Isa abaꞌ Nikudimos
3
Adai sikoꞌ urang ari klumpok Parisi te nama Nikudimos, ya nyaꞌ salah sikoꞌ pemimpen bansa Yahudi. 2 Ya datai malam ngusong Isa abaꞌ madah, “Guru, kami tauꞌ badaꞌ enteꞌ Wan dautos Tuhan Allah ngau ngajar kami. Niseꞌ urang te tauꞌ mulah kebala tana te upa Wan pulah nyaꞌ, enteꞌ Tuhan Allah nadai abaꞌ sidaꞌ.” 3 Isa nyawot ya, “Ku kaꞌ madah ngau pengamat ke meh: niseꞌ urang te tauꞌ tamaꞌ ke Pemrintah Tuhan Allah, enteꞌ sidaꞌ nadai deadai ageꞌ.” 4 Baroꞌ Nikudimos nanyaꞌ Ya, “Piyaꞌ kati urang tauꞌ deadai ageꞌ, enteꞌ ya nyau tuwai? Tauꞌ weh ya tamaꞌ ageꞌ ke alam perot peranak inai ya abaꞌ deadai ageꞌ?” 5 Isa nyawot ya, “Ku kaꞌ madah ngau pengamat ke meh: enteꞌ urang nadai deadai ari aiꞌ abaꞌ Roh Kudos, ya nadai tauꞌ tamaꞌ ke alam Pemrintah Tuhan Allah. 6 Secara tuboh ensia deadai uleh ensia, uleh secara rohani, ensia deadai uleh Roh Kudos. 7 Nang meh ampal, enteꞌ ninga Ku madah, ‘Kitaꞌ alah deadai ageꞌ.’ 8 Ribot nyepu kikai ya kaꞌ, abaꞌ meh ninga goꞌ ya, uleh meh nitauꞌ badaꞌ ari ni penatai ya abaꞌ kikai ya angkat. Upa nyaꞌ mah gaꞌ urang te deadai uleh Roh Kudos.” 9 Baroꞌ Nikudimos nanyaꞌ ageꞌ, jakoꞌ ya, “Kati kebala utai nyaꞌ tauꞌ piyaꞌ?” 10 Sawot Isa, “Meh toꞌ guru te ma penteng de Israel, ngapa bah meh nadai nyarok ke kebala utai nyaꞌ? 11 Skaleꞌ ageꞌ Ku kaꞌ madah ngau pengamat, tunaꞌ kami madah apa te kami ketauꞌ abaꞌ kami nusoi apa te udah kami pedaꞌ, uleh kitaꞌ nadai pecayaꞌ ke apa te kami padah kah. 12 Ku becakap ke kebala utai te de dunia toꞌ jaꞌ kitaꞌ nadai pecayaꞌ, apa klageꞌ enteꞌ Ku becakap ke kebala utai te de sruga. 13 Niseꞌ urang te udah ke sruga, bukai ari Ya te datai ari sruga, Ya nyaꞌ Ensia te datai ari Tuhan Allah.14 Sama upa medaꞌ Musa ngangkat tingeꞌ patong ular te dapulah ari temaga de atau tianga, de tanah luah te baengkerangan, upa piyaꞌ mah gaꞌ Ensia te datai ari Tuhan Allah alah deangkat tingeꞌ de atau tiang. 15 Ensia te datai ari Tuhan Allah alah de angkat tingeꞌ, isaꞌ ugaꞌ urang te pecayaꞌ ke Ya tauꞌ jong idop abaꞌ Tuhan Allah. 16 Nema lampar besai kaseh Tuhan Allah ke ensia de dunia toꞌ, nyaꞌ mah te nyuroh Ya mreꞌ Anak tungal Ya, isaꞌ ngenap urang te pecayaꞌ ke Anak Ya nadai jong mati, uleh tauꞌ jong idop abaꞌ Tuhan Allah sengabot. 17 Tuhan Allah ngutos Anak Ya ke dunia toꞌ nadai ngau ngukom ensia, uleh ngau nyelamat ensia. 18 Ugaꞌ urang te pecayaꞌ ke Ya nadai daukom, uleh urang te nadai pecayaꞌ ke Ya udah daukom Tuhan Allah; nema sidaꞌ nadai pecayaꞌ ke Anak tungal Tuhan Allah. 19 Toꞌ mah te ngasoh Tuhan Allah udah ngukom kebala urang de dunia toꞌ: Trang udah datai ke dunia, uleh kebala urang de dunia toꞌ lebeh gaga idop teban te petang ari pada de teban te trang, nema kebala te dapulah sidaꞌ jat. 20 Ngenap urang te mulah jat, areh ke Trang. Sidaꞌ nadai kaꞌ datai ke Trang nyaꞌ, isaꞌ pemenyat sidaꞌ nadai ketauꞌ. 21 Uleh ngenap urang te mulah te kenaꞌ, datai ke Trang nyaꞌ, isaꞌ Trang nyaꞌ nganyaꞌ apa te dapulah sidaꞌ kenaꞌ nunaꞌ te dakedekaꞌ Tuhan Allah.”
Yohanes besaksi tentang Isa
22 Udah nyaꞌ Isa abaꞌ kebala muret Ya angkat ari Yerosalem ke wilayah Yudia. Diyaꞌ sidaꞌ merama dua tiga mingu, abaꞌ Isa maneꞌ kebala urang. 23 Tengan nyaꞌ gaꞌ Yohanes maneꞌ kebala urang de kuta Ainon, semak kuta Salim, nema diyaꞌ mayoh aiꞌ. Kebala urang datai kiyaꞌ isaꞌ depaneꞌ ya. 24 Pas nyaꞌ Yohanes bedau dapenyara.b
25 Baroꞌ dua tiga ikoꞌ muret Yohanes blayaꞌ abaꞌ sikoꞌ sidaꞌ Yahudi tentang mreseh direꞌ nunaꞌ adat Yahudi. 26 Kebala muret Yohanes datai ke ya abaꞌ madah, “Guru, urang te abaꞌ wan de sebrang sungai Yordan, abaꞌ tentang Ya wan besaksi, entoꞌ Ya maneꞌ urang gaꞌ abaꞌ mayoh urang datai ngusong Ya.” 27 Baroꞌ Yohanes nyawot, “Kita ensia toꞌ proꞌ nrimaꞌ apa te Tuhan Allah breꞌ ke kita. 28 Kitaꞌ kedireꞌ udah ninga ku madah, ‘Ku ukai Al Maseh, uleh ku dautos lebeh dulau ari Ya.’ 29 Penganten laki mah te jadi ke penganten inoꞌ, kawan penganten laki proꞌ diri de tisi ya, meneng ya, abaꞌ gaga amat ninga penganten laki nyaꞌ. Upa piyaꞌ gaꞌ ku, entoꞌ ku ngasa ma gaga. 30 Ya alah empala besai, uleh ku alah empala met.”
31 Ya te ari sruga lebeh besai ari ugaꞌ urang de bumi. Sapa te ari bumi toꞌ ensia biasa abaꞌ sidaꞌ becakap tentang ugaꞌ utai te tejadi de bumi toꞌ. Ya te datai ari sruga, lebeh besai ari ugaꞌ urang. 32 Ya madah tentang apa te Ya dinga abaꞌ Ya pedaꞌ de sruga, uleh datai kesikoꞌ mah niseꞌ urang pecayaꞌ ke apa te depadah Ya. 33 Urang te pecayaꞌ ke apa te desaksi Ya, ngakoꞌ Tuhan Allah nyaꞌ kenaꞌ. 34 Urang te deutos Tuhan Allah, nusoi apa te depadah Tuhan Allah, nema Tuhan Allah mreꞌ Roh Kudos niseꞌ jangkaꞌ ke Ya. 35 Apai te de sruga kaseh ke Anak Ya abaꞌ udah mreꞌ ugaꞌ kuasa ke Ya. 36 Urang te pecayaꞌ ke Anak tauꞌ jong idop abaꞌ Tuhan Allah sengabot. Uleh urang te ngai pecayaꞌ ke Anak nitauꞌ jong idop abaꞌ Tuhan Allah sengabot abaꞌ sidaꞌ jong daukom Tuhan Allah.