Isa becakap abaꞌ inoꞌ sidaꞌ Samaria
4
Kebala sidaꞌ Parisi ninga, enteꞌ Isa lebeh mayoh buleh muret abaꞌ maneꞌ urang ari pada Yohanes. 2 (Tunaꞌ ukai Isa te maneꞌ urang uleh kebala muret Ya.) 3 Pas Isa tauꞌ badaꞌ kebala sidaꞌ Parisi udah ninga kebala utai nyaꞌ, Ya angkat ari wilayah Yudia pulai ke wilayah Galelia. 4 Abaꞌ Ya alah mansaꞌ wilayah Samaria. 5 De Samaria Isa datai ke suteꞌ kuta te nama Sikar. Kuta nyaꞌ nadai jaoh ari tanah te debereꞌ Yakoba ke Yusop anak ya meliyaꞌ teh. 6 De tanah nyaꞌ adai sumor Yakob. Tegal bejalai jaoh, nyaꞌ nyuroh Isa lelak amat. Baroꞌ Ya dudok de tisi sumor nyaꞌ. Tengan nyaꞌ kurang lebeh jam dua belas tengah ari. 7 Baroꞌ datai mah sikoꞌ urang inoꞌ sidaꞌ Samaria ke sumor nyaꞌ kaꞌ nyawok aiꞌ. Isa madah ke ya, “Tauꞌ Ku mintaꞌ aiꞌ inom.” 8 Tengan nyaꞌ, kebala muret Isa nyau angkat ke kuta meli kebala te depakai.9 Inoꞌ sidaꞌ Samaria nyaꞌ nyawot, “Nadai kati mah Wan sidaꞌ Yahudi, mintaꞌ aiꞌ inom ke ku, sidaꞌ Samaria?” (Ya madah piyaꞌ nema sidaꞌ Yahudi ngai bekawan abaꞌ sidaꞌ Samaria.b) 10 Udah nyaꞌ Isa nyawot ya, “Enteꞌ deꞌ tauꞌ badaꞌ apa te kaꞌ debereꞌ Tuhan Allah ke ensia abaꞌ sapa Ku toꞌ te mintaꞌ aiꞌ ke deꞌ, pesti deꞌ kaꞌ gaꞌ mintaꞌ aiꞌ inom ke Ku. Abaꞌ Ku kaꞌ mereꞌ ke deꞌ aiꞌ te tauꞌ ngasoh ensia idop.” 11 Sawot inoꞌ nyaꞌ, “Pak, Wan niseꞌ penimaꞌ aiꞌ abaꞌ sumor toꞌ dalam amat mah. Ari ni Wan buleh aiꞌ te tauꞌ ngasoh ensia idop? 12 Yakob puyang jagang kami mereꞌ sumor toꞌ ke kami. Ya abaꞌ kebala anak ya, abaꞌ kebala pengidop ya nginom aiꞌ ari sumor toꞌ. Wan miker Direꞌ lebeh penteng ari Yakob?”
13 Baroꞌ Isa madah ke inoꞌ nyaꞌ, “Ngenap urang te nginom aiꞌ ari sumor toꞌ, pesti awos ageꞌ, 14 uleh urang te nginom aiꞌ te kaꞌ Ku bereꞌ, nyaꞌ nadai ngamoꞌ awos datai ke jemah. Nema aiꞌ te kaꞌ Ku bereꞌ, kaꞌ jadi mata aiꞌ te keluar sengabot alam idop ya. Nyaꞌ te nyuroh ya tauꞌ jong idop abaꞌ Tuhan Allah.”
15 Sawot inoꞌ nyaꞌ, “Pak, bereꞌ ke ku aiꞌ nyaꞌ, isaꞌ ku nadai awos abaꞌ nadai alah datai nyawok aiꞌ kitoꞌ ageꞌ.”
16 Baroꞌ Isa madah, “Angkat, baiꞌ ke laki deꞌ kitoꞌ.”
17 Sawot inoꞌ nyaꞌ, “Ku niseꞌ laki.”
Baroꞌ Isa madah, “Kenaꞌ mah te jakoꞌ deꞌ nyaꞌ, deꞌ niseꞌ laki, 18 nema deꞌ udah belaki limaꞌ kaleꞌ. Laki te diyau abaꞌ deꞌ entoꞌ nyaꞌ ukai laki deꞌ.”
19 Sawot inoꞌ nyaꞌ, “Pak, entoꞌ tauꞌ mah ku badaꞌ enteꞌ Wan toꞌ nabi. 20 Puyang jagang kami nyemah Tuhan Allah de buket toꞌ, uleh kitaꞌ sidaꞌ Yahudi madah peroꞌ de Yerosalem mah teban urang nyemah Tuhan Allah.”
21 Isa madah, “Pecayaꞌ jaꞌ deꞌ ke Ku, adai lah senta urang nyemah Tuhan Allah Apai kita nadai peroꞌ de buket toꞌ, abaꞌ nadai gaꞌ peroꞌ de Yerosalem. 22 Kitaꞌ sidaꞌ Samaria nyemah Tuhan Allah, uleh kitaꞌ nadai ngelala Ya. Kami sidaꞌ Yahudi nyemah Tuhan Allah abaꞌ kami ngelala Ya nema Penyelamat ensia datai ari sidaꞌ Yahudi. 23 Uleh kaꞌ datai lah senta, abaꞌ tunaꞌ des toꞌ nyau mah senta, kebala urang nyemah Tuhan Allah Apai kita alam roh abaꞌ pengajar te kenaꞌ. Nema urang te nyemah upa piyaꞌ mah te dekedekaꞌ Ya. 24 Tuhan Allah toꞌ Roh. Kebaꞌ urang te nyemah Ya alah nyemah Ya alam roh abaꞌ pengajar te kenaꞌ.”
25 Sawot inoꞌ nyaꞌ, “Ku tauꞌ badaꞌ, enteꞌ Mesias kaꞌ datai lah.” (Mesias toꞌ sama mah abaꞌ Al Maseh, reti nyaꞌ Raja Penyelamat te dedanyi Tuhan Allah.) “Asa Ya datai, Ya kaꞌ madah kebala utai ke kami.”
26 Isa madah, “Ku mah Ya, te tengan becakap abaꞌ deꞌ.”
27 Pas tengan nyaꞌ, kebala muret bebalek kiyaꞌ ageꞌ abaꞌ sidaꞌ ampal medaꞌ Ya becakap abaꞌ inoꞌ nyaꞌ. Uleh niseꞌ sidaꞌ te berani nanyaꞌ apa te deperlu inoꞌ nyaꞌ ke Isa abaꞌ apa te decakap Isa ke ya. 28 Udah nyaꞌ inoꞌ nyaꞌ nudi badah te ngau ya nepoꞌ aiꞌ de tisi sumor nyaꞌ, baroꞌ pulai ke kampong. Ya nusoi ke kebala urang, jakoꞌ ya, 29 “Den adai sikoꞌ urang te tauꞌ badaꞌ abaꞌ madah kebala utai te udah ku pulah. Amang ku Ya nyaꞌ mah Al Maseh?” Boh kita medaꞌ ken! 30 Ninga piyaꞌ kebala urang de kampong nyaꞌ angkat ngusong Isa.
31 Sebedau kebala urang ari kampong nyaꞌ datai kiyaꞌ, kebala muret Isa ngemaiꞌ Ya makai, jakoꞌ sidaꞌ, “Guru, boh kita makai!”
32 Uleh Isa nyawot sidaꞌ, “De Ku adai pemakai te nadai deketauꞌ kitaꞌ.”
33 Ninga Isa madah piyaꞌ, kebala muret nyaꞌ madah ke pangan bukai, “Nadai patot weh adai urang te ngemaiꞌ pemakai ke Ya tadeꞌ?”
34 Baroꞌ Isa madah ke sidaꞌ, “Pemakai Ku toꞌ, nunaꞌ kedekaꞌ Ya te ngutos Ku abaꞌ nemoꞌ kreja te desuroh Ya ke Ku. 35 Kitaꞌ madah, ‘Empat bulan ageꞌ lah nyau mah rama ngetau.’ Uleh Ku madah ke kitaꞌ: Pedaꞌ ke semak kitaꞌ kebala uma nyau kuneng abaꞌ nyau tauꞌ deketau. 36 Entoꞌ gaꞌ kebala urang te ngetau udah nerimaꞌ upah abaꞌ sidaꞌ ngumpol buah. Buah nyaꞌ kebala urang te pecayaꞌ, te tauꞌ jong idop abaꞌ Tuhan Allah sengabot, nyaꞌ ngasoh kebala urang te namak abaꞌ te ngetau sama gaga. 37 Kebaꞌ, kenaꞌ amat mah te gah depadah urang, ‘Te sikoꞌ namak abaꞌ te kebukai ngetau.’ 38 Ku nyuroh kitaꞌ ngetau apa te nadai kitaꞌ tamak; urang bukai namak, abaꞌ kitaꞌ ngumpol asel ari te detamak sidaꞌ.”
39 Mayoh urang ari kampong Samaria pecayaꞌ ke Isa, ninga apa te detusoi inoꞌ nyaꞌ. Inoꞌ nyaꞌ madah ke sidaꞌ, enteꞌ Isa tauꞌ ugaꞌ badaꞌ utai te udah ya pulah. 40 Pas kebala sidaꞌ Samaria datai ngusong Isa, sidaꞌ ngemon ke Ya isaꞌ diyau abaꞌ sidaꞌ. Kebaꞌ dua ari Isa merama diyaꞌ. 41 Udah nyaꞌ empala mayoh kebala urang de kampong Samaria nyaꞌ pecayaꞌ ke Isa ninga apa te deajar Isa ke sidaꞌ. 42 Sidaꞌ madah ke inoꞌ nyaꞌ, “Entoꞌ kami pecayaꞌ, bukai ageꞌ tegal apa te deꞌ padah ke kami, uleh nema kami kedireꞌ udah ninga Ya, abaꞌ tauꞌ badaꞌ enteꞌ Ya bamat-amat Penyelamat ensia.”
Isa bebalek ageꞌ ke Galelia
43 Nyau udah dua ari de Sikar, baroꞌ Isa bebalek ageꞌ ke Galelia. 44 Isa kedireꞌ udah madah, enteꞌ nabi nadai depanang danoꞌ direꞌ. 45 Pas Isa datai ke Galelia, kebala urang diyaꞌ nyamot Ya, nema sidaꞌ udah medaꞌ kebala utai te udah depulah Ya de Yerosalem pas ari besai Paskah.
Isa nyemoh anak pegawai pemrintah
(Mat. 8:5-13; Luk. 7:1-10)
46 Udah nyaꞌ Isa bebalek ageꞌ ke kuta Kana te de wilayah Galelia. De kuta Kana nyaꞌ Ya udah maleꞌ aiꞌ jadi aiꞌ angor. De kuta Kapernaom adai sikoꞌ pegawai pemrintah, anak ya tengan pedeh. 47 Pas ya ninga enteꞌ Isa nyau datai ari Yudia ke Galelia, ya angkat ngusong Isa abaꞌ mintaꞌ Isa datai ke Kapernaom nyemoh anak ya, nema anak ya nyau kaꞌ mati. 48 Uleh Isa madah ke pegawai nyaꞌ, “Enteꞌ kitaꞌ nadai medaꞌ tana te nyaroh ari Tuhan Allah, kitaꞌ nadai kaꞌ pecayaꞌ.”
49 Baroꞌ pegawai nyaꞌ madah ke Isa, “Pak, tulong datai ke Wan, sebedau anak ku mati.” 50 Isa madah ke ya, “Pulai ke meh, anak meh semoh!” Pegawai nyaꞌ pecayaꞌ ke apa te depadah Isa, abaꞌ ya pulai. 51 Pas ya ageꞌ de jalai, ya betemu abaꞌ kebala pemantoꞌ ya te datai ari rumah ya. Sidaꞌ madah brita enteꞌ anak ya nyau semoh.
52 Baroꞌ ya nanyaꞌ ke sidaꞌ, “Jam berapa ya semoh?” Sidaꞌ nyawot, “Tengah ari kemareꞌ, jam satu ya badoꞌ taben.”
53 Ninga piyaꞌ ingat mah ya, pas jam nyaꞌ mah Isa madah ke ya, “Anak meh semoh.” Baroꞌ ya abaꞌ ugaꞌ sidaꞌ sebilek pecayaꞌ ke Isa.
54 Nyaꞌ mah tana kedua te depulah Isa jalai Ya pulai ari Yudia ke Galelia.