Isa mileh kebala muret Ya te semaru
5
Adai sekaleꞌ Isa diri de tisi danau besai Genasaret. Diyaꞌ mayoh urang sampai bekeneꞌ semak Ya kaꞌ ninga pesau ari Tuhan Allah te depadah Ya.
2 Isa medaꞌ adai dua buah prau besai de tisi danau nyaꞌ. Kebala urang te bekreja ngigaꞌ ikan nyau turon ari prau nyaꞌ abaꞌ sidaꞌ tengan masok jala sidaꞌ.
3 Baroꞌ Isa nikeꞌ ke sigeꞌ prau te diyaꞌ, prau nyaꞌ noꞌ Simon. Isa nyuroh Simon ngenyoꞌ prau ya jaoh geꞌ ari tisi danau, udah nyaꞌ Ya dudok abaꞌ Ya ngajar urang banyau ari prau nyaꞌ.
4 Udah Isa ngajar, Ya madah ke Simon: “Kayoh kah prau meh ke teban te dalam, abaꞌ jentang kah jala meh ngau nguleh ikan.”
5 Baroꞌ Simon nyawot Ya: “Guru, nyau udah semalam-malam teh kami berunteꞌ ngigaꞌ ikan uleh datai ke sikoꞌ mah kami niseꞌ buleh. Uleh nema Wan te nyuroh, auꞌ em, ku jentang ke mah jala kami toꞌ.”
6 Breta sidaꞌ udah nyentang jala sidaꞌ, sidaꞌ ma mah mayoh buleh ikan, nyaꞌ ngasoh jala sidaꞌ nyau kaꞌ carek.
7 Baroꞌ sidaꞌ ngepai jari ngangau kebala kawan te de prau te bukai isaꞌ datai mantoꞌ sidaꞌ. Breta kebala kawan te sidaꞌ kangau datai kiyaꞌ, sidaꞌ beramai-ramai ngiseꞌ ikan ke dua buah prau sidaꞌ, sampai prau sidaꞌ sama nyau kaꞌ karam.
8 Breta medaꞌ piyaꞌ, Simon Petros tesungkor de mua Isa, ya madah: “Tuhan, dudi kah ku toꞌ, nema ku toꞌ urang te dusa.”
9-10 Simon madah piyaꞌ nema ya abaꞌ kawan ya Yakubos abaꞌ Yohanes anak Sibedius, abaꞌ ugaꞌ urang te diyaꞌ ampal medaꞌ pemayoh ikan te dauleh sidaꞌ. Baroꞌ Isa madah ke Simon: “Nang meh takot, belaboh ari sari toꞌ meh nadai bekreja ngigaꞌ ikan ageꞌ, uleh meh ngigaꞌ kebala urang isaꞌ pecayaꞌ ke Ku.”
11 Udah nyaꞌ sidaꞌ nipu prau sidaꞌ ke darat, sidaꞌ nudi ugaꞌ apa te daempu sidaꞌ, baroꞌ sidaꞌ nerudi Isa.
Isa nyemoh urang te kenaꞌ penyaket kulet kusta
12 Adai sekaleꞌ Isa de suteꞌ kuta, de kuta nyaꞌ gaꞌ, adai sikoꞌ urang te sekayu tuboh ya kenaꞌ penyaket kulet kusta. Breta ya medaꞌ Isa, ya datai tesungkor de mua Isa, blumaꞌ mintaꞌ talau, jakoꞌ ya: “Tuhan, enteꞌ Wan kaꞌ, Wan talah nyemoh ku.”
13 Baroꞌ Isa ngulor jari Ya blumaꞌ megai ensia nyaꞌ, Ya madah: “Kaꞌ Ku nyemoh meh. Semoh meh!” Skelen nyaꞌ mah gaꞌ penyaket ensia nyaꞌ tulu semoh.
14 Baroꞌ Isa madah ke ensia nyaꞌ: “Nang meh nusoi ke urang bukai apa te udah Ku pulah ke meh, uleh ken ke meh nganyaꞌ direꞌ ke imam isaꞌ ya tauꞌ badaꞌ meh nyau semoh. Meh alah ngemaiꞌ kurban pesemah ke Tuhan Allah nunaꞌ printah Ya te datules Musa, abaꞌ pesemah nyaꞌ ngau tana ke urang bukai enteꞌ meh nyau semoh.”
15 Uleh utai te dapulah Isa nyaꞌ udah dadinga urang kiyaꞌ kitoꞌ, nyaꞌ ngasoh kebala urang mayoh datai ninga Ya ngajar, abaꞌ sidaꞌ mintaꞌ gaꞌ isaꞌ Ya nyemoh sidaꞌ ari kebala te medeh sidaꞌ.
16 Amat Isa ma sibok, uleh Ya selareh angkat ke teban te sunyeꞌ nyempat direꞌ ngau bradua.
Isa nyemoh urang lumpoh
17 Adai sekaleꞌ tengan Isa ngajar adai dua tiga ikoꞌ urang ari kelumpok Parisi abaꞌ kebala urang te ahli de alam kitab te datules Musa, dudok abaꞌ Isa. Sidaꞌ datai ari Yerosalem abaꞌ ari kebala kuta de wilayah Galelia abaꞌ Yudia. Kuasa Tuhan Allah adai de Isa ngau Ya nyemoh kebala urang te pedeh.
18 Tengan nyaꞌ, datai kebala urang te merangong urang lumpoh te tengan galeꞌ de atau tikai ya. Sidaꞌ ngigaꞌ akal kati ngemaiꞌ urang lumpoh nyaꞌ tamaꞌ alam rumah, isaꞌ sidaꞌ tauꞌ ngelekaꞌ ya de mua Isa,
19 uleh sidaꞌ nitauꞌ tamaꞌ nema urang diyaꞌ lampar mayoh. Kebaꞌ sidaꞌ ngemaiꞌ urang lumpoh nyaꞌ nikeꞌ ke atau atap, sidaꞌ nebok atap, baroꞌ sidaꞌ ngulor urang lumpoh nyaꞌ de mua urang mayoh, pas de mua Isa.
20 Breta Isa medaꞌ sidaꞌ ma mah pecayaꞌ ke Ya, Isa madah ke urang lumpoh nyaꞌ: “Nak, dusa meh udah deampon.”
21 Jakoꞌ alam ati kebala urang te ahli de alam kitab te datules Musa abaꞌ urang Parisi: “Sapa bah urang toꞌ, berani-rani Ya melicak Tuhan Allah? Peroꞌ Tuhan Allah mah tauꞌ ngampon kebala dusa urang.”
22 Isa tauꞌ badaꞌ iseꞌ ati sidaꞌ, kebaꞌ Ya madah: “Ngapa bah kitaꞌ miker te piyaꞌ alam ati kitaꞌ?
23 Ni te lebeh nyamai Ku padah: Dusa meh udah deampon, apa madah, Angkat bejalai kah meh!
24 Uleh toꞌ Ku kaꞌ kitaꞌ tauꞌ badaꞌ, Ensia te datai ari Tuhan Allah bekuasa de alam dunia toꞌ ngampon kebala dusa urang.” Baroꞌ Isa madah ke urang lumpoh nyaꞌ: “Angkat, katong ke tikai meh, pulai meh ke rumah meh.”
25 Urang lumpoh nyaꞌ sintak diri de mua sidaꞌ. Ya ngatong tikai ya, blumaꞌ pulai ya muji Tuhan Allah.
26 Ugaꞌ urang te diyaꞌ ma mah ampal, blumaꞌ adai prasa takot sidaꞌ muji Tuhan Allah. Sidaꞌ madah: “Lampar nyaroh apa te udah kita pedaꞌ ke sari toꞌ.”
Isa ngumai Liwi isaꞌ nerudi Ya
27 Udah nyaꞌ Isa keluar Ya medaꞌ Liwi sikoꞌ urang te nageh pajak tengan dudok de kantor ya. Isa madah ke ya: “Boh nerudi Ku.”
28 Baroꞌ Liwi diri, ya nudi kreja abaꞌ ugaꞌ apa te daempu ya, abaꞌ ya nerudi Isa.
29 Udah nyaꞌ, Liwi mulah acara makai besai ngau nyamot Isa de rumah ya. De acara nyaꞌ adai mayoh gaꞌ kebala penageh pajak abaꞌ kebala urang te bukai abaꞌ makai diyaꞌ.
30 Medaꞌ piyaꞌ kebala urang ari kelumpok Parisi abaꞌ urang te ahli de alam kitab te datules Musa merunya ke kebala muret Isa. Sidaꞌ madah: “Ngapa bah kebala kitaꞌ makai nginom abaꞌ kebala penageh pajak abaꞌ kebala urang te dusa?”
31 Ninga piyaꞌ Isa nyawot sidaꞌ: “Ukai urang angas te merlu enteri, uleh urang pedeh te merlu enteri.
32 Ku datai nadai ngumai kebala urang te ngangap direꞌ udah bayek, uleh Ku datai ngumai kebala urang te dusa, isaꞌ sidaꞌ nudi kebala dusa te udah sidaꞌ pulah.”
Puasa te deajar Isa
33 Udah nyaꞌ kebala urang madah ke Isa: “Kebala muret Yohanes gah bradua abaꞌ puasa, piyaꞌ mah gaꞌ kebala muret urang Parisi, uleh ngapa kebala muret Wan selareh makai nginom?”
34 Isa nyawot sidaꞌ: “Piyaꞌ tauꞌ kitaꞌ nyuroh kebala temuai puasa enteꞌ urang gawai, enteꞌ penganten te laki ageꞌ abaꞌ sidaꞌ? Pesti nadai.
35 Uleh jemah lah adai senta penganten te laki nyaꞌ deameꞌ ari sidaꞌ, tengan nyaꞌ mah sidaꞌ puasa.”
36 Baroꞌ Isa nusoi suteꞌ kisah empama ke sidaꞌ upa pitoꞌ: “Niseꞌ urang te minsak baju te ageꞌ baru ngau nampal baju te lamaꞌ te nyau udah tebinsak. Nema enteꞌ piyaꞌ baju te baru nyaꞌ sigeꞌ abaꞌ tebinsak, apa klageꞌ baju lamaꞌ nadai tucok enteꞌ detampal ngau baju baru.
37 Upa piyaꞌ mah niseꞌ urang te ngiseꞌ aiꞌ angor baru ke alam badah aiꞌ lamaꞌ, nema aiꞌ angor te baru kaꞌ ngeruap nyaꞌ nyuroh badah aiꞌ nyaꞌ pecah. Aiꞌ angor mes tesioh abaꞌ badah aiꞌ nyaꞌ sigeꞌ ancor.a
38 Aiꞌ angor te baru alah datepoꞌ de alam badah aiꞌ angor te baru.
39 Abaꞌ urang te udah nginom aiꞌ angor te nyau lamaꞌ niseꞌ te kaꞌ nginom aiꞌ angor te baru, nema pesti mah sidaꞌ madah: ‘Aiꞌ angor te lamaꞌ nyaꞌ lebeh nyamai.’ ”b