SURAT PAULOS KE JEMAT
GALATIA
Tabeꞌ
1
Tabeꞌ ari ku rasol Paulos. Ku jadi rasol ukai dapileh kebala ensia, abaꞌ ukai gaꞌ ari sikoꞌ ensia. Uleh ku dapileh uleh Isa Al Maseh abaꞌ Allah Apai, te udah ngidop Isa ari pemati. 2 Kebala menyadeꞌ seiman kita te adai abaꞌ ku, kirem tabeꞌ gaꞌ ke kitaꞌ kebala jemat te adai de wilayah Galatia. 3 Ku bradua isaꞌ Tuhan Allah Apai kita abaꞌ Tuhan Isa Al Maseh nganyaꞌ pemayek ati abaꞌ mreꞌ idop penoh damai ke kitaꞌ. 4 Isa udah nyerah direꞌ mati, ngau ngelepas kita ari kebala dusa, isaꞌ kita slamat ari jaman te jat toꞌ. Ya mulah piyaꞌ nema nyaꞌ mah kedekaꞌ Tuhan Allah Apai kita. 5 Puji Tuhan Allah blaboh ari entoꞌ datai ke jemah! Amen.Proꞌ suteꞌ mah Brita Bayek
6 Ku ampal ke kitaꞌ deras amat nudi Tuhan Allah. Ya udah ngumai kitaꞌ isaꞌ idop alam pemayek ati Al Maseh, uleh kitaꞌ pecayaꞌ ke brita bayek te ke bukai ari Brita Bayek te udah kami padah ke kitaꞌ. 7 Tunaꞌ des niseꞌ brita bayek te kebukai, uleh adai urang te ngaru pemiker kitaꞌ abaꞌ brusaha ngubah Brita Bayek tentang Al Maseh. 8 Enteꞌ adai urang te madah brita bayek te kebukai ari Brita Bayek te udah kami padah ke kitaꞌ, entah ke nyaꞌ kami kedireꞌ, entah ke nyaꞌ mlikat ari sruga, pesti mah Tuhan Allah ngukom ya! 9 Upa te udah kami padah ke kitaꞌ meliyaꞌ teh jalai kami ageꞌ abaꞌ kitaꞌ. Entoꞌ ku madah ageꞌ, enteꞌ adai urang te madah ke kitaꞌ brita bayek te kebukai ari Brita Bayek te udah kitaꞌ trimaꞌ, isaꞌ mah Tuhan Allah ngukom urang nyaꞌ. 10 Ari apa te ku padah, amat mah enteꞌ ku sama skaleꞌ nadai kaꞌ brusaha nyuroh ati ensia gaga. Uleh ku proꞌ kaꞌ brusaha nyuroh ati Tuhan Allah gaga. Amat mah enteꞌ ku nadai brusaha nyuroh urang madah enteꞌ ku urang bayek. Enteꞌ ku proꞌ kaꞌ brusaha nyuroh ati ensia gaga, ku ukai playan Al Maseh.
Paulos nusoi kati ya jadi Rasol
11 Kebala menyadeꞌ, ku kaꞌ kitaꞌ tauꞌ badaꞌ, enteꞌ Brita Bayek te ku padah ke nyaꞌ nadai ari ensia. 12 Ku nadai nrimaꞌ Brita Bayek nyaꞌ ari ensia, abaꞌ niseꞌ urang te ngajar nyaꞌ ke ku. Isa Al Maseh kedireꞌ mah te nganyaꞌ Brita Bayek nyaꞌ ke ku. 13 Pesti kitaꞌ udah ninga kati pengidop ku meliyaꞌ, jalai ku ageꞌ nunaꞌ agama Yahudi. Kitaꞌ tauꞌ badaꞌ ku niseꞌ pemadoꞌ mrisa kebala jemat Allah, abaꞌ brusaha kaꞌ munas sidaꞌ. 14 Alam agama Yahudi, ku jaoh lebeh bayek ari sidaꞌ Yahudi te sepantar abaꞌ ku. Ku ma ransak nunaꞌ kebala prator adat basa puyang jagangku. 15 Uleh nema pemayek ati Tuhan Allah, Ya udah mileh ku blaboh ari ku adai alam perot inaiku abaꞌ ngumai ku jadi playan Ya. 16 Ya kaꞌ nyuroh ku bamat-amat nglala Anak Ya, isaꞌ ku nusoi Ya nyaꞌ ke urang te ukai bansa Yahudi. Pas tengan nyaꞌ ku nadai mintaꞌ ajar urang bukai. 17 Ku nadai gaꞌ angkat ke Yerosalem ngusong sidaꞌ te dulau ari ku jadi rasol. Uleh ku angkat ke dairah Arab, baroꞌ ari nyaꞌ ku bebalek ke kuta Damsek. 18 Tiga taon udah nyaꞌ, baroꞌ ku angkat ke Yerosalem ngunyong Kepas.a Diyaꞌ ku diyau de rumah ya plamaꞌ limaꞌ blas ari. 19 Uleh ku niseꞌ betemu abaꞌ kebala rasol te kebukai, bukai ari Yakubos menyadeꞌ Tuhan Isa. 20 Tuhan Allah te jadi saksi ku tauꞌ badaꞌ apa te ku tules ke toꞌ kenaꞌ, ku nadai bulaꞌ. 21 Udah nyaꞌ ku angkat ke propinsi Siria abaꞌ Klikia. 22 Uleh tengan nyaꞌ kebala jemat te adai de daerah Yudia bedau kalaꞌ medaꞌ ku. 23 Sidaꞌ proꞌ ninga urang madah, “Urang te dulau mrisa kami te pecayaꞌ ke Al Maseh, entoꞌ nyau madah Brita Bayek te udah kaꞌ dapunas ya dulau.” 24 Sidaꞌ muji Tuhan Allah nema apa te udah dapulah Tuhan Allah alam idop ku.