Suwayak
10
Ari Kapernaom Isa angkat ke wilayah Yudia abaꞌ ke seberang sungai Yordan, tengan nyaꞌ urang banyau datai bekeneꞌ ngelileng Ya. Abaꞌ upa sengket Ya ngajar sidaꞌ.2 Baroꞌ datai mah kebala sidaꞌ Parisi kaꞌ encuba Isa. Sidaꞌ nanyaꞌ Ya, “Enteꞌ nunaꞌ prator agama kita, tauꞌ nadai urang nyuwayak bini direꞌ?”
3 Uleh sawot Ya ke sidaꞌ, “Apa printah Musa ke kitaꞌ?”
4 Sawot sidaꞌ, “Musa nyadi urang nyuwayak bini direꞌ uleh alah mulah surat suwayak.”a
5 Baroꞌ Isa madah ageꞌ ke sidaꞌ, “Musa nules printah nyaꞌ nema tegal penegel ati kitaꞌ nadai talah ajar. 6 Uleh ari semaru dunia toꞌ, Tuhan Allah mulah ensia laki abaꞌ inoꞌ. 7 Urang laki kaꞌ nudi apai abaꞌ inai ya abaꞌ suteꞌ abaꞌ bini ya, 8 kebaꞌ senikoꞌ jadi suteꞌ. Senikoꞌ nadai ageꞌ dua uleh suteꞌ.b 9 Nyaꞌ mah ngasoh apa te udah desuteꞌ Tuhan Allah, nitauꞌ desuwayak ensia.”
10 Nyau sidaꞌ datai ke rumah, kebala muret Isa nanyaꞌ utai nyaꞌ ke Ya. 11 Baroꞌ Isa madah ke sidaꞌ, “Sapa jaꞌ te nyuwayak bini direꞌ, baroꞌ jadi ke inoꞌ bukai, ya besinah ke bini ya nyaꞌ. 12 Abaꞌ enteꞌ bini te nyuwayak laki direꞌ abaꞌ ya jadi ke laki bukai, ya besinah gaꞌ.”
Isa mereꞌ tuah ke kebala miyak
(Luk. 18:15-17)
13 Baroꞌ urang ngemaiꞌ kebala miyak ngusong Isa, isaꞌ Ya nyamah abaꞌ mereꞌ tuah ke sidaꞌ, uleh kebala muret Ya nganoꞌ kebala urang nyaꞌ. 14 Breta Isa medaꞌ te depulah kebala muret Ya, Ya nganoꞌ sidaꞌ, jakoꞌ Ya, “Nang ngerot kebala miyak datai ngusong Ku, nema urang te upa kebala miyak toꞌ mah te idop de alam Pemrintah Tuhan Allah. 15 Ku madah ke kitaꞌ, urang te nadai nerimaꞌ Pemrintah Tuhan Allah upa kebala miyak toꞌ, ya nitauꞌ idop de alam Pemrintah Tuhan Allah.” 16 Udah Ya madah munyi piyaꞌ, Isa ngrengkon kebala miyak nyaꞌ abaꞌ blumaꞌ ngeletak jari de atau sidaꞌ Ya mereꞌ tuah ke sidaꞌ.
Urang kaya pedeh tamaꞌ ke Pemrintah Tuhan Allah
(Luk. 18:18-27)
17 Tengan Isa bejalai, datai mah sikoꞌ urang beguai blumaꞌ tesungkor de mua Isa, urang nyaꞌ nanyaꞌ, “Guru te bayek, apa te alah ku pulah isaꞌ ku tauꞌ jong idop abaꞌ Tuhan Allah sengabot?”
18 Sawot Isa, “Ngapa piyaꞌ meh madah Ku bayek? Niseꞌ urang te bayek bukai ari Tuhan Allah. 19 Meh udah tauꞌ badaꞌ kebala printah Tuhan Allah, ‘Nang munoh, nang besinah, nang encuri, nang madah utai te bulaꞌ tentang urang, nang nipu abaꞌ patoh ke apai inai meh!’ ”
20 Baroꞌ urang nyaꞌ nyawot Isa, “Guru, ugaꞌ nyaꞌ udah ugaꞌ mah ku tunaꞌ belaboh ari ku ageꞌ biyak teh.”
21 Isa ma mah kaseh ke urang nyaꞌ blumaꞌ Ya madah, “Ageꞌ suteꞌ te kurang, ‘Angkat jual ke ugaꞌ utai te deempu meh abaꞌ duet bereꞌ ke kebala urang misken, abaꞌ meh kaꞌ buleh reta de sruga. Udah nyaꞌ datai kitoꞌ abaꞌ terudi ke Ku.’ ” 22 Ninga Isa madah piyaꞌ, urang nyaꞌ ma mah tusah, baroꞌ angkat ngau pemedeh ati nema ya urang kaya.
23 Baroꞌ Isa nilek ke kebala muret Ya abaꞌ madah, “Lampar pedeh urang kaya tamaꞌ ke alam Pemrintah Tuhan Allah.”
24 Kebala muret Ya ampal ninga te jakoꞌ Ya, uleh Isa madah ageꞌ, “Kebala anak Ku, lampar pedeh tamaꞌ ke Pemrintah Tuhan Allah! 25 Lebeh mudah sikoꞌ unta tamaꞌ lubang jarom ari pada urang kaya tamaꞌ ke Pemrintah Tuhan Allah.”
26 Sidaꞌ empala ampal ninga te jakoꞌ Isa, nyaꞌ ngasoh sidaꞌ mansen nanyaꞌ pangan, “Enteꞌ piyaꞌ, sapa te tauꞌ selamat?”
27 Isa nilek sidaꞌ abaꞌ madah, “Apa te nitauꞌ depulah ensia, tauꞌ depulah Tuhan Allah, nema peroꞌ Tuhan Allah te tauꞌ nyelamat ensia.”
Upah nerudi Isa
(Luk. 18:28-30)
28 Baroꞌ Petros madah, “Kami toꞌ udah nudi kebala utai abaꞌ nerudi Wan!”
29 Sawot Isa, “Ku madah ke kitaꞌ, ngenap urang te tegal Ku abaꞌ tegal madah Brita Bayek ari Tuhan Allah nudi rumah ya, menyadeꞌ ya te laki abaꞌ inoꞌ, apai inai ya, kebala anak ya abaꞌ uma ya, 30 entoꞌ urang nyaꞌ kaꞌ nerimaꞌ lebeh mayoh. Ya kaꞌ nerimaꞌ seratos kaleꞌ lipat kebala rumah, kebala menyadeꞌ te laki abaꞌ inoꞌ, inai, anak abaꞌ uma, amat mah blumaꞌ ngau pemedeh. Abaꞌ jemah lah ya tauꞌ jong idop abaꞌ Tuhan Allah sengabot. 31 Uleh mayoh urang te deangap urang nadai gulong penteng entoꞌ, jemah lah nyaꞌ mah te jadi urang paleng penteng. Abaꞌ mayoh urang te deangap urang paleng penteng entoꞌ, jemah lah nyaꞌ mah te jadi urang te nadai penteng.”
Isa madah apa te kaꞌ nacah Ya de Yerosalem
(Luk. 18:31-34)
32 Isa abaꞌ kebala muret Ya bejalai ke Yerosalem, tengan nyaꞌ Isa de mua sidaꞌ. Kebala muret te nerudi Ya ampal abaꞌ kebala urang te nerudi Ya ari belakang ma takot. Baroꞌ Isa ngumai kebala muret Ya abaꞌ madah ke sidaꞌ apa te kaꞌ nacah Ya de Yerosalem, 33 jakoꞌ Ya, “Boh kita ke Yerosalem abaꞌ den lah, Anak Ensia kaꞌ deserah ke kebala kepalaꞌ imam abaꞌ kebala urang te ahli alam Prator Musa, abaꞌ sidaꞌ kaꞌ ngukom mati Ya. Abaꞌ sidaꞌ kaꞌ nyerah Ya ke kebala bansa te nadai ngelala Tuhan Allah, 34 sidaꞌ kaꞌ melicak Ya, ngeludah Ya, nyimat Ya ngau tali, abaꞌ munoh Ya, uleh ari ketiga lah Ya idop ageꞌ.”
Te depintaꞌ Yakubos abaꞌ Yohanes
35 Baroꞌ Yakubos abaꞌ Yohanes, anak Sebedios, ngusong Isa abaꞌ madah, “Guru, kami ngagam Wan kaꞌ mereꞌ te kami pintaꞌ!”
36 Isa nyawot senikoꞌ, “Apa te senikoꞌ pintaꞌ ke Ku?”
37 Baroꞌ senikoꞌ madah, “Jemah lah enteꞌ Wan mrintah jadi Raja, bereꞌ ke kemua pangkat te penteng, sikoꞌ de sepiyak kanan abaꞌ sikoꞌ de sepiyak kibaꞌ Wan.”
38 Uleh Isa nyawot, “Senikoꞌ nitauꞌ badaꞌ apa te senikoꞌ pintaꞌ. Talah piyaꞌ senikoꞌ nginom cawan te Ku inom abaꞌ depaneꞌ ngau cara ku depaneꞌ?”
39 Sawot senikoꞌ, “Kemua talah.”
Isa madah ke senikoꞌ, “Amat mah senikoꞌ nginom ari cawan te Ku inom abaꞌ kaꞌ depaneꞌ upa Ku. 40 Uleh ukai Ku te ngatoh sapa te tauꞌ dudok de sepiyak kanan abaꞌ kibaꞌ Ku. Tuhan Allah te mereꞌ pangkat penteng ke kebala urang te udah Ya atoh.”
41 Ninga apa te senikoꞌ pintaꞌ, sepuloh muret te kebukai ringat ke Yakubos abaꞌ Yohanes. 42 Uleh Isa ngumai sidaꞌ abaꞌ madah, “Kitaꞌ tauꞌ badaꞌ, kebala pemimpen de dunia toꞌ te nadai ngelala Tuhan Allah medeh kebala rakyat sidaꞌ, abaꞌ kebala penguasa kasar ke sidaꞌ. 43 Uleh kitaꞌ nang upa piyaꞌ. Sapa te kaꞌ jadi pemimpen de entara kitaꞌ, ya alah jadi pelayan, 44 abaꞌ sapa te kaꞌ jadi urang penteng de entara kitaꞌ, ya alah jadi ulon. 45 Nema Anak Ensia datai ke dunia toꞌ bukai kaꞌ delayan, uleh Ya datai kaꞌ ngelayan urang abaꞌ nyerah idop Ya ngau nebos mayoh urang ari dusa.”
Isa nyemoh Bartemios
(Luk. 18:35-43)
46 Baroꞌ datai mah Isa abaꞌ kebala muret Ya ke kuta Yeriko. Breta Isa abaꞌ kebala muret Ya abaꞌ urang banyau keluar ari kuta nyaꞌ, diyaꞌ adai sikoꞌ urang te mintaꞌ-mintaꞌ, ya butaꞌ abaꞌ tengan dudok de tisi jalai. Nama ya Bartemios, anak Timios. 47 Breta ya ninga enteꞌ te mansaꞌ nyaꞌ Isa sidaꞌ Nasaret, ya ngangau jakoꞌ ya, “Isa, pureh Raja Daot, kaseh ke ku toꞌ!”
48 Mayoh urang te ngerara ya, isaꞌ ya sunyeꞌ. Uleh ya empala ngangau kaya, “Isa, pureh Raja Daot, kaseh ke ku toꞌ!”
49 Baroꞌ Isa mentan abaꞌ madah, “Kumai ke ya!” Sidaꞌ ngumai urang butaꞌ nyaꞌ abaꞌ madah ke ya, “Kuat ke ati meh, ayoh diri, Ya ngumai meh.”
50 Baroꞌ ya mukaꞌ jubah, ya sintak diri abaꞌ angkat ngusong Isa.
51 Isa nanyaꞌ ya, “Apa te meh kedekaꞌ Ku pulah ke meh?”
Sawot ya, “Guru, ku kaꞌ tauꞌ medaꞌ!”
52 Baroꞌ Isa madah ke ya, “Angkat, nema meh pecayaꞌ ke Ku, meh udah semoh!”
Breta nyaꞌ mah ya sintak medaꞌ, baroꞌ ya nerudi Isa bejalai.