Isa nyemoh urang lumpoh
(Luk. 5:17-26)
2
Dua tiga ari udah nyaꞌ, Isa datai ageꞌ ke Kapernaom, tengan nyaꞌ urang banyau ninga brita Isa adai de rumah. 2 Kebaꞌ kebala urang datai sampai bekeneꞌ abaꞌ niseꞌ ageꞌ teban te puang, datai ke mua pintu mah penoh gaꞌ. Tengan nyaꞌ mah gaꞌ Isa madah Brita Bayek ari Tuhan Allah ke sidaꞌ. 3 Tengan Isa becakap, datai empat urang te merangong sikoꞌ urang lumpoh kaꞌ ngemaiꞌ ngusong Isa. 4 Uleh sidaꞌ nitauꞌ tamaꞌ, nema urang diyaꞌ lampar mayoh. Medaꞌ piyaꞌ sidaꞌ nikeꞌ abaꞌ nebok atap rumah nyaꞌ. Udah nyaꞌ sidaꞌ ngulor urang lumpoh te tengan galeꞌ de atau tikai ya, pas de mua Isa. 5 Breta Isa medaꞌ sidaꞌ ma pecayaꞌ ke Ya, Isa madah ke urang lumpoh nyaꞌ, “O nak, dusa meh udah deampon.”6 Uleh diyaꞌ adai gaꞌ dudok kebala urang te ahli alam Prator Musa. Jakoꞌ alam ati sidaꞌ, 7 “Ngapa bah ensia toꞌ madah piyaꞌ? Brani amat mah Ya melicak Tuhan Allah, peroꞌ Tuhan Allah te tauꞌ ngampon dusa urang.”
8 Uleh Isa tauꞌ badaꞌ iseꞌ ati sidaꞌ, kebaꞌ Ya madah, “Ngapa bah kitaꞌ miker te piyaꞌ alam ati kitaꞌ? 9 Ni te lebeh mudah, madah ‘Dusa meh udah deampon,’ sekaleꞌ ke madah, ‘Katong ke tikai meh abaꞌ bejalai ke meh’? 10 Uleh toꞌ isaꞌ kitaꞌ tauꞌ badaꞌ, de dunia toꞌ Anak Ensia bekuasa ngampon dusa.” Baroꞌ Isa madah ke urang lumpoh nyaꞌ, 11 “Angkat, katong ke tikai meh, abaꞌ pulai ke meh ke rumah meh!”
12 Urang lumpoh nyaꞌ sintak diri blumaꞌ ngatong tikai, ya angkat keluar depedaꞌ urang banyau te diyaꞌ. Ugaꞌ urang te diyaꞌ ma mah ampal blumaꞌ adai prasa takot, sidaꞌ muji Tuhan Allah, jakoꞌ sidaꞌ, “Bedau kalaꞌ kita medaꞌ utai te nyaroh upa toꞌ.”
Isa ngumai Liwi isaꞌ nerudi Ya
(Luk. 5:27-32)
13 Udah nyaꞌ Isa angkat ageꞌ ke tisi danau, mayoh urang datai ngusong Ya abaꞌ Ya ngajar sidaꞌ. 14 Tengan Isa bejalai, Ya medaꞌ Liwi sikoꞌ urang te tukang nageh pajak. Liwi nyaꞌ anak Alpios, ya tengan dudok de kantor ya, Isa madah ke ya, “Boh nerudi Ku!” Baroꞌ Liwi diri abaꞌ nerudi Isa.
15 Pas tengan Isa abaꞌ kebala muret Ya makai de rumah Liwi, diyaꞌ adai gaꞌ kebala penageh pajak abaꞌ kebala urang te dusa berama makai abaꞌ sidaꞌ, nema mayoh urang te nerudi Ya. 16 Medaꞌ piyaꞌ kebala urang te ahli alam Prator Musa abaꞌ urang ari kelumpok Parisi betanyaꞌ ke kebala muret Isa, jakoꞌ sidaꞌ, “Ngapa bah Isa makai breta brama abaꞌ kebala penageh pajak abaꞌ kebala urang te dusa?”
17 Ninga piyaꞌ Isa nyawot sidaꞌ, “Ukai urang angas te merlu enteri, uleh urang pedeh te merlu enteri. Ku datai nadai ngumai kebala urang te ngangap direꞌ bayek, uleh Ku datai ngumai kebala urang te dusa.”
Puasa te deajar Isa
(Luk. 5:33-39)
18 Adai sekaleꞌ pas kebala muret Yohanes abaꞌ kebala sidaꞌ Parisi tengan puasa, datai kebala urang ngusong Isa abaꞌ nanyaꞌ, “Ngapa kebala muret Yohanes abaꞌ kebala muret sidaꞌ Parisi puasa uleh kebala muret Wan nadai?”
19 Isa nyawot sidaꞌ, “Piyaꞌ tauꞌ weh kebala temuai puasa enteꞌ urang tengan gawai belaki bini, enteꞌ penganten te laki ageꞌ abaꞌ sidaꞌ? Selamaꞌ penganten te laki nyaꞌ abaꞌ sidaꞌ, sidaꞌ nitauꞌ puasa. 20 Uleh jemah lah adai senta penganten te laki nyaꞌ deameꞌ ari sidaꞌ, tengan nyaꞌ mah sidaꞌ puasa.
21 Niseꞌ urang te nampal baju te lamaꞌ ngau cebek kayen te baru. Nema kayen te ngau nampal nyaꞌ kaꞌ ngerakedot abaꞌ nyuroh te carek nyaꞌ empala besai. 22 Upa piyaꞌ mah gaꞌ niseꞌ urang te ngiseꞌ aiꞌ angor baru ke alam badah aiꞌ lamaꞌ, nema aiꞌ angor te baru kaꞌ ngeruap nyaꞌ nyuroh badah nyaꞌ pecah, aiꞌ angor mes tesioh abaꞌ badah aiꞌ nyaꞌ sigeꞌ pecah. Aiꞌ angor te baru alah detepoꞌ de alam badah te baru gaꞌ.”a
Anak Ensia bekuasa ngatoh apa te tauꞌ abaꞌ te nitauꞌ depulah urang ari Sabat
(Luk. 6:1-5)
23 Adai sekaleꞌ pas ari Sabat, ari sidaꞌ Yahudi nyemah Tuhan Allah, ari nyaꞌ Isa abaꞌ kebala muret Ya mansaꞌ belayan ganom, tengan sidaꞌ bejalai kebala muret Ya nguleh leka ganom. 24 Medaꞌ piyaꞌ kebala sidaꞌ Parisi te diyaꞌ nanyaꞌ ke Isa, “Ngapa piyaꞌ kebala muret Meh mulah utai te nitauꞌ depulah urang ari Sabat?
25 Isa nyawot sidaꞌ, “Nadai piyaꞌ kitaꞌ kalaꞌ maca alam Kitab Suci, jalai Daot abaꞌ urang te abaꞌ ya niseꞌ ageꞌ te depakai abaꞌ sidaꞌ lapar? 26 Pas tengan nyaꞌ Abiyatar te jadi Imam Besai. Daot tamaꞌ ke kemah Tuhan Allah abaꞌ makai ruti te udah depesemah ke Tuhan Allah abaꞌ Ya mereꞌ ruti nyaꞌ ke kebala urang te abaꞌ ya. Enteꞌ nunaꞌ Prator Musa peroꞌ kebala imam mah te tauꞌ makai ruti nyaꞌ.”