Isa nyemoh urang pas ari Sabat
(Luk. 6:6-11)
3
Ari Sabat te bukai, Isa tamaꞌ ageꞌ ke rumah te jalai sidaꞌ Yahudi nyemah Tuhan Allah. Diyaꞌ adai sikoꞌ urang te temati jari sepiyak. 2 Diyaꞌ adai gaꞌ kebala urang te ngigaꞌ penyalah Ya, isaꞌ sidaꞌ tauꞌ ngelapor Ya ke kebala pemimpen. Kebaꞌ sidaꞌ merati mali Ya nyemoh urang te pedeh nyaꞌ ari Sabat. 3 Isa madah ke urang te temati jari sepiyak nyaꞌ, “Ayoh, diri de tengah ke meh!” 4 Udah nyaꞌ, Isa madah ke sidaꞌ, “Ku nanyaꞌ ke kitaꞌ ni te tauꞌ depulah urang ari Sabat, mulah te bayek sekaleꞌ mulah te jat, nyelamat idop urang sekaleꞌ ke munoh urang?” Uleh sidaꞌ nyaꞌ sunyeꞌ mah. 5 Blumaꞌ ringat Isa nilek skamat sidaꞌ, uleh Ya riyu gaꞌ nema medaꞌ penegel sidaꞌ te lampar gilaꞌ. Baroꞌ Ya madah ke urang te pedeh nyaꞌ, “Ulor ke jari meh!” Urang nyaꞌ ngulor jari, abaꞌ jari ya sintak semoh. 6 Udah nyaꞌ kebala sidaꞌ Parisi angkat ari rumah nyaꞌ ngusong kebala urang te nukong Herudes, sidaꞌ bepekat kati akal munoh Isa.Isa nyemoh urang mayoh
7 Udah nyaꞌ Isa abaꞌ kebala muret Ya ngerari direꞌ ke tisi danau besai Galelia. Mayoh amat urang ari wilayah Galelia abaꞌ Yudia datai nerudi Ya. 8 Adai mayoh gaꞌ te datai ari kuta Yerosalem, ari dairah Idumea, ari seberang Yordan, ari kuta Tiros abaꞌ Sidon, nema sidaꞌ udah ninga ugaꞌ utai te udah depulah Isa. 9 Medaꞌ kebala urang mayoh amat diyaꞌ, Isa nyuroh kebala muret Ya ngageh sebuah prau ke Ya, isaꞌ kebala urang mayoh diyaꞌ nadai nyekot Ya. 10 Sari nyaꞌ Isa mayoh nyemoh urang, kebaꞌ mayoh kebala urang te kenaꞌ brena macam penyaket sampai bepangkeꞌ bekeneꞌ kaꞌ nyamah Ya. 11 Abaꞌ pas kebala urang te desarong sitan medaꞌ Isa, sidaꞌ tesungkor de mua Ya blumaꞌ enciak encrabak, kebala sitan nyaꞌ madah, “Meh mah Anak Tuhan Allah!”
12 Uleh Isa ngerot kebala sitan nyaꞌ madah sapa Ya.
Isa mileh dua belas muret Ya
(Luk. 6:12-16)
13 Nadai lamaꞌ udah nyaꞌ Isa nikeꞌ ke suteꞌ buket, Ya ngumai kebala urang te dekedekaꞌ Ya isaꞌ datai ngusong Ya. 14 Baroꞌ Ya mileh ari entara sidaꞌ dua belas urang te abaꞌ Ya sengabot. Ya ngutos sidaꞌ madah Brita Bayek ari Tuhan Allah, 15 abaꞌ mereꞌ sidaꞌ kuasa ngau muru sitan.
16 Toꞌ mah nama dua belas urang te depileh Isa: Simon te degelar Ya Petros, 17 Yakubos abaꞌ menyadeꞌ ya Yohanes anak Sibedios, senikoꞌ degelar Isa Boanerges, reti nyaꞌ anak guntor. 18 Baroꞌ Andrias, Pelipos, Bartolumios, Matios, Tumas, Yakubos anak Alpios, Tadios, Simon ari kelumpok Silot, 19 abaꞌ Yudas Iskariot, te jemah lah kaꞌ nyual Isa ke urang te areh ke Ya.
Isa abaꞌ Belsebol
(Luk. 11:14-23)
20 Udah nyaꞌ Isa datai ageꞌ ke rumah teban Ya numpang bemalam. Mayoh kebala urang datai ngusong Isa sampai bepangkeꞌ bakeneꞌ, nyaꞌ mah te ngasoh Isa abaꞌ kebala muret Ya nadai sempat makai. 21 Breta kebala keluarga Isa ninga brita nyaꞌ, sidaꞌ angkat kaꞌ ngameꞌ Ya nema sidaꞌ miker Ya nyau mamau.
22 Tengan nyaꞌ datai mah ari Yerosalem kebala urang te ahli alam Prator Musa abaꞌ sidaꞌ madah, “Ya desarong Belsebol abaꞌ Ya tauꞌ muru kebala sitan nema Belsebol Kepalaꞌ kebala sitan te mereꞌ kuasa ke Ya.”
23 Kebaꞌ Isa ngumai sidaꞌ, abaꞌ nusoi kisah empama ke sidaꞌ upa pitoꞌ, “Piyaꞌ tauꞌ Kepalaꞌ kebala sitan muru sama direꞌ? 24 Enteꞌ alam suteꞌ pemrintah kebala urang te diyaꞌ bemunsoh, pesti mah pemrintah nyaꞌ nadai betan lamaꞌ. 25 Enteꞌ alam keluarga kebala urang te diyaꞌ areh ke pangan, pesti keluarga nyaꞌ nadai betan lamaꞌ. 26 Upa piyaꞌ gaꞌ alam pemrintah Kepalaꞌ kebala sitan, enteꞌ kebala sitan diyaꞌ bemunsoh bunoh, pesti mah pemrintah nyaꞌ nadai betan lamaꞌ abaꞌ pesti mah punas.
27 Uleh datai ke sikoꞌ mah niseꞌ urang te tauꞌ tamaꞌ ke rumah urang te kuat abaꞌ ngerampas kebala reta bena ya asa urang te kuat nyaꞌ nadai detamet dulau. Urang nyaꞌ alah detamet dulau, baroꞌ tauꞌ tamaꞌ abaꞌ ngerampas kebala reta bena ya.
28 Ku madah ke kitaꞌ, ugaꞌ dusa te depulah urang abaꞌ dusa melicak tauꞌ deampon. 29 Uleh enteꞌ melicak Roh Kudos nadai tauꞌ deampon, nema nyaꞌ dusa te niseꞌ pemadoꞌ.” 30 Isa madah piyaꞌ nema sidaꞌ madah Ya desarong sitan.
Inai abaꞌ kebala menyadeꞌ Isa
(Luk. 8:19-21)
31 Baroꞌ udah nyaꞌ datai mah inai abaꞌ kebala menyadeꞌ Isa. Sidaꞌ nungoꞌ de luar abaꞌ nyuroh urang ngumai Ya. 32 Tengan nyaꞌ urang mayoh dudok ngelileng Isa. Sidaꞌ madah ke Ya, “Pak, inai abaꞌ kebala menyadeꞌ Wan adai de luar. Sidaꞌ kaꞌ betemu abaꞌ Wan.”
33 Isa nyawot sidaꞌ, “Sapa piyaꞌ inai Ku abaꞌ sapa piyaꞌ kebala menyadeꞌ Ku?” 34 Baroꞌ Isa medaꞌ ke kebala urang te dudok ngelileng Ya abaꞌ madah, “Toꞌ mah inai Ku abaꞌ kebala menyadeꞌ Ku! 35 Urang te mulah apa te dekedekaꞌ Tuhan Allah, nyaꞌ mah menyadeꞌ Ku te laki, nyaꞌ mah menyadeꞌ Ku te inoꞌ, nyaꞌ mah inai Ku.”