Isa maleꞌ aiꞌ jadi aiꞌ angor de kampong Kana
2
Dua ari udah nyaꞌ, adai gawai belaki bini de kampong Kana de wilayah Galelia, abaꞌ inai Isa adai diyaꞌ. 2 Isa abaꞌ kebala muret Ya dakumai gaꞌ ke gawai nyaꞌ. 3 Tengan gawai, aiꞌ angor mes. Baroꞌ inai Isa madah ke Ya, “Aiꞌ angor sidaꞌ nyau mes.” 4 Isa nyawot ya, “Inai, ngapa wan madah utai nyaꞌ ke Ku? Bedau naꞌ senta Ku nganyaꞌ kuasa Ku.” 5 Uleh inai Isa madah ke kebala pemantoꞌ urang te gawai nyaꞌ, “Apa te depadah Isa ke kitaꞌ, pulah ke nyaꞌ!” 6 De rumah nyaꞌ adai nam tepayan aiꞌ te besai te dapulah ari batu. Kebala tepayan nyaꞌ gah daiseꞌ ke aiꞌ isaꞌ kebala urang tauꞌ masok jari nunaꞌ adat Yahudi. Iseꞌ aiꞌ de ngenap tepayan nyaꞌ sekitar seratos liter. 7 Baroꞌ Isa madah ke kebala pemantoꞌ urang te gawai nyaꞌ, “Iseꞌ kah aiꞌ ke kebala tepayan nyaꞌ sampai penoh.” Kebaꞌ nyaꞌ sidaꞌ ngiseꞌ aiꞌ ke ugaꞌ tepayan nyaꞌ sampai penoh. 8 Udah nyaꞌ Isa madah ke sidaꞌ, “Entoꞌ, kawot ke mimet aiꞌ nyaꞌ abaꞌ baiꞌ ke urang te nguros gawai toꞌ.” Baroꞌ sidaꞌ ngemaiꞌ aiꞌ nyaꞌ ke urang te nguros gawai. 9 Baroꞌ urang te nguros gawai nyaꞌ ngasa aiꞌ te udah bebaleꞌ jadi aiꞌ angor. (Ya nitauꞌ badaꞌ ari ni penatai aiꞌ angor nyaꞌ, uleh kebala urang te mantoꞌ gawai te ngawot aiꞌ nyaꞌ, tauꞌ badaꞌ nyaꞌ.) Udah nyaꞌ urang te nguros gawai nyaꞌ ngumai ensia laki te de gawai, 10 abaꞌ madah ke ya, “Sengket urang gah dulau ngageh aiꞌ angor te nyamai. Abaꞌ asa kebala temuai nyau puas nginom, baroꞌ ya ngageh aiꞌ angor te nadai gulong nyamai. Uleh meh naroh aiꞌ angor te nyamai datai ke entoꞌ.”11 Nyaꞌ mah tana te nyaroh te semaru dapulah Isa. Utai toꞌ dapulah Ya de kampong Kana de wilayah Galelia. Ngau tana nyaꞌ Ya nganyaꞌ lampar pemesai kuasa Ya, abaꞌ kebala muret Ya pecayaꞌ ke Ya.
Isa de Kapernaom
12 Udah nyaꞌ Isa angkat ke Kapernaom. Ya angkat abaꞌ inai Ya, abaꞌ kebala menyadeꞌ Ya abaꞌ kebala muret Ya, sidaꞌ merama diyaꞌ dua tigaꞌ ari.
Isa nesar kebala urang te bejual de Rumah Kudos Tuhan Allah
(Mat. 21:12-13; Mrk. 11:15-17; Luk. 19:45-46)
13 Pas ari besai sidaꞌ Yahudi te dasebot Paskah nyau semak, Isa angkat ke Yerosalem. 14 De laman Rumah Kudos Tuhan Allah, Ya medaꞌ kebala urang bejual sapi, dumba, abaꞌ burong dara. Adai gaꞌ kebala urang te sibok nukar duet dudok de mija. 15 Medaꞌ piyaꞌ Isa mulah alat penyimat ari tali, baroꞌ nesar ugaꞌ sidaꞌ abaꞌ muru ugaꞌ sapi dumba sidaꞌ, ari laman nyaꞌ. Kebala mija teban urang te nukar duet de balek Ya, nyaꞌ ngasoh kebala duet sidaꞌ teperamas ke tanah. 16 Baroꞌ Isa madah ke urang te nyual burong dara, “Baiꞌ kluar ugaꞌ burong nyaꞌ ari toꞌ, nang kitaꞌ nguna Rumah Apai Ku ngau bejual.” 17 Kebaꞌ nyaꞌ kebala muret Ya sintak ingat, ke apa te datules alam Kitab Suci, “Ku kaseh ke Rumah Wan Tuhan Allah, abaꞌ lampar amat kaseh Ku upa api te ngangos ati Ku.” 18 Kebala pemimpen sidaꞌ Yahudi madah ke Isa, “Anyaꞌ kah tana ke kami enteꞌ Wan bekuasa nesar ugaꞌ sidaꞌ ari laman Rumah Kudos Tuhan Allah.” 19 Baroꞌ Isa nyawot sidaꞌ, “Ruboh kah Rumah Kudos Tuhan Allah toꞌ abaꞌ Ku kaꞌ niri ya ageꞌ alam tiga ari.” 20 Baroꞌ kebala pemimpen sidaꞌ Yahudi madah ke Isa, “Rumah toꞌ dadiri empat puloh nam taon! Ngapa Wan brani madah Direꞌ tauꞌ niri ageꞌ alam tiga ari jaꞌ?” 21 Uleh Rumah Kudos Tuhan Allah te demaksot Ya nyaꞌ, tuboh Ya kedireꞌ. 22 Udah Isa idop ageꞌ ari pemati, baroꞌ kebala muret Ya tekingat enteꞌ utai nyaꞌ udah depadah Ya. Abaꞌ sidaꞌ pecayaꞌ ke Kitab Suci abaꞌ ugaꞌ te depadah Isa.
23 Tengan Isa ngeramai Paskah sidaꞌ Yahudi de Yerosalem, mayoh urang pecayaꞌ ke Ya, nema sidaꞌ medaꞌ kebala tana te dapulah Ya. 24 Amat piyaꞌ Isa ngenyawoh direꞌ ari sidaꞌ, nema Ya tauꞌ badaꞌ iseꞌ ati sidaꞌ. 25 Nadai perlu urang nyelas ke Ya tentang urang bukai, nema Ya kedireꞌ tauꞌ badaꞌ apa te adai de alam ati ensia.