Kita udah debibas Al Maseh
5
Kita entoꞌ udah bibas, nema Al Maseh te udah nyuroh kita bibas! Kebaꞌ nyaꞌ diri tegoh abaꞌ nang kaꞌ jadi ulon ageꞌ. 2 Dinga kah! Ku Paulos, madah ke kitaꞌ: Enteꞌ kitaꞌ kaꞌ desunat, nyaꞌ breti apa te depulah Al Maseh niseꞌ guna ke kitaꞌ. 3 Skaleꞌ ageꞌ ku ngingat kitaꞌ, ngenap urang te kaꞌ desunat isaꞌ tauꞌ kenaꞌ de mua Tuhan Allah, ya alah patoh ke ugaꞌ Prator Tuhan Allah te detules Musa. 4 Kitaꞌ te berusaha isaꞌ tauꞌ kenaꞌ de mua Tuhan Allah ngau cara patoh ke Prator Musa, nadai suteꞌ ageꞌ abaꞌ Al Maseh. Nyaꞌ breti kitaꞌ idop de luar pemayek ati Tuhan Allah. 5 Uleh tegal Roh Kudos te nulong kita abaꞌ tegal kita pecayaꞌ ke Al Maseh, Tuhan Allah kaꞌ nerimaꞌ kita jadi urang te kenaꞌ de mua Ya. Abaꞌ nyaꞌ mah te kita agam kah. 6 Nema enteꞌ kita suteꞌ abaꞌ Isa Al Maseh, niseꞌ ageꞌ masalah urang te desunat abaꞌ urang te nadai dasunat. Te penteng kita alah pecayaꞌ ke Al Maseh, abaꞌ nyaꞌ pedaꞌ enteꞌ kita kaseh ke pangan bukai.7 Meliyaꞌ teh kitaꞌ sruni nunaꞌ Brita Bayek ari Tuhan Allah. Entoꞌ ngapa kitaꞌ nadai nunaꞌ pengajar te kenaꞌ? Ngapa bah kitaꞌ mudah amat detipu? 8 Pesti te mulah nyaꞌ ukai Tuhan Allah te udah ngumai kitaꞌ! 9 Kebaꞌ nyaꞌ ati-ati kitaꞌ! Pengajar sidaꞌ te nesat nyaꞌ upa ragi, “Siket ragi tauꞌ nyuroh ugaꞌ tepong ngeremai.” 10 Ku yaken kitaꞌ kaꞌ nunaꞌ pengajar ku nema kita suteꞌ abaꞌ Tuhan. Uleh sapa jaꞌ urang te ngaru pemiker kitaꞌ pesti deukom Tuhan Allah!
11 Kebala menyadeꞌ ku, ku nadai ngajar enteꞌ urang alah desunat. Enteꞌ ku ageꞌ ngajar urang alah desunat, ngapa ku ageꞌ daprisa? Enteꞌ ku ageꞌ ngajar piyaꞌ, pengajar ku te madah Al Maseh mati de saleb nadai jadi masalah. 12 Ku ngagam kebala urang te ngacau pemiker kitaꞌ, lebeh bayek sidaꞌ merireꞌ direꞌ!
13 Kebala menyadeꞌ, kitaꞌ udah de dekumai Allah jadi urang te bibas ari Prator Musa. Uleh amat piyaꞌ, nang bibas nyaꞌ kitaꞌ ngau muas penekaꞌ te jat. Sebalek kitaꞌ alah nglayan pangan bukai ngau kaseh. 14 Nema adai Printah te madah pitoꞌ, “Kaseh ke pangan bukai upa ngaseh direꞌ kedireꞌ.”a Printah toꞌ jadi dasar ugaꞌ Prator Musa. 15 Uleh enteꞌ kitaꞌ beketop abaꞌ makai sama direꞌ sengabot upa jelu te ganas, ati-ati, kitaꞌ kaꞌ sama ancor.
Penekaꞌ Roh Kudos abaꞌ penekaꞌ ensia te jat
16 Maksot ku pitoꞌ: Kitaꞌ alah idop depimpen Roh Kudos, isaꞌ kitaꞌ nadai nunaꞌ penekaꞌ ensia te jat, te adai alam direꞌ kitaꞌ. 17 Nema penekaꞌ ensia te jat belawan abaꞌ penekaꞌ Roh Kudos abaꞌ penekaꞌ Roh Kudos belawan abaꞌ penekaꞌ ensia te jat te adai alam idop kitaꞌ. Nema dua uteꞌ utai toꞌ belawan, nyaꞌ nyuroh kitaꞌ nadai mulah utai te bayek te kitaꞌ kedekaꞌ. 18 Uleh enteꞌ Roh Kudos mimpen idop kitaꞌ, kitaꞌ nadai depaksa nunaꞌ Prator Musa.
19 Ugaꞌ pemulah te nunaꞌ penekaꞌ ensia te jat nyaꞌ udah jelas: baraꞌ, mulah utai te nadai senunoh, kanyi, 20 nyemah berhala, ngau ilmu siher, bemunsoh, belayaꞌ, ngemuru, iri, mudah ranseng, menteng direꞌ kedireꞌ, mecah-belah, mulah kelumpok kedireꞌ, 21 ripot ke pangan, pemabok, gaga brami mulah te nadai bayek, abaꞌ ageꞌ mayoh utai te kebukai. Skaleꞌ ageꞌ ku ngingat kitaꞌ! Upa te udah ku padah ke dulau, enteꞌ urang mulah te piyaꞌ sengabot, ya nitauꞌ nerimaꞌ apa te udah Tuhan Allah ageh ke urang te deempu Ya de Pemrintah Tuhan Allah.
22 Uleh buah Roh Kudos nyaꞌ: kaseh, ati gaga, idop penoh damai, sabar, iboh ke pangan, bayek ati, setia, 23 renah ati, abaꞌ talah ngetat direꞌ. Niseꞌ ukom agama te ngerot ugaꞌ nyaꞌ. 24 Ngenap urang te deempu Isa Al Maseh udah nyaleb penekaꞌ sidaꞌ te dusa. Sidaꞌ udah nudi kebala penekaꞌ sidaꞌ te jat te kaꞌ sidaꞌ pulah. 25 Kita udah idop baru uleh Roh Kudos. Kebaꞌ nyaꞌ kita alah bejalai depimpen Roh Kudos. 26 Kebaꞌ nyaꞌ, nang ngepah-ngemah direꞌ, nang belayaꞌ abaꞌ pangan, abaꞌ nang iri ke pangan bukai.