Isa nyemoh urang pas ari Sabat de kulam Betesda
5
Udah nyaꞌ, sidaꞌ Yahudi ngeramai ari besai agama sidaꞌ, kebaꞌ nyaꞌ mah te ngasoh Isa angkat ke Yerosalem. 2 De Yerosalem semak pintu Gerbang Dumba, adai suteꞌ kulam te alam baasa Ibrani dasebot Betesda. De tisi kulam nyaꞌ adai limaꞌ ruai, 3 abaꞌ mayoh amat kebala urang te pedeh galeꞌ de kebala ruai nyaꞌ. Diyaꞌ adai kebala urang butaꞌ, kebala urang te timpang abaꞌ kebala urang te lumpoh. [Sidaꞌ nungoꞌ aiꞌ kulam nyaꞌ briyak. 4 Nema tauꞌ segena-gena adai mlikat Tuhan Allah turon ke kulam nyaꞌ abaꞌ ngriyak aiꞌ nyaꞌ. Pas aiꞌ nyaꞌ briyak, urang te paleng dulau tamaꞌ ke kulam nyaꞌ, nyaꞌ mah te semoh ari pemedeh te nacah ya.] 5 Diyaꞌ adai sikoꞌ urang laki te lumpoh slamaꞌ tiga puloh lapan taon. 6 Pas Isa medaꞌ urang laki nyaꞌ galeꞌ diyaꞌ, Ya tauꞌ badaꞌ enteꞌ urang laki nyaꞌ udah lamaꞌ pedeh. Kebaꞌ Isa nanyaꞌ ya, “Kaꞌ meh semoh?” 7 Sawot ya, “Pak, niseꞌ urang te nuron ku ke alam kulam enteꞌ aiꞌ briyak. Asa ku nyau kaꞌ turon ke kulam nyaꞌ, tang adai mah urang bukai te dulau turon ari ku.” 8 Baroꞌ Isa madah ke ya, “Diri ke meh, katong ke tikai abaꞌ bejalai.” 9 Seklen nyaꞌ mah gaꞌ urang laki nyaꞌ semoh. Baroꞌ ya ngatong tikai ya abaꞌ bejalai.Pas sari nyaꞌ ari Sabat. 10 Medaꞌ piyaꞌ kebala pemimpen sidaꞌ Yahudi madah ke urang te baroꞌ semoh nyaꞌ, “Sari toꞌ ari Sabat mali ngatong tikai.” 11 Uleh ya nyawot sidaꞌ, “Urang te udah nyemoh ku, Ya te nyuroh ku, ngatong tikai ku abaꞌ bejalai.” 12 Baroꞌ sidaꞌ nanyaꞌ ke ya, “Sapa bah ya nyaꞌ te nyuroh meh ngatong tikai abaꞌ bejalai?” 13 Uleh urang laki nyaꞌ nitauꞌ badaꞌ sapa te nyemoh ya, ya nadai tepedaꞌ ke Isa ageꞌ nema tekol urang banyau te diyaꞌ. 14 Udah nyaꞌ Isa betemu abaꞌ urang laki nyaꞌ de laman Rumah Kudos Tuhan Allah, baroꞌ Isa madah ke ya, “Ingat weh, meh udah semoh; nang mulah dusa ageꞌ, isaꞌ meh nadai ngasa utai te lebeh pedeh ageꞌ.” 15 Urang nyaꞌ kluar, baroꞌ ya nusoi ke kebala pemimpen sidaꞌ Yahudi, enteꞌ Isa mah te udah nyemoh ya. 16 Ninga piyaꞌ, kebala pemimpen sidaꞌ Yahudi blaboh nyusah Isa nema Isa nyemoh urang laki nyaꞌ de ari Sabat. 17 Uleh Isa madah ke sidaꞌ, “Apai Ku kreja sengabot datai ke entoꞌ, kebaꞌ Ku kreja gaꞌ.” 18 Ninga Ya madah piyaꞌ kebala pemimpen sidaꞌ Yahudi empala brusaha kaꞌ munoh Ya. Sidaꞌ mulah piyaꞌ, nadai proꞌ tegal Isa nadai patoh ke prator agama tentang ari Sabat. Uleh tegal Ya madah gaꞌ enteꞌ Tuhan Allah nyaꞌ Apai Ya; nema enteꞌ piyaꞌ breti Ya nyama direꞌ abaꞌ Tuhan Allah.
Isa empu kuasa sama upa Tuhan Allah
19 Kebaꞌ Isa nyawot kebala pemimpen sidaꞌ Yahudi, jakoꞌ Ya, “Ku kaꞌ madah ngau pengamat ke kitaꞌ, Ku toꞌ Anak Apai Ku abaꞌ Ku nitauꞌ ngreja kebala utai nunaꞌ kedekaꞌ Ku kedireꞌ uleh Ku mulah apa te tengan dakerja Apai. Ku mulah apa te Ku pedaꞌ ari Apai Ku. 20 Apai kaseh ke Anak abaꞌ Ya nunyok ke Ku, Anak Ya, kebala utai te Ya kreja kah. Piyaꞌ gaꞌ Ya kaꞌ nunyok kebala kreja Ya te lebeh besai ageꞌ ari kebala kreja nyaꞌ. Kebala utai nyaꞌ kaꞌ ngasoh kitaꞌ ampal. 21 Kebaꞌ sama upa Apai ngidop urang mati abaꞌ mreꞌ idop; piyaꞌ gaꞌ Anak mreꞌ idop ke urang te dakedekaꞌ Ya. 22 Apai nadai nyidang sapa-sapa, Ya udah nyerah ugaꞌ kuasa ke Ku Anak Ya, ngau nyidang urang, 23 isaꞌ ugaꞌ urang hormat ke Anak sama upa sidaꞌ hormat ke Apai. Sapa jaꞌ te nadai hormat ke Anak, ya nadai gaꞌ hormat ke Apai, te ngutos Ya.
24 Apa te Ku padah toꞌ kenaꞌ amat, enteꞌ urang ninga apa te Ku padah toꞌ abaꞌ pecayaꞌ ke Ya te ngutos Ku, ya tauꞌ jong idop abaꞌ Tuhan Allah sengabot abaꞌ nadai daukom. Nema ya udah lepas ari pemati abaꞌ buleh idop. 25 Apa te Ku padah toꞌ kenaꞌ amat, kaꞌ datai lah senta abaꞌ tunaꞌ des toꞌ nyau mah senta enteꞌ kebala urang te tengan mati rohani ninga goꞌ Anak Tuhan Allah, abaꞌ sidaꞌ te ninga nyaꞌ, sidaꞌ kaꞌ jong idop abaꞌ Tuhan Allah sengabot. 26 Upa Apai kedireꞌ pon pengidop, Ya te ngasoh Anak Ya jadi pon pengidop gaꞌ. 27 Apai gaꞌ udah mreꞌ kuasa ke Ku, Anak Ya, ngau nyidang ensia, nema Ku Ensia te datai ari Tuhan Allah. 28 Nang kitaꞌ ampal ninga kebala utai te kaꞌ Ku padah toꞌ, nema kaꞌ datai lah senta enteꞌ ugaꞌ urang te nyau mati ninga goꞌ Ku, 29 abaꞌ sidaꞌ idop ageꞌ. Jalai sidaꞌ ageꞌ idop de dunia toꞌ, adai sidaꞌ te mulah te bayek abaꞌ adai gaꞌ te mulah te jat. Sidaꞌ te mulah te bayek, kaꞌ jong idop abaꞌ Tuhan Allah sengabot; uleh sidaꞌ te mulah te jat kaꞌ daukom.
30 Ku nitauꞌ mulah kebala utai proꞌ ngau kuasa Ku kedireꞌ. Ku nyidang urang nunaꞌ apa te Ya padah ke Ku. Kebaꞌ apa te Ku putos kah adel nema Ku nadai nunaꞌ kedekaꞌ Ku kedireꞌ, uleh nunaꞌ kedekaꞌ Apai te ngutos ku. 31 Enteꞌ Ku proꞌ besaksi ke Ku kedireꞌ, te desaksi Ku nyaꞌ nadai tauꞌ dapecayaꞌ; 32 uleh adai te kebukai te besaksi tentang Ku, abaꞌ Ku tauꞌ badaꞌ enteꞌ apa te depadah Ya tentang Ku nyaꞌ kenaꞌ. 33 Kitaꞌ udah nyuroh dua tiga ikoꞌ urang ngusong Yohanes Pemaneꞌ abaꞌ ya udah besaksi te kenaꞌ; 34 uleh Ku nadai merlu saksi ari ensia, Ku kaꞌ ngingat ke kitaꞌ apa te udah desaksi Yohanes, isaꞌ kitaꞌ daslamat. 35 Yohanes nyaꞌ upa klita te idop abaꞌ bedawar, uleh stegal mah kitaꞌ gaga ngasa dawar nyaꞌ. 36 Uleh Ku adai bukti tentang direꞌ Ku te lebeh besai ari te desaksi Yohanes. Ugaꞌ utai te Ku kreja nyaꞌ datugas Apai ke Ku, ugaꞌ nyaꞌ bukti enteꞌ Apai te ngutos Ku. 37 Apai te ngutos Ku, abaꞌ Ya gaꞌ te besaksi tentang Ku. Kitaꞌ nadai kalaꞌ ninga goꞌ Ya, abaꞌ medaꞌ mua Ya, 38 abaꞌ Jakoꞌ Tuhan Allah nadai dasimpan de alam ati kitaꞌ, nema kitaꞌ nadai pecayaꞌ ke Ku te dautos Ya. 39 Kitaꞌ kedireꞌ gaga blajar Kitab Suci, nema piker kitaꞌ ngau cara mulah piyaꞌ kitaꞌ tauꞌ jong idop abaꞌ Tuhan Allah sengabot, amat mah Kitab Suci nyaꞌ besaksi tentang Ku, 40 uleh kitaꞌ ngai datai ngusong Ku isaꞌ kitaꞌ tauꞌ jong idop abaꞌ Tuhan Allah sengabot.
41 Ku nadai mintaꞌ puji ensia. 42 Uleh Ku nglala ati kitaꞌ, kitaꞌ nadai kaseh ke Tuhan Allah. 43 Ku datai ngau kuasa Apai Ku, amat piyaꞌ kitaꞌ nadai nrimaꞌ Ku. Uleh asa urang bukai datai ngau kuasa ya kedireꞌ, kitaꞌ kaꞌ nrimaꞌ ya. 44 Kati kitaꞌ tauꞌ pecayaꞌ ke ku enteꞌ kitaꞌ gaga dapuji urang, abaꞌ nadai kaꞌ brusaha dapuji Tuhan Allah te sikoꞌ-ikoꞌ nyaꞌ? 45 Nang kitaꞌ miker, enteꞌ Ku te kaꞌ nudoh kitaꞌ de mua Apai; nabi Musa te kitaꞌ agam mantoꞌ kitaꞌ nyaꞌ lah te kaꞌ nudoh kitaꞌ. 46 Nema enteꞌ kitaꞌ pecayaꞌ ke Musa, pesti mah kitaꞌ pecayaꞌ ke Ku, nema ya udah nules tentang Ku. 47 Uleh enteꞌ kitaꞌ nadai pecayaꞌ ke apa te datules ya, pesti kitaꞌ nadai pecayaꞌ ke apa te Ku padah!”