Isa nyemoh urang de kulam Betesda pas ari Sabat
5
Udah nyaꞌ, sidaꞌ Yahudi ngeramai ari besai agama sidaꞌ, kebaꞌ nyaꞌ mah te ngasoh Isa angkat ke Yerosalem. 2 De Yerosalem semak pintu Gerbang Dumba, adai sigeꞌ kulam te alam baasa Ibrani desebot Betesda. De tisi kulam nyaꞌ adai limaꞌ ruai, 3 abaꞌ mayoh amat kebala urang te pedeh galeꞌ de kebala ruai nyaꞌ. Diyaꞌ adai kebala urang te butaꞌ, kebala urang te timpang abaꞌ kebala urang te lumpoh. [Sidaꞌ nungoꞌ aiꞌ kulam nyaꞌ briyak. 4 Nema tauꞌ segena-gena adai mlikat Tuhan Allah turon ke kulam nyaꞌ abaꞌ ngriyak aiꞌ nyaꞌ. Pas aiꞌ nyaꞌ briyak, urang te paleng dulau tamaꞌ ke kulam nyaꞌ, nyaꞌ mah te semoh ari pemedeh te nacah ya.] 5 Diyaꞌ adai sikoꞌ urang laki te lumpoh selamaꞌ tiga puloh lapan taon. 6 Pas Isa medaꞌ ensia laki nyaꞌ galeꞌ diyaꞌ, Ya tauꞌ badaꞌ enteꞌ ensia laki nyaꞌ udah lamaꞌ pedeh. Kebaꞌ Isa nanyaꞌ ya, “Kaꞌ meh semoh?”7 Sawot ya, “Pak, niseꞌ urang te nuron ku ke alam kulam enteꞌ aiꞌ briyak. Asa ku nyau kaꞌ turon ke kulam nyaꞌ, tang adai mah urang bukai te dulau turon ari ku.”
8 Baroꞌ Isa madah ke ya, “Diri ke meh, katong ke tikai abaꞌ bejalai.” 9 Sekelen nyaꞌ mah gaꞌ ensia laki nyaꞌ semoh. Baroꞌ ya ngatong tikai ya abaꞌ bejalai.
Sari nyaꞌ ari Sabat. 10 Medaꞌ piyaꞌ kebala pemimpen sidaꞌ Yahudi madah ke ensia te baroꞌ semoh nyaꞌ, “Sari toꞌ ari Sabat mali ngatong tikai.”
11 Uleh ya nyawot sidaꞌ, “Urang te udah nyemoh ku, Ya te nyuroh ku, ngatong tikai ku abaꞌ bejalai.”
12 Baroꞌ sidaꞌ nanyaꞌ ya, “Sapa piyaꞌ urang te nyuroh meh ngatong tikai abaꞌ bejalai?”
13 Uleh ensia laki nyaꞌ nitauꞌ badaꞌ sapa te nyemoh ya, ya nadai tepedaꞌ ke Isa ageꞌ nema tekol urang banyau te diyaꞌ.
14 Udah nyaꞌ Isa betemu abaꞌ ensia laki nyaꞌ de laman Rumah Kudos Tuhan Allah, baroꞌ Isa madah ke ya, “Ingat weh, meh udah semoh; nang mulah dusa ageꞌ, isaꞌ meh nadai ngasa utai te lebeh pedeh ageꞌ.”
15 Ensia nyaꞌ keluar, baroꞌ ya nusoi ke kebala pemimpen sidaꞌ Yahudi, enteꞌ Isa mah te udah nyemoh ya. 16 Ninga piyaꞌ, kebala pemimpen sidaꞌ Yahudi belaboh nyusah Isa nema Isa nyemoh ensia laki nyaꞌ de ari Sabat.
17 Uleh Isa madah ke sidaꞌ, “Apai Ku kreja sengabot datai ke entoꞌ, kebaꞌ Ku kreja gaꞌ.”
18 Ninga Ya madah piyaꞌ kebala pemimpen sidaꞌ Yahudi empala berusaha kaꞌ munoh Ya. Sidaꞌ mulah piyaꞌ, nadai peroꞌ tegal Isa nadai patoh ke prator ari Sabat. Uleh tegal Ya madah enteꞌ Tuhan Allah nyaꞌ Apai Ya; nema enteꞌ piyaꞌ breti Ya nyama direꞌ abaꞌ Tuhan Allah.
Isa empu kuasa sama upa Tuhan Allah
19 Kebaꞌ Isa nyawot kebala pemimpen sidaꞌ Yahudi, jakoꞌ Ya, “Ku kaꞌ madah ngau pengamat ke kitaꞌ, Ku toꞌ Anak Apai Ku abaꞌ Ku nitauꞌ ngreja kebala utai nunaꞌ kedekaꞌ Ku kedireꞌ, uleh Ku mulah apa te tengan dekreja Apai. Ku mulah apa te Ku pedaꞌ ari Apai Ku. 20 Apai kaseh ke Anak abaꞌ Ya nunyok ke Ku, Anak Ya, kebala utai te Ya kreja kah. Piyaꞌ gaꞌ Ya kaꞌ nunyok kebala kreja Ya te lebeh besai ageꞌ ari kebala kreja nyaꞌ. Kebala utai nyaꞌ kaꞌ ngasoh kitaꞌ ampal. 21 Kebaꞌ sama upa Apai ngidop urang mati abaꞌ mereꞌ idop; piyaꞌ gaꞌ Anak mereꞌ idop ke urang te dekedekaꞌ Ya. 22 Apai nadai nyidang sapa-sapa, Ya udah nyerah ugaꞌ kuasa ke Ku Anak Ya, ngau nyidang urang, 23 isaꞌ ugaꞌ urang hormat ke Anak sama upa sidaꞌ hormat ke Apai. Sapa jaꞌ te nadai hormat ke Anak, ya nadai gaꞌ hormat ke Apai, te ngutos Ya.
24 Apa te Ku padah toꞌ kenaꞌ amat, enteꞌ urang ninga apa te Ku padah toꞌ abaꞌ pecayaꞌ ke Ya te ngutos Ku, ya tauꞌ jong idop abaꞌ Tuhan Allah sengabot abaꞌ nadai deukom. Nema ya udah lepas ari pemati abaꞌ buleh idop. 25 Apa te Ku padah toꞌ kenaꞌ amat, kaꞌ datai lah senta abaꞌ tunaꞌ des toꞌ nyau mah senta enteꞌ kebala urang te tengan mati rohani ninga goꞌ Anak Tuhan Allah, abaꞌ sidaꞌ te ninga nyaꞌ kaꞌ idop abaꞌ Tuhan Allah sengabot. 26 Upa Apai kedireꞌ pon pengidop, Ya te ngasoh Anak Ya jadi pon pengidop gaꞌ. 27 Apai udah mereꞌ kuasa ke Ku, Anak Ya, ngau nyidang ensia, nema Ku Anak Ensia. 28 Nang kitaꞌ ampal ninga kebala utai te kaꞌ Ku padah toꞌ, nema kaꞌ datai lah senta enteꞌ ugaꞌ urang te nyau mati ninga goꞌ Ku, 29 abaꞌ sidaꞌ idop ageꞌ. Jalai sidaꞌ ageꞌ idop de dunia toꞌ, adai sidaꞌ te mulah te bayek abaꞌ adai gaꞌ te mulah te jat. Sidaꞌ te mulah te bayek, kaꞌ jong idop abaꞌ Tuhan Allah sengabot; uleh sidaꞌ te mulah te jat kaꞌ deukom.
30 Ku nitauꞌ mulah kebala utai peroꞌ ngau kuasa Ku kedireꞌ. Ku nyidang urang nunaꞌ apa te Ya padah ke Ku. Kebaꞌ apa te Ku putos ke adel nema Ku nadai nunaꞌ kedekaꞌ Ku kedireꞌ, uleh nunaꞌ kedekaꞌ Apai te ngutos ku.
31 Enteꞌ Ku peroꞌ besaksi ke Ku kedireꞌ, te desaksi Ku nyaꞌ nadai tauꞌ depecayaꞌ; 32 uleh adai te kebukai te besaksi ke Ku, abaꞌ Ku tauꞌ badaꞌ enteꞌ apa te desaksi Ya ke Ku nyaꞌ kenaꞌ. 33 Kitaꞌ udah nyuroh dua tiga ikoꞌ urang ngusong Yohanes Pemaneꞌ abaꞌ ya udah besaksi te kenaꞌ; 34 uleh Ku nadai perlu saksi ari ensia, Ku kaꞌ ngingat ke kitaꞌ apa te udah desaksi Yohanes, isaꞌ kitaꞌ deselamat. 35 Yohanes nyaꞌ upa kelita te idop abaꞌ bedawar, uleh stegal mah kitaꞌ gaga medaꞌ dawar nyaꞌ. 36 Uleh te desaksi Ku lebeh besai ari te desaksi Yohanes. Ugaꞌ utai te Ku kreja nyaꞌ, apa te de tugas Apai ke Ku, ugaꞌ nyaꞌ bukti enteꞌ Apai te ngutos Ku. 37 Apai te ngutos Ku, abaꞌ Ya gaꞌ te besaksi ke Ku. Kitaꞌ nadai kalaꞌ ninga goꞌ Ya, abaꞌ medaꞌ mua Ya, 38 abaꞌ Jakoꞌ Tuhan Allah nadai detaroh alam ati kitaꞌ, nema kitaꞌ nadai pecayaꞌ ke Ku te deutos Ya. 39 Kitaꞌ kedireꞌ gaga belajar Kitab Suci, nema piker kitaꞌ ngau cara nyaꞌ kitaꞌ tauꞌ jong idop abaꞌ Tuhan Allah sengabot, amat mah Kitab Suci nyaꞌ besaksi ke Ku, 40 uleh kitaꞌ ngai datai ngusong Ku isaꞌ kitaꞌ tauꞌ jong idop abaꞌ Tuhan Allah sengabot.
41 Ku nadai mintaꞌ puji ensia. 42 Uleh Ku ngelala ati kitaꞌ, kitaꞌ nadai kaseh ke Tuhan Allah. 43 Ku datai ngau kuasa Apai Ku, amat piyaꞌ kitaꞌ nadai nerimaꞌ Ku. Uleh asa urang bukai datai ngau kuasa ya kedireꞌ, kitaꞌ kaꞌ nerimaꞌ ya. 44 Kati kitaꞌ tauꞌ pecayaꞌ ke ku enteꞌ kitaꞌ gaga depuji urang, abaꞌ nadai kaꞌ berusaha depuji Tuhan Allah te sikoꞌ-ikoꞌ nyaꞌ? 45 Nang kitaꞌ miker, enteꞌ Ku te kaꞌ nudoh kitaꞌ de mua Apai; nabi Musa te kitaꞌ agam ke mantoꞌ kitaꞌ nyaꞌ lah te kaꞌ nudoh kitaꞌ. 46 Nema enteꞌ kitaꞌ pecayaꞌ ke Musa, pesti mah kitaꞌ pecayaꞌ ke Ku, nema ya udah nules kati Ku. 47 Uleh enteꞌ kitaꞌ nadai pecayaꞌ ke apa te detules ya, pesti kitaꞌ nadai pecayaꞌ ke apa te Ku padah!”