞌ te dasarong sitan ngusong Isa. 33 Nyaꞌ mah nyuroh ugaꞌ urang te de kuta nyaꞌ sampai bekeneꞌ de mua rumah nyaꞌ. 34 Isa nyemoh mayoh urang te pedeh tacah brena macam penyaket abaꞌ muru mayoh sitan; Isa ngerot bala sitan nyaꞌ becakap, nema sidaꞌ tauꞌ badaꞌ sapa Ya.
Isa ngajar de kebala kuta bukai
35 Lam-lam panam Isa dani abaꞌ angkat kluar ari rumah ke teban te sunyeꞌ, diyaꞌ Ya bradua. 36 Uleh Simon abaꞌ kebala kawan ya ngigaꞌ Ya, 37 nyau sidaꞌ betemu abaꞌ Isa, sidaꞌ madah, “Ugaꞌ urang ngigaꞌ Wan.” 38 Uleh Isa nyawot sidaꞌ, “Boh kita angkat ke kebala kuta te kebukai te semak toꞌ, den Ku alah madah Brita Bayek ari Tuhan Allah gaꞌ, nema nyaꞌ mah nyuroh Ku datai ke dunia toꞌ.” 39 Udah nyaꞌ Isa angkat ke ugaꞌ wilayah Galelia abaꞌ Ya madah Brita Bayek ari Tuhan Allah de kebala rumah te jalai sidaꞌ Yahudi nyemah Tuhan Allah abaꞌ muru bala sitan.
Isa nyemoh urang te kenaꞌ penyaket kulet kusta
40 Adai sikoꞌ urang te kenaꞌ penyaket kulet kusta datai ngusong Isa, ya tesungkor de mua Isa blumaꞌ mintaꞌ talau, jakoꞌ ya, “Pak, enteꞌ Wan kaꞌ, pesti Wan talah nyemoh ku.” 41 Medaꞌ piyaꞌ timol pengaseh alam ati Isa, baroꞌ Ya ngulor jari Ya, blumaꞌ madah, “Kaꞌ Ku, semoh meh.” 42 Skelen nyaꞌ mah gaꞌ penyaket ensia nyaꞌ lenyau abaꞌ ya semoh. 43 Isa nyuroh ensia nyaꞌ angkat blumaꞌ ngentak nal ensia nyaꞌ jakoꞌ Ya: 44 “Nang meh nusoi ke urang bukai apa te udah Ku pulah ke meh, uleh ken kah meh nganyaꞌ direꞌ ke imam isaꞌ ya tauꞌ badaꞌ meh nyau semoh. Abaꞌ meh alah ngemaiꞌ kurban pesemah ke Tuhan Allah nunaꞌ perintah Ya te datules Musa abaꞌ pesemah nyaꞌ ngau tana ke urang bukai enteꞌ meh nyau semoh.” 45 Uleh urang nyaꞌ angkat kiyaꞌ-kitoꞌ blumaꞌ nusoi apa te udah dapulah Isa ke ya, nyaꞌ nyuroh Isa nitauꞌ bibas tamaꞌ ke alam kuta ageꞌ. Isa abaꞌ kebala muret Ya mileh diyau de luar kuta de teban te niseꞌ urang, uleh amat piyaꞌ mayoh urang reyaꞌ-retoꞌ datai ngusong Ya.