Isa mreꞌ empat ribu urang makai
8
Nadai lamaꞌ udah nyaꞌ adai mayoh urang datai ngusong Isa. Breta Isa medaꞌ sidaꞌ niseꞌ te depakai, Ya ngumai kebala muret Ya abaꞌ madah: 2 “Ku saja ma mah kaseh ke kebala urang banyau toꞌ. Nyau tiga ari sidaꞌ abaꞌ Ku abaꞌ entoꞌ sidaꞌ niseꞌ te depakai. 3 Enteꞌ Ku nyuroh sidaꞌ pulai bedau makai, sidaꞌ tauꞌ lupot de tengah jalai. Apa klageꞌ daentara sidaꞌ adai rumah te jaoh.” 4 Uleh kebala muret Isa nyawot Ya, “Teban te jalai kita toꞌ sunyeꞌ Wan, dini kita tauꞌ meli ruti ngau urang te pemayoh toꞌ?” 5 Isa nanyaꞌ sidaꞌ, “Brapa uteꞌ ruti te adai de kitaꞌ?” Sawot sidaꞌ, “Tujoh uteꞌ.” 6 Baroꞌ Isa nyuroh urang banyau nyaꞌ dudok de tanah. Ya ngameꞌ ruti te tujoh uteꞌ nyaꞌ abaꞌ bradua ngucap sukor ke Tuhan Allah. Udah nyaꞌ Ya mungaꞌ ruti nyaꞌ abaꞌ mreꞌ ke kebala muret Ya, isaꞌ sidaꞌ magi ke kebala urang banyau. Kebala muret Isa nunaꞌ te dasuroh Ya ke sidaꞌ. 7 De kebala muret Ya adai gaꞌ dua tiga ikoꞌ ikan te engkaꞌ met. Isa bradua ngucap sukor ke Tuhan Allah, udah nyaꞌ Ya nyuroh muret Ya magi ke urang banyau. 8 Ugaꞌ sidaꞌ makai sampai kenyang. Baroꞌ kebala muret Isa ngumpol plebeh ruti abaꞌ ikan adai tujoh ragaꞌ. 9 Kebala urang te makai diyaꞌ kurang lebeh empat ribu. Udah nyaꞌ Isa nyuroh sidaꞌ pulai ke rumah sidaꞌ kedireꞌ. 10 Udah nyaꞌ Isa abaꞌ kebala muret Ya nikeꞌ prau besai abaꞌ angkat ke dairah Dalmanuta.Urang ari klumpok Parisi encuba Isa
11 Dua tiga ikoꞌ urang ari klumpok Parisi datai betengek abaꞌ Isa. Sidaꞌ kaꞌ encuba Ya, nyaꞌ nyuroh sidaꞌ mintaꞌ Isa mulah utai te nyaroh ari Tuhan Allah isaꞌ sidaꞌ tauꞌ badaꞌ enteꞌ Ya amat de utos Tuhan Allah ke dunia toꞌ. 12 Ninga piyaꞌ Isa ngeloh ke sidaꞌ, jakoꞌ alam ati Ya, “Ngapa kitaꞌ te idop de jaman toꞌ mintaꞌ ku mulah utai te nyaroh ari Tuhan Allah? Ku madah ke kitaꞌ Ku sama skaleꞌ nadai kaꞌ mulah utai te nyaroh ari Tuhan Allah de tengah kitaꞌ.” 13 Udah madah piyaꞌ, Isa abaꞌ kebala muret Ya angkat ari nyaꞌ. Sidaꞌ nyemerang danau.
Ragi urang ari klumpok Parisi abaꞌ Herudes
14 Tengan nyaꞌ kebala muret Isa kelupa ngemaiꞌ ruti. Te adai de prau sidaꞌ proꞌ suteꞌ mah ruti. 15 Baroꞌ Isa madah ke sidaꞌ, “Kitaꞌ alah ati-ati ke ragi urang ari klumpok Parisi abaꞌ ragi raja Herudes.” 16 Kebala muret Isa nadai nyarok te jakoꞌ Ya kebaꞌ sidaꞌ madah ke pangan bukai, “Isa madah piyaꞌ tegal kitaꞌ niseꞌ ngemaiꞌ ruti.” 17 Isa tauꞌ badaꞌ apa te decakap sidaꞌ. Ya madah, “Ngapa kitaꞌ becakap ke kitaꞌ niseꞌ maiꞌ ruti. Ukai nyaꞌ te de maksot Ku. Tunaꞌ des kitaꞌ nyau tauꞌ badaꞌ abaꞌ nyarok. Ma mah tumpol pemiker kitaꞌ weh? 18 Kitaꞌ adai mata ngapa nadai ngau medaꞌ? Abaꞌ kitaꞌ adai peneng ngapa nadai ngau ninga? Nadai piyaꞌ kitaꞌ ingat, 19 jalai Ku mungaꞌ ruti ngau limaꞌ ribu urang teh? Brapa ragaꞌ penoh plebeh ruti te kitaꞌ kumpol kah?” Sawot sidaꞌ, “Dua blas ragaꞌ.” 20 “Jalai Ku mungaꞌ tujoh uteꞌ ruti ngau empat ribu urang, brapa ragaꞌ plebeh ruti te kitaꞌ kumpol ke ari nyaꞌ?” Sawot sidaꞌ, “Tujoh ragaꞌ.” 21 Baroꞌ Isa nanyaꞌ sidaꞌ, “Nyauꞌ kitaꞌ nyarok deh?”
Isa nyemoh urang te butaꞌ de Betsaida
22 Nyau klamaꞌ Isa abaꞌ kebala muret Ya datai ke kuta Betsaida. Diyaꞌ adai dua tiga ikoꞌ urang datai ngemaiꞌ sikoꞌ urang butaꞌ ngusong Isa. Sidaꞌ ngemon ke Isa, isaꞌ Ya nyamah urang te butaꞌ nyaꞌ. 23 Baroꞌ Isa megai jari ensia nyaꞌ abaꞌ ngireng ya keluar ari kuta nyaꞌ. Baroꞌ Isa ngeludah mata ensia nyaꞌ abaꞌ nyamah ngau jari Ya. Udah nyaꞌ Isa nanyaꞌ ke ya, “Adai meh medaꞌ utai?” 24 Ensia nyaꞌ nilek ke mua, baroꞌ ya madah, “Auꞌ. Adai ku medaꞌ urang bejalai; uleh sidaꞌ ke upa medaꞌ kebala pon kayu mah te bejalai.” 25 Baroꞌ Isa nyamah mata ensia nyaꞌ ageꞌ. Breta udah nyaꞌ deh baroꞌ ensia nyaꞌ bamat-amat medaꞌ abaꞌ semoh, nyaꞌ nyuroh ensia nyaꞌ tauꞌ rantas amat medaꞌ kebala utai. 26 Udah nyaꞌ Isa nyuroh ya pulai ke rumah ya abaꞌ madah, “Adu meh selagat bebalek ke kuta nyaꞌ.”
Petros madah Isa nyaꞌ mah Al Maseh
27 Udah nyaꞌ Isa abaꞌ kebala muret Ya angkat ke kampong te semak kuta Kaisarea Plipi. De tengah jalai Isa nanyaꞌ sidaꞌ, “Enteꞌ jakoꞌ kebala urang sapa Ku toꞌ?” 28 Sawot sidaꞌ, “Adai te madah Wan Yohanes Pemaneꞌ, adai te madah Wan nabi Elia, abaꞌ adai gaꞌ te madah Wan salah sikoꞌ nabi te meliyaꞌ idop ageꞌ.” 29 Baroꞌ Isa nanyaꞌ ageꞌ, “Enteꞌ jakoꞌ kitaꞌ sapa Ku toꞌ?” Sawot Petros, “Wan toꞌ Al Maseh, Raja Penyelamat te udah dedanyi Tuhan Allah.” 30 Baroꞌ Isa ngerot sidaꞌ nusoi ke kebala urang sapa Ya nyaꞌ.
Isa madah pemedeh Ya abaꞌ pemati Ya
31 Udah nyaꞌ Isa blaboh ngajar kebala muret Ya, enteꞌ Ensia te datai ari Tuhan Allah alah mayoh ngasa pemedeh, dakengai kebala urang tuwai bansa Yahudi, kepalaꞌ kebala imam, abaꞌ kebala urang te ahli de alam printah Tuhan Allah te datules Musa. Ya kaꞌ dabunoh, uleh ari ketiga lah Ya kaꞌ idop ageꞌ. 32 Aja jelas amat mah te depadah Isa nyaꞌ ke kebala muret Ya. Kebaꞌ Petros narek Isa ke tisi ya abaꞌ nganoꞌ Ya, “Guru, adu Wan becakap munyi piyaꞌ.” 33 Uleh Isa malek ke kebala muret Ya abaꞌ merak Petros, “Rari ke ari toꞌ Ibles, te meh piker ke nyaꞌ pemiker ensia, ukai pemiker Tuhan Allah.”
34 Baroꞌ Isa ngumai kebala muret Ya abaꞌ kebala urang te diyaꞌ. Ya madah ke sidaꞌ, “Ngenap urang te kaꞌ jadi muret Ku nitauꞌ idop nunaꞌ penekaꞌ ati direꞌ, alah siap nangong saleb ya ngenap ari, abaꞌ alah bamat-amat abaꞌ Ku. 35 Nema ngenap urang te kaꞌ brusaha ngintu idop direꞌ de dunia toꞌ nitauꞌ jong idop abaꞌ Tuhan Allah. Uleh sapa jaꞌ te kaꞌ nyerah idop direꞌ tegal Ku abaꞌ tegal nusoi Brita Bayek ari Ku, ya tauꞌ jong idop abaꞌ Tuhan Allah. 36 Engkapaꞌ kitaꞌ buleh ugaꞌ iseꞌ dunia toꞌ enteꞌ kitaꞌ nitauꞌ jong idop abaꞌ Tuhan Allah. 37 Nema idop abaꞌ Tuhan Allah nitauꞌ debayar ngau ugaꞌ utai te adai de dunia toꞌ. 38 Enteꞌ urang malu ngakoꞌ Ku abaꞌ apa te Ku ajar kah, de jaman urang te jat toꞌ abaꞌ nadai setia ke Tuhan Allah; Ensia te datai ari Tuhan Allah sigeꞌ malu ngakoꞌ ya jemah lah, senta Ya datai daterudi kebala mlikat Ya alam kuasa te lampar trang ari sruga.”