Kisah empama urang te ngunsai beneh
4
Adai skaleꞌ Isa ngajar ageꞌ da tisi danau Galelia. Mayoh amat kebala urang datai ke menatai begugoꞌ ngelileng Ya. Medaꞌ piyaꞌ Ya angkat dudok de suteꞌ prau te de atau aiꞌ, uleh urang banyau nyaꞌ de darat. 2 Isa mayoh ngajar brena macam ke urang alam kisah empama. Ya nusoi kisah empama ke sidaꞌ upa pitoꞌ: 3 “Dinga kah! Adai sikoꞌ urang te beuma angkat ngunsai beneh de uma ya. 4 Jalai ya ngunsai, adai te laboh de tisi jalai. Baroꞌ kebala burong datai abaꞌ makai beneh nyaꞌ sampai mes. 5 Beneh keduaꞌ laboh de tanah te bebatu te nadai mayoh tanah, bala beneh nyaꞌ deras matok, nema tanah mimet. 6 Uleh nyau mataari tumoh beneh nyaꞌ sintak layos udah nyaꞌ tengkereng juros mati nema ya nitauꞌ beurat de teban tanah te mimet. 7 Adai keduaꞌ beneh laboh de tanah te beblayan dureꞌ, beneh nyaꞌ tumoh uleh dealet blayan dureꞌ, nyaꞌ nyuroh nitauꞌ bebuah. 8 Adai gaꞌ beneh te laboh de tanah te bayek, beneh nyaꞌ tumoh galak abaꞌ bebuah, adai te tiga puloh kaleꞌ lipat, adai te enam puloh kaleꞌ lipat, abaꞌ adai te seratos kaleꞌ lipat.” 9 Udah Isa nusoi kisah empama nyaꞌ, Ya madah, “Sapa te adai peneng ngau ninga, dinga kah!”10 Tengan Isa kedireꞌ, dua blas muret Ya abaꞌ kebala muret Ya te bukai nanyaꞌ ke Ya, apa reti kisah empama nyaꞌ. 11 Isa nyawot, “Kitaꞌ desadi Tuhan Allah ngetauꞌ upa apa Pemrintah Ya. Uleh ke urang bukai deajar ngau kisah empama, 12 isaꞌ:
‘Amat sidaꞌ medaꞌ, uleh sidaꞌ nadai amat-amat mrati,
abaꞌ amat sidaꞌ ninga, uleh nadai sidaꞌ nyarok,
isaꞌ sidaꞌ nadai bebalek ke Tuhan Allah abaꞌ Tuhan Allah ngampon sidaꞌ.’ ”a
13 Isa madah ke sidaꞌ ageꞌ, “Enteꞌ kitaꞌ nadai nyarok kisah empama toꞌ, kati kitaꞌ tauꞌ nyarok kebala kisah empama te bukai? 14 Urang te beuma ngunsai beneh nyaꞌ, kebarat urang te madah apa te jakoꞌ Tuhan Allah. 15 Beneh te laboh de tisi jalai, nyaꞌ kebarat urang te ninga apa te jakoꞌ Tuhan Allah, uleh Kepalaꞌ bala sitan datai ngameꞌ apa te udah dedinga ari alam ati sidaꞌ. 16 Beneh te laboh de tanah te bebatu nyaꞌ, kebarat urang te ninga apa te jakoꞌ Tuhan Allah abaꞌ sintak nrimaꞌ ngau ati gaga, 17 uleh apa te jakoꞌ Tuhan Allah nyaꞌ nadai beurat de alam ati sidaꞌ nyaꞌ nyuroh sidaꞌ nadai tan lamaꞌ. Asa adai te medeh sidaꞌ tegal patoh ke Tuhan Allah, sidaꞌ sintak rari ari Tuhan Allah. 18 Beneh te laboh de tanah te beblayan dureꞌ nyaꞌ, kebarat ke urang te ninga apa te jakoꞌ Tuhan Allah, 19 uleh saban ke pengidop sidaꞌ abaꞌ sidaꞌ kaꞌ idop nyamai de dunia toꞌ. Ugaꞌ nyaꞌ nekol apa te jakoꞌ Tuhan Allah bebuah alam idop sidaꞌ. 20 Beneh te laboh de tanah te bayek nyaꞌ kebarat ke urang te udah ninga abaꞌ nrimaꞌ apa te jakoꞌ Tuhan Allah. Nyaꞌ nyuroh sidaꞌ bebuah, adai te tiga puloh kaleꞌ lipat, adai te enam puloh kaleꞌ lipat, abaꞌ adai te seratos kaleꞌ lipat.”
Kisah empama klita te datungkop ngau tepayan
21 Udah nyaꞌ Isa madah ageꞌ, “Enteꞌ urang nungon klita nadai rinah nungkop ngau tepayan, abaꞌ rinah nepoꞌ de baroh peninok, uleh enteꞌ urang nungon klita alah datepoꞌ de teban te tingeꞌ. 22 Ugaꞌ te detapok kaꞌ pedaꞌ jemah lah abaꞌ ugaꞌ te nadai depadah sebedau nyaꞌ kaꞌ deketauꞌ abaꞌ dabungkar jemahlah. 23 Sapa te adai peneng ngau ninga, dinga kah!”
24 Baroꞌ Isa madah ageꞌ, “Dinga kah bamat-amat apa te jakoꞌ Ku! Apa te ngau kitaꞌ nyukat urang, nyaꞌ mah gaꞌ te dengau Tuhan Allah nyukat kitaꞌ, abaꞌ apa te ngau Tuhan Allah nyukat kitaꞌ lebeh berat ageꞌ. 25 Nema Tuhan Allah kaꞌ namah pemenauꞌ ke urang te kaꞌ nyarok, uleh ke urang te ngai nyarok, Tuhan Allah kaꞌ ngameꞌ pemenauꞌ te desangkaꞌ urang nyaꞌ empu ya.”
Kisah empama beneh te tumoh
26 Isa nyamong cakap Ya ageꞌ alam kisah empama, jakoꞌ Ya, “Pemrintah Tuhan Allah kebarat sikoꞌ urang te beuma angkat ngunsai beneh de tanah te jalai ya beuma. 27 Asa malam ya tinok, asa tawas ya dani. Ari beganti ke beganti beneh nyaꞌ matok abaꞌ tumoh galak. Uleh urang nyaꞌ nitauꞌ badaꞌ kati cara kebala beneh nyaꞌ tauꞌ matok abaꞌ tumoh galak. 28 Tanah nyaꞌ nyuroh beneh bebuah. Semaru beneh nyaꞌ matok, baroꞌ tumoh tingeꞌ, baroꞌ terbet, baroꞌ biseꞌ sakai jadi buah. 29 Enteꞌ ganom nyaꞌ nyau mudoh, urang nyaꞌ blaboh ngetau, nema nyaꞌ nyau senta rama ngetau.”
Kisah empama igeꞌ ensawi
30 Baroꞌ Isa madah ageꞌ, “Ngau apa weh kita tauꞌ nyemaꞌ Pemrintah Tuhan Allah nyaꞌ? Abaꞌ ngau kisah empama te ni kita tauꞌ nyemaꞌ lah? 31 Pemrintah Tuhan Allah toꞌ upa igeꞌ ensawi te detamak de tanah. Igeꞌ ensawi paleng met daentara beneh te adai de dunia. 32 Uleh asa igeꞌ ensawi nyaꞌ detamak, ya tumoh galak ari utai darebos te kebukai abaꞌ kebala burong tauꞌ besarang de dan ya.”
33 Isa mayoh ngajar sidaꞌ ngau kisah empama te upa nyaꞌ isaꞌ sidaꞌ nyarok. 34 Isa slareh ngau kisah empama asa ngajar kebala urang, uleh asa Ya abaꞌ kebala muret Ya kedireꞌ Ya madah reti ke sidaꞌ.
Isa nyuroh kudeꞌ abaꞌ glumang badoꞌ
35 Sari nyaꞌ gaꞌ pas nyau slepat petang, Isa madah ke kebala muret Ya, “Boh kita nyemrang danau.” 36 Baroꞌ Isa abaꞌ kebala muret Ya nikeꞌ ke prau te udah jalai Isa ngajar abaꞌ sidaꞌ blayar nudi kebala urang banyau da tisi danau. Tengan nyaꞌ adai gaꞌ kebala prau te bukai nrudi sidaꞌ. 37 Nadai lamaꞌ udah nyaꞌ datai mah kudeꞌ te lampar betat nacah danau nyaꞌ, nyaꞌ te nyuroh aiꞌ beglumang besai, abaꞌ aiꞌ tamaꞌ prau sidaꞌ, kebaꞌ prau sidaꞌ nyau kaꞌ karam. 38 Tengan nyaꞌ Isa tinok bebantal de buntot prau. Baroꞌ kebala muret Ya datai ngerak Ya abaꞌ madah ke Ya, “Guru, Wan nadai iboh enteꞌ kita mati?” 39 Ninga piyaꞌ Isa diri, Ya madah ke kudeꞌ abaꞌ glumang aiꞌ nyaꞌ, “Jadi mah!” Tengan nyaꞌ kudeꞌ abaꞌ glumang aiꞌ sintak badoꞌ seklen. 40 Udah nyaꞌ Isa nanyaꞌ sidaꞌ, “Ngapa bah kitaꞌ lampar takot? Ngapa bah kitaꞌ nadai pecayaꞌ ke Ku?” 41 Sidaꞌ empala takot abaꞌ sidaꞌ ampal abaꞌ nanyaꞌ ke pangan bukai, “Sapa bah ensia toꞌ, sampai kudeꞌ abaꞌ glumang aiꞌ nunaꞌ te jakoꞌ Ya?”