Urang pecayaꞌ jadi urang te kenaꞌ tegal iman
3
Eh kebala sidaꞌ Galatia! Ngapa bah kitaꞌ lampar budu, ngapa bah kitaꞌ mudah amat detipu? Bataꞌ ku udah jelas ngajar ke kitaꞌ enteꞌ Isa Al Maseh nyaꞌ mati dekayu saleb tegal kita. 2 Sawot ke te ku tanyaꞌ ke toꞌ, kitaꞌ nerimaꞌ Roh Kudos tegal nunaꞌ Prator Tuhan Allah te detules Musa, sekaleꞌ ke tegal kitaꞌ pecayaꞌ ke Brita Bayek te kitaꞌ tinga? 3 Ngapa bah kitaꞌ lampar budu! Kitaꞌ udah belaboh idop baru depimpen Roh Kudos, uleh ngapa entoꞌ kitaꞌ miker kitaꞌ talah ngemansang idop baru nyaꞌ sampai temoꞌ ngau penalah kitaꞌ kedireꞌ? 4 Ku sama sekaleꞌ nadai pecayaꞌ enteꞌ pemedeh te udah kitaꞌ asa ke nyaꞌ nyau niseꞌ guna! 5 Jadi kati, Tuhan Allah mereꞌ Roh Kudos ke kitaꞌ abaꞌ mulah tana te nyaroh tegal kitaꞌ nunaꞌ Prator Musa, sekaleꞌ ke tegal kitaꞌ pecayaꞌ Brita Bayek te kitaꞌ tinga?6 Nyaꞌ sama upa te tejadi ke Abraham. Alam Kitab Suci depadah, “Abraham pecayaꞌ ke Tuhan Allah, abaꞌ tegal ya pecayaꞌ, ya tauꞌ kenaꞌ de mua Tuhan Allah.”a 7 Kebaꞌ kitaꞌ alah tauꞌ badaꞌ, urang te bamat-amat pureh Abraham nyaꞌ urang te pecayaꞌ ke Tuhan Allah. 8 Abaꞌ ari meliyaꞌ Kitab Suci udah madah Tuhan Allah kaꞌ ngasoh urang te ukai sidaꞌ Yahudi tauꞌ kenaꞌ de mua Ya nema sidaꞌ pecayaꞌ ke Ya. Meliyaꞌ teh Brita Bayek toꞌ udah depadah ke Abraham upa pitoꞌ, “Ari meh Ku kaꞌ mereꞌ tuah ke ugaꞌ bansa.”b 9 Abraham pecayaꞌ ke Tuhan Allah kebaꞌ ya debereꞌ berkat. Upa piyaꞌ gaꞌ ngenap urang te pecayaꞌ, kaꞌ debereꞌ berkat sama abaꞌ Abraham.
10 Uleh ugaꞌ urang te begantong ke Prator Musa, idop de baroh kutok. Nema alam Kitab Suci detules, “Tekutok ugaꞌ urang te nadai setia mulah ugaꞌ kebala utai te detules alam Prator Musa.”c 11 Jadi jelas, datai ke sikoꞌ mah niseꞌ urang te tauꞌ kenaꞌ de mua Tuhan Allah tegal patoh ke Prator Musa, nema Kitab Suci madah, “Urang te kenaꞌ tegal pecayaꞌ ke Tuhan Allah kaꞌ idop.”d
12 Dasar Prator Musa ukai pecayaꞌ ke Tuhan Allah, uleh apa te depulah. Upa te detules alam Kitab Suci, “Urang te patoh ke Prator Musa, kaꞌ idop tegal Prator nyaꞌ.”e 13 Al Maseh udah nebos kita ari kutok Prator Musa ngau cara Ya kedireꞌ dekutok nganti kita. Nema adai detules alam Kitab Suci, “Tekutok urang te degantong de tiyang kayu.”f 14 Isa Al Maseh mulah piyaꞌ, isaꞌ ari Ya berkat te udah dedanyi Tuhan Allah ke Abraham debereꞌ gaꞌ ke kebala bansa te ukai Yahudi. Ngau cara nyaꞌ, kita te pecayaꞌ ke Tuhan Allah tauꞌ nerimaꞌ Roh Kudos te udah dedanyi Ya.
Prator Musa sekaleꞌ ke danyi Tuhan Allah
15 Kebala menyadeꞌ, ku kaꞌ ngau suteꞌ cuntoh idop ari-ari. Empama teh adai dua belah pihak udah bedanyi abaꞌ danyi nyaꞌ udah desah, niseꞌ urang te tauꞌ ngemalang abaꞌ namah apa te udah depekat. 16 Tuhan Allah bedanyi ke Abraham abaꞌ ke sikoꞌ pureh ya. Alam Kitab Suci niseꞌ detules “ngau kebala pureh ya,” nyaꞌ breti nadai ngau urang mayoh, uleh detules “ke sikoꞌ pureh meh,”g nyaꞌ breti ke sikoꞌ urang jaꞌ, nyaꞌ mah Al Maseh. 17 Maksot ku: Danyi Tuhan Allah udah depulah abaꞌ lebeh dulau sah. Prator Musa te baroꞌ depulah empat ratos tiga puloh taon udah nyaꞌ, nitauꞌ ngemalang danyi te udah sah abaꞌ nitauꞌ ngapos danyi te debereꞌ Tuhan Allah.h 18 Nema enteꞌ berkat te debereꞌ Tuhan Allah tegantong ke urang patoh ke Prator Musa, nyaꞌ nadai ageꞌ tegantong ke danyi Ya. Uleh justru Tuhan Allah udah bedanyi ke Abraham, tegal pemayek ati Tuhan Allah, Ya mereꞌ tuah nyaꞌ ke Abraham.
19 Enteꞌ piyaꞌ engkapaꞌ Prator Musa? Prator nyaꞌ debereꞌ ngau nganyaꞌ kebala penyalah te depulah ensia. Prator nyaꞌ peroꞌ beguna datai ke senta penatai sikoꞌ pureh Abraham te depadah alam danyi Tuhan Allah ke Abraham. Prator Musa depadah kebala mlikat ke Musa, baroꞌ Musa madah ke urang te deempu Tuhan Allah. 20 Urang te jadi penengah nadai peroꞌ ngewakel sikoꞌ urang, uleh Tuhan Allah kedireꞌ mah te bedanyi ke Abraham.
21 Enteꞌ piyaꞌ Prator Musa belawan abaꞌ danyi Tuhan Allah? Sama sekaleꞌ nadai! Prator Musa nitauꞌ mereꞌ idop baru ke ensia. Enteꞌ utai nyaꞌ tauꞌ, breti ensia tauꞌ kenaꞌ de mua Tuhan Allah nema sidaꞌ patoh ke Prator nyaꞌ. 22 Uleh Kitab Suci madah ugaꞌ urang idop de baroh kuasa dusa, isaꞌ tegal pecayaꞌ ke Isa Al Maseh danyi nyaꞌ debereꞌ ke sidaꞌ te pecayaꞌ.
23 Sebedau senta urang tauꞌ pecayaꞌ ke Al Maseh, Prator Musa ngurong urang upa urang te depenyara. Utai nyaꞌ tejadi datai ke senta Tuhan Allah nganyaꞌ cara urang pecayaꞌ ke Al Maseh. 24 Prator Musa nyaꞌ ngator kita sampai Al Maseh datai, isaꞌ kita tauꞌ deangap kenaꞌ de mua Tuhan Allah nema kita pecayaꞌ ke Al Maseh. 25 Entoꞌ, nema nyau senta ensia tauꞌ pecayaꞌ ke Al Maseh, kebaꞌ kita nadai ageꞌ dator Prator Musa.
26 Kitaꞌ jadi anak Tuhan Allah nema kitaꞌ pecayaꞌ ke Isa Al Maseh abaꞌ suteꞌ abaꞌ Ya. 27 Ugaꞌ kitaꞌ te udah de paneꞌ ngau kuasa nama Al Maseh, udah suteꞌ abaꞌ Al Maseh abaꞌ nunaꞌ gaya idop Ya. 28 Toꞌ breti niseꞌ ageꞌ bida sidaꞌ Yahudi abaꞌ urang te ukai Yahudi, niseꞌ ageꞌ bida entara urang te jadi ulon abaꞌ urang te nadai jadi ulon, niseꞌ ageꞌ bida te laki abaꞌ te inoꞌ, nema ugaꞌ kitaꞌ udah suteꞌ alam Isa Al Maseh. 29 Nema kitaꞌ toꞌ empu Al Maseh, kebaꞌ kitaꞌ pureh Abraham gaꞌ abaꞌ adai hak nerimaꞌ berkat te udah dedanyi Tuhan Allah.