Roh Kudos turon
2
Pas senta ari besai Pentakosta sidaꞌ Yahudi, ugaꞌ urang pecayaꞌ begugoꞌ de suteꞌ bilek.a 2 Nadai mang-mang turon ari langet goꞌ munyi kudeꞌ betat menoh rumah te jalai sidaꞌ dudok begugoꞌ. 3 Udah nyaꞌ sidaꞌ medaꞌ utai upa daon api te nyebar abaꞌ turon ke atau sidaꞌ sikoꞌ-sikoꞌ. 4 Tengan nyaꞌ gaꞌ sidaꞌ depenoh Roh Kudos, abaꞌ sidaꞌ belaboh becakap ngau baasa te kebukai nunaꞌ te udah debereꞌ Roh Kudos ke sidaꞌ.5 Pas tengan nyaꞌ, de Yerosalem adai mayoh sidaꞌ Yahudi te patoh ke Tuhan Allah datai ari brena macam menua. Sidaꞌ abaꞌ ngeramai ari besai nyaꞌ. 6 Pas kebala urang banyau ninga goꞌ te sareng nyaꞌ, sidaꞌ datai begugoꞌ ke rumah nyaꞌ. Sidaꞌ ampal nema sidaꞌ ninga kebala rasol nyaꞌ becakap ngau baasa sidaꞌ kedireꞌ. 7 Baroꞌ sidaꞌ ma mah ampal abaꞌ madah, “Kati tauꞌ pitoꞌ? Kebala urang toꞌ sidaꞌ Galelia, uleh kita ninga sidaꞌ becakap ngau baasa kita. 8 Kati kita tauꞌ ninga sidaꞌ becakap ngau kebala baasa kita kedireꞌ? 9 Ngau baasa kita sidaꞌ Partia, Media, Elam, sidaꞌ wilayah Mesopotamia, Yudia Kapadokia, Pontus, Asia, 10 Prigia, Pampilia, Mesir, kebala propinsi Libia te besemak abaꞌ Kirene, kebala penatai ari Ruma, 11 adai kebala sidaꞌ Yahudi abaꞌ kebala sidaꞌ bansa te bukai te udah masok agama Yahudi, adai gaꞌ te datai ari pulau Kreta abaꞌ Arab. Ugaꞌ kita ninga sidaꞌ becakap ngau baasa kita upa kati kebala utai te nyaroh depulah Tuhan Allah.”
12 Nema sidaꞌ ampal kebaꞌ sidaꞌ betanyaꞌ ke sama direꞌ, “Kati utai toꞌ tauꞌ upa pitoꞌ?”
13 Uleh adai gaꞌ kebala urang te nyiner sidaꞌ abaꞌ madah, “Ah, paleng mah sidaꞌ tengan mabok.”
Petros madah pesau ari Tuhan Allah
14 Udah nyaꞌ Petros abaꞌ sebelas rasol nyaꞌ diri, abaꞌ ya madah ngau goꞌ te sareng, “O kebala manal menyadeꞌ ku sidaꞌ Yahudi abaꞌ ugaꞌ urang te diyau de Yerosalem. Dinga ke te jakoꞌ ku toꞌ, 15 kebala sidaꞌ toꞌ nadai mabok upa te desangkaꞌ kitaꞌ, nema entoꞌ ageꞌ lam baroꞌ jam semilan. 16 Uleh apa te depedaꞌ kitaꞌ entoꞌ nunaꞌ te detules nabi Yoel,
17 Kaꞌ datai de jeman pemadoꞌ apa te udah depadah Tuhan Allah,
‘Ku kaꞌ mereꞌ Roh Kudos ke ugaꞌ ensia,
kebaꞌ kebala miyak belaki inoꞌ kaꞌ benebuat,b
kebala bujang dara kaꞌ medaꞌ kebala utai te Ku anyaꞌ ke sidaꞌ
abaꞌ kebala urang tuai kaꞌ buleh mimpi ari Ku.
18 Senta nyaꞌ gaꞌ Ku kaꞌ mereꞌ Roh Ku
ke urang te nglayan Ku, bayek laki bayek inoꞌ
sidaꞌ kaꞌ madah pesau ari Ku.
19 Abaꞌ Ku kaꞌ mulah utai te nyaroh de langet
abaꞌ kebala tana de bumi.
Kaꞌ adai darah, api abaꞌ kebala gumpal asap.
20 Mataari kaꞌ maleꞌ itam petang upa malam,
abaꞌ bulan kaꞌ maleꞌ mirah upa darah
sebedau ari Tuhan,
te ma pedeh abaꞌ luar biasa nyaꞌ datai.
21 Tengan nyaꞌ sapa urang te ngumai nama Tuhan deselamat.’c
22 O kebala sidaꞌ Israel dinga ke apa te ku padah ke toꞌ! Isa sidaꞌ Nasaret nyaꞌ deutos Tuhan Allah ke kitaꞌ. Pedaꞌ ke kebala te luar biasa abaꞌ kebala tana te Tuhan Allah pulah de tengah kitaꞌ ari Tuhan Isa nyaꞌ. Upa te kitaꞌ ketauꞌ kah. 23 Nunaꞌ pengamoꞌ Tuhan Allah, Ya mutos nyerah Isa ke kitaꞌ, abaꞌ pas Isa deserah, kitaꞌ mintaꞌ urang jat munoh ngau cara nyaleb Ya. 24 Uleh Tuhan Allah ngidop Isa ageꞌ abaꞌ ngelepas Ya ari pemati, nema pesti Ya nadai jong mati. 25 Kebaꞌ Daot madah Isa upa pitoꞌ,
‘Ku selareh medaꞌ Tuhan,
nema Ya abaꞌ ku, kebaꞌ nyaꞌ urang nadai talah ngaru ku.
26 Kebaꞌ nyaꞌ ati ku gaga abaꞌ mulot ku muji Tuhan,
abaꞌ tuboh ku tauꞌ diyau tenang, nema Wan mah te deagam ku sengabot,
27 nema Wan nadai ngengaꞌ semengat ku jong de sebayan,
Wan nadai ngengaꞌ ku te setia nglayan Wan reraꞌ alam kubor.
28 Wan udah nunyok ke ku jalai te alah ku titi isaꞌ tauꞌ idop.
Wan kaꞌ nyuroh ku bamat-amat gaga nema Wan kaꞌ abaꞌ ku.’ ”d
29 Baroꞌ Petros nyamong cakap ya age, jakoꞌ ya, “O kebala menyadeꞌ, ku kaꞌ teros terang madah ke kitaꞌ sapa Raja Daot, puyang jagang bansa kita nyaꞌ. Ya nyau mati abaꞌ udah dekubor, abaꞌ kubor ya nyaꞌ ageꞌ tubah adai mah ditoꞌ, datai ke sari toꞌ. 30 Nema Raja Daot toꞌ nabi, kebaꞌ ya tauꞌ badaꞌ Tuhan Allah udah bedanyi ke ya abaꞌ besumpah kaꞌ ngangkat sikoꞌ urang ari pureh ya jadi raja. 31 Raja Daot udah medaꞌ apa te kaꞌ datai lah, abaꞌ ya udah becakap ke Al Maseh te kaꞌ idop ageꞌ. Daot madah,
Ya nadai dengaꞌ diyau de sebayan
abaꞌ tuboh Ya nadai reraꞌ alam kubor.
32 Isa toꞌ mah te udah deidop Tuhan Allah ageꞌ. Ugaꞌ kami toꞌ mah saksi nema kami medaꞌ lansong. 33 Isa terangkat ke sruga abaꞌ dudok de teban te paleng tepanang de sepiyak kanan Tuhan Allah. Abaꞌ Isa udah nerimaꞌ Roh Kudos te dedanyi Apai Ya. Kebaꞌ entoꞌ Isa udah mereꞌ Roh nyaꞌ, abaꞌ nyaꞌ mah te kitaꞌ pedaꞌ abaꞌ dinga entoꞌ. 34 Ukai Daot te terangkat ke sruga, uleh Isa. Kebaꞌ Daot madah,
‘Tuhan Allah madah ke Tuhan ku
35 Dudok ke Direꞌ de sepiyak kanan Ku,
datai ke senta Ku nyuroh kebala munsoh detijak kaki Direꞌ.’e
36 Kebaꞌ nyaꞌ ugaꞌ kitaꞌ sidaꞌ Israel alah tauꞌ badaꞌ, Tuhan Allah udah nyuroh Isa te udah kitaꞌ saleb ke nyaꞌ jadi Tuhan abaꞌ Al Maseh Raja Penyelamat.”
37 Breta kebala urang ninga utai nyaꞌ, ati sidaꞌ ma tusah. Baroꞌ sidaꞌ nanyaꞌ ke Petros abaꞌ kebala rasol te kebukai, “Kebala menyadeꞌ apa te alah kami pulah?”
38 Sawot Petros, “Kitaꞌ alah nudi kebala dusa kitaꞌ abaꞌ depaneꞌ ngau nama Isa Al Maseh isaꞌ Tuhan Allah ngampon kebala dusa kitaꞌ abaꞌ pesti kitaꞌ nerimaꞌ Roh Kudos. 39 Nema toꞌ udah dedanyi Tuhan Allah ke kitaꞌ abaꞌ pureh kitaꞌ abaꞌ ke ugaꞌ urang te ageꞌ jaoh, ugaꞌ urang te kaꞌ dekumai Tuhan Allah.”
40 Upa piyaꞌ mah Petros nyelas ke sidaꞌ ngau brena utai, baroꞌ udah nyaꞌ ya nyamong cakap ya ageꞌ ngau nguat ati sidaꞌ, jakoꞌ ya, “Berusaha ke kitaꞌ ngelepas direꞌ ari ukom Tuhan Allah te kaꞌ datai ke urang te jat de jeman toꞌ.”
Cara idop jemat te semaru
41 Mayoh urang pecayaꞌ apa te depadah Petros abaꞌ sidaꞌ depaneꞌ. Kebaꞌ pemayoh urang te pecayaꞌ sari nyaꞌ betamah kurang lebeh tiga ribu urang. 42 Sidaꞌ patoh ke pengajar kebala rasol abaꞌ kumpol sengabot. Sidaꞌ makai berama, mungaꞌ roti abaꞌ bradua banyau.
43 Ugaꞌ urang ampal abaꞌ takot, nema sidaꞌ medaꞌ mayoh utai te nyaroh ari Tuhan Allah te depulah kebala rasol, 44 Kebala urang te udah pecayaꞌ nyaꞌ idop sati, abaꞌ kebala te deempu sidaꞌ nyaꞌ, empu sidaꞌ banyau. 45 Selareh adai mah ari entara sidaꞌ te nyual kebala reta bena empu sidaꞌ, baroꞌ udah nyaꞌ asel nyaꞌ debagi ke pangan bukai nunaꞌ te deperlu sidaꞌ kedireꞌ. 46 Ngenap ari sidaꞌ begugoꞌ de Rumah Kudos Tuhan Allah abaꞌ sidaꞌ makai berama ngau ati gaga de kebala rumah pangan bukai. 47 Sidaꞌ muji Tuhan Allah sengabot, abaꞌ kebala urang ma mah gaga ke sidaꞌ. Ngenap ari Tuhan Allah namah jumlah ke sidaꞌ kebala urang te pecayaꞌ.