Petros abaꞌ Yohanes ngadap Pengadel Agama
4
Tengan Petros abaꞌ Yohanes ageꞌ becakap abaꞌ kebala urang nyaꞌ, nadai mang-mang kebala imam abaꞌ kepalaꞌ penyaga Rumah Kudos Tuhan Allah, abaꞌ kebala sidaꞌ Saduki datai ngusong senikoꞌ. 2 Kebala sidaꞌ nyaꞌ ma ranseng nema Petros abaꞌ Yohanes madah ke urang banyau, Isa udah idop ageꞌ ari pemati Ya. Abaꞌ senikoꞌ madah nyaꞌ mah bukti lah enteꞌ urang te mati kaꞌ idop ageꞌ. 3 Sidaꞌ nangkap Petros abaꞌ Yohanes udah nyaꞌ sidaꞌ majak senikoꞌ ke alam penyara, nema ari nyau malam, kebaꞌ senikoꞌ detan diyaꞌ datai ke lam. 4 Uleh kebala urang te ninga pengajar Petros abaꞌ Yohanes, mayoh te kaꞌ pecayaꞌ ke Isa. Nyaꞌ nyuroh sidaꞌ betamah mayoh kurang lebeh limaꞌ ribu urang te laki.5 Ari suteꞌ kebala urang tuai bansa Yahudi, kebala pemimpen agama Yahudi abaꞌ kebala urang te ahli alam Prator Musa begugoꞌ rapat de Yerosalem. 6 Sidaꞌ betemu abaꞌ Imam Besai Hanas abaꞌ Kayapas, Yohanes, Aleksander abaꞌ ugaꞌ urang te pureh Imam Besai. 7 Baroꞌ sidaꞌ nyuroh penyaga ngemaiꞌ Petros abaꞌ Yohanes ke mua sidaꞌ, udah nyaꞌ sikoꞌ ari entara pemimpen nyaꞌ nanyaꞌ, “Kati cara senikoꞌ nyemoh urang lumpoh nyaꞌ? Abaꞌ ngau kuasa sapa senikoꞌ mulah nyaꞌ?”
8 Petros te tengan depenoh Roh Kudos nyawot sidaꞌ jakoꞌ ya, “O kebala pemimpen bansa Yahudi abaꞌ kebala pemimpen agama Yahudi, 9 enteꞌ tegal kemua mulah utai te bayek nalau urang lumpoh toꞌ abaꞌ kitaꞌ kaꞌ tauꞌ badaꞌ kati urang toꞌ tauꞌ semoh, kemua alah desidang, 10 ugaꞌ kitaꞌ abaꞌ ugaꞌ bansa Israel alah tauꞌ badaꞌ urang toꞌ tauꞌ diri ditoꞌ ngau tuboh te angas regas de mua kitaꞌ, nyaꞌ tegal kuasa Isa Al Maseh sidaꞌ Nasaret nyaꞌ. Ugaꞌ kitaꞌ nyaleb Isa nyaꞌ, uleh Tuhan Allah udah ngidop Ya ageꞌ. 11 Isa toꞌ mah
batu te debuai ugaꞌ kitaꞌ kebala tukang rumah,
uleh Ya udah jadi batu dasar.a
12 Peroꞌ Isa mah te tauꞌ nyelamat urang. Nema de dunia toꞌ niseꞌ nama bukai te debereꞌ Tuhan Allah ke ensia, te adai kuasa ngau nyelamat kita.”
13 Kebala anggota Pengadel Agama nyaꞌ ampal medaꞌ pemerani Petros abaꞌ Yohanes, apa klageꞌ sidaꞌ tauꞌ badaꞌ senikoꞌ nyaꞌ urang biasa, ukai urang te sekulah tingeꞌ. Baroꞌ sidaꞌ tauꞌ badaꞌ senikoꞌ nyaꞌ bamat-amat muret Isa. 14 Uleh sidaꞌ nitauꞌ badaꞌ kaꞌ ngumong apa nema urang te udah desemoh nyaꞌ diri de mua sidaꞌ abaꞌ Petros abaꞌ Yohanes. 15 Kebaꞌ sidaꞌ nyuroh senikoꞌ angkat ari nyaꞌ. Udah nyaꞌ sidaꞌ bepekat. 16 Sidaꞌ mansen betanyaꞌ ke pangan abaꞌ madah, “Kaꞌ kita kati ke senikoꞌ nyaꞌ? Ugaꞌ urang te diyau de Yerosalem udah tauꞌ badaꞌ utai te nyaroh te depulah senikoꞌ nyaꞌ. Kita nitauꞌ ngemulaꞌ utai toꞌ. 17 Uleh isaꞌ utai toꞌ nadai empala ketauꞌ urang mayoh, boh kita ngerot abaꞌ ngancam senikoꞌ isaꞌ senikoꞌ nadai ageꞌ nyakap Isa ke urang bukai.”
18 Baroꞌ kebala pemimpen nyaꞌ nyuroh Petros abaꞌ Yohanes tamaꞌ ageꞌ ke teban senikoꞌ desidang abaꞌ madah ke senikoꞌ, jakoꞌ sidaꞌ, “Senikoꞌ nang sama sekaleꞌ nyebot abaꞌ ngajar Isa ageꞌ ke urang bukai.”
19 Uleh Petros abaꞌ Yohanes nyawot sidaꞌ, “Piker ke uleh kitaꞌ ni te kenaꞌ de mua Tuhan Allah, patoh ke kitaꞌ, sekaleꞌ patoh ke Tuhan Allah. 20 Kemua nitauꞌ badoꞌ nusoi apa te udah kami pedaꞌ abaꞌ udah kemua dinga.”
21 Kebala pemimpen nyaꞌ empala ngancam Petros abaꞌ Yohanes, uleh kepanyai sidaꞌ ngelepas senikoꞌ nema niseꞌ nemu alasan ngau ngukom senikoꞌ abaꞌ sidaꞌ takot gaꞌ ke urang banyau te muji Tuhan Allah tegal utai te tejadi nyaꞌ. 22 Apa klageꞌ urang te desemoh ngau cara te luar biasa nyaꞌ, umor ya nyau lebeh empat puloh taon.
Pradua jemat
23 Udah Petros abaꞌ Yohanes delepas, senikoꞌ angkat ngusong kebala kawan senikoꞌ abaꞌ ngisah ugaꞌ te depadah kepalaꞌ kebala imam abaꞌ kebala pemimpen sidaꞌ Yahudi nyaꞌ ke sidaꞌ. 24 Udah kebala kawan sidaꞌ ninga nyaꞌ, sidaꞌ sati sepiker bradua ke Tuhan Allah jakoꞌ sidaꞌ, “O Tuhan Allah te ma bekuasa, Wan mah te mulah langet, bumi, laot abaꞌ kebala utai te adai alam nyaꞌ. 25 Ngau Roh Kudos, Wan becakap ke puyang jagang kami, Raja Daot, pelayan Wan. Wan madah,
‘Ngapa kebala urang te nadai ngelala Tuhan Allah ranseng,
ngapa kebala bansa ngamoꞌ mulah utai te niseꞌ reti?
26 Kebala raja abaꞌ penguasa dunia ageꞌ nyiap direꞌ
beperang ngelawan Tuhan Allah
abaꞌ Al Maseh te deutos Ya.’b
27 Kebaꞌ amat mah Herudes Antipas abaꞌ Pontius Pelatos betemu abaꞌ kebala urang te nadai ngelala Tuhan Allah abaꞌ kebala sidaꞌ Israel te adai de kuta toꞌ. Sidaꞌ betemu ngelawan Isa Pelayan Wan te Suci nyaꞌ, te udah Wan angkat jadi Raja Penyelamat. 28 Uleh nema Wan lampar bekuasa, ugaꞌ nyaꞌ udah tejadi nunaꞌ kedekaꞌ abaꞌ pengamoꞌ Wan kedireꞌ. 29 Entoꞌ Tuhan Allah, pedaꞌ ke kati sidaꞌ ngancam kami. Abaꞌ sadi ke kami kebala pelayan Wan toꞌ madah Brita Bayek Wan toꞌ ngau brani. 30 Anyaꞌ ke kuasa Wan isaꞌ urang te pedeh desemoh ngau kebala tana abaꞌ utai te nyaroh ari Wan ngau kuasa nama Isa, Pelayan Wan te Suci nyaꞌ.”
31 Pas sidaꞌ bradua, teban te jalai sidaꞌ begugoꞌ nyaꞌ teka beguncang abaꞌ ugaꞌ sidaꞌ depenoh Roh Kudos. Udah nyaꞌ ugaꞌ sidaꞌ berani nusoi Brita Bayek ari Tuhan Allah.
Cara idop jemat
32 Ugaꞌ urang te pecayaꞌ nyaꞌ idop sati sepiker. Niseꞌ sidaꞌ te ngangap apa te noꞌ direꞌ empu direꞌ kedireꞌ. Kebala utai te adai de ugaꞌ sidaꞌ empu ugaꞌ sidaꞌ banyau. 33 Ngau kuasa te besai kebala rasol nyaꞌ nusoi Isa te udah idop ageꞌ. Kebaꞌ nyaꞌ Tuhan Allah mereꞌ mayoh berkat ke sidaꞌ. 34 Kebaꞌ niseꞌ de entara sidaꞌ te kurang nema sidaꞌ te adai tanah, rumah, nyual empu sidaꞌ, baroꞌ duet asel ari sidaꞌ bejual nyaꞌ sidaꞌ baiꞌ 35 abaꞌ sidaꞌ serah ke kebala rasol. Udah nyaꞌ, duet nyaꞌ sidaꞌ bagi ke kebala urang te perlu. 36 Upa piyaꞌ gaꞌ Yusop. Yusop toꞌ pureh Liwi, sidaꞌ Siprus; ya degelar kebala rasol Barnabas, reti nama nyaꞌ pengibor. 37 Ya sigeꞌ nyual tanah empu ya, baroꞌ duet rega tanah nyaꞌ debaiꞌ abaꞌ deserah ya ke kebala rasol.