SURAT PAULOS KE JEMAT
GALATIA
PENULAU BECAKAP
Surat toꞌ rasol Paulos tules ke kebala jemat te adai de Galatia, salah suteꞌ Propinsi Ruma te adai de Asia Met. Urang te de Galatia toꞌ ukai sidaꞌ Yahudi. Meliyaꞌ teh sidaꞌ nyemah kebala roh-roh, uleh pas Paulos semaru blaboh madah Brita Bayek diyaꞌ, adai urang te pecayaꞌ ke Isa Al Maseh. Tengan nyaꞌ adai urang te nanyaꞌ apa urang Kristen alah patoh ke Prator Tuhan Allah te datules Musa. Paulos madah nadai alah piyaꞌ. Suteꞌ uteꞌ te paleng penteng ngau pengidop urang Kristen nyaꞌ pecayaꞌ ke Isa Al Maseh. Ngau cara nyaꞌ ensia tauꞌ kenaꞌ de mua Tuhan Allah. Uleh adai kebala urang te nentang pengajar Paulos. Sidaꞌ ngajar urang alah nunaꞌ Prator Musa isaꞌ tauꞌ kenaꞌ de mua Tuhan Allah.
Surat Paulos toꞌ datules ngau nulong kebala urang te udah datesat kebala pengajar te salah nyaꞌ, isaꞌ sidaꞌ bebalek patoh ke pengajar te kenaꞌ. Paulos blaboh madah enteꞌ ya adai hak dasebot rasol Isa Al Maseh. Paulos madah Tuhan Allah te mileh ya jadi rasol, ukai ensia. Tugas semaru ya nyaꞌ madah Brita Bayek ke urang te ukai bansa Yahudi (pasal 1-2). Udah nyaꞌ Paulos madah ageꞌ ensia proꞌ tauꞌ kenaꞌ de mua Tuhan Allah ngau cara pecayaꞌ ke Tuhan Allah (pasal 3-4). De pasal pemadoꞌ kitab toꞌ (pasal 5-6), Paulos nunyok kaseh te timol de urang Kristen nyaꞌ nema ya pecayaꞌ ke Al Maseh. Kaseh nyaꞌ mah te ngasoh urang Kristen mulah kebala utai te bayek.