9
Isa madah ageꞌ ke sidaꞌ, “Ku madah ke kitaꞌ, de entara kitaꞌ te ditoꞌ, adai lah te bedau mati sebedau medaꞌ Pemrintah Tuhan Allah datai ngau penoh kuasa.”Isa bebaleꞌ de atau buket
(Luk. 9:28-36)
2 Nam ari udah nyaꞌ, Isa ngemaiꞌ Petros, Yakubos abaꞌ Yohanes nikeꞌ ke suteꞌ buket te tingeꞌ. Te adai diyaꞌ peroꞌ sidaꞌ mah. Baroꞌ sidaꞌ medaꞌ Isa bebaleꞌ de mua sidaꞌ. 3 Jubah Ya puteh bedawar, niseꞌ urang de dunia toꞌ te tauꞌ mampoꞌ baju te pemuteh nyaꞌ. 4 Nadai mang-mang tiga ikoꞌ muret Isa nyaꞌ medaꞌ nabi Elia abaꞌ Musa tengan becakap abaꞌ Isa. 5 Medaꞌ piyaꞌ, Petros madah ke Isa, “Rabi, haja gaga kami diyau ditoꞌ Wan. Kati enteꞌ kami mulah langkau ngau kitaꞌ tiga, sebuah ngau Wan, sebuah ngau Musa, abaꞌ sebuah ngau nabi Elia.” 6 Petros madah piyaꞌ, nema ya nitauꞌ badaꞌ kaꞌ madah apa, nema sidaꞌ tiga ma takot.
7 Baroꞌ udah nyaꞌ awan turon ke atau sidaꞌ abaꞌ ngelikop sidaꞌ. Baroꞌ sidaꞌ ninga goꞌ ari alam awan nyaꞌ madah pitoꞌ, “Toꞌ mah Anak Ku te Ku kaseh, dinga ke te jakoꞌ Ya.” 8 Sidaꞌ tigaꞌ beburoh medaꞌ sekamat sidaꞌ, abaꞌ sidaꞌ medaꞌ peroꞌ Isa mah te abaꞌ sidaꞌ. Te kebukai niseꞌ pedaꞌ ageꞌ.
9 Baroꞌ Isa abaꞌ kebala muret Ya nyaꞌ turon ari buket. Isa bepesau ke sidaꞌ, isaꞌ sidaꞌ nadai nusoi ke kebala urang apa te udah sidaꞌ pedaꞌ tadeꞌ, sebedau Anak Ensia idop ageꞌ ari pemati.
10 Sidaꞌ patoh ke printah Ya nyaꞌ. Uleh sidaꞌ tiga nanyaꞌ ke pangan bukai, apa reti idop ageꞌ ari pemati te jakoꞌ Isa. 11 Kebaꞌ sidaꞌ nanyaꞌ ke Isa, “Ngapa kebala urang te ahli alam Prator Musa madah enteꞌ nabi Elia alah datai sebedau Al Maseh datai ke dunia?”
12 Sawot Isa, “Amat mah nabi Elia alah datai dulau, abaꞌ ya kaꞌ ngageh kebala utai. Uleh ngapa adai detules alam Kitab Suci enteꞌ Anak Ensia alah mayoh ngasa pemedeh abaꞌ deplicak urang? 13 Uleh Ku madah ke kitaꞌ, nabi Elia nyau datai, abaꞌ kebala urang mulah utai te jat ke ya nunaꞌ penekaꞌ sidaꞌ. Utai nyaꞌ upa te udah detules de alam Kitab Suci.”
Isa nyemoh miyak te desarong sitan
(Luk. 9:37-43)
14 Isa abaꞌ tiga ikoꞌ muret Ya turon ari buket, abaꞌ sidaꞌ pulai ngusong kebala muret Ya te kebukai. Pas nyaꞌ sidaꞌ medaꞌ adai mayoh urang diyaꞌ. Kebala urang te ahli alam Prator Musa betengek abaꞌ kebala muret te kebukai. 15 Breta urang mayoh nyaꞌ medaꞌ Isa, sidaꞌ ma ampal. Sidaꞌ beguai nyamot Isa. 16 Baroꞌ Isa nanyaꞌ ke muret Ya, “Apa te kitaꞌ tengek ke abaꞌ sidaꞌ?”
17 Sikoꞌ urang ari entara urang mayoh nyaꞌ nyawot, “Rabi, ku ngemaiꞌ anak ku ngusong Wan. Ya bisoꞌ nema ya desarong sitan. 18 Ngenap kaleꞌ sitan nyerang anak ku, sitan nyaꞌ ngempas ya ke tanah. Baroꞌ mulot anak ku brepoꞌ, gigi ya begeret, abaꞌ tuboh ya kejang. Ku udah mintaꞌ kebala muret Wan muru sitan nyaꞌ, uleh sidaꞌ nadai talah.”
19 Kebaꞌ Isa madah ke sidaꞌ “Kitaꞌ toꞌ amat-amat urang te nadai pecayaꞌ! Sampai kemaya lah Ku alah diyau de entara kitaꞌ abaꞌ sabar ke kitaꞌ ?” Baiꞌ kitoꞌ miyak nyaꞌ!”
20 Baroꞌ sidaꞌ ngemaiꞌ miyak nyaꞌ ngusong Isa. Pas sitan nyaꞌ medaꞌ Isa, ya nguncang tuboh miyak nyaꞌ. Baroꞌ miyak nyaꞌ laboh ke tanah begular galer abaꞌ mulot ya brepoꞌ. 21 Baroꞌ Isa nanyaꞌ apai miyak nyaꞌ, “Nyau lamaꞌ ya desarong sitan?” Apai miyak nyaꞌ nyawot, “Belaboh ari ya engkaꞌ met. 22 Sitan nyaꞌ gah nibar ya ke alam api abaꞌ muai ya ke alam aiꞌ ngau munoh ya. Ku ngemon ke Wan kaseh ke kami toꞌ abaꞌ talau ke kami, enteꞌ Wan talah nyemoh miyak toꞌ!”
23 Isa nyawot ya, “Ngapa meh madah, ‘Enteꞌ Wan talah’? Tuhan Allah tauꞌ mulah apa jaꞌ ke urang te pecayaꞌ ke Tuhan Allah!”
24 Apai miyak nyaꞌ mangkes, “Ku pecayaꞌ! Tulong ke ku isaꞌ ku lebeh pecayaꞌ.”
25 Pas Isa medaꞌ urang empala mayoh te datai kemenatai begugoꞌ. Kebaꞌ nyaꞌ, Ya merak sitan nyaꞌ, jakoꞌ Ya, “Sitan te nyuroh urang bisoꞌ abaꞌ bangal, Ku mrintah direꞌ, rari ari miyak toꞌ, abaꞌ nang tamaꞌ ke alam ya ageꞌ!”
26 Sitan nyaꞌ enciak-encerabak abaꞌ nguncang tuboh miyak nyaꞌ, baroꞌ keluar ari ya. Miyak nyaꞌ nyau upa urang te mati, nyaꞌ nyuroh urang mayoh madah, “Ya udah mati.” 27 Uleh Isa megai jari miyak nyaꞌ abaꞌ mantoꞌ ya diri. Baroꞌ miyak nyaꞌ diri.
28 Isa abaꞌ kebala muret Ya tamaꞌ ke suteꞌ rumah. Pas niseꞌ urang bukai abaꞌ sidaꞌ, kebala muret nanyaꞌ ke Isa, “Ngapa kami nadai talah muru sitan nyaꞌ?”
29 Isa nyawot sidaꞌ, “Kitaꞌ tauꞌ muru sitan te upa toꞌ peroꞌ ngau pradua.”
Isa madah ageꞌ kati upa pemati Ya
(Luk. 9:43-45)
30 Isa abaꞌ kebala muret Ya angkat ari nyaꞌ bejalai mansaꞌ Galelia. Isa ngai deketauꞌ urang enteꞌ sidaꞌ adai diyaꞌ, 31 nema Ya tengan ngajar kebala muret Ya. Isa madah, “Anak Ensia kaꞌ deserah ke penekaꞌ kebala urang te bekuasa. Sidaꞌ kaꞌ munoh Ya, uleh ari ketiga Ya kaꞌ idop ageꞌ.”
32 Kebala muret Isa nadai nyarok apa te jakoꞌ Ya, uleh sidaꞌ nadai gaꞌ berani nanyaꞌ Ya.
Sapa te paleng penteng de entara kebala muret Isa
(Luk. 9:46-48)
33 Isa abaꞌ kebala muret Ya datai ke kuta Kapernaom. Nyau sidaꞌ tamaꞌ ke suteꞌ rumah, Isa nanyaꞌ sidaꞌ, “Apa te decakap kitaꞌ de jalai tadeꞌ teh?”
34 Uleh sidaꞌ ngai nyawot, nema tadeꞌ teh de tengah jalai sidaꞌ udah betengek ke sapa te paleng penteng de entara sidaꞌ. 35 Isa dudok abaꞌ ngumpol kedua belas muret Ya. Ya madah ke sidaꞌ, “Sapa te kaꞌ jadi urang te paleng penteng, ya alah kaꞌ upa urang te nadai penteng, abaꞌ ngelayan ugaꞌ urang.” 36 Baroꞌ Isa megai jari sikoꞌ miyak abaꞌ nyuroh diri de mua ugaꞌ sidaꞌ. Isa ngerengkon miyak nyaꞌ abaꞌ madah ke kebala muret Ya, 37 “Urang te kaꞌ nerimaꞌ urang te met upa miyak toꞌ nema ya pecayaꞌ ke Ku, nyaꞌ sama mah abaꞌ ya nerimaꞌ Ku. Abaꞌ urang te nerimaꞌ Ku, ya bukai peroꞌ nerimaꞌ Ku gena, uleh ya nerimaꞌ Tuhan Allah te ngutos Ku.”
Sikoꞌ urang te ukai muret Isa muru sitan
(Luk. 9:49-50)
38 Baroꞌ Yohanes madah ke Isa, “Guru, kami adai medaꞌ sikoꞌ urang muru sitan ngau nama Wan, uleh kami rot nema ya ukai ari kelumpok kita.”
39 Uleh Isa madah, “Nang ngerot ya. Enteꞌ urang tauꞌ mulah utai te nyaroh ngau kuasa nama Ku, ya nitauꞌ teka nadai mang-mang melicak Ku. 40 Urang te nadai ngelawan kita, breti ya kawan kita. 41 Ku madah ke kitaꞌ, sapa jaꞌ urang te mereꞌ kitaꞌ nginom aiꞌ segelas nema kitaꞌ empu Al Maseh, urang nyaꞌ pesti kaꞌ nerimaꞌ upah ari Tuhan Allah.”
Kebala utai te nyuroh urang mulah dusa
(Luk. 17:1-2)
42 Isa nyamong pengajar Ya ageꞌ, “Enteꞌ adai urang te nyuroh sikoꞌ ari kebala urang te met upa miyak te pecayaꞌ ke Ku laboh ke alam dusa, ageꞌ kasa enteꞌ batu besaia detamet ke ler urang nyaꞌ abaꞌ ya detibar ke laot. Uleh pemedeh nyaꞌ ageꞌ encadeꞌ ari ukom Tuhan Allah. 43 Enteꞌ jari te nyuroh kitaꞌ mulah dusa, kempat ke jari nyaꞌ!b Lebeh bayek kitaꞌ jong idop abaꞌ Tuhan Allah sengabot ngau suteꞌ jari, ari pada kitaꞌ adai dua jari uleh tamaꞌ neraka, ke alam api te nitauꞌ padam. [ 44 Diyaꞌ ulat te makai tuboh urang nadai tauꞌ mati abaꞌ api nyaꞌ te nitauꞌ padam.] 45 Enteꞌ kaki kitaꞌ te nyuroh kitaꞌ dusa kempat ke kaki nyaꞌ! Lebeh bayek kitaꞌ jong idop abaꞌ Tuhan Allah sengabot ngau suteꞌ kaki, ari pada kitaꞌ adai dua kaki, uleh tamaꞌ neraka. [ 46 Diyaꞌ ulat te makai tuboh urang nadai tauꞌ mati abaꞌ api nyaꞌ nitauꞌ padam.] 47 Enteꞌ mata kitaꞌ te nyuroh kitaꞌ mulah dusa, kruweng ke mata nyaꞌ! Lebeh bayek kitaꞌ tamaꞌ ke Pemrintah Tuhan Allah ngau sigeꞌ mata, ari pada kitaꞌ adai dua mata, uleh debuai ke alam api neraka. 48 Diyaꞌ ulat te makai tuboh urang nadai tauꞌ mati abaꞌ api nyaꞌ nitauꞌ padam.c
49 Nema ngenap urang kaꞌ deuji Tuhan Allah sidaꞌ mayoh ngasa pemedeh upa te angos uleh api.
50 Garam amat beguna, uleh enteꞌ garam nyau tabar, niseꞌ te tauꞌ nyuroh ya masen ageꞌ. Kitaꞌ alah upa garam abaꞌ alah selareh idop damai abaꞌ urang.”