Petros abaꞌ Yohanes ngadap Pengadel Agama
4
Tengan Petros abaꞌ Yohanes ageꞌ becakap abaꞌ kebala urang nyaꞌ, teka nadai mang-mang kebala imam abaꞌ kepalaꞌ penyaga Rumah Kudos Tuhan Allah, abaꞌ kebala urang Saduki datai ngusong snikoꞌ. 2 Kebala sidaꞌ ma ranseng nema Petros abaꞌ Yohanes madah ke urang banyau, Isa udah idop ageꞌ ari pemati Ya. Abaꞌ snikoꞌ madah nyaꞌ mah bukti lah enteꞌ urang mati kaꞌ idop ageꞌ. 3 Sidaꞌ nangkap Petros abaꞌ Yohanes udah nyaꞌ sidaꞌ majak snikoꞌ ke alam penyara, nema ari nyau malam, kebaꞌ snikoꞌ detan diyaꞌ datai ke lam. 4 Uleh kebala urang te ninga pengajar Petros abaꞌ Yohanes, mayoh te kaꞌ pecayaꞌ ke Isa. Nyaꞌ nyuroh sidaꞌ betamah mayoh sekitar limaꞌ ribu urang laki.5 Ari suteꞌ kebala urang tuwai bansa Yahudi, kebala pemimpen agama Yahudi abaꞌ kebala urang te ahli de alam kitab te datules Musa begugoꞌ rapat de Yerosalem. 6 Sidaꞌ betemu abaꞌ Imam Besai Hanas abaꞌ Kayapas, Yohanes, Aleksander abaꞌ ugaꞌ urang te pureh Imam Besai. 7 Baroꞌ sidaꞌ nyuroh penyaga ngemaiꞌ Petros abaꞌ Yohanes ke mua sidaꞌ, udah nyaꞌ sikoꞌ urang ari entara pemimpen nyaꞌ nanyaꞌ, “Kati cara kitaꞌ nyemoh urang lumpoh nyaꞌ? Abaꞌ ngau kuasa ari ni kitaꞌ tauꞌ mulah te piyaꞌ?” 8 Petros te tengan dapenoh Roh Kudos nyawot sidaꞌ jakoꞌ ya, “O kebala pemimpen bansa Yahudi abaꞌ kebala pemimpen agama Yahudi, 9 enteꞌ tegal kmua mulah utai te bayek nalau urang lumpoh toꞌ abaꞌ kitaꞌ kaꞌ tauꞌ badaꞌ kati urang toꞌ tauꞌ semoh, kmua alah dasidang, 10 ugaꞌ kitaꞌ abaꞌ ugaꞌ bansa Israel alah tauꞌ badaꞌ urang toꞌ tauꞌ diri ditoꞌ ngau tuboh te angas regas de mua kitaꞌ, nyaꞌ tegal kuasa Isa Al Maseh sidaꞌ Nasaret nyaꞌ. Ugaꞌ kitaꞌ nyaleb Isa nyaꞌ, uleh Tuhan Allah udah ngidop Ya ageꞌ. 11 Isa toꞌ mah
tiang te dabuai ugaꞌ kitaꞌ kebala tukang rumah,
uleh Ya udah jadi tiang tengah.a
12 Proꞌ Isa mah te tauꞌ nyelamat urang. Nema de dunia toꞌ niseꞌ nama bukai te dabreꞌ Tuhan Allah ke ensia, te adai kuasa ngau nyelamat kita.”
13 Kebala anggota Pengadel Agama nyaꞌ ampal medaꞌ pemrani Petros abaꞌ Yohanes, apa klageꞌ sidaꞌ tauꞌ badaꞌ snikoꞌ nyaꞌ urang biasa, ukai urang te sekulah tingeꞌ. Baroꞌ sidaꞌ tauꞌ badaꞌ snikoꞌ nyaꞌ bamat-amat muret Isa. 14 Uleh sidaꞌ nitauꞌ badaꞌ kaꞌ ngumong apa nema urang te udah dasemoh nyaꞌ diri de mua sidaꞌ abaꞌ Petros abaꞌ Yohanes. 15 Kebaꞌ sidaꞌ nyuroh snikoꞌ angkat ari nyaꞌ. Udah nyaꞌ sidaꞌ bepekat. 16 Sidaꞌ mansen betanyaꞌ ke pangan abaꞌ madah, “Kaꞌ kita kati kah snikoꞌ nyaꞌ? Ugaꞌ urang te diyau de Yerosalem udah tauꞌ badaꞌ utai te nyaroh te dapulah snikoꞌ nyaꞌ. Kita nitauꞌ ngemulaꞌ utai toꞌ. 17 Uleh isaꞌ utai toꞌ nadai empala ketauꞌ urang mayoh, boh kita ngerot abaꞌ ngancam snikoꞌ isaꞌ snikoꞌ nadai ageꞌ nyakap Isa ke urang.” 18 Baroꞌ kebala pemimpen nyaꞌ nyuroh Petros abaꞌ Yohanes tamaꞌ ageꞌ ke teban snikoꞌ dasidang abaꞌ madah ke snikoꞌ, jakoꞌ sidaꞌ, “Sdua nang sama skaleꞌ nyebot abaꞌ ngajar Isa ageꞌ ke urang.” 19 Uleh Petros abaꞌ Yohanes nyawot sidaꞌ, “Piker ke uleh kitaꞌ apa te kenaꞌ de mua Tuhan Allah, patoh ke kitaꞌ, skaleꞌ patoh ke Tuhan Allah. 20 Kami nitauꞌ badoꞌ nusoi apa te udah kami pedaꞌ abaꞌ udah kami dinga.” 21 Kebala pemimpen nyaꞌ empala ngancam Petros abaꞌ Yohanes, uleh kepanyai sidaꞌ ngelepas snikoꞌ nema niseꞌ nemu alasan ngau ngukom snikoꞌ abaꞌ sidaꞌ takot gaꞌ ke urang banyau te muji Tuhan Allah tegal utai te tejadi nyaꞌ. 22 Apa klageꞌ urang te dasemoh ngau cara te luar biasa nyaꞌ, udah empat puloh taon lebeh umor ya.
Pradua jemat
23 Udah Petros abaꞌ Yohanes dalepas, snikoꞌ angkat ngusong kebala kawan snikoꞌ abaꞌ ngisah ugaꞌ te depadah kebala imam kepalaꞌ abaꞌ kebala pemimpen sidaꞌ Yahudi nyaꞌ ke sidaꞌ. 24 Udah kebala kawan sidaꞌ ninga nyaꞌ, sidaꞌ bradua sati sepiker ke Tuhan Allah jakoꞌ sidaꞌ, “O Tuhan Allah te ma bekuasa, Wan mah te mulah langet, bumi, laot abaꞌ kebala utai te dealam nyaꞌ. 25 Ngau Roh Kudos, Wan becakap ke puyang jagang kami, raja Daod, playan Wan. Wan madah:
‘Ngapa kebala urang te nadai nglala Tuhan Allah ranseng,
ngapa kebala bansa ngamoꞌ mulah utai te niseꞌ reti?
26 Kebala raja abaꞌ penguasa dunia ageꞌ nyiap direꞌ
beperang ngelawan Tuhan Allah
abaꞌ Al Maseh te dautos Ya.’b
27 Kebaꞌ amat mah Herudes Antipas abaꞌ Pontius Platos betemu abaꞌ kebala urang te nadai nglala Tuhan Allah abaꞌ kebala sidaꞌ Israel te adai de kuta toꞌ. Sidaꞌ betemu ngelawan Isa Playan Wan te Suci nyaꞌ, te udah Wan angkat jadi Raja Penyelamat. 28 Uleh nema Wan lampar bekuasa, ugaꞌ nyaꞌ udah tejadi nunaꞌ kedekaꞌ abaꞌ pengamoꞌ Wan kedireꞌ. 29 Entoꞌ Tuhan Allah, pedaꞌ kah kati sidaꞌ ngancam kami. Abaꞌ sadi kah kami kebala playan Wan toꞌ madah Brita Bayek Wan toꞌ ngau brani. 30 Anyaꞌ kah kuasa Wan isaꞌ urang te pedeh dasemoh ngau kebala tana abaꞌ utai te nyaroh ari Wan ngau kuasa nama Isa, Playan Wan te Suci nyaꞌ.” 31 Pas sidaꞌ bradua, teban te jalai sidaꞌ begugoꞌ nyaꞌ teka beguncang abaꞌ ugaꞌ sidaꞌ dapenoh Roh Kudos. Udah nyaꞌ ugaꞌ sidaꞌ brani nusoi Brita Bayek ari Tuhan Allah.
Cara idop jemat
32 Ugaꞌ urang te pecayaꞌ nyaꞌ idop sati sepiker. Niseꞌ sidaꞌ te ngangap apa te noꞌ direꞌ empu direꞌ kedireꞌ. Kebala utai te adai de ugaꞌ sidaꞌ empu ugaꞌ sidaꞌ banyau. 33 Ngau kuasa te besai kebala rasol nyaꞌ nusoi Isa te udah idop ageꞌ. Kebaꞌ nyaꞌ Tuhan Allah mreꞌ mayoh berkat ke sidaꞌ. 34 Kebaꞌ niseꞌ daentara sidaꞌ te kurang nema sidaꞌ te adai tanah, rumah, nyual empu sidaꞌ, baroꞌ duet asel ari sidaꞌ nyual nyaꞌ sidaꞌ baiꞌ 35 abaꞌ sidaꞌ serah ke kebala rasol. Udah nyaꞌ, duet nyaꞌ sidaꞌ bagi ke kebala urang te perlu. 36 Upa piyaꞌ gaꞌ Yusop. Yusop toꞌ pureh Liwi, sidaꞌ Siprus; ya dagelar kebala rasol Barnabas, reti nama nyaꞌ pengibor. 37 Ya sigeꞌ nyual tanah empu ya, baroꞌ duet rega tanah nyaꞌ debaiꞌ abaꞌ daserah ya ke kebala rasol.