Kebala rasol te kebukai ngakoꞌ enteꞌ Paulos toꞌ rasol
2
Udah empat blas taon, ku angkat ageꞌ ke Yerosalem abaꞌ Barnabas, abaꞌ Titos ku baiꞌ ke gaꞌ. 2 Ku angkat ke Yerosalem nema nunaꞌ apa te udah Tuhan Allah anyaꞌ ke ku. Da Yerosalem ku kedireꞌ betemu abaꞌ kebala pemimpen jemat. Ku nyelas ke sidaꞌ Brita Bayek te ku padah ke kebala bansa te ukai bansa Yahudi. Ku kaꞌ kami sati isaꞌ playanan te udah ku pulah abaꞌ te toꞌ nadai pracuma. 3 Titos te abaꞌ ku ukai sidaꞌ Yahudi, uleh kebala pemimpen jemat Yerosalem nadai maksa ya dasunat nunaꞌ Prator Musa, 4 amat mah adai kebala urang te nesak utai nyaꞌ. Sidaꞌ nyaꞌ ngamoh direꞌ ke klumpok kita, budi-budi ngau menyadeꞌ kita. Kebala urang nyaꞌ diyau-diyau tamaꞌ ngintop, kaꞌ medaꞌ kita te nyau suteꞌ abaꞌ Al Maseh, amat nadai kita nyau bibas ari Prator Tuhan Allah te datules Musa. Sidaꞌ kaꞌ isaꞌ kita bebalek ageꞌ upa ulon nunaꞌ Prator Musa nyaꞌ. 5 Uleh kami sengai-ngai tunok ke sidaꞌ, nema kami kaꞌ nyaga isaꞌ Brita Bayek te amat nyaꞌ jong adai da kitaꞌ. 6 Uleh kebala pemimpen jemat niseꞌ namah apa te ku padahkah. (Ku nadai iboh ke sapa sidaꞌ meliyaꞌ, nema Tuhan Allah kedireꞌ nadai nyemeh mipeh urang te dakaseh.) 7 Uleh sebalek sidaꞌ nyaꞌ medaꞌ enteꞌ ku udah dapecayaꞌ madah Brita Bayek ke kebala urang te ukai bansa Yahudi, sama upa Petros de pecayaꞌ madah Brita Bayek ke kebala sidaꞌ Yahudi. 8 Nema Tuhan Allah te mreꞌ kuasa ke Petros jadi rasol kebala sidaꞌ Yahudi, Ya gaꞌ te mreꞌ kuasa ke ku jadi rasol ke kebala urang te ukai bansa Yahudi. 9 Yakubos, Petros, abaꞌ Yohanes te depanang ngau pemimpen jemat diyaꞌ sadar enteꞌ Tuhan Allah mreꞌ tugas kusos toꞌ ke ku, kebaꞌ sidaꞌ nabeꞌ ku abaꞌ Barnabas ngau tana kami toꞌ kawan kreja. Baroꞌ kami abaꞌ sidaꞌ bepekat, kami madah Brita Bayek ngau urang te ukai bansa Yahudi, abaꞌ sidaꞌ ngau sidaꞌ Yahudi. 10 Sidaꞌ proꞌ mintaꞌ, isaꞌ kami ingat mantoꞌ kebala urang te misken. Abaꞌ utai nyaꞌ lamaꞌ udah ku pulah ari meliyaꞌ.Paulos ngerara Petros
11 Pas Petros bekunyong ke Antiokia, ku ngerara ya nema te dapulah ya nyaꞌ salah. 12 Sebedau kebala urang te dautos Yakubos datai kiyaꞌ, Petros gah dudok makai abaꞌ sidaꞌ te ukai Yahudi, uleh nyau kebala urang te dautos Yakubos datai kiyaꞌ, ya ngai ageꞌ dudok abaꞌ sidaꞌ, nema ya takot ke kebala urang te kaꞌ isaꞌ ugaꞌ urang desunat. 13 Kebala sidaꞌ Yahudi te kebukai, te udah pecayaꞌ, sigeꞌ nadai jujor upa Petros, nema sidaꞌ nadai mulah nunaꞌ pengajar sidaꞌ, nyaꞌ nyuroh Barnabas sigeꞌ mulah piyaꞌ. 14 Pas ku medaꞌ tingkah sidaꞌ nadai sesuai abaꞌ pengajar te kenaꞌ alam Brita Bayek, ku ngerara Petros de mua sidaꞌ, “Enteꞌ meh sidaꞌ Yahudi, udah idop upa urang te ukai Yahudi, ngapa meh mukong kebala urang te ukai Yahudi idop nunaꞌ cara Yahudi?”
Sidaꞌ Yahudi abaꞌ te ukai Yahudi slamat nema pecayaꞌ ke Isa Al Maseh
15 Kami toꞌ adai ari bansa Yahudi, nadai ari bansa bukai te deangap dusa. 16 Kita tauꞌ badaꞌ datai ke sikoꞌ mah niseꞌ urang te kenaꞌ demua Tuhan Allah tegal nunaꞌ Prator Musa, uleh proꞌ tegal pecayaꞌ ke Isa Al Maseh. Kebaꞌ nyaꞌ mah gaꞌ te nyuroh kami pecayaꞌ ke Isa Al Maseh, isaꞌ kami tauꞌ kenaꞌ demua Tuhan Allah. Ku madah piyaꞌ nema datai ke sikoꞌ mah niseꞌ urang te tauꞌ kenaꞌ de mua Tuhan Allah, tegal nunaꞌ Prator Musa. 17 Kami pecayaꞌ ke Isa Al Maseh isaꞌ kami tauꞌ kenaꞌ demua Tuhan Allah. Uleh adai urang te nyalah pengajar kami, sidaꞌ madah, “Enteꞌ kitaꞌ proꞌ pecayaꞌ ke Isa Al Maseh uleh nadai tunok ke Prator Musa, kitaꞌ dusa, sama upa urang te ukai ari bansa Yahudi. Kitaꞌ dusa nema kitaꞌ proꞌ pecayaꞌ ke Isa Al Maseh.” Uleh apa te depadah sidaꞌ nyaꞌ salah! 18 Nema enteꞌ ku niri ageꞌ Prator Musa te udah ku ruboh, ku jadi urang te ngelangar Prator nyaꞌ. 19 Jalai ku brusaha nunaꞌ Prator Musa, ku tauꞌ badaꞌ ku nadai talah abaꞌ pesti ku mati alam dusa. Kebaꞌ ku badoꞌ brusaha nunaꞌ ugaꞌ Prator nyaꞌ, isaꞌ ku tauꞌ idop nunaꞌ kedekaꞌ Tuhan Allah. Ku udah desaleb abaꞌ Al Maseh. 20 Entoꞌ ukai ageꞌ ku te idop, uleh Al Maseh te idop alam ku. Abaꞌ idop te ku idop ke entoꞌ, nyaꞌ idop tegal pecayaꞌ ke Anak Tuhan Allah te ngaseh ku abaꞌ te udah mati ngau ku. 21 Ku nadai nulak pemayek ati Tuhan Allah ke ensia. Nema enteꞌ urang tauꞌ kenaꞌ demua Tuhan Allah tegal patoh ke Prator Musa, niseꞌ reti pemati Al Maseh.