SURAT PAULOS KE JEMAT
GALATIA
PENULAU BECAKAP
Surat toꞌ rasol Paulos tules ke kebala jemat te adai de Galatia, salah suteꞌ propinsi Ruma te adai de Asia Met. Urang te de Galatia toꞌ ukai sidaꞌ Yahudi. Meliyaꞌ teh sidaꞌ nyemah kebala roh-roh, uleh pas Paulos semaru belaboh madah Brita Bayek diyaꞌ, adai urang te pecayaꞌ ke Isa Al Maseh. Tengan nyaꞌ adai urang te nanyaꞌ apa urang Kristen alah patoh ke Prator Tuhan Allah te detules Musa. Paulos madah nadai alah piyaꞌ. Suteꞌ-uteꞌ te paleng penteng ngau pengidop urang Kristen nyaꞌ pecayaꞌ ke Isa Al Maseh. Ngau cara nyaꞌ ensia tauꞌ kenaꞌ de mua Tuhan Allah. Uleh adai kebala urang te ngelawan pengajar Paulos. Sidaꞌ ngajar urang alah nunaꞌ Prator Musa isaꞌ tauꞌ kenaꞌ de mua Tuhan Allah.
Surat Paulos toꞌ detules ngau nulong kebala urang te udah detesat kebala pengajar te salah nyaꞌ, isaꞌ sidaꞌ bebalek patoh ke pengajar te kenaꞌ. Paulos belaboh madah enteꞌ ya adai hak desebot rasol Isa Al Maseh. Paulos madah Tuhan Allah te mileh ya jadi rasol, ukai ensia. Tugas semaru ya nyaꞌ madah Brita Bayek ke urang te ukai bansa Yahudi (pasal 1-2.) Udah nyaꞌ Paulos madah ageꞌ ensia peroꞌ tauꞌ kenaꞌ de mua Tuhan Allah ngau cara pecayaꞌ ke Tuhan Allah (pasal 3-4.) De pasal pemadoꞌ kitab toꞌ (pasal 5-6), Paulos nunyok kaseh te timol de urang Kristen nyaꞌ nema ya pecayaꞌ ke Al Maseh. Kaseh nyaꞌ mah te ngasoh urang Kristen mulah kebala utai te bayek.