Isa ngutos dua belas rasol Ya
9
Isa ngumai dua belas rasol abaꞌ Ya nyuroh sidaꞌ begugoꞌ, baroꞌ Ya mereꞌ kuasa ke sidaꞌ ngau sidaꞌ muru bala sitan abaꞌ nyemoh kebala penyaket.
2 Isa ngutos sidaꞌ ke kebala kuta abaꞌ kampong isaꞌ sidaꞌ nusoi ke urang upa apa Pemerintah Tuhan Allah abaꞌ sidaꞌ dautos nyemoh kebala urang te pedeh.
3 Sebedau sidaꞌ angkat Isa madah ke sidaꞌ: “Nang ngemaiꞌ kebala utai enteꞌ kitaꞌ angkat, bayek kebala tungkat, kebala tas bekal, kebala te depakai, kebala duet, abaꞌ kebala baju te ngau begareꞌ.
4 Den lah enteꞌ adai urang nerimaꞌ kitaꞌ bemalam de rumah sidaꞌ, diyaꞌ mah kitaꞌ bemalam sampai ke senta kitaꞌ angkat ageꞌ ari nyaꞌ.
5 Enteꞌ kebala urang te den nadai nerimaꞌ kitaꞌ, adu mah diyaꞌ. Angkat kitaꞌ ari kuta nyaꞌ abaꞌ tepas kah debu te diyaꞌ ari kaki kitaꞌ isaꞌ nyaꞌ ngau tana ke sidaꞌ jemah lah Tuhan Allah kaꞌ ngukom sidaꞌ.”
6 Baroꞌ kebala rasol Isa nyaꞌ angkat bejalai ari suteꞌ kampong ke kampong te kebukai, madah brita bayek Pemerintah Tuhan Allah abaꞌ nyemoh kebala urang te pedeh de ugaꞌ teban te sidaꞌ pansaꞌ.
Herodes ampal ke sapa Isa nyaꞌ
7 Tengan Herodes mrintah de wilayah Galelia, ya ninga kebala brena utai te nyaroh ari Tuhan Allah te dapulah Isa. Ya ampal, nema adai te madah: “Isa nyaꞌ Yohanes Pemaneꞌ te idop ageꞌ.”
8 Adai te madah: “Ya nabi Elia te datai ari sruga.” Abaꞌ adai gaꞌ te madah: “Ya salah sikoꞌ nabi te meliyaꞌ idop ageꞌ.”
9 Uleh Herodes madah: “Ku udah nyuroh urang mancong palaꞌ Yohanes. Uleh sapa weh pengamat urang toꞌ? Udah mayoh amat brita Ya te ku dinga kah.” Baroꞌ Herodes ngigaꞌ cara isaꞌ ya tauꞌ betemu abaꞌ Isa.
Limaꞌ ribu urang dabereꞌ Isa makai
10 Udah kebala muret Isa te Ya utos datai ageꞌ, sidaꞌ nusoi ke Isa apa te udah sidaꞌ pulah kah. Baroꞌ Isa ngemaiꞌ kebala muret Ya jaoh ari urang banyau, angkat bong ke kuta Betsaida isaꞌ sidaꞌ tauꞌ kedireꞌ.
11 Uleh breta urang banyau tauꞌ badaꞌ Isa kiyaꞌ, sidaꞌ mupoh Isa. Ya gaga nerimaꞌ sidaꞌ abaꞌ nusoi ke sidaꞌ upa apa Pemerintah Tuhan Allah abaꞌ Ya nyemoh kebala urang te pedeh.
12 Nyau malam ari dua belas muret Isa datai ngusong Ya abaꞌ madah: “Guru, amang ku bayek enteꞌ Wan nyuroh kebala urang nyaꞌ angkat ke kebala desa abaꞌ kampong te semak toꞌ, isaꞌ sidaꞌ tauꞌ ngigaꞌ te jalai sidaꞌ makai abaꞌ tinok ngantok, nema teban te jalai kita toꞌ jaoh ari urang.”
13 Isa nyawot sidaꞌ: “Kitaꞌ mah te alah mereꞌ sidaꞌ makai.” Uleh kebala muret Isa nyawot Ya: “Te adai de kami toꞌ peroꞌ limaꞌ uteꞌ ruti abaꞌ dua ikoꞌ ikan mah, nadai ngenani bayah ngau urang te pemayoh toꞌ, paleng enteꞌ kami angkat meli kebukai mah.”
14 Sidaꞌ madah piyaꞌ nema diyaꞌ te laki jaꞌ adai sekitar limaꞌ ribu. Baroꞌ Isa madah ke muret Ya: “Asoh ke sidaꞌ dudok bekelumpok sekitar limaꞌ puloh ikoꞌ sekelumpok.”
15 Kebala muret Isa mulah apa te dasuroh Isa ke sidaꞌ baroꞌ urang banyau nyaꞌ dudok.
16 Baroꞌ Isa nyapai limaꞌ uteꞌ ruti abaꞌ dua ikoꞌ ikan. Ya engkadah ke langet ngucap sukor trimaꞌ kaseh ke Tuhan Allah, blumaꞌ Ya mungaꞌ ruti abaꞌ ikan nyaꞌ. Udah nyaꞌ Isa mereꞌ ke muret Ya, isaꞌ sidaꞌ magi ke kebala urang banyau te diyaꞌ.
17 Udah ugaꞌ sidaꞌ te diyaꞌ makai sampai kenyang, adai dua belas ragaꞌ teda ruti abaꞌ ikan te dakumpol kebala muret Isa.
Petros madah Isa nyaꞌ mah Al Maseh
18 Adai sekaleꞌ tengan Isa bradua kedireꞌ, kebala muret Ya datai ngusong Ya. Baroꞌ Ya nanyaꞌ ke sidaꞌ: “Jakoꞌ urang mayoh sapa Ku toꞌ?”
19 Sawot sidaꞌ: “Adai te madah Wan Yohanes Pemaneꞌ, adai te madah nabi Elia abaꞌ adai gaꞌ te madah Wan sikoꞌ nabi te dulau udah idop ageꞌ.”
20 Isa nanyaꞌ ageꞌ: “Enteꞌ jakoꞌ kitaꞌ kedireꞌ, sapa Ku toꞌ?” Sawot Petros: “Wan mah Al Maseh, Raja te dedanyi Tuhan Allah.”
21 Isa madah ke kebala muret Ya: “Nang sekaleꞌ-kaleꞌ kitaꞌ nusoi utai toꞌ ke urang bukai.”
Isa madah pemedeh abaꞌ pemati Ya
22 Baroꞌ Isa madah ke kebala muret Ya: “Ensia te datai ari Tuhan Allah, alah mayoh ngasa pemedeh abaꞌ dakengai kebala urang tuai bansa Yahudi, kebala kepalaꞌ imam, abaꞌ kebala urang te ahli de alam kitab te datules Musa. Ensia te datai ari Tuhan Allah nyaꞌ kaꞌ dabunoh, uleh ari ketiga Ya idop ageꞌ.”
23 Baroꞌ Isa madah ageꞌ ke ugaꞌ urang te diyaꞌ: “Ugaꞌ urang te kaꞌ jadi muret Ku nitauꞌ idop nunaꞌ penekaꞌ ati direꞌ, alah selareh siap nangong saleb ngenap ari abaꞌ alah bamat-amat abaꞌ Ku.
24 Nema sapa urang te kaꞌ berusaha ngintu idop direꞌ de dunia toꞌ, ya nitauꞌ jong idop abaꞌ Tuhan Allah sengabot; uleh sapa urang te kaꞌ nyerah idop ya nema pecayaꞌ ke Ku, ya pesti jong idop abaꞌ Tuhan Allah sengabot.
25 Niseꞌ guna urang buleh ugaꞌ utai te de dunia toꞌ enteꞌ ya nitauꞌ jong idop abaꞌ Tuhan Allah sengabot.
26 Enteꞌ adai urang te malu ngangkoꞌ direꞌ muret Ku abaꞌ malu ngangkoꞌ te Ku ajar kah, Ensia te datai ari Tuhan Allah sigeꞌ malu ngangkoꞌ urang nyaꞌ senta Ya datai jemah lah. Senta nyaꞌ, Ya datai ke dunia toꞌ, abaꞌ ugaꞌ urang medaꞌ sinar kuasa Ya te lampar besai upa te adai de Apai Ya abaꞌ kebala mlikat suci.
27 Ku madah ke kitaꞌ, de entara urang te adai ditoꞌ adai te nadai mati sebedau sidaꞌ medaꞌ senta Pemerintah Tuhan Allah.”
Isa dapedaꞌ besinar de atau buket
28 Sekitar lapan ari udah Isa ngajar munyi piyaꞌ, Ya ngemaiꞌ Petros, Yohanes, abaꞌ Yakubos nikeꞌ ke buket kaꞌ bradua.
29 Tengan Isa bradua, mua Ya bebaleꞌ abaꞌ selawar baju Ya puteh besinar.
30 Nadai mang-mang diyaꞌ adai pedaꞌ gaꞌ dua ikoꞌ urang, Musa abaꞌ nabi Elia tengan becakap abaꞌ Isa.
31 Snikoꞌ nganyaꞌ direꞌ alam sinar te lampar terang ari sruga. Diyaꞌ, sidaꞌ becakap enteꞌ Isa nadai lamaꞌ ageꞌ kaꞌ mati de Yerosalem nunaꞌ te deamoꞌ Tuhan Allah.
32 Tengan nyaꞌ, Petros abaꞌ kawan ya tetinok. Pas sidaꞌ tekejot, sidaꞌ medaꞌ sinar lampar terang ari Isa abaꞌ sidaꞌ medaꞌ gaꞌ Musa abaꞌ nabi Elia semak Ya.
33 Breta Musa abaꞌ nabi Elia nyau kaꞌ nudi Isa, Petros madah ke Ya: “Guru, haja gaga kami diyau ditoꞌ Wan. Kati enteꞌ kami mulah langkau ngau kitaꞌ tiga, sebuah ngau Wan, sebuah ngau Musa abaꞌ sebuah ngau nabi Elia.” (Petros madah munyi piyaꞌ nema ya nitauꞌ badaꞌ apa te kaꞌ depadah).
34 Tengan ya madah piyaꞌ turon mah awan ngelikop sidaꞌ, kebaꞌ sidaꞌ haja ma mah takot.
35 Baroꞌ sidaꞌ ninga goꞌ ari alam awan nyaꞌ: “Toꞌ mah Anak Ku te Ku pileh, dinga kah apa te jakoꞌ Ya.”
36 Udah Petros, Yohanes, abaꞌ Yakubos ninga goꞌ nyaꞌ, sidaꞌ medaꞌ peroꞌ Isa kedireꞌ mah te ageꞌ diyaꞌ. Kebala muret Isa nyimpan alam ati apa te udah sidaꞌ pedaꞌ, abaꞌ sidaꞌ ngai dulau nusoi apa te sidaꞌ pedaꞌ ke urang bukai.
Isa muru sitan ari miyak te pedeh
37 Ari suteꞌ Isa abaꞌ tiga ikoꞌ muret Ya turon ari buket nyaꞌ, mayoh urang datai ngusong Isa.
38 Nadai mang-mang sikoꞌ urang laki ari tengah urang banyau ngangau Ya: “Guru, tulong pedaꞌ kah anak ku, ya mah sikoꞌ-ikoꞌ anak ku.
39 Enteꞌ bidek sitan nyarong ya, ya sintak enciak encerabak abaꞌ sitan nyaꞌ nguncang tuboh ya sampai mulot ya berepoꞌ. Sitan nyaꞌ niseꞌ pemadoꞌ medeh ya abaꞌ ngai nudi ya.
40 Ku udah mintaꞌ ke kebala muret Wan muru sitan nyaꞌ uleh sidaꞌ nadai talah.”
41 Baroꞌ Isa madah: “Kitaꞌ toꞌ amat-amat urang te nadai pecayaꞌ abaꞌ idop tesat! Sampai kmaya lah Ku alah sabar diyau de entara kitaꞌ baroꞌ kitaꞌ bamat-amat pecayaꞌ ke Ku?” Baroꞌ Isa madah ke ensia laki nyaꞌ: “Baiꞌ kitoꞌ anak direꞌ nyaꞌ.”
42 Breta miyak nyaꞌ bejalai nyau kaꞌ semak Isa, sitan nyaꞌ nguncang tuboh miyak nyaꞌ blumaꞌ ngempas ke tanah. Uleh Isa mrintah isaꞌ sitan nyaꞌ rari ari miyak nyaꞌ abaꞌ Ya nyemoh miyak nyaꞌ. Baroꞌ Ya ngemaiꞌ miyak nyaꞌ ke apai ya.
43a Kebala urang te diyaꞌ ampal medaꞌ kuasa Tuhan Allah te lampar besai.
Isa nusoi ageꞌ pemati Ya
43b Tengan kebala urang ageꞌ ampal medaꞌ apa te udah dapulah Isa, Ya madah ke kebala muret Ya:
44 “Dinga kah abaꞌ nang kelupa ke apa te jakoꞌ Ku toꞌ: Ensia te datai ari Tuhan Allah kaꞌ detangkap abaꞌ daserah ke penekaꞌ urang.”
45 Uleh kebala muret Isa nadai nyarok apa te jakoꞌ Ya. Nema reti pengamat te jakoꞌ Isa nyaꞌ ageꞌ detapok ari sidaꞌ, kebaꞌ sidaꞌ nadai nyarok te depadah Ya abaꞌ sidaꞌ nadai gaꞌ berani nanyaꞌ ke Isa apa reti te jakoꞌ Ya nyaꞌ.
Sapa te paleng penteng de entara kebala muret
46 Kebala muret Isa belayaꞌ abaꞌ direꞌ sebala. Sidaꞌ belayaꞌ ke sapa de entara sidaꞌ te paleng penteng.
47 Uleh Isa tauꞌ badaꞌ apa te adai de pemiker sidaꞌ. Medaꞌ piyaꞌ Ya ngameꞌ miyak, abaꞌ nepoꞌ de tisi Ya.
48 Baroꞌ Ya madah ke sidaꞌ: “Urang te nerimaꞌ miyak toꞌ nema ya pecayaꞌ ke Ku, bereti nerimaꞌ Ku. Urang te nerimaꞌ Ku bereti nerimaꞌ gaꞌ Ya te ngutos Ku. Nema urang te dapedaꞌ kitaꞌ nadai penteng de entara kitaꞌ, nyaꞌ mah te paleng penteng.”
Urang te ukai muret Isa muru sitan
49 Yohanes madah ke Isa: “Guru, adai kami medaꞌ urang te muru sitan ngau kuasa nama Wan, uleh kami rot kah nema ya ukai ari kelumpok kita.”
50 Baroꞌ Isa madah: “Nang kitaꞌ ngerot ya, asa urang nadai ngelawan kitaꞌ bereti ya kawan kitaꞌ.”
Isa abaꞌ urang Samaria
51 Breta nyau kaꞌ nyemak senta Isa deangkat ke sruga, Ya mutos direꞌ angkat ke Yerosalem abaꞌ kebala muret Ya.
52 Ya nyuroh sidaꞌ dua tiga ikoꞌ dulau ari Ya. Sidaꞌ nyaꞌ deasoh Ya tamaꞌ ke kampong te adai de wilayah Samaria isaꞌ sidaꞌ tauꞌ ngageh apa te dengau Ya.
53 Uleh urang te de kampong nyaꞌ ngai nerimaꞌ Isa abaꞌ kebala muret Ya, nema sidaꞌ kaꞌ mansang ke Yerosalem.
54 Medaꞌ piyaꞌ Yakubos abaꞌ Yohanes muret Isa nanyaꞌ ke Ya: “Tuhan, kaꞌ Wan jalai kami mintaꞌ ke Tuhan Allah nuron api ngau munas sidaꞌ?”
55 Uleh Isa malek, blumaꞌ ngerara snikoꞌ.
56 Udah nyaꞌ sidaꞌ angkat ke kampong te kebukai.
Kebala urang te kaꞌ nerudi Isa
57 De tengah jalai tengan Isa abaꞌ muret Ya ke Yerosalem, adai urang te madah ke Ya: “Guru, ku kaꞌ abaꞌ Wan, kikai Wan angkat kiyaꞌ mah ku.”
58 Isa madah: “Serigala adai peniyau abaꞌ burong adai sarang, uleh Ensia te datai ari Tuhan Allah, niseꞌ rumah direꞌ ngau Ya belepa.”
59 Baroꞌ Isa madah ke urang te kebukai: “Boh abaꞌ Ku, abaꞌ jadi muret Ku!” Uleh urang nyaꞌ nyawot: “Auꞌ Guru, uleh ku pulai dulau weh ngubor apai ku.”
60 Uleh Isa madah ke ya: “Isaꞌ mah urang mati ngubor urang mati; uleh meh angkat tusoi ke urang upa apa Pemerintah Tuhan Allah.”
61 Adai gaꞌ urang te kebukai madah: “Guru, ku kaꞌ abaꞌ Wan, uleh ku kaꞌ pulai dulau weh madah ke ugaꞌ keluarga ku.”
62 Uleh Isa nyawot ya: “Enteꞌ urang bekreja membajak tanah uleh begasak nilek ke belakang, pesti tanah te debajak ya nyaꞌ nadai bujor. Nyaꞌ sama abaꞌ urang te nerudi Ku uleh ya selareh ngenang kebala utai te dadudi ya, ya nadai patot ngelayan Tuhan Allah ngau Raja ya.”