Printah Tuhan Allah abaꞌ adat basa sidaꞌ Yahudi
7
Adai skaleꞌ dua tiga ikoꞌ urang ari klumpok Parisi abaꞌ kebala urang te ahli de alam printah Tuhan Allah te datules Musa datai ari Yerosalem ngusong Isa. 2 Sidaꞌ medaꞌ dua tiga ikoꞌ muret Isa makai, uleh nadai bebasok jari nunaꞌ prator agama sidaꞌ. 3 Kebala urang Parisi abaꞌ kebala sidaꞌ Yahudi te ke bukai, ngai makai asa sidaꞌ bedau naꞌ masok jari nunaꞌ prator te udah deatoh. Nema sidaꞌ slareh patoh ke adat basa kebala puyang jagang sidaꞌ. 4 Sidaꞌ ngai makai kebala utai te dabeli de pasar asa bedau de basok. Abaꞌ ageꞌ tubah mayoh kebala prator puyang jagang sidaꞌ te alah sidaꞌ tunaꞌ kah; upa medaꞌ prator cara sidaꞌ masok kebala pingan mangkok. 5 Kebaꞌ nyaꞌ kebala urang Parisi abaꞌ kebala urang te ahli alam Prator Tuhan Allah te datules Musa nanyaꞌ ke Isa, “Ngapa kebala muret Wan kaꞌ makai nadai masok jari dulau? Ngapa sidaꞌ ngai nunaꞌ prator adat basa puyang jagang kita?” 6 Isa nyawot sidaꞌ, “Amat mah pesau Tuhan Allah te depadah nabi Yesaya, kitaꞌ toꞌ urang te budi-budi bayek! Adai datules:‘Kebala bansa toꞌ muji nyemah Ku ngau mulot gena mah,
uleh ati sidaꞌ jaoh ari Ku.
7 Pracuma mah sidaꞌ nyemah Ku,
nema kebala printah ensia te deajar sidaꞌ, ukai Printah Ku.’a
8 Apa te Ku printah, kitaꞌ ngai nunaꞌ, uleh adat basa te dapulah ensia kitaꞌ tunaꞌ.”
9 Baroꞌ Isa madah ageꞌ ke sidaꞌ, “Kitaꞌ panai amat, kitaꞌ budi-budi nunaꞌ printah Tuhan Allah! Uleh prator te pengamat kitaꞌ tunaꞌ kah te deajar puyang jagang kitaꞌ. 10 Musa udah madah, ‘Pulah ke te bayek ke apai inai kitaꞌ! Abaꞌ sapa jaꞌ kitaꞌ te ngutok apai inai kitaꞌ, alah daukom mati.’ 11 Uleh kitaꞌ ngajar urang tauꞌ sidaꞌ madah ke apai inai sidaꞌ, ‘Apa te kaꞌ ku breꞌ ke wan, udah ku pesemah ke Tuhan Allah.’ 12 Nyaꞌ sama mah abaꞌ kitaꞌ nyadi urang nyaꞌ nadai ngintu apai inai sidaꞌ. 13 Pengajar te kitaꞌ ajar ke urang nyaꞌ, nyuroh apa te depadah Tuhan Allah nadai dengau ageꞌ. Abaꞌ ageꞌ mayoh kebala utai te upa toꞌ te kitaꞌ pulah.”
14 Baroꞌ Isa ngumai ageꞌ urang banyau abaꞌ madah ke sidaꞌ, “Dinga kah jakoꞌ Ku isaꞌ kitaꞌ nyarok! 15 Apa te urang pakai inom nadai nyuroh najes de mua Tuhan Allah. Uleh apa te urang padah abaꞌ pulah, nyaꞌ te nyuroh urang najes.” [ 16 Asa kitaꞌ adai peneng ngau ninga, dingakah!] 17 Pas Isa nudi urang mayoh nyaꞌ abaꞌ tamaꞌ ke rumah, kebala muret nanyaꞌ ke Ya reti kisah empama te baroꞌ udah Ya ajar kah. 18 Sawot Isa, “Kitaꞌ nadai nyarok gaꞌ? Nitauꞌ kitaꞌ badaꞌ apa reti te urang pakai inom nadai nyuroh najes de mua Tuhan Allah. 19 Apa te kita pakai inom nyaꞌ tamaꞌ ke alam perot, nadai tamaꞌ ke alam ati, udah nyaꞌ keluar ageꞌ pas kita biraꞌ.” Isa madah piyaꞌ, isaꞌ urang tauꞌ badaꞌ ugaꞌ pemakai tauꞌ ugaꞌ mah depakai. 20 Baroꞌ Isa madah ageꞌ, “Apa te keluar ari ati urang nyaꞌ te nyuroh urang najes 21 nema ari alam ati timol kebala pemiker jat te nyuroh encuri, munoh, 22 besinah, nipu, menyaiꞌ urang bukai, abaꞌ mulah ugaꞌ utai te jat, tamaꞌ, iri ati, niseꞌ basa, sumong, abaꞌ ngai de ajar. 23 Ugaꞌ utai te jat nyaꞌ timol ari alam ati, abaꞌ nyaꞌ mah te nyuroh urang najes.”
Urang inoꞌ ari dairah Penisia propinsi Siria te pecayaꞌ ke Isa
24 Udah nyaꞌ Isa angkat ke daerah nyemak kuta Tiros. Ya tamaꞌ ke alam rumah abaꞌ Ya ngai urang tauꞌ badaꞌ Ya diyaꞌ. Uleh Ya nitauꞌ lamaꞌ gilaꞌ napok direꞌ. 25 Adai sikoꞌ iboꞌ, anak ya desarong sitan. Breta ya ninga Isa diyaꞌ, ya datai ngusong Isa abaꞌ tesungkor de mua Ya, 26 blumaꞌ mintaꞌ Isa muru sitan ari anak ya. Iboꞌ nyaꞌ ukai sidaꞌ Yahudi. Ya ari daerah Penisia propinsi Siria. 27 Baroꞌ Isa madah ke ya, “Kebala miyak alah dabreꞌ makai dulau. Nadai bayek ngameꞌ pemakai kebala miyak ngau mreꞌ ukoi.” 28 Uleh iboꞌ nyaꞌ nyawot Ya, “Amat mah pak te jakoꞌ Wan. Uleh kebala ukoi de baroh mija sigeꞌ makai kebala tisaꞌ pemakai te laboh uleh kebala miyak.” 29 Baroꞌ Isa madah ke ya, “Nema sawot wan upa piyaꞌ, pulai jaꞌ wan, sitan nyaꞌ udah rari ari anak wan.” 30 Iboꞌ nyaꞌ pulai ke rumah, ya medaꞌ anak ya tengan galeꞌ de peninok ya, abaꞌ sitan nyau rari ari anak ya.
Isa nyemoh urang te bangal abaꞌ kangaꞌ
31 Udah nyaꞌ Isa angkat ari kuta Tiros. Ya mansaꞌ kuta Sidon angkat ke danau besai Galelia. Ya mansaꞌ wilayah te dasebot Dekapolis. 32 Diyaꞌ sidaꞌ ngemaiꞌ urang te bangal abaꞌ kangaꞌ ngusong Isa abaꞌ sidaꞌ mintaꞌ Ya ngletak jari ke kebala urang te pedeh. 33 Isa ngemaiꞌ urang nyaꞌ angkat jaoh geꞌ ari urang banyau. Baroꞌ Isa majak tunyok Ya kedua uteꞌ lubang peneng urang nyaꞌ. Udah nyaꞌ Isa ngeludah abaꞌ nyamah dilah urang nyaꞌ. 34 Baroꞌ Isa engkadah ke langet, blumaꞌ ngesoh penyuan Ya madah, “Epata!” reti nyaꞌ “Tebukaꞌ mah.” 35 Tengan nyaꞌ gaꞌ urang nyaꞌ sintak tauꞌ ninga abaꞌ ya nadai kangaꞌ ageꞌ. Ya tauꞌ temos becakap. 36 Isa ngerot sidaꞌ nusoi ke urang apa te udah ya pulah ke urang nyaꞌ. Uleh empala Isa ngerot, nyaꞌ empala sidaꞌ nusoi utai nyaꞌ ke urang bukai. 37 Ugaꞌ urang ampal abaꞌ madah, “Ugaꞌ te dapulah Isa nyaꞌ bayek. Urang te bangal desuroh Ya tauꞌ ninga abaꞌ urang te kangaꞌ desuroh Ya tauꞌ temos becakap.”