Isa abaꞌ dua belas muret Ya abaꞌ kebala urang inoꞌ
8
Bedau lamaꞌ udah nyaꞌ, Isa abaꞌ dua belas muret Ya bejalai bekunyong kelileng ari kuta ke kuta abaꞌ ari kampong ke kampong, sidaꞌ madah brita bayek Pemerintah Tuhan Allah.
2 Abaꞌ sidaꞌ adai gaꞌ kebala urang inoꞌ te udah semoh ari kebala sitan te nyarong sidaꞌ, abaꞌ dasemoh ari brena penyaket. Sidaꞌ nyaꞌ: Maria te ari kampong Makdalaa te udah dasemoh ari tujoh sitan te nyarong ya,
3 udah nyaꞌ Susana, abaꞌ Yohana bini Kusa, Kusa nyaꞌ kepalaꞌ pegawai Herodes, abaꞌ adai mayoh kebala inoꞌ te kebukai te mantoꞌ Isa abaꞌ dua belas muret ngau duet sidaꞌ kedireꞌ.
Kisah empama urang te meneh
4 Adai sekaleꞌ tengan Isa madah brita bayek ari Tuhan Allah, adai mayoh amat kebala urang te datai ke menatai ari kebala kuta begugoꞌ abaꞌ Isa. Baroꞌ Ya belaboh nusoi kisah empama ke sidaꞌ upa pitoꞌ:
5 “Adai sikoꞌ urang te beuma angkat ngunsai beneh, jalai ya ngunsai, adai te laboh de tisi jalai. Beneh te laboh nyaꞌ datijak urang, baroꞌ depakai kebala burong.
6 Beneh keduaꞌ laboh de tanah te bebatu, nyau beneh nyaꞌ matok, ya layos sampai mati nema niseꞌ aiꞌ.
7 Adai keduaꞌ beneh laboh de tanah te beblayan dureꞌ, breta beneh nyaꞌ tumoh, ya mati dealet dureꞌ.
8 Adai gaꞌ beneh te laboh de tanah te bayek, beneh nyaꞌ tumoh galak bebuah seratos kaleꞌ lipat.” Udah Isa nusoi kisah empama nyaꞌ, Ya madah ageꞌ ngau goꞌ te sareng: “Sapa te adai peneng ngau ninga, dinga kah!”
9 Dua belas muret nyaꞌ nanyaꞌ ke Isa, apa reti kisah empama nyaꞌ.
10 Baroꞌ Isa nyawot sidaꞌ: “Kitaꞌ desadi Tuhan Allah ngetauꞌ upa apa Pemerintah Ya, abaꞌ utai nyaꞌ nadai depadah ke urang dulau. Kebaꞌ nyaꞌ ke urang bukai deajar ngau kisah empama, nyaꞌ nyuroh amat sidaꞌ medaꞌ uleh sidaꞌ nadai amat-amat mrati, abaꞌ amat sidaꞌ ninga uleh sidaꞌ nadai nyarok.
11 Toꞌ mah reti kisah empama nyaꞌ: Beneh nyaꞌ apa te jakoꞌ Tuhan Allah.
12 Beneh te laboh de tisi jalai nyaꞌ, kebarat urang te ninga apa te depadah Tuhan Allah, uleh Kepalaꞌ bala sitan datai ngameꞌ apa te udah dadinga ari alam ati sidaꞌ isaꞌ sidaꞌ nadai pecayaꞌ abaꞌ nadai selamat.
13 Beneh te laboh de tanah te bebatu nyaꞌ, kebarat urang te ninga jakoꞌ Tuhan Allah ngau ati gaga, uleh jakoꞌ Ya nyaꞌ nadai beurat de alam ati sidaꞌ. Sidaꞌ pecayaꞌ setegal abaꞌ asa adai te medeh sidaꞌ, sidaꞌ rari ari Tuhan Allah.
14 Beneh te laboh de tanah te beblayan dureꞌ nyaꞌ, kebarat ke urang te ninga apa te depadah Tuhan Allah, uleh saban ke pengidop sidaꞌ abaꞌ sidaꞌ kaꞌ idop nyamai abaꞌ rinang de dunia toꞌ. Ugaꞌ nyaꞌ nyuroh idop sidaꞌ upa dakepet, nyaꞌ nyuroh sidaꞌ nadai bebuah bayek abaꞌ beguna.
15 Beneh te laboh de tanah te bayek nyaꞌ, kebarat ke urang te udah ninga apa te jakoꞌ Tuhan Allah, abaꞌ naroh alam ati sidaꞌ te bayek abaꞌ bujor, abaꞌ sidaꞌ idop nunaꞌ apa te depadah Tuhan Allah sengabot.”
Kisah empama kelita te datungkop ngau tepayan
16 Niseꞌ urang te nungon kelita rinah nungkop ngau tepayan, abaꞌ niseꞌ urang te nungon kelita nepoꞌ de baroh peninok. Uleh enteꞌ urang nungon kelita datepoꞌ de teban te tingeꞌ, isaꞌ asa urang tamaꞌ rumah ya tauꞌ medaꞌ te tampak.
17 Ugaꞌ te detapok kaꞌ pedaꞌ jemah lah abaꞌ ugaꞌ te nadai depadah sebedau nyaꞌ kaꞌ daketauꞌ abaꞌ dabungkar jemah lah.
18 Kebaꞌ prati ke cara kitaꞌ ninga, nema Tuhan Allah kaꞌ namah pemenauꞌ ke urang te kaꞌ nyarok, uleh ke urang ngai nyarok, Tuhan Allah kaꞌ ngameꞌ pemenauꞌ te desangkaꞌ urang nyaꞌ empu ya.
Inai abaꞌ menyadeꞌ Isa
19 Tengan Isa ngajar, inai abaꞌ kebala menyadeꞌ Ya datai kaꞌ betemu abaꞌ Isa, uleh sidaꞌ nitauꞌ betemu abaꞌ Ya, nema urang mayoh.
20 Adai urang datai madah ke Isa: “Guru, nyen inai abaꞌ kebala menyadeꞌ Wan kaꞌ betemu, sidaꞌ adai de luar.”
21 Uleh Isa madah ke urang te adai diyaꞌ: “Inai Ku abaꞌ menyadeꞌ Ku, urang te ninga apa te depadah Tuhan Allah, abaꞌ nunaꞌ apa te jakoꞌ Ya.”
Isa ngemadoꞌ kudeꞌ abaꞌ glumang aiꞌ
22 Adai sekaleꞌ Isa abaꞌ dua belas muret Ya nikeꞌ ke prau besai, Isa madah: “Boh kita nyemerang danau.” Baroꞌ sidaꞌ angkat.
23 Tengan sidaꞌ bekayoh, Isa tinok. Nadai mang-mang datai kudeꞌ te lampar betat nacah danau nyaꞌ, nyaꞌ nyuroh aiꞌ beglumang besai, abaꞌ aiꞌ tamaꞌ prau sidaꞌ kebaꞌ sidaꞌ nyau kaꞌ karam.
24 Baroꞌ kebala muret Isa beburoh datai ngerak Ya, jakoꞌ sidaꞌ: “Guru, guru, mati kita!” Udah nyaꞌ Isa diri, Ya madah ke kudeꞌ abaꞌ glumang aiꞌ nyaꞌ: “Jadi mah!” Tengan nyaꞌ kudeꞌ abaꞌ glumang aiꞌ nyaꞌ tulu badoꞌ.
25 Udah nyaꞌ Isa nanyaꞌ ke sidaꞌ: “Ngapa bah kitaꞌ nadai pecayaꞌ ke Ku?” Sidaꞌ takot, sidaꞌ ampal abaꞌ nanyaꞌ ke pangan bukai: “Sapa bah ensia toꞌ, sampai kudeꞌ abaꞌ glumang aiꞌ nunaꞌ te jakoꞌ Ya?”
Isa nyemoh urang te desarong sitan
26 Udah nyaꞌ, Isa abaꞌ dua belas muret Ya bekayoh datai ke tebeng sepiyak, de tanah Gerasa de seberang wilayah Galelia.
27 Pas Isa turon ke darat, diyaꞌ adai urang laki te desarong bala sitan, urang nyaꞌ datai ngusong Isa. Ya nyau lamaꞌ nadai beselawar baju, abaꞌ ngai diyau de rumah uleh diyau de kubor.
28 Pas ya medaꞌ Isa, ya enciak encrabak baroꞌ ya tesungkor de mua Isa abaꞌ madah ngau goꞌ te kaya: “Nang kalot ke ku, oi Isa Anak Tuhan Allah te Ma Tingeꞌ! Ku ngemon ke Wan, nang Wan mrisa ku!”
29 Urang te desarong bala sitan nyaꞌ madah piyaꞌ nema Isa mrintah sitan rari ari ya. Sebedau ya betemu abaꞌ Isa, ya gah dairet bala sitan te nyarong ya, kebaꞌ urang masong kaki jari ya ngau rantai abaꞌ ya dejaga urang. Uleh ya talah mutos rantai te ngau urang masong ya, abaꞌ ya debaiꞌ bala sitan ke teban te sunyeꞌ.
30 Isa nanyaꞌ ya: “Sapa nama direꞌ?” Sawot ya: “Nama ku Legion.” Ya madah piyaꞌ nema sidaꞌ mayoh.
31 Baroꞌ bala sitan nyaꞌ ngemon ke Isa, isaꞌ Ya nadai muai sidaꞌ ke teban te ngau ngukom sidaꞌ.
32 Nyemak nyaꞌ adai mayoh kebala babi te tengan ngigaꞌ pemakai de kaki buket. Bala sitan nyaꞌ ngemon direꞌ tamaꞌ ke alam kebala babi nyaꞌ. Isa madah: “Auꞌ,” jakoꞌ Ya.
33 Baroꞌ kebala sitan rari ari urang nyaꞌ, sidaꞌ tamaꞌ ke alam kebala babi, kebala babi nyaꞌ rari ke darong tamaꞌ ke danau, mati tengelam.
34 Breta kebala urang te ngintu kebala babi nyaꞌ medaꞌ piyaꞌ, sidaꞌ beburoh beguai ke kuta abaꞌ kebala kampong te semak nyaꞌ. Sidaꞌ nusoi ke urang apa te udah sidaꞌ pedaꞌ.
35 Udah nyaꞌ, kebala urang angkat kaꞌ medaꞌ apa te tejadi. Sidaꞌ datai ngusong Isa abaꞌ sidaꞌ medaꞌ urang te udah desarong sitan nyaꞌ udah beselawar baju abaꞌ udah semoh dudok nyemak kaki Isa, sidaꞌ ma takot ke Isa.
36 Kebala urang te udah medaꞌ ngau mata sidaꞌ kedireꞌ nusoi ke kebala urang, kati urang te desarong sitan nyaꞌ udah dasemoh.
37 Ugaꞌ urang te de daerah Gerasa nyaꞌ nyuroh Isa nudi sidaꞌ, nema sidaꞌ takot amat ke Ya. Kebaꞌ Ya angkat nikeꞌ prau kaꞌ pulai.
38 Uleh urang te udah desarong sitan nyaꞌ madah: “Isa, ku kaꞌ abaꞌ Wan, ku kaꞌ jadi muret Wan.” Uleh Isa nyuroh ya pulai, abaꞌ madah:
39 “Pulai meh ke rumah meh abaꞌ tusoi kebala urang apa te udah Tuhan Allah pulah ke meh.” Baroꞌ urang nyaꞌ angkat pulai abaꞌ ya ngelileng ugaꞌ kuta nusoi apa te udah Isa pulah ke ya.
Isa nyemoh urang inoꞌ te pedeh abaꞌ ngidop anak Yairos
40 Pas Isa datai ari seberang danau Galelia, mayoh urang gaga nyamot Ya nema sidaꞌ lamaꞌ ngentang penatai Ya.
41 Tengan nyaꞌ datai Yairos, Yairos nyaꞌ kepalaꞌ rumah te jalai urang Yahudi nyemah Tuhan Allah. Blumaꞌ tesungkor de kaki Isa, ya mintaꞌ isaꞌ Isa datai ke rumah ya,
42 nema anak tungal inoꞌ ya, te umor dua belas taon nyau kaꞌ mati. Kebaꞌ nyaꞌ nyuroh Isa angkat abaꞌ sidaꞌ bejalai mansang ke rumah Yairos. Tengan sidaꞌ bejalai, mayoh amat urang sampai bekeneꞌ ngugoꞌ Isa.
43 De entara sidaꞌ adai urang inoꞌ te udah dua belas taon saket dujoh,b abaꞌ niseꞌ urang te tauꞌ nyemoh ya.
44 Ya nyeleteꞌ kebala urang mayoh te de belakang Isa abaꞌ nyamah ramai jubah Ya, breta nyaꞌ ya teka skelen semoh.
45 Udah nyaꞌ Isa nanyaꞌ: “Sapa kitaꞌ te udah nyamah Ku?” Uleh datai ke sikoꞌ urang niseꞌ te kaꞌ ngangkoꞌ, baroꞌ Petros madah: “Guru, urang lamaꞌ mayoh bekeneꞌ ngerumon Wan.”
46 Uleh Isa madah: “Adai te nyamah Ku, Ku ngasa adai kuasa te keluar ari Ku.”
47 Ninga piyaꞌ, urang inoꞌ nyaꞌ tauꞌ badaꞌ apa te dapulah ya daketauꞌ Isa. Kebaꞌ ya datai, ya takot blumaꞌ begetar tesungkor de mua Isa. Ya nusoi de mua urang banyau, ngapa ya nyamah Isa abaꞌ breta ya nyamah Isa, ya teka semoh skelen.
48 Kebaꞌ Isa madah ke ya: “Anak Ku, deꞌ udah semoh, nema deꞌ pecayaꞌ ke Ku. Angkat deꞌ ngau ati lantang.”
49 Tengan Isa becakap, adai urang datai ari rumah Yairos ngusong kiyaꞌ abaꞌ madah ke Yairos: “Anak wan nyau mati, nang ngaru Guru.”
50 Pas Isa ninga piyaꞌ Ya madah ke Yairos: “Nang takot, pecayaꞌ jaꞌ meh ke Ku, abaꞌ anak meh pesti semoh.”
51 Pas sidaꞌ datai ke rumah Yairos, Isa ngerot urang tamaꞌ ke alam rumah abaꞌ Ya, bukai ari Petros, Yohanes, Yakubos, abaꞌ apai inai miyak nyaꞌ te desadi Ya tamaꞌ.
52 Ugaꞌ urang te adai diyaꞌ tengan nyabak ke miyak nyaꞌ, Isa madah: “Jadi kitaꞌ nyabak, miyak nyaꞌ nadai mati, ya bayah tinok mah.”
53 Uleh urang te diyaꞌ ketawaꞌ ke Isa, nema sidaꞌ tauꞌ badaꞌ miyak nyaꞌ nyau mati.
54 Baroꞌ Isa tamaꞌ ke teban te jalai mengaleꞌ miyak nyaꞌ, Ya megai jari miyak nyaꞌ abaꞌ madah: “Dani nak.”
55 Semengat miyak nyaꞌ sintak pulai ke ya, tengan nyaꞌ ya teka dani abaꞌ angkat diri. Baroꞌ Isa nyuroh urang mereꞌ miyak nyaꞌ makai.
56 Apai inai miyak nyaꞌ ma ampal, uleh Isa ngerot sidaꞌ madah ke urang apa te udah Ya pulah.