Isa maleꞌ aiꞌ jadi aiꞌ angor de kampong Kana
2
Dua ari udah nyaꞌ, adai gawai belaki bini de kampong Kana de wilayah Galelia, abaꞌ inai Isa adai diyaꞌ. 2 Isa abaꞌ kebala muret Ya dekumai gaꞌ ke gawai nyaꞌ. 3 Tengan gawai, aiꞌ angor mes. Baroꞌ inai Isa madah ke Ya, “Aiꞌ angor sidaꞌ nyau mes.”4 Isa nyawot ya, “Inai, ngapa wan madah utai nyaꞌ ke Ku? Bedau naꞌ senta Ku nganyaꞌ kuasa Ku.”
5 Uleh inai Isa madah ke kebala pemantoꞌ urang te gawai nyaꞌ, “Apa te depadah Isa ke kitaꞌ, pulah ke nyaꞌ!”
6 De rumah nyaꞌ adai nam tepayan besai te depulah ari batu. Kebala tepayan nyaꞌ gah deiseꞌ ke aiꞌ isaꞌ kebala urang tauꞌ masok jari nunaꞌ adat Yahudi. Pemayoh aiꞌ te tauꞌ deiseꞌ de ngenap tepayan nyaꞌ kurang lebeh seratos liter. 7 Baroꞌ Isa madah ke kebala pemantoꞌ urang te gawai nyaꞌ, “Iseꞌ ke aiꞌ ke kebala tepayan nyaꞌ sampai penoh.” Kebaꞌ nyaꞌ sidaꞌ ngiseꞌ aiꞌ ke ugaꞌ tepayan nyaꞌ sampai penoh. 8 Udah nyaꞌ Isa madah ke sidaꞌ, “Entoꞌ, kawot ke mimet aiꞌ nyaꞌ abaꞌ baiꞌ ke urang te nguros gawai toꞌ.” Baroꞌ sidaꞌ ngemaiꞌ aiꞌ nyaꞌ ke urang te nguros gawai. 9 Baroꞌ urang te nguros gawai nyaꞌ ngasa aiꞌ te udah bebaleꞌ jadi aiꞌ angor. (Ya nitauꞌ badaꞌ ari ni penatai aiꞌ angor nyaꞌ, uleh kebala urang te mantoꞌ gawai te ngawot aiꞌ nyaꞌ, tauꞌ badaꞌ nyaꞌ.) Udah nyaꞌ urang te nguros gawai nyaꞌ ngumai ensia laki te degawai, 10 abaꞌ madah ke ya, “Sengket urang gah dulau ngageh aiꞌ angor te nyamai. Abaꞌ asa kebala temuai nyau puas nginom, baroꞌ ya ngageh aiꞌ angor te nadai gulong nyamai. Uleh meh naroh aiꞌ angor te nyamai datai ke entoꞌ.”
11 Nyaꞌ mah tana te nyaroh te semaru depulah Isa. Utai toꞌ depulah Ya de kampong Kana de wilayah Galelia. Ngau tana nyaꞌ Ya nganyaꞌ lampar pemesai kuasa Ya, abaꞌ kebala muret Ya pecayaꞌ ke Ya.
Isa de Kapernaom
12 Udah nyaꞌ Isa angkat ke Kapernaom. Ya angkat abaꞌ inai Ya, kebala menyadeꞌ Ya, abaꞌ kebala muret Ya, sidaꞌ merama diyaꞌ dua tigaꞌ ari.
Isa nesar kebala urang te bejual de Rumah Kudos Tuhan Allah
(Mat. 21:12-13; Mrk. 11:15-17; Luk. 19:45-46)
13 Pas ari besai sidaꞌ Yahudi te desebot Paskah nyau semak, Isa angkat ke Yerosalem. 14 De laman Rumah Kudos Tuhan Allah, Ya medaꞌ kebala urang bejual sapi, dumba, abaꞌ burong dara. Adai gaꞌ kebala urang te sibok nukar duet dudok de diyaꞌ. 15 Medaꞌ piyaꞌ Isa mulah penyimat ari tali, baroꞌ nesar ugaꞌ sidaꞌ abaꞌ muru ugaꞌ sapi dumba sidaꞌ, ari laman nyaꞌ. Kebala mija teban jalai nukar duet de balek Ya, nyaꞌ ngasoh kebala duet sidaꞌ teberamas ke tanah. 16 Baroꞌ Isa madah ke urang te nyual burong dara, “Baiꞌ keluar ugaꞌ burong nyaꞌ ari toꞌ, nang kitaꞌ nguna Rumah Apai Ku ngau bejual.” 17 Kebaꞌ sintak ingat mah kebala muret Ya apa te detules alam Kitab Suci, “Ku kaseh ke Rumah Wan Tuhan Allah, abaꞌ lampar amat kaseh Ku upa api te ngangos ati Ku.”
18 Kebala pemimpen sidaꞌ Yahudi madah ke Isa, “Anyaꞌ ke tana ke kami enteꞌ Wan bekuasa nesar ugaꞌ sidaꞌ ari laman Rumah Kudos Tuhan Allah.” 19 Baroꞌ Isa nyawot sidaꞌ, “Ruboh ke Rumah Kudos Tuhan Allah toꞌ abaꞌ Ku kaꞌ mulah ya ageꞌ alam tiga ari.” 20 Baroꞌ kebala pemimpen sidaꞌ Yahudi madah ke Isa, “Rumah toꞌ depulah empat puloh nam taon! Ngapa Wan berani madah Direꞌ tauꞌ mulah ageꞌ alam tiga ari jaꞌ?” 21 Uleh Rumah Kudos Tuhan Allah te demaksot Ya nyaꞌ, tuboh Ya kedireꞌ. 22 Udah Isa idop ageꞌ ari pemati, baroꞌ kebala muret Ya ingat enteꞌ utai nyaꞌ udah depadah Ya. Abaꞌ sidaꞌ pecayaꞌ ke Kitab Suci abaꞌ ugaꞌ te depadah Isa.
23 Tengan Isa ngeramai Paskah sidaꞌ Yahudi de Yerosalem, mayoh urang pecayaꞌ ke Ya, nema sidaꞌ medaꞌ kebala tana te depulah Ya. 24 Amat piyaꞌ Isa ngenyawoh direꞌ ari sidaꞌ, nema Ya tauꞌ badaꞌ iseꞌ ati sidaꞌ. 25 Nadai perlu urang nyelas ke Ya upa kati urang bukai, nema Ya kedireꞌ tauꞌ badaꞌ apa te adai alam ati ensia.