Isa nyemoh pemantoꞌ kepalaꞌ prajuret Ruma
7
Udah Isa ngajar de mua urang banyau, Ya angkat ke kuta Kapernaom.
2 De kuta nyaꞌ adai sikoꞌ kepalaꞌ prajuret Ruma te empu sikoꞌ pemantoꞌ, pemantoꞌ ya nyaꞌ ma pedeh nyau kaꞌ mati. Kepalaꞌ prajuret nyaꞌ kaseh amat ke ya.
3 Pas kepalaꞌ prajuret nyaꞌ ninga Isa adai de kuta nyaꞌ, ya ngasoh kebala urang tuai bansa Yahudi ngusong Isa, mintaꞌ isaꞌ Ya datai abaꞌ nyemoh pemantoꞌ ya.
4 Sidaꞌ datai ngusong Isa abaꞌ mintaꞌ talau Ya, jakoꞌ sidaꞌ: “Kepalaꞌ prajuret nyaꞌ patot Wan tulong,
5 nema ya kaseh ke bansa kita, abaꞌ ya udah mulah rumah te jalai kami nyemah Tuhan Allah.”
6 Udah nyaꞌ Isa angkat nerudi sidaꞌ. Pas sidaꞌ nyau kaꞌ datai ke rumah kepalaꞌ prajuret nyaꞌ, kepalaꞌ prajuret nyaꞌ nyuroh kebala kawan ya ngusong Isa abaꞌ madah: “Adu mah Wan ngelelak direꞌ ke rumah ku, ku ngasa direꞌ nadai patot nerimaꞌ Wan de rumah ku.
7 Kebaꞌ nyaꞌ nyuroh ku nadai berani ngadap Wan. Padah jaꞌ: ‘Semoh!’ Ku pecayaꞌ pemantoꞌ ku pesti semoh.
8 Nema ku kedireꞌ de baroh pangan bukai, abaꞌ de baroh ku adai prajuret. Enteꞌ ku madah ke sikoꞌ prajuret: ‘Angkat!,’ baroꞌ ya angkat, abaꞌ ke sikoꞌ ageꞌ: ‘Datai!,’ baroꞌ ya datai, abaꞌ ke pemantoꞌ ku: ‘Pulah ke toꞌ!,’ baroꞌ ya mulah nyaꞌ.”
9 Pas Isa ninga jakoꞌ ya nyaꞌ, Ya ampal. Ya malek ke urang banyau te nerudi Ya blumaꞌ madah: “Ku madah ke kitaꞌ, de entara urang Israel jaꞌ bedau kalaꞌ Ku nemu urang te pecayaꞌ amat ke Ku upa toꞌ.”
10 Pas kebala urang te dasuroh kepalaꞌ prajuret nyaꞌ datai ke rumah ya, sidaꞌ medaꞌ pemantoꞌ ya nyaꞌ udah semoh.
Isa ngemangket anak muda de Nain
11 Udah nyaꞌ, Isa angkat ke kuta Nain. Kebala muret Ya abaꞌ urang banyau angkat breta Ya.
12 Pas sidaꞌ datai ke pintu gerbang kuta nyaꞌ, adai urang te mati tengan detangong kebala urang ke kubor. Te mati nyaꞌ, anak tungal iboꞌ te balu, ya daterudi kebala urang banyau ari kuta nyaꞌ.
13 Pas Tuhan Isa medaꞌ iboꞌ nyaꞌ, timol pengaseh ke ya, baroꞌ Ya madah: “Jadi mah wan nyabak boꞌ.”
14 Baroꞌ Isa ngusong urang te mati nyaꞌ abaꞌ megai peniyau te ngau urang ngemaiꞌ ya. Kebaꞌ kebala urang te nangong nyaꞌ belepa. Isa madah: “O jang, bangket meh!”
15 Kebaꞌ urang te udah mati nyaꞌ idop ageꞌ, ya dudok abaꞌ lansong becakap. Baroꞌ Isa ngemaiꞌ ya ngusong inai ya.
16 Ugaꞌ urang takot abaꞌ muji Tuhan Allah. Sidaꞌ madah: “Sikoꞌ nabi besai udah adai de tengah kita. Tuhan Allah udah datai nyelamat kita urang te daempu Ya.”
17 Brita te udah dapulah Isa nyaꞌ dadinga urang de wilayah Yudia abaꞌ daerah te semak nyaꞌ.
Isa abaꞌ Yohanes Pemaneꞌ
18 Kebala muret Yohanes nusoi ke ya apa te dapulah Isa. Kebaꞌ nyaꞌ Yohanes ngumai dua ikoꞌ muret ya.
19 Baroꞌ ya nyuroh snikoꞌ nyaꞌ angkat ngusong Isa, abaꞌ nanyaꞌ ke Ya: “Wan piyaꞌ te kaꞌ datai nunaꞌ danyi Tuhan Allah, apa kami alah nungoꞌ te kebukai?”
20 Dua ikoꞌ muret Yohanes nyaꞌ angkat ngusong Isa, pas snikoꞌ nemu Ya, snikoꞌ madah: “Yohanes Pemaneꞌ nyuroh kemua nanyaꞌ: ‘Wan piyaꞌ te kaꞌ datai nunaꞌ danyi Tuhan Allah, apa kami alah nungoꞌ te kebukai?’ ”
21 Tengan nyaꞌ, Isa nyemoh mayoh urang abaꞌ muru bala sitan. Abaꞌ Ya nyuroh gaꞌ mayoh urang butaꞌ tauꞌ medaꞌ.
22 Isa nyawot snikoꞌ: “Pulai abaꞌ tusoi kah ke Yohanes, apa te snikoꞌ dinga abaꞌ pedaꞌ kah, kebala urang butaꞌ tauꞌ medaꞌ abaꞌ urang lumpoh bejalai, urang te kenaꞌ penyaket kulet kusta semoh, urang te bangal, ninga, urang mati idop ageꞌ, abaꞌ brita bayek ari Tuhan Allah udah depadah ke urang misken.
23 Kebaꞌ betuah amat urang te nadai gamaꞌ pecayaꞌ abaꞌ nudi Ku.”
24 Udah dua ikoꞌ muret Yohanes pulai, Isa madah sapa Yohanes nyaꞌ ke urang banyau, jakoꞌ Ya: “Dulau kitaꞌ angkat ke tanah luah te beengkrangan kaꞌ medaꞌ apa? Kaꞌ medaꞌ rumpot dasepu kudeꞌ kiyaꞌ kitoꞌ? Nadai weh?
25 Enteꞌ piyaꞌ, kitaꞌ angkat kaꞌ medaꞌ apa? Urang te bebaju bayek? Pesti nadai, nema kebala urang te bebaju piyaꞌ abaꞌ te idop nyamai diyau de teban jalai raja.
26 Apa pengamat te kaꞌ kitaꞌ pedaꞌ ke den? Medaꞌ sikoꞌ nabi? Auꞌ, Ku madah ke kitaꞌ, Yohanes lebeh ari sikoꞌ nabi.
27 Nema ya te depadah Tuhan Allah de alam Kitab Suci: ‘Toꞌ mah utosan Ku, te Ku suroh dulau ari Direꞌ, ya kaꞌ ngageh jalai ngau Direꞌ.’a
28 Dinga kah: De entara urang te udah idop de dunia toꞌ, bedau iseꞌ te lebeh ari Yohanes. Uleh amat piyaꞌ, amat mah urang te nadai gulong penteng de alam Pemerintah Tuhan Allah, ya lebeh ari Yohanes.”
29 Ugaꞌ urang te ninga Ya temasok penageh pajak ngangkoꞌ Tuhan Allah amat kenaꞌ, nema sidaꞌ udah depaneꞌ Yohanes.
30 Uleh kebala urang ari kelumpok Parisi abaꞌ kebala urang te ahli de alam kitab te datules Musa, ngai nerimaꞌ kedekaꞌ Tuhan Allah ke sidaꞌ, nema sidaꞌ ngai depaneꞌ Yohanes.
31 Baroꞌ jakoꞌ Isa: “Upa sapa lah weh Ku nyemaꞌ urang rama pitoꞌ? Ku madah ke kitaꞌ sidaꞌ upa toꞌ,
32 sidaꞌ toꞌ upa kebala miyak te dudok de teban urang mayoh begugoꞌ, suteꞌ kelumpok miyak mangkis ke kelumpok bukai:
‘Kami begenang ke kitaꞌ, uleh kitaꞌ nadai gaꞌ ngajat, kami menanyi lagu te ngeriyu uleh kitaꞌ nadai nyabak.’
33 Upa piyaꞌ mah jalai Yohanes Pemaneꞌ datai nadai makai ruti abaꞌ nadai nginom aiꞌ angor, kitaꞌ madah: ‘Ya kesarong sitan.’
34 Baroꞌ Ensia te datai ari Tuhan Allah makai abaꞌ nginom, kitaꞌ madah: ‘Pedaꞌ kah! Urang nyaꞌ muloꞌ, gila mabok, bekawan abaꞌ penageh pajak abaꞌ urang te dusa.’
35 Uleh amat piyaꞌ, pemanai ari Tuhan Allah udah dapedaꞌ alam ugaꞌ urang te nyerah idop ke Ya.”
Isa daunsot ngau binyak wangi uleh inoꞌ te dusa
36 Simon salah sikoꞌ urang ari kelumpok Parisi, ya ngunang Isa makai. Udah nyaꞌ Isa angkat ke rumah Simon, diyaꞌ sidaꞌ dudok berama makai.
37 De kuta nyaꞌ adai sikoꞌ inoꞌ te daketauꞌ urang dusa. Breta ya ninga Isa tengan makai de rumah Simon urang Parisi nyaꞌ, ya kiyaꞌ maiꞌ binyak wangi alam jebol te dapulah ari batu pualam.
38 Baroꞌ inoꞌ nyaꞌ diri de belakang Isa te tengan dudok singet, ya nyabak sampai aiꞌ mata ya laboh masah kaki Isa, ya ngelap kaki Isa ngau bok ya. Ya nyiom kaki Isa, blumaꞌ ngunsot kaki Isa ngau binyak wangi.
39 Pas urang Parisi te ngunang Isa nyaꞌ medaꞌ piyaꞌ, jakoꞌ alam ati ya: “Enteꞌ Ya nyaꞌ amat nabi, pesti mah Ya tauꞌ badaꞌ sapa inoꞌ nyaꞌ, kati pulah inoꞌ nyaꞌ te megai Ya, abaꞌ Ya tauꞌ badaꞌ inoꞌ nyaꞌ dusa.”
40 Baroꞌ Isa madah ke Simon: “Simon adai te kaꞌ Ku padah ke meh.” Sawot Simon: “Apa Guru?”
41 Isa madah: “Adai dua ikoꞌ urang berutang ke urang te jalai nginyau duet. Sikoꞌ berutang limaꞌ ratos duet dinar, te sikoꞌ limaꞌ puloh duet dinar.
42 Nema snikoꞌ nadai talah mayar, utang snikoꞌ deapos urang nyaꞌ. Enteꞌ jakoꞌ meh sapa de entara snikoꞌ nyaꞌ te paleng kaseh ke ya?”
43 Sawot Simon: “Enteꞌ jakoꞌ ku, urang te paleng mayoh deapos utang nyaꞌ.” “Kenaꞌ haja nunaꞌ jakoꞌ meh,” jakoꞌ Isa.
44 Blumaꞌ Isa malek ke inoꞌ nyaꞌ, Ya madah ke Simon: “Meh pesti udah medaꞌ apa te dapulah inoꞌ toꞌ. Ku tamaꞌ ke rumah meh, uleh meh niseꞌ ngageh aiꞌ ngau masok kaki Ku, uleh ya masah kaki Ku ngau aiꞌ mata ya abaꞌ ngunos ngau bok ya.
45 Jalai meh nyamot Ku, niseꞌ meh nyiom Ku, uleh inoꞌ toꞌ breta Ku tamaꞌ niseꞌ renti nyiom kaki Ku.
46 Meh niseꞌ ngunsot palaꞌ Ku ngau binyak wangi, uleh ya ngunsot kaki Ku ngau binyak wangi.b
47 Kebaꞌ nyaꞌ Ku madah ke meh, nema dusa ya te mayoh nyaꞌ udah deampon, kebaꞌ mayoh gaꞌ kaseh ya. Uleh urang te ngangap siket mah dusa ya te perlu ampon, siket gaꞌ kaseh ya.”
48 Baroꞌ Ya madah ke inoꞌ nyaꞌ: “Dusa deꞌ udah deampon.”
49 Jakoꞌ alam ati kebala urang te dudok makai abaꞌ Isa: “Sangkaꞌ Ya sapa Ya, tauꞌ ngampon dusa urang?”
50 Uleh Isa madah ke inoꞌ nyaꞌ: “Nema deꞌ pecayaꞌ ke Ku, kebaꞌ Tuhan Allah nyelamat deꞌ. Pulai deꞌ ngau ati lantang.”