Isa tamaꞌ ke Yerosalem
11
Isa abaꞌ kebala muret Ya nyau semak Yerosalem, nyemak kampong Betpage abaꞌ Betania de baroh buket Saiton. Diyaꞌ Isa nyuroh dua ikoꞌ muret Ya bejalai dulau, 2 jakoꞌ Ya, “Angkat dulau ke kampong te de mua kita toꞌ. Pas snikoꞌ tamaꞌ ke kampong nyaꞌ lah, snikoꞌ medaꞌ sikoꞌ keledai mudaꞌ te tengan detamet, bedau kalaꞌ adai urang nikeꞌ keledai nyaꞌ. Iret kah baiꞌ ngusong Ku. 3 Asa adai urang nanyaꞌ ke snikoꞌ, ‘Ngapa snikoꞌ ngemaiꞌ keledai nyaꞌ?’ Padah kah, ‘Tuhan kaꞌ ngau nyaꞌ. Ilaꞌ lah Ya ngasoh urang mulai keledai toꞌ kitoꞌ ageꞌ.’ ” 4 Dua ikoꞌ muret Isa nyaꞌ angkat abaꞌ nemu sikoꞌ keledai mudaꞌ te tengan detamet de pintu rumah de tisi jalai, abaꞌ ngelepas keledai nyaꞌ. 5 Dua tiga ikoꞌ urang te medaꞌ snikoꞌ nanyaꞌ, “Ngapa snikoꞌ ngelepas keledai nyaꞌ?” 6 Snikoꞌ nyaꞌ nyawot sidaꞌ munyi te Isa padah ke snikoꞌ. Kebaꞌ kebala urang diyaꞌ nyadi snikoꞌ ngemaiꞌ keledai nyaꞌ. 7 Udah nyaꞌ snikoꞌ ngemaiꞌ keledai nyaꞌ ngusong Isa abaꞌ nyelap belakang keledai ngau jubah snikoꞌ. Baroꞌ udah nyaꞌ Isa nikeꞌ ke atau keledai nyaꞌ. 8 Mayoh urang ngancau jubah sidaꞌ de jalai abaꞌ adai te ngameꞌ kebala pelepah te bedaon ijau ari uma abaꞌ ngidar de tengah jalai. 9 Kebala urang banyau bejalai abaꞌ Isa, adai te de mua abaꞌ adai gaꞌ te nrudi Ya ari belakang. Sidaꞌ madah ngau goꞌ te sareng:“Puji Tuhan Allah!
Puji ke Ya te datai ngau Raja de alam nama Tuhan Allah.
10 Lampar bayek Pemrintah Ya te kaꞌ datai, te kaꞌ upa pemrintah de jaman raja Daod, puyang jagang kita meliyaꞌ.
Puji Tuhan Allah te ma Tingeꞌ!”
11 Isa datai ke Yerosalem abaꞌ tamaꞌ ke Rumah Kudos Tuhan Allah. Diyaꞌ Ya medaꞌ ugaꞌ utai te adai de semak Ya. Uleh nema ari nyau kaꞌ malam, Ya kluar angkat abaꞌ dua blas muret Ya ke Betania.
Isa ngutok pon ara
12 Nyau lam Isa abaꞌ dua blas muret Ya angkat ari Betania. De tengah jalai Isa ngasa direꞌ lapar. 13 Ari jaoh Ya medaꞌ suteꞌ pon ara te tengan bedaon, Isa ngusong pon ara nyaꞌ abaꞌ kaꞌ ngigaꞌ buah. Uleh pas Ya datai ke pon nyaꞌ, Ya niseꞌ nemu buah datai ke sigeꞌ mah niseꞌ, tulu bayah bedaon gena mah nema tengan nyaꞌ pas nadai tengan rama ara bebuah. 14 Isa madah ke pon ara nyaꞌ, “Blaboh ari sari toꞌ niseꞌ urang te makai buah direꞌ ageꞌ.” Kebala muret Ya ninga apa te jakoꞌ Ya nyaꞌ.
Isa tamaꞌ ke Rumah Kudos Tuhan Allah
15 Udah nyaꞌ Isa abaꞌ kebala muret Ya datai ke Yerosalem. Isa tamaꞌ ke Rumah Kudos Tuhan Allah abaꞌ blaboh nesar ugaꞌ urang te bejual beli de laman Rumah Kudos Tuhan Allah. Ya nunsang kebala mija te dengau urang nukar duet abaꞌ kebala bangku te dengau urang nyual burong dara. 16 Abaꞌ Ya nadai nyadi kebala urang ngemaiꞌ barang mansaꞌ laman Rumah Kudos Tuhan Allah. 17 Udah nyaꞌ Isa ngajar kebala urang jakoꞌ Ya, “Adai datules alam Kitab Suci, ‘Rumah Ku toꞌ rumah ngau ugaꞌ kebala bansa bradua.’ Uleh kitaꞌ pulah ke ngau sarang perampok.”a 18 Kebala kepalaꞌ imam abaꞌ kebala urang te ahli dealam kitab te datules Musa ninga apa te depadah Isa. Kebaꞌ sidaꞌ brusaha kaꞌ munoh Ya. Sidaꞌ takot ke Isa nema sidaꞌ medaꞌ kebala urang tebelanga ninga pengajar Isa. 19 Pas tikop petang Isa abaꞌ kebala muret Ya keluar ari kuta nyaꞌ.
Pon ara nyau mati
20 Nyau lam, Isa abaꞌ kebala muret Ya mansaꞌ pon ara te udah sidaꞌ pansaꞌ ke kemareꞌ. Sidaꞌ medaꞌ pon ara nyaꞌ nyau mati datai ke kebala urat. 21 Baroꞌ Petros ingat apa te depadah Isa ke pon ara nyaꞌ sari sebedau nyaꞌ. Petros madah ke Isa, “Guru, pedaꞌ Wan! Pon ara te Wan kutok kemareꞌ nyaꞌ nyau mati.” 22 Isa madah ke kebala muret Ya, “Kitaꞌ alah pecayaꞌ ke Tuhan Allah! 23 Ku madah ke kitaꞌ, enteꞌ adai urang te madah ke buket toꞌ, ‘Pinah abaꞌ laboh kah ke laot!’ Pukoꞌ urang nyaꞌ pecayaꞌ abaꞌ nadai gamaꞌ, apa te jakoꞌ ya nyaꞌ tejadi, pesti Tuhan Allah mulah utai nyaꞌ. 24 Kebaꞌ nyaꞌ Ku madah ke kitaꞌ, apa jaꞌ te kitaꞌ pintaꞌ ke Tuhan Allah. Pecayaꞌ jaꞌ kitaꞌ udah nrimaꞌ te kitaꞌ pintaꞌ, pesti utai nyaꞌ debreꞌ ke kitaꞌ. 25 Asa kitaꞌ bradua, ampon ke dulau penyalah urang ke kitaꞌ isaꞌ Apai kitaꞌ te de sruga ngampon bala dusa kitaꞌ. [ 26 Uleh enteꞌ kitaꞌ nadai ngampon urang te udah mulah penyalah ke kitaꞌ, Apai kitaꞌ te de sruga ngai gaꞌ ngampon kebala dusa kitaꞌ.”]
Urang nanyaꞌ ari ni kuasa Isa
27 Isa abaꞌ kebala muret bebalek ageꞌ ke Yerosalem. Tengan Isa bejalai de laman Rumah Kudos Tuhan Allah, kebala kepalaꞌ Imam agama Yahudi, kebala urang te ahli de alam kitab te datules Musa abaꞌ kebala urang tuwai bansa Yahudi datai ngusong Isa. 28 Sidaꞌ nanyaꞌ ke Ya, “Ngau kuasa sapa Direꞌ mulah kebala utai toꞌ? Sapa te mreꞌ kuasa ngau mulah ugaꞌ utai nyaꞌ?” 29 Isa nyawot sidaꞌ, “Ku sigeꞌ kaꞌ gaꞌ nanyaꞌ kitaꞌ. Enteꞌ kitaꞌ kaꞌ nyawot te detanyaꞌ Ku, baroꞌ Ku madah ke kitaꞌ sapa te mreꞌ kuasa ke Ku ngau mulah ugaꞌ utai toꞌ. 30 Padah ke Ku, Yohanes maneꞌ urang ngau kuasa ari sruga apa ari ensia?” 31 Kebala pemimpen nyaꞌ blaboh becakap abaꞌ pangan bukai. Sidaꞌ madah pitoꞌ “Enteꞌ kita nyawot Ya ari sruga, pesti Ya madah, ‘Enteꞌ piyaꞌ ngapa kitaꞌ nadai pecayaꞌ ke te jakoꞌ Yohanes?’ 32 Uleh pedeh gaꞌ enteꞌ kita madah, ‘Ari ensia!’ ” Sidaꞌ takot madah piyaꞌ, nema sidaꞌ takot ke urang banyau. Nema ugaꞌ urang madah Yohanes toꞌ nabi. 33 Kebaꞌ nyaꞌ sidaꞌ nyawot Isa, “Kami nitauꞌ badaꞌ.” Udah nyaꞌ Isa nyawot sidaꞌ, “Enteꞌ piyaꞌ Ku sigeꞌ ngai gaꞌ madah ke kitaꞌ sapa te mreꞌ Ku kuasa ngau mulah ugaꞌ nyaꞌ.”