Niseꞌ ageꞌ ulon
4
Maksot te ku padah ke toꞌ: Selamaꞌ miyak ageꞌ engkaꞌ met, amat ya lah te ngewares empu apai inai, ya niseꞌ bida abaꞌ ulon. 2 Nema pewares nyaꞌ ageꞌ biyak, ya alah patoh ke urang te ngintu ya abaꞌ urang te nguros apa te deempu ya, datai ke senta te udah deatoh apai ya. 3 Upa piyaꞌ gaꞌ kita. Meliyaꞌ teh, kita ageꞌ upa miyak te bedau nyarok te dekedekaꞌ Tuhan Allah. Tengan nyaꞌ, kita jadi ulon kebala roh te jat te bekuasa de dunia toꞌ. 4 Uleh de senta te pas, Tuhan Allah ngutos Anak Ya ke dunia. Miyak nyaꞌ adai ari sikoꞌ inoꞌ abaꞌ Ya idop de baroh Prator Musa. 5 Tuhan Allah ngutos Anak Ya nyaꞌ, ngau ngelepas kita ari Prator Musa, isaꞌ kita tauꞌ detrimaꞌ jadi anak Tuhan Allah.6 Nema kitaꞌ udah jadi anak Tuhan Allah, kebaꞌ Tuhan Allah udah ngutos Roh Anak Ya ke ati kita. Roh Kudos nyaꞌ mah te nyuroh kita ngumai, “O Abba,a o Apai!” 7 Kitaꞌ ukai ageꞌ ulon, kitaꞌ nyau jadi anak. Abaꞌ nema kitaꞌ nyau jadi anak Tuhan Allah, kitaꞌ adai hak ngewares ugaꞌ te udah dedanyi Ya ke kebala anak Ya.
8 Meliyaꞌ teh, jalai kitaꞌ nadai ngelala Tuhan Allah, kitaꞌ jadi ulon kebala allah te kebukai, te ukai Tuhan Allah. 9 Uleh entoꞌ, kitaꞌ nyau ngelala Tuhan Allah, te lebeh tepat Tuhan Allah ngelala kitaꞌ. Ngapa kitaꞌ kaꞌ bebalek ageꞌ ngelayan kebala kuasa dunia toꞌ, te lemah abaꞌ niseꞌ guna? Ngapa kitaꞌ kaꞌ jadi ulon kebala kuasa nyaꞌ ageꞌ? 10-11 Ku saban ke apa te udah ku kreja ke kitaꞌ selamaꞌ toꞌ nyau niseꞌ ageꞌ reti, nema kitaꞌ patoh ke adat basa sidaꞌ Yahudi. Kitaꞌ ngeraya kebala ari besai Yahudi, kebala bulan, kebala rama, abaꞌ kebala taon te deatoh sidaꞌ.
Paulos saban ke kebala urang de Galatia
12 Kebala menyadeꞌ, ku mintaꞌ isaꞌ kitaꞌ upa ku, nema ku sigeꞌ udah upa kitaꞌ. Meliyaꞌ teh datai ke suteꞌ mah niseꞌ penyalah kitaꞌ ke ku. 13 Pesti kitaꞌ ingat semaru ku madah Brita Bayek ke kitaꞌ, tengan nyaꞌ ku pedeh. 14 Amat mah penyaket ku nyaꞌ ngripot kitaꞌ, kitaꞌ nadai mejaiꞌ ku abaꞌ nadai ngai ke ku. Uleh kitaꞌ empala nerimaꞌ ku upa nerimaꞌ mlikat ari Tuhan Allah abaꞌ sama upa nerimaꞌ Isa Al Maseh kedireꞌ. 15 Kitaꞌ lampar gaga tengan nyaꞌ, uleh entoꞌ, dini pengaga kitaꞌ te nyaꞌ? Ku tauꞌ badaꞌ tengan nyaꞌ kitaꞌ kaꞌ mereꞌ apa jaꞌ ke ku, ngerueng mata kitaꞌ kedireꞌ kira tauꞌ pon kitaꞌ pulah ke ku. 16 Uleh entoꞌ, nema ku madah te pengamat ke kitaꞌ, apa kitaꞌ ngangap ku munsoh kitaꞌ?
17 Kebala urang te nesat nyaꞌ ma ransak ngigaꞌ kitaꞌ, uleh maksot sidaꞌ nadai bayek. Sidaꞌ bayah kaꞌ ngenyawoh kitaꞌ ari kami, isaꞌ kitaꞌ ransak nerudi sidaꞌ. 18 Ku gaga enteꞌ kitaꞌ ransak, uleh kitaꞌ alah selareh ransak ngau kebala utai te bayek, abaꞌ nang peroꞌ tengan ku abaꞌ kitaꞌ. 19 Ku kaseh ke kitaꞌ upa anak ku kedireꞌ. Ku pedeh uleh gaya kitaꞌ upa urang inoꞌ pedeh tengan beranak, datai ke kebala urang tauꞌ medaꞌ Al Maseh alam idop kitaꞌ. 20 Ku gawok amat adai de tengah kitaꞌ tengan toꞌ, isaꞌ ku tauꞌ maleꞌ kati cara ku becakap ke kitaꞌ, nema ku niseꞌ akal ageꞌ ngadap kitaꞌ.
Hagar abaꞌ Sara jadi cuntoh dua danyi Tuhan Allah
21 Padah ke ku, o kitaꞌ te kaꞌ patoh ke Prator Musa, nyarok nadai kitaꞌ apa te detules alam Prator Musa? 22 Alam Kitab Suci adai detules enteꞌ Abraham empu dua ikoꞌ anak laki. Sikoꞌ adai ari inoꞌ te jadi ulon, te sikoꞌ ageꞌ, adai ari inoꞌ te ukai ulon. 23 Anak te adai ari inoꞌ te jadi ulon nyaꞌ adai ngau penekaꞌ ensia. Uleh anak te adai ari inoꞌ te ukai ulon, nyaꞌ adai nema nemoꞌ danyi Tuhan Allah.
24 Dua ikoꞌ inoꞌ nyaꞌ kebarat dua danyi Tuhan Allah abaꞌ urang te deempu Ya. Inoꞌ te jadi ulon nyaꞌ Hagar. Ya kebarat danyi semaru Tuhan Allah de buket Sinai. Kebala anak ya belaboh ari adai jadi ulon te patoh ke Prator Musa. 25 Hagar toꞌ kebarat Buket Sinai de tanah Arab, abaꞌ ya sama abaꞌ kuta Yerosalem te entoꞌ, nema ya abaꞌ kebala anak ya jadi ulon. 26 Uleh Sara bini Abraham toꞌ, inoꞌ te ukai ulon. Ya kebarat ke kuta Yerosalem ari Tuhan Allah, abaꞌ ya nyaꞌ inai kita nema kita udah bibas ari Prator Musa. 27 Nema adai detules alam Kitab Suci,
“Crigah gaga ke deꞌ o inoꞌ te manol,
te nadai kalaꞌ ngasa beranak!
Menanyi ke deꞌ ngau goꞌ te sareng,
dek te nadai kalaꞌ ngasa pemedeh beranak!
Nema inoꞌ te dedudi laki kaꞌ empu mayoh anak
ari inoꞌ te idop abaꞌ laki.”b
28 Kebala menyadeꞌ! Kitaꞌ kedireꞌ mah kebala anak Tuhan Allah te adai nema danyi Tuhan Allah, sama upa Isak. 29 Meliyaꞌ teh, Ismael anak Abraham te adai nunaꞌ penekaꞌ ensia, mrisa Isak anak te adai nunaꞌ penekaꞌ Roh Kudos. Upa piyaꞌ mah gaꞌ entoꞌ. 30 Uleh apa te depadah alam Kitab Suci? “Tesar ke inoꞌ te jadi ulon abaꞌ anak ya nema anak ya nitauꞌ buleh wares ari apai ya. Uleh anak ari inoꞌ te ukai ulon nyaꞌ te nerimaꞌ ugaꞌ wares apai ya.”c 31 Kebaꞌ nyaꞌ kebala menyadeꞌ, kita toꞌ bukai kebala anak ino te jadi ulon, uleh kebala anak inoꞌ te ukai ulon.