Mantoꞌ sama direꞌ
6
Kebala menyadeꞌ enteꞌ adai de entara kitaꞌ te mulah penyalah, kitaꞌ te idop nunaꞌ Roh Kudos, alah mimpen urang nyaꞌ bebalek ke jalai te kenaꞌ. Uleh kitaꞌ alah mulah nyaꞌ ngau cara alos, abaꞌ nyaga direꞌ nang sampai kitaꞌ kedireꞌ tebaiꞌ-baiꞌ laboh ke alam dusa gaꞌ. 2 Kitaꞌ alah mantoꞌ sama direꞌ te ngasa pemedeh, ngau cara nyaꞌ kitaꞌ patoh ke ukom Al Maseh. 3 Enteꞌ sikoꞌ urang ngangap direꞌ penteng, bataꞌ ya sama sekaleꞌ nadai penteng, ya ngemulaꞌ direꞌ kedireꞌ. 4 Ngenap urang alah mresa direꞌ, apa te depulah ya bayek sekaleꞌ ke nadai. Enteꞌ bayek ya tauꞌ ngepah-ngemah direꞌ ke kebala utai nyaꞌ. Uleh nadai ya alah nyemaꞌ nyaꞌ ngau apa te depulah urang bukai. 5 Nema ngenap urang betangong jawab kedireꞌ ke apa te ya pulah.6 Urang te deajar Pemadah Tuhan Allah, alah magi sebagi ari apa te adai de ya ke urang te ngajar ya.
7 Nang ngemulaꞌ direꞌ! Tuhan Allah nadai tauꞌ degurau. Apa te detamak urang, nyaꞌ mah te deketau. 8 Kebaꞌ enteꞌ urang namak nunaꞌ penekaꞌ ensia ya te jat, ya kaꞌ ngetau pemati ari penekaꞌ te jat. Uleh sapa te namak alam Roh Kudos, ya kaꞌ ngetau idop sengabot ari Roh nyaꞌ. 9 Nang kita lejoꞌ mulah te bayek, nema jemah kita kaꞌ ngetau asel, enteꞌ kita nadai badoꞌ mulah te bayek. 10 Kebaꞌ nyaꞌ panyong tauꞌ mulah te bayek, boh kita mulah te bayek ke ugaꞌ urang, te paleng dulau ke kebala menyadeꞌ kita te sama pecayaꞌ ke Isa Al Maseh.
Pesau abaꞌ tabeꞌ Paulos de pemadoꞌ surat ya
11 Pedaꞌ kah, kati pemesai kebala urop te ku tules ke kitaꞌ ngau jari ku kedireꞌ.
12 Kebala sidaꞌ nyaꞌ kaꞌ mukong kitaꞌ desunat, isaꞌ sidaꞌ depedaꞌ bayek. Sidaꞌ takot deprisa enteꞌ sidaꞌ ngajar urang peroꞌ tauꞌ kenaꞌ de mua Tuhan Allah, nema pecayaꞌ ke Isa Al Maseh te mati de kayu saleb. 13 Amat sidaꞌ desunat, uleh sidaꞌ nadai patoh ke ugaꞌ Prator Musa. Sidaꞌ kaꞌ kitaꞌ desunat, isaꞌ sidaꞌ tauꞌ ngepah-ngemah direꞌ nema kitaꞌ patoh ke pengajar sidaꞌ. 14 Uleh ku peroꞌ kaꞌ ngepah-ngemah pemati Tuhan Isa Al Maseh de kayu saleb. Nema tegal pemati Ya, apa te deangap kebala urang dunia toꞌ brega, ku angap niseꞌ reti. Abaꞌ ku tauꞌ depadah upa urang te udah mati de pemedaꞌ dunia. 15 Desunat abaꞌ nadai, nyaꞌ nadai penteng. Te ma penteng idop baru alam Al Maseh. 16 Ku bradua ke ugaꞌ urang te idop nunaꞌ pengajar toꞌ, ke ugaꞌ urang te deempu Tuhan Allah. Engkremaꞌ Tuhan Allah nganyaꞌ pemayek ati Ya ke sidaꞌ abaꞌ nyuroh idop damai.
17 Belaboh ari entoꞌ ku mintaꞌ ke kitaꞌ nang medeh ku ageꞌ ngau kebala utai toꞌ. Nema de tuboh ku adai abi kebala bakal, nyaꞌ bukti enteꞌ ku empu Isa.
18 Kebala menyadeꞌ ku, ku bradua isaꞌ Tuhan kita Isa Al Maseh nganyaꞌ pemayek ati Ya ke kitaꞌ sengabot. Amen.