Sual bekreja de ari Sabat
6
Ari Sabat, ari urang Yahudi nyemah Tuhan Allah, ari nyaꞌ Isa abaꞌ kebala muret Ya mansaꞌ belayan ganom. Baroꞌ kebala muret Ya nguleh ganom, sidaꞌ ngusok ngau jari muai kulet udah nyaꞌ sidaꞌ makai.
2 Medaꞌ piyaꞌ adai dua tiga ikoꞌ urang ari kelumpok Parisi madah: “Ngapa bah kitaꞌ bekreja ari Sabat? Tunaꞌ printah Tuhan Allah te datules Musa ngerot urang bekreja ari nyaꞌ.”
3 Uleh Isa nyawot sidaꞌ: “Nadai piyaꞌ kitaꞌ kalaꞌ maca alam Kitab Suci, jalai Daod abaꞌ urang te abaꞌ ya lapar?
4 Daod tamaꞌ ke Kemah Tuhan Allah. Ya ngameꞌ ruti te udah daserah ke Tuhan Allah, baroꞌ sidaꞌ berama makai ruti nyaꞌ. Tunaꞌ ruti nyaꞌ nitauꞌ depakai, bukai ari peroꞌ kebala imam mah te tauꞌ makai.”a
5 Isa madah ke sidaꞌ ageꞌ: “Ensia te datai ari Tuhan Allah bekuasa nentu apa te tauꞌ dapulah urang ari Sabat.”
Isa nyemoh urang pas ari Sabat
6 Ari Sabat bukai, Isa tamaꞌ ke rumah te jalai urang Yahudi nyemah Tuhan Allah, baroꞌ Ya ngajar. Diyaꞌ adai urang te temati jari kanan.
7 Kebala urang te ahli de alam kitab te datules Musa abaꞌ urang ari kelumpok Parisi mrati Isa nema mali Ya nyemoh urang te pedeh nyaꞌ ari Sabat. Sidaꞌ piyaꞌ nema sidaꞌ kaꞌ ngigaꞌ penyalah Isa, isaꞌ adai alasan ngau sidaꞌ nyalah Ya.
8 Uleh Isa tauꞌ badaꞌ pemiker sidaꞌ, Ya madah ke urang te temati jari nyaꞌ: “Angkat diri de tengah ke meh.” Kebaꞌ urang nyaꞌ angkat abaꞌ ya diri.
9 Udah nyaꞌ Isa madah ke sidaꞌ: “Ku nanyaꞌ kitaꞌ ni te tauꞌ dapulah urang ari Sabat, mulah te bayek apa mulah te jat, nyelamat nyawa urang apa munoh?”
10 Udah nyaꞌ Ya nilek ke kelileng ugaꞌ sidaꞌ, baroꞌ Ya madah ke urang te pedeh nyaꞌ: “Ulor kah jari meh.” Urang nyaꞌ mulah piyaꞌ abaꞌ jari ya sintak semoh.
11 Uleh kebala urang te ahli de alam kitab te datules Musa abaꞌ urang ari kelumpok Parisi ma areh, sidaꞌ bepekat ke apa te kaꞌ sidaꞌ pulah ke Isa.
Isa mileh dua belas rasol
12 Nadai lamaꞌ udah nyaꞌ, Isa nikeꞌ ke suteꞌ buket kaꞌ bradua. Diyaꞌ semalam-malam Ya bradua ke Tuhan Allah.
13 Nyau tawas ari Isa ngumai ugaꞌ urang te gah abaꞌ Ya isaꞌ datai ngusong Ya. Baroꞌ Ya mileh ari entara sidaꞌ dua belas muret te Ya sebot rasol. Rasol nyaꞌ utosan te buleh tugas kusos ari Isa. Nama kebala sidaꞌ:
14 Simon te dagelar Ya Petros, abaꞌ Andrias menyadeꞌ Simon, Yakubos abaꞌ Yohanes, Plipos abaꞌ Bartolumios,
15 Matius abaꞌ Tumas, Yakubos anak Alpios, abaꞌ Simon ari kelumpok Silot,b
16 Yudas anak Yakubos, abaꞌ Yudas Iskariot te jemah lah kaꞌ nyual Isa ke urang te areh ke Ya.
Isa ngajar abaꞌ nyemoh urang mayoh
17 Baroꞌ Isa abaꞌ kebala muret Ya turon ari buket ke tanah te rata. Diyaꞌ kebala urang te gah abaꞌ Isa abaꞌ urang bukai mayoh begugoꞌ nungoꞌ Isa abaꞌ muret Ya. Urang mayoh nyaꞌ datai ari wilayah Yudia, ari kuta Yerosalem, abaꞌ daerah pantai kuta Tiros abaꞌ kuta Sidon.
18 Sidaꞌ datai kaꞌ ninga Isa, abaꞌ sidaꞌ kaꞌ dasemoh ari penyaket sidaꞌ. Abaꞌ kebala urang te desarong sitan sigeꞌ dasemoh.
19 Ugaꞌ urang berusaha kaꞌ nyamah Ya, nema adai kuasa keluar ari Ya te nyemoh ugaꞌ urang diyaꞌ.
Isa madah pengamat idop te nyamai
20 Isa ngadap blumaꞌ nilek ke kebala muret Ya abaꞌ madah:
“Betuah amat kitaꞌ te niseꞌ utai entoꞌ,
nema kitaꞌ nyaꞌ mah te idop de alam Pemerintah Tuhan Allah.
21 Betuah amat kitaꞌ te niseꞌ pemakai entoꞌ,
nema Tuhan Allah kaꞌ ngasoh kitaꞌ kenyang lah.
Betuah amat kitaꞌ te nyabak entoꞌ,
nema kitaꞌ te ketawaꞌ jemah lah.
22 Betuah amat kitaꞌ enteꞌ tegal pecayaꞌ ke Ensia te datai ari Tuhan Allah, kitaꞌ dekareh, kitaꞌ nadai datrimaꞌ, kitaꞌ dapenadai, abaꞌ kitaꞌ dapejaiꞌ urang.
23 Enteꞌ utai nyaꞌ kenaꞌ ke kitaꞌ, kitaꞌ alah gaga nema besai upah te nungoꞌ kitaꞌ de sruga. Nema ingat kah kebala nabi te idop meliyaꞌ sigeꞌ dapulah sidaꞌ piyaꞌ uleh puyang jagang kebala urang te mulah te piyaꞌ ke kitaꞌ entoꞌ.
24 Uleh rugi amat mah kitaꞌ te kaya entoꞌ,
nema kitaꞌ udah ngasa dulau idop gaga ari pengaya kitaꞌ!
25 Rugi amat mah kitaꞌ te adai mayoh te depakai entoꞌ,
nema jemah lah kitaꞌ te lapar!
Rugi amat mah kitaꞌ te ketawaꞌ entoꞌ,
nema jemah lah kitaꞌ ngasa tusah ati abaꞌ nyabak!
26 Rugi amat mah kitaꞌ te dapuji ugaꞌ urang entoꞌ, nema upa nyaꞌ mah kebala nabi te nesat urang dulau dapuji kebala puyang jagang kitaꞌ.”
Kaseh kah musoh direꞌ
27 “Uleh Ku madah ke kitaꞌ te ninga Ku entoꞌ: Kaseh kah munsoh kitaꞌ, pulah kah te bayek ke urang te areh ke kitaꞌ,
28 pintaꞌ ke Tuhan Allah isaꞌ Ya mereꞌ berkat ke urang te ngutok kitaꞌ abaꞌ pradua ke urang te jat abaꞌ kitaꞌ.
29 Enteꞌ urang nampar pipi kitaꞌ te sepiyak, bereꞌ ke gaꞌ pipi te sepiyak. Enteꞌ urang ngerampas baju panyai kitaꞌ, bereꞌ ke gaꞌ baju serak te tengan kitaꞌ ngau.
30 Bereꞌ ke ugaꞌ urang te mintaꞌ utai ke kitaꞌ, abaꞌ nang mintaꞌ pulai ageꞌ ari urang te udah ngerampas utai ari kitaꞌ.
31 Apa te dakedekaꞌ urang pulah ke kitaꞌ, pulah kah dulau ke urang bukai upa piyaꞌ.
32 Enteꞌ kitaꞌ peroꞌ ngaseh urang te ngaseh kitaꞌ, apa te kaꞌ dapuji urang ke kitaꞌ? Nema urang te dusa sigeꞌ tauꞌ ngaseh urang te ngaseh sidaꞌ.
33 Enteꞌ kitaꞌ peroꞌ mulah te bayek ke urang te bayek abaꞌ kitaꞌ, apa te kaꞌ dapuji urang ke kitaꞌ? Nema urang te dusa sigeꞌ tauꞌ mulah te piyaꞌ.
34 Enteꞌ kitaꞌ peroꞌ tauꞌ mereꞌ pinyau duet ke urang te tauꞌ mulai ke kitaꞌ, apa te kaꞌ dapuji urang ke kitaꞌ? Nema urang te dusa sigeꞌ tauꞌ mereꞌ pinyau ke sama sidaꞌ te dusa isaꞌ tauꞌ nerimaꞌ pemulai te sama pemayoh.
35 Uleh kaseh kah munsoh kitaꞌ abaꞌ pulah kah te bayek ke sidaꞌ abaꞌ enteꞌ sidaꞌ nginyau utai ke kitaꞌ bereꞌ kah, abaꞌ kitaꞌ nang ngagam sidaꞌ malas ke kitaꞌ. Enteꞌ kitaꞌ mulah piyaꞌ, upah kitaꞌ besai lah abaꞌ nyaꞌ mah cara kitaꞌ nunyok direꞌ anak Tuhan Allah te Ma Tingeꞌ nema Ya bayek ke urang te nadai nyarok betrimaꞌ kaseh abaꞌ urang te mulah te jaiꞌ.
36 Tunyok kah pengaseh kitaꞌ upa pengaseh Apai kitaꞌ te de sruga.”
Nang nyalah urang bukai
37 Nang kitaꞌ nyalah urang isaꞌ kitaꞌ nadai desalah Tuhan Allah. Nang ngukom urang isaꞌ kitaꞌ nadai daukom Tuhan Allah. Ampon kah penyalah urang ke kitaꞌ isaꞌ Tuhan Allah ngampon kitaꞌ.
38 Bereꞌ kah apa te adai de kitaꞌ ke urang bukai isaꞌ Tuhan Allah mereꞌ lebeh mayoh ageꞌ sampai penoh ke kitaꞌ, upa urang te nakar padi ngau kulak daiseꞌ ritat-ritat sampai ngelueꞌ. Nema upa pemayoh te dabereꞌ kitaꞌ ke urang bukai upa nyaꞌ gaꞌ kitaꞌ trimaꞌ ari Tuhan Allah.
39 Isa nusoi gaꞌ suteꞌ kisah empama: “Enteꞌ urang butaꞌ ngireng urang butaꞌ pesti snikoꞌ sama tamaꞌ lubang.
40 Niseꞌ muret te lebeh ari guru, uleh enteꞌ sidaꞌ blajar sampai tamat, sidaꞌ sama upa guru sidaꞌ.
41 Ngapa bah kitaꞌ medaꞌ sepok kayu de mata kawan kitaꞌ uleh balok te besai de mata kitaꞌ kedireꞌ kitaꞌ nadai medaꞌ?
42 Kati kitaꞌ tauꞌ madah ke kawan: ‘Kitoꞌ ku nguleh sepok kayu de mata direꞌ.’ Uleh balok de mata kitaꞌ kedireꞌ, kitaꞌ nadai medaꞌ? Eh urang te budi-budi awas, uleh kah balok de mata kitaꞌ dulau, isaꞌ pemedaꞌ kitaꞌ rantas, isaꞌ kitaꞌ tauꞌ muai sepok kayu de mata kawan kitaꞌ.”
Pon abaꞌ Buah
43 “Nema pon kayu te bayek nyaꞌ nadai bebuah ke buah te jaiꞌ, piyaꞌ gaꞌ kayu te nadai bayek nadai tauꞌ bebuah ke buah te bayek,
44 nema ngenap pon kayu deklala ari buah ya. Nema ari belayan dureꞌ urang nadai nguleh buah ara, abaꞌ ari belayan dureꞌ gaꞌ nadai sidaꞌ buleh buah angor
45 Urang te bayek ngeluar te bayek ari alam ati ya, urang te jat ngeluar te jat ari alam ati ya, nema apa te pansot ari mulot timol ari alam ati ya.”
Rumah te kuat abaꞌ Rumah te mudah ruboh
46 “Ngapa kitaꞌ ngumai Ku: ‘Tuhan, Tuhan.’ Uleh kitaꞌ nadai mulah apa te Ku padah ke kitaꞌ?
47 Ngenap urang te datai ngusong Ku abaꞌ ninga apa te jakoꞌ Ku abaꞌ ya kaꞌ mulah apa te Ku padah, Ku kaꞌ madah ke kitaꞌ abaꞌ sapa ya tauꞌ dasemaꞌ:
48 Ya sama upa urang te mulah rumah. Semaru, ya ngali lubang dalam-dalam, baroꞌ ya ngentak tiangc ngau kayu te tan. Pas aiꞌ besai abaꞌ ranah nacah rumah nyaꞌ, rumah nyaꞌ nadai tekancai nema dadiri tegoh.
49 Urang te ninga jakoꞌ Ku, uleh ya nadai kaꞌ mulah apa te Ku padah, ya sama upa urang te mulah rumah te nadai betiang. Pas ranah datai nacah rumah nyaꞌ, rumah nyaꞌ tekancai abaꞌ ma rusak.”