Sidaꞌ Nasaret nadai pecayaꞌ ke Isa
(Luk. 4:16-30)
6
Baroꞌ Isa abaꞌ kebala muret Ya angkat ke Nasaret teban jalai Ya debesai. 2 Pas ari Sabat, ari sidaꞌ Yahudi nyemah Tuhan Allah, Ya belaboh ngajar de rumah teban jalai sidaꞌ Yahudi nyemah Tuhan Allah. Pas kebala urang mayoh te diyaꞌ ninga pengajar Ya sidaꞌ ampal blumaꞌ madah, “Ari ni naꞌ mah Ya buleh ugaꞌ nyaꞌ? Kati naꞌ mah Ya tauꞌ buleh Pemanai te upa nyaꞌ? Abaꞌ kati naꞌ mah Ya tauꞌ mulah kebala utai te nyaroh? 3 Ukai piyaꞌ Ya toꞌ tukang kayu, anak Maria, menyadeꞌ Yakubos, Yuses, Yudas abaꞌ Simon? Abaꞌ nadai piyaꞌ kebala menyadeꞌ Ya te inoꞌ adai abaꞌ kita?” Kebaꞌ nyaꞌ sidaꞌ nadai kaꞌ pecayaꞌ ke Ya.4 Baroꞌ Isa madah ke sidaꞌ, “Sikoꞌ nabi depanang diyaꞌ-ditoꞌ, uleh nadai de kampong abaꞌ rumah direꞌ.”
5 Diyaꞌ datai ke suteꞌ mah niseꞌ utai te nyaroh ari Tuhan Allah te depulah Isa, bukai ari nyemoh dua tiga ikoꞌ urang te pedeh ngau cara ngeletak jari Ya ke atau sidaꞌ. 6a Ya ampal medaꞌ sidaꞌ nadai pecayaꞌ.
Isa ngutos dua belas muret Ya
(Luk. 9:1-6)
6b Baroꞌ Isa bejalai kelileng ari kampong ke kampong blumaꞌ ngajar. 7 Ya ngumai dua belas muret Ya abaꞌ ngutos sidaꞌ dua ikoꞌ dua ikoꞌ, abaꞌ mereꞌ kuasa ke sidaꞌ ngau muru kebala sitan. 8 Ya madah ke sidaꞌ isaꞌ nadai ngemaiꞌ kebala pemakai, kebala dumpet, duet selamaꞌ sidaꞌ bejalai, peroꞌ tungkat mah te tauꞌ debaiꞌ, 9 sidaꞌ tauꞌ ngau sepatu, uleh nitauꞌ ngau dua baju. 10 Jakoꞌ Ya madah ke sidaꞌ ageꞌ, “Enteꞌ kitaꞌ udah detrimaꞌ de suteꞌ rumah, diyaꞌ mah kitaꞌ diyau sampai kitaꞌ angkat ari nyaꞌ. 11 Abaꞌ enteꞌ kita datai ke teban urang te ngai nerimaꞌ kitaꞌ abaꞌ enteꞌ sidaꞌ ngai ninga kitaꞌ, keluar ari nyaꞌ abaꞌ tepau ke debu te lekat de kaki kitaꞌ ngau tana ke sidaꞌ jemah lah Tuhan Allah kaꞌ ngukom sidaꞌ.”
12 Baroꞌ muret Isa angkat abaꞌ madah ke urang enteꞌ sidaꞌ alah nudi kebala dusa sidaꞌ. 13 Kebala muret Isa mayoh muru kebala sitan abaꞌ ngunsot binyak saiton de kebala urang te pedeh abaꞌ nyemoh sidaꞌ ngau kuasa Tuhan Allah.
Yohanes Pemaneꞌ debunoh
(Luk. 9:7-9)
14 Ugaꞌ kebala brita te udah Isa pulah ke nyaꞌ nyau datai ke peneng Herudes Antipas, nema Isa lamaꞌ nyau dekelala urang diyaꞌ-ditoꞌ. Adai urang te madah, “Yohanes Pemaneꞌ udah idop ageꞌ ari entara urang mati! Kebaꞌ nyaꞌ nyuroh Ya adai kuasa tauꞌ mulah kebala utai te nyaroh.”
15 Adai kedaꞌ madah, “Ya nyaꞌ Elia!”
Abaꞌ adai gaꞌ te kebukai madah, “Ya nyaꞌ sama abaꞌ nabi te meliyaꞌ.”
16 Breta Herudes ninga utai nyaꞌ, ya madah, “Ya nyaꞌ ukai nabi te meliyaꞌ, Ya nyaꞌ Yohanes te udah ku pancong ke palaꞌ uleh ya nyau idop ageꞌ.”
17 Nema sebedau nyaꞌ teh Herudes udah nyuroh urang nangkap Yohanes, ngerantai ya abaꞌ majak ya ke alam penyara. Herudes mulah piyaꞌ tegal ya ngai derara Yohanes nema ya jadi ke Herudias bini Pelipos menyadeꞌ ya kedireꞌ. 18 Yohanes gah ngerara Herudes upa pitoꞌ, “Nitauꞌ meh jadi ke bini menyadeꞌ meh!”
19 Nyaꞌ mah te ngasoh Herudias pedeh ati ke Yohanes abaꞌ ngamoꞌ munoh Yohanes, uleh nadai tauꞌ, 20 nema Herudes ngasoh urang ngelinong Yohanes. Herudes takot ke Yohanes nema ya tauꞌ badaꞌ enteꞌ Yohanes urang te kenaꞌ abaꞌ suci. Uleh enteꞌ ya ninga pengajar Yohanes, ati ya bingong uleh amat piyaꞌ ya gaga ninga Yohanes.
21 Kepanyai datai mah senta te bayek ke Herudias, nema tengan nyaꞌ Herudes mulah acara ngeraya ari ulang taon ya. Pas ari nyaꞌ Herudes ngunang kebala petingeꞌ ya, kebala prajuret, abaꞌ kebala urang te tepanang de Galelia. 22 Tengan acara nyaꞌ, anak Herudias te dara bejuget de mua kebala temuai abaꞌ nyaꞌ ngasoh ati Herudes abaꞌ kebala temuai gaga amat. Raja Herudes madah ke miyak nyaꞌ, “Pintaꞌ jaꞌ apa te dekedekaꞌ deꞌ, pesti ku bereꞌ ke deꞌ!” 23 Baroꞌ Herudes bedanyi ke miyak nyaꞌ blumaꞌ besumpah, jakoꞌ ya, “Apa jaꞌ te depintaꞌ deꞌ ke ku, biar mah setengah ari wilayah te ku printah, pesti ku bereꞌ ke deꞌ.”
24 Miyak dara nyaꞌ angkat abaꞌ nanyaꞌ inai ya, “Nai, apa te alah ku pintaꞌ?” Sawot inai ya, “Palaꞌ Yohanes Pemaneꞌ!”
25 Miyak nyaꞌ sintak ngusong Herudes abaꞌ madah, “Ku kaꞌ mintaꞌ palaꞌ Yohanes Pemaneꞌ detepoꞌ de lemidang baiꞌ ke ku entoꞌ!”
26 Ninga te depintaꞌ ya, ati Herudes ma mah riyu. Uleh nema ya udah bedanyi de mua kebala temuai, nyaꞌ nyuroh ya nitauꞌ jalai ngai. 27 Herudes sintak mrintah anak buah ya ngemaiꞌ palaꞌ Yohanes Pemaneꞌ. Anak buah ya angkat ke penyara abaꞌ mancong palaꞌ Yohanes Pemaneꞌ. 28 Ya ngemaiꞌ palaꞌ nyaꞌ ngau lemidang abaꞌ mereꞌ ke miyak dara nyaꞌ, baroꞌ miyak dara nyaꞌ mereꞌ ke inai ya.
29 Breta kebala muret Yohanes ninga brita nyaꞌ, sidaꞌ datai abaꞌ ngameꞌ bangkai ya, baroꞌ mengaleꞌ de alam kubor.
Isa mereꞌ makai limaꞌ ribu urang
(Luk. 9:10-17)
30 Kebala rasol te udah deutos Isa ke kebala kampong datai ageꞌ abaꞌ nusoi ke Ya ugaꞌ te udah sidaꞌ pulah abaꞌ ajar. 31 Mayoh amat urang te datai abaꞌ pulai ngusong Isa abaꞌ kebala rasol Ya, nyaꞌ ngasoh datai ke makai mah sidaꞌ nadai sempat. Kebaꞌ nyaꞌ Isa madah ke kebala rasol Ya, “Boh kita angkat ke teban te sunyeꞌ isaꞌ kitaꞌ tauꞌ kedireꞌ abaꞌ blepa!” 32 Baroꞌ sidaꞌ angkat ngau prau ke teban te sunyeꞌ.
33 Uleh pas sidaꞌ angkat mayoh urang te medaꞌ sidaꞌ abaꞌ tauꞌ badaꞌ kikai pemansang sidaꞌ. Kebaꞌ kebala urang te adai de wilayah nyaꞌ, bejalai ngelampat sidaꞌ ari jalai darat, nyaꞌ ngasoh sidaꞌ dulau datai ari Isa abaꞌ kebala rasol Ya. 34 Pas Isa turon ari prau, Ya medaꞌ urang uleh kepemayoh, tengan nyaꞌ timol pengaseh alam ati Ya, nema sidaꞌ upa dumba te nadai deintu. Kebaꞌ Ya belaboh ngajar kebala utai ke sidaꞌ.
35 Pas ari nyau slepat petang, kebala muret Isa datai abaꞌ madah ke Ya, “Guru, teban toꞌ sunyeꞌ abaꞌ ari toꞌ nyau kaꞌ malam. 36 Suroh ke sidaꞌ angkat, isaꞌ sidaꞌ tauꞌ meli pemakai de kebala desa abaꞌ de kebala kampong te semak toꞌ.”
37 Uleh Ya nyawot, “Kitaꞌ mah te alah mereꞌ sidaꞌ makai!”
Sawot sidaꞌ, “Kati kami tauꞌ mereꞌ sidaꞌ makai? Alah kebaꞌ kami adai duet dua ratos dinar baroꞌ mah kami talah meli pemakai ke sidaꞌ.”
38 Uleh Ya madah ke sidaꞌ, “Berapa uteꞌ ruti te adai de kitaꞌ? Cuba pedaꞌ kah!” Udah sidaꞌ mresa, sidaꞌ madah, “Limaꞌ uteꞌ ruti abaꞌ dua ikoꞌ ikan.”
39 Baroꞌ Isa nyuroh ugaꞌ kebala urang nyaꞌ dudok bekelumpok de atau rumpot. 40 Baroꞌ kebala sidaꞌ nyaꞌ dudok bekelumpok, adai te seratos, abaꞌ adai te limaꞌ puloh alam sekelumpok. 41 Udah nyaꞌ Isa ngameꞌ limaꞌ uteꞌ ruti abaꞌ dua ikoꞌ ikan, Ya engkadah ke langet bradua ngucap sukor betrimaꞌ kaseh ke Tuhan Allah. Udah nyaꞌ Ya mungaꞌ ruti nyaꞌ abaꞌ mereꞌ ke kebala muret Ya, isaꞌ sidaꞌ magi ke kebala sidaꞌ nyaꞌ. Piyaꞌ gaꞌ dua ikoꞌ ikan nyaꞌ debagi Ya ke ugaꞌ sidaꞌ. 42 Sidaꞌ makai sampai kenyang. 43 Baroꞌ kebala muret ngumpol pelebeh ari te depakai sidaꞌ adai dua belas ragaꞌ penoh 44 Urang te makai ruti nyaꞌ adai limaꞌ ribu urang laki.
Isa bejalai de atau aiꞌ
45 Udah nyaꞌ Isa sintak ngasoh kebala muret Ya nikeꞌ ke prau abaꞌ dulau geꞌ angkat ari Ya nyemrang ke Betsaida, abaꞌ Ya ngasoh kebala urang banyau pulai. 46 Udah nyaꞌ Ya angkat ke buket abaꞌ bradua diyaꞌ. 47 Pas nyau malam, prau te detumpang kebala muret Isa nyaꞌ udah de tengah danau, uleh Isa ageꞌ de darat. 48 Breta Ya medaꞌ sidaꞌ uleh ke pemedeh bekayoh nema kudeꞌ betat datai ari mua sidaꞌ, kebaꞌ nyaꞌ nyuroh sekitar jam tiga dinari Ya angkat ngusong sidaꞌ bejalai de atau aiꞌ uleh Ya mansaꞌ sidaꞌ jaꞌ. 49 Breta sidaꞌ medaꞌ Ya bejalai de atau aiꞌ, sidaꞌ ngangar Ya antu, baroꞌ sidaꞌ mangkes-nguwes, 50 nema ugaꞌ sidaꞌ medaꞌ Ya abaꞌ sidaꞌ tekanyat gaꞌ. Uleh Ya sintak madah ke sidaꞌ, “Tenang jaꞌ! Ku toꞌ Isa, nang kitaꞌ takot!” 51 Baroꞌ Ya nikeꞌ ke prau ngusong sidaꞌ, abaꞌ kudeꞌ teka badoꞌ. Sidaꞌ ma mah ampal abaꞌ bingong. 52 Tegal ati sidaꞌ degel amat nyaꞌ ngasoh sidaꞌ nadai nyarok apa te udah depulah Isa ke limaꞌ ruti.
Isa nyemoh urang de Genesaret
53 Datai ke seberang, Isa abaꞌ kebala muret Ya singah de Genesaret abaꞌ namet prau diyaꞌ. 54 Breta sidaꞌ keluar ari prau, kebala urang tauꞌ badaꞌ enteꞌ nyaꞌ Isa. 55 Kebaꞌ sidaꞌ beguai kiyaꞌ-kitoꞌ bepadah ke ugaꞌ urang te adai de wilayah nyaꞌ, abaꞌ belaboh ngemaiꞌ kebala urang te pedeh de atau tikai ngusong Isa. Nema upa sengket sidaꞌ mulah piyaꞌ enteꞌ ninga brita Isa datai. 56 Kikai jaꞌ Ya angkat, ke kebala desa, kebala kuta, kebala kampong, urang nepoꞌ kebala urang te pedeh de teban te jalai urang mayoh begugoꞌ, abaꞌ mintaꞌ ke Ya isaꞌ kebala urang te pedeh desadi nyamah jubah Ya. Ugaꞌ urang te nyamah Ya semoh.