KISAH KEBALA RASOL
Roh Kudos dedanyi
1
O Tiopilos te tepanang, alam bukoꞌ ku te semaru ku udah nules kebala utai te depulah abaꞌ deajar Isa, 2 datai ke ari Ya terangkat ke sruga. Sebedau nyaꞌ Ya udah mereꞌ printah ari Roh Kudos ke kebala rasol te depileh Ya. 3 Udah Isa mati abaꞌ idop ageꞌ, selamaꞌ empat puloh ari Ya malar nganyaꞌ direꞌ ke kebala rasol Ya abaꞌ ngau brena macam tana Ya madah direꞌ bamat-amat idop ageꞌ. Isa mulah piyaꞌ isaꞌ sidaꞌ bamat-amat pecayaꞌ enteꞌ Ya nyau idop ageꞌ. Sidaꞌ medaꞌ Ya abaꞌ ninga Ya ngajar upa kati Pemrintah Tuhan Allah.4 Adai sekaleꞌ pas Isa begumpoꞌ makai abaꞌ kebala rasol, Ya ngerot sidaꞌ angkat ari Yerosalem, abaꞌ nyuroh sidaꞌ nungoꞌ danyi Apai te de sruga, munyi te udah Ya padah ke sidaꞌ. Jakoꞌ Ya, “Danyi te udah kitaꞌ dinga ari Ku, 5 Yohanes maneꞌ urang ngau aiꞌ, uleh nadai lamaꞌ ageꞌ lah kitaꞌ kaꞌ depaneꞌ ngau Roh Kudos.”
Isa terangkat ke sruga
6 Pas kebala rasol tengan begugoꞌ abaꞌ Isa, sidaꞌ nanyaꞌ Ya, “Tuhan, kaꞌ nadai Wan entoꞌ mulah pemrintah bansa Israel kuat ageꞌ?” 7 Sawot Ya, “Kitaꞌ nadai perlu tauꞌ badaꞌ kemaya ari abaꞌ senta nyaꞌ, nema utai nyaꞌ udah deatoh Apai nunaꞌ penekaꞌ Ya. 8 Uleh kitaꞌ kaꞌ nerimaꞌ kuasa, enteꞌ Roh Kudos turon ke atau kitaꞌ abaꞌ kitaꞌ kaꞌ jadi saksi Ku belaboh ari Yerosalem, Yudia, Samaria abaꞌ datai ke ujong bumi.”
9 Udah Isa madah piyaꞌ, Ya terangkat ke surga depedaꞌ sidaꞌ, abaꞌ awan ngelinong Ya ari pemedaꞌ sidaꞌ. 10 Pas tengan sidaꞌ engkadah ke langet jalai Ya terangkat nyaꞌ, nadai mang-mang dua ikoꞌ urang te ngau baju puteh bedawar diri semak sidaꞌ, 11 senikoꞌ nyaꞌ madah ke sidaꞌ, “O kebala sidaꞌ Galelia, ngapa kitaꞌ diri engkadah ke langet? Isa toꞌ te terangkat ke sruga nudi kitaꞌ, kaꞌ datai ageꞌ lah upa kitaꞌ medaꞌ Ya terangkat ke sruga.”
Kebala rasol ngentang danyi Isa
12 Udah nyaꞌ kebala rasol nyaꞌ angkat ari buket Saiton, sidaꞌ pulai ke Yerosalem. Penyaoh buket Saiton nyaꞌ ari Yerosalem kurang lebeh sekilu mah. 13 Nyau sidaꞌ datai ke kuta, sidaꞌ tamaꞌ ke bilek te de atau, de rumah urang teban te jalai sidaꞌ bemalam. Sidaꞌ nyaꞌ Petros, Yohanes, Yakubos, Andrias, Pelipos, Tumas, Bartolumios, Matios, Yakubos anak Alpios, Simon ari kelumpok Silot abaꞌ Yudas anak Yakubos. 14 Ugaꞌ sidaꞌ tekon abaꞌ sati bradua banyau, abaꞌ dua tiga ikoꞌ urang inoꞌ abaꞌ Maria inai Isa abaꞌ kebala menyadeꞌ Isa.
Matias depileh nganti Yudas
15 Adai sekaleꞌ kurang lebeh seratos dua puloh urang te pecayaꞌ ke Isa begugoꞌ bradua, Petros diri abaꞌ madah, 16 “O kebala menyadeꞌ, apa te detules alam Kitab Suci alah temoꞌ. Meliyaꞌ teh Roh Kudos ngasoh Raja Daot madah pesau ari Tuhan Allah, sapa Yudas Iskariot nyaꞌ. Yudas mah te mimpen urang nangkap Isa. 17 Isa udah mileh Yudas abaꞌ kami nglayan Tuhan Allah, kebaꞌ ya adai de kelumpok kami.”
( 18 Yudas toꞌ udah meli sebidang tanah ari upah pemenyat ya, diyaꞌ ya laboh tingkap, abaꞌ perot ya tebelah sampai ugaꞌ iseꞌ perot ya tebramas keluar. 19 Utai nyaꞌ ketauꞌ sidaꞌ Yerosalem, kebaꞌ tanah nyaꞌ alam baasa sidaꞌ depadah sidaꞌ Hakal-Dama, reti nyaꞌ Tanah Darah.)
20 Baroꞌ Petros nyamong cakap ya ageꞌ, “Kebaꞌ adai detules alam kitab Masmor,
‘Isaꞌ mah bilek ya sunyeꞌ,
isaꞌ mah niseꞌ urang te diyau diyaꞌ.’a
Abaꞌ adai gaꞌ detules alam ayat te kebukai,
‘Isaꞌ mah jabatan ya deameꞌ urang bukai.’b
21-22 Kebaꞌ nyaꞌ matang alah adai mah urang te nganti Yudas, isaꞌ ya abaꞌ kita nusoi enteꞌ Tuhan Isa bamat-amat nyau idop ageꞌ. Lebeh bayek kita mileh ari entara urang te ditoꞌ jaꞌ, uleh ya alah urang te lamaꞌ abaꞌ kelumpok kita te lamaꞌ gah nerudi Isa kiyaꞌ-kitoꞌ. Belaboh ari Yohanes maneꞌ urang datai ke Isa terangkat ke sruga.”
23 Baroꞌ sidaꞌ ngusol dua ikoꞌ urang, Yusop te degelar Barsabas abaꞌ ya gah dekumai Yustos, abaꞌ Matias. 24 Ugaꞌ sidaꞌ bradua abaꞌ madah, “O Tuhan, Wan mah te ngelala ati ugaꞌ urang, padah ke kami sapa te Wan pileh ari entara senikoꞌ toꞌ, 25 te tauꞌ nerimaꞌ tugas rasol nganti Yudas te udah mati laboh ke teban te patot ngau ya.” 26 Udah nyaꞌ sidaꞌ cabot undi ngau ngetauꞌ sapa de entara senikoꞌ te depileh Tuhan. Pas tengan nyaꞌ nama Matias te tepileh. Kebaꞌ ya delantek ngau rasol namah sidaꞌ sebelas te kebukai.