Petros nyemoh urang lumpoh
3
Adai sekaleꞌ kurang lebeh jam tiga ujong ari, Petros abaꞌ Yohanes angkat ke Rumah Kudos Tuhan Allah nema senta nyaꞌ jam ngau bradua. 2 Diyaꞌ, de pintu gerbang te desebot Pintu Gerbang Indah, adai sikoꞌ urang laki te lumpoh ari baroꞌ adai. Ngenap ari ensia nyaꞌ debaiꞌ kiyaꞌ isaꞌ mintaꞌ duet ke kebala urang te tamaꞌ ke Rumah Kudos Tuhan Allah. 3 Pas urang te lumpoh nyaꞌ medaꞌ Petros abaꞌ Yohanes kaꞌ tamaꞌ ke Rumah Kudos Tuhan Allah, ya mintaꞌ duet ke senikoꞌ. 4 Senikoꞌ nilek ke ya, baroꞌ Petros madah, “Pedaꞌ ke kemua!” 5 Baroꞌ urang nyaꞌ nilek ke Petros abaꞌ Yohanes, blumaꞌ ngagam senikoꞌ mereꞌ utai ke ya. 6 Uleh Petros madah ke ya, “Ku niseꞌ kebala duet, uleh ku adai kuasa ari Isa. Kebaꞌ ku nyuroh ngau kuasa nama Isa sidaꞌ Nasaret nyaꞌ: Bejalai mah!” 7 Baroꞌ Petros megai jari kanan ensia te lumpoh nyaꞌ abaꞌ mantoꞌ ya diri. Tengan nyaꞌ mah gaꞌ teka kuat mah bukoꞌ laleꞌ abaꞌ kaki ya. 8 Udah nyaꞌ nadai mang-mang ya beburoh diri abaꞌ bejalai kiyaꞌ-kitoꞌ, baroꞌ ya tamaꞌ ke laman Rumah Kudos Tuhan Allah abaꞌ Petros abaꞌ Yohanes blumaꞌ ya ngingkak-melanyong abaꞌ muji Tuhan Allah. 9 Ugaꞌ urang medaꞌ ya bejalai abaꞌ ninga ya muji Tuhan Allah. 10 Ugaꞌ urang te diyaꞌ ngelala ya, sidaꞌ tauꞌ badaꞌ ya mah te mangah mintaꞌ duet de Pintu Gerbang Indah de Rumah Kudos Tuhan Allah. Kebaꞌ sidaꞌ ma mah ampal medaꞌ ya bejalai.Petros ngajar de Ruai Salomo
11 Ensia te udah semoh nyaꞌ nerudi Petros abaꞌ Yohanes sengabot. Kebala urang banyau te ampal medaꞌ ensia nyaꞌ semoh, datai ngusong sidaꞌ tiga te benong adai de ruai te desebot Ruai Salomo. 12 Pas Petros medaꞌ kebala ensia nyaꞌ, ya madah ke sidaꞌ, “O kebala sidaꞌ Israel ngapa kitaꞌ ampal ke utai toꞌ? Ngapa kitaꞌ medaꞌ ke kami sengabot? Sangkaꞌ kitaꞌ ensia toꞌ tauꞌ bejalai tegal kami adai kuasa, abaꞌ tegal kami patoh ke Tuhan Allah? 13 Tuhan Allah te desemah puyang jagang kita Abraham, Isak abaꞌ Yakob, Tuhan Allah nyaꞌ udah nyunyong tingeꞌ pelayan Ya, Isa. Isa nyaꞌ urang te kitaꞌ serah abaꞌ kitaꞌ kengai ke de mua Pelatos, bataꞌ tengan nyaꞌ Pelatos kaꞌ ngelepas Ya. 14 Uleh kitaꞌ nadai nerimaꞌ Ya te Kudos abaꞌ Kenaꞌ, kitaꞌ empala mintaꞌ ke Pelatos isaꞌ ngelepas urang te gah munoh nganti Ya. 15 Kitaꞌ udah munoh Ya, bataꞌ Ya mah pon pengidop. Uleh Tuhan Allah udah nyuroh Ya idop ageꞌ ari entara urang te mati, abaꞌ kami toꞌ mah saksi. 16 Kitaꞌ udah medaꞌ ensia te lumpoh toꞌ. Entoꞌ ya nyau angas regas nema ya pecayaꞌ ke Isa abaꞌ kuasa Ya. Tegal ya pecayaꞌ ke Isa kebaꞌ ensia te lumpoh toꞌ tauꞌ angas regas ageꞌ de mua kitaꞌ.
17 Kebala menyadeꞌ, ku tauꞌ badaꞌ apa te kitaꞌ abaꞌ pemimpen kitaꞌ pulah ke Isa, nyaꞌ kitaꞌ pulah tegal kitaꞌ nitauꞌ badaꞌ te tengan kitaꞌ pulah. 18 Uleh ngau cara nyaꞌ mah Tuhan Allah nemoꞌ apa te udah depadah ke kebala nabi, enteꞌ Al Maseh alah ngasa pemedeh sampai mati. 19 Kebaꞌ nyaꞌ kitaꞌ alah nudi kebala dusa kitaꞌ abaꞌ bebalek ke Tuhan Allah isaꞌ Ya ngampon kebala dusa kitaꞌ, 20 isaꞌ Tuhan Allah ngasoh penyuan kitaꞌ lantang abaꞌ Ya kaꞌ ngutos Isa ke kitaꞌ jadi Al Maseh, Raja Penyelamat kitaꞌ te udah depileh ari semaru. 21 Al Maseh alah diyau de sruga datai ke senta kebala utai te baru, munyi te depadah Tuhan Allah ari kebala nabi suci Ya jeman meliyaꞌ teh. 22 Musa udah madah, ‘Tuhan Allah kitaꞌ kaꞌ ngutos ke kitaꞌ sikoꞌ nabi ari bansa kitaꞌ kedireꞌ upa Ya ngutos ku. Kitaꞌ alah ninga ugaꞌ te depadah ya ke kitaꞌ. 23 Sapa urang te ngai ninga te depadah nabi nyaꞌ, kaꞌ depunas ari ugaꞌ kita te deempu Ya.’ 24 Kebala nabi te gah madah pesau ari Tuhan Allah belaboh ari nabi Samuel abaꞌ kebala nabi te bukai, ugaꞌ sidaꞌ gah madah jeman toꞌ. 25 Kebala danyi te udah depadah kebala nabi nyaꞌ ngau kita. Alam danyi te depadah Tuhan Allah ke puyang jagang kita, Tuhan Allah madah ke Abraham munyi pitoꞌ, ‘Ari pureh meh Ku kaꞌ mereꞌ tuah ke ugaꞌ bansa de bumi.’ Danyi toꞌ ngau kitaꞌ gaꞌ. 26 Nyaꞌ ngasoh Tuhan Allah mileh Pelayan Ya, baroꞌ nyuroh Ya datai ke kitaꞌ dulau isaꞌ Ya mereꞌ tuah ke kitaꞌ. Cara Ya mereꞌ tuah ke kitaꞌ Ya ngasoh kebala kitaꞌ nudi dusa.”