Limaꞌ ribu urang dabreꞌ Isa makai
(Mat. 14:13-21; Mrk. 6:32-44; Luk. 9:10-17)
6
Ari bukai, Isa abaꞌ kebala muret Ya angkat ke sebrang danau besai Galelia, te dasebot gaꞌ Danau Teberias. 2 Adai mayoh rumong urang te nrudi Ya, nema sidaꞌ medaꞌ kebala tana te dapulah Ya ke kebala urang te pedeh. 3 Baroꞌ Isa nikeꞌ ke buket abaꞌ dudok diyaꞌ abaꞌ kebala muret Ya. 4 (Paskah ari besai sidaꞌ Yahudi nyau semak.) 5 Pas Isa nilek semak Ya abaꞌ medaꞌ mayoh rumong urang datai ngusong Ya, Ya nanyaꞌ Plipos, “Dini kita tauꞌ meli ruti, isaꞌ ugaꞌ sidaꞌ nyaꞌ tauꞌ makai?” 6 (Ya madah piyaꞌ ngau nguji Plipos, nema Isa tauꞌ badaꞌ apa te kaꞌ dapulah Ya.) 7 Plipos nyawot Ya, “Ruti te brega dua ratos duet dinara nadai ngenani bayah ngau ugaꞌ sidaꞌ toꞌ, amat mah sama mimet.” 8 Baroꞌ adai sikoꞌ muret Isa te kebukai te nama Andrias, menyadeꞌ Simon Petros, madah ke Isa, 9 “Ditoꞌ adai sikoꞌ miyak laki, te adai limaꞌ rutib abaꞌ dua ikoꞌ ikan; uleh pracuma mah nadai ngenani mah bayah ngau urang te pemayoh toꞌ.” 10 Baroꞌ Isa madah ke kebala muret Ya, “Suroh kah kebala urang nyaꞌ dudok.” De teban nyaꞌ mayoh rumpot. Urang laki te dudok diyaꞌ kurang lebeh limaꞌ ribu. 11 Baroꞌ Isa ngameꞌ ruti nyaꞌ, ngucap sukor ke Tuhan Allah. Udah nyaꞌ Ya nyuroh kebala muret Ya magi ke urang banyau. Upa piyaꞌ gaꞌ te dapulah Ya ke ikan abaꞌ sidaꞌ diyaꞌ makai sampai puas. 12 Udah sidaꞌ kenyang, Ya madah ke kebala muret Ya, “Kumpol kah plebeh pemakai, isaꞌ niseꞌ te debuai.” 13 Sidaꞌ ngumpol plebeh ari limaꞌ ruti te depakai urang banyau, adai dua blas ragaꞌ penoh. 14 Pas kebala urang banyau medaꞌ tana te luar biasa te dapulah Isa, sidaꞌ madah, “Ya toꞌ bamat-amat Nabi te kaꞌ datai ke dunia toꞌ.”15 Isa tauꞌ badaꞌ enteꞌ sidaꞌ kaꞌ mukong Ya ngau raja sidaꞌ, kebaꞌ Ya angkat ngerari direꞌ ke buket.
Isa bejalai de atau aiꞌ
(Mat. 14:22-33; Mrk. 6:45-52)
16 Pas ari nyau kaꞌ malam, kebala muret Isa angkat ke danau, sidaꞌ nikeꞌ prau 17 abaꞌ nyemerang ke kuta Kapernaom. Pas ari nyau petang, Isa bedau gaꞌ datai ke sidaꞌ, 18 tengan nyaꞌ gelumang aiꞌ de danau ma amat nema tacah kudeꞌ te lampar betat. 19 Udah sidaꞌ bekayoh kurang lebeh limaꞌ kilomiter ari tebeng, sidaꞌ medaꞌ Isa bejalai de atau aiꞌ nyemak prau sidaꞌ. Kebaꞌ sidaꞌ ma mah takot. 20 Uleh Ya madah ke sidaꞌ, “Toꞌ Ku, nang takot!”
21 Pas Ya madah piyaꞌ, lampar pengaga sidaꞌ nalau Ya nikeꞌ ke alam prau, abaꞌ tengan nyaꞌ gaꞌ prau sidaꞌ datai ke tebeng te sidaꞌ gusong.
Urang banyau ngigaꞌ Isa
22 Ari suteꞌ, kebala urang banyau te ageꞌ dudi de sebrang, ingat enteꞌ proꞌ sigeꞌ mah prau te adai diyaꞌ. Sidaꞌ tauꞌ badaꞌ kebala muret Isa angkat ngau prau nyaꞌ abaꞌ sidaꞌ tauꞌ badaꞌ Isa nadai abaꞌ sidaꞌ. 23 Baroꞌ tengan nyaꞌ adai kebala prau datai ari Teberias. Kebala prau nyaꞌ, singah nyemak teban te jalai urang banyau makai ruti udah Isa ngucap sukor ke Tuhan Allah. 24 Pas urang banyau medaꞌ Isa abaꞌ kebala muret Ya niseꞌ diyaꞌ, sidaꞌ nikeꞌ ke kebala prau bekayoh ke kuta Kapernaom ngigaꞌ Isa.
Isa mah ruti te ngasoh ensia idop
25 Pas kebala urang banyau nemu Isa de seberang danau nyaꞌ, sidaꞌ nanyaꞌ Ya, “Guru, bila Wan datai kitoꞌ teh?” 26 Isa nyawot sidaꞌ, “Ku kaꞌ madah ngau pengamat ke kitaꞌ, kitaꞌ ngigaꞌ Ku nadai tegal kitaꞌ udah medaꞌ kebala tana, uleh nema kitaꞌ udah makai ruti sampai kenyang. 27 Nang kreja ngau utai te depakai te tauꞌ punas, uleh kreja ke ngau utai te depakai te nyuroh kitaꞌ tauꞌ jong idop abaꞌ Tuhan Allah sengabot. Ensia te datai ari Tuhan Allah kaꞌ mreꞌ pemakai nyaꞌ ke kitaꞌ; nema Ya te udah desah Tuhan Allah Apai, ngau mreꞌ pemakai nyaꞌ.” 28 Baroꞌ sidaꞌ nanyaꞌ ke Ya, “Apa te alah kami pulah, isaꞌ kami ngreja kebala kreja te dakedekaꞌ Tuhan Allah?” 29 Isa nyawot sidaꞌ, “Kreja te dakedekaꞌ Tuhan Allah ari kitaꞌ, isaꞌ kitaꞌ pecayaꞌ ke Ku te udah dautos Tuhan Allah ke dunia toꞌ.”
30 Sidaꞌ nyawot Ya, “Asa piyaꞌ apa tana te kaꞌ Wan pulah, isaꞌ kami tauꞌ medaꞌ abaꞌ pecayaꞌ ke Wan? Apa te kaꞌ Wan pulah? 31 Puyang jagang kami udah makai ruti ‘manna’ slamaꞌ sidaꞌ de tanah luah te baengkerangan, upa te datules de alam Kitab Suci, ‘Ya nuron ruti ari sruga isaꞌ sidaꞌ makai.’ ”c
32 Baroꞌ Isa madah ke sidaꞌ, “Ku kaꞌ madah ngau pengamat ke kitaꞌ, ukai Musa te mreꞌ kitaꞌ ruti ari sruga, uleh Apai Ku. Entoꞌ Apai Ku kaꞌ mreꞌ ruti te pengamat ari sruga ke kitaꞌ. 33 Nema ruti ari Tuhan Allah nyaꞌ mah ruti te turon ari sruga, abaꞌ te mreꞌ idop ke urang te de dunia toꞌ.” 34 Baroꞌ sidaꞌ nyawot Ya, “Pak, breꞌ sengabot kah kami ruti nyaꞌ.” 35 Jakoꞌ Isa nyawot sidaꞌ, “Ku mah ruti te ngasoh ensia idop; ngenap urang te datai ngusong Ku nadai kaꞌ lapar ageꞌ, abaꞌ ngenap urang te pecayaꞌ ke Ku nadai kaꞌ awos ageꞌ. 36 Uleh Ku udah madah ke kitaꞌ, amat mah kitaꞌ udah medaꞌ Ku, kitaꞌ nadai pecayaꞌ. 37 Ugaꞌ urang te udah dabreꞌ Apai ke Ku pesti kaꞌ datai ke Ku, abaꞌ Ku nadai nulak sidaꞌ. 38 Ku turon ari sruga nadai mulah kedekaꞌ Ku, uleh mulah kedekaꞌ Ya te udah ngutos Ku. 39 Abaꞌ toꞌ mah te dakedekaꞌ Ya te udah ngutos Ku, isaꞌ ugaꞌ te udah dabreꞌ Ya ke Ku niseꞌ te lenyau, isaꞌ Ku ngidop sidaꞌ ageꞌ de pemadoꞌ dunia toꞌ. 40 Abaꞌ toꞌ mah te dakedekaꞌ Apai Ku, isaꞌ ngenap urang te medaꞌ Anak abaꞌ pecayaꞌ ke Ya, tauꞌ jong idop abaꞌ Tuhan Allah sengabot, abaꞌ isaꞌ Ku ngidop sidaꞌ ageꞌ de pemadoꞌ dunia toꞌ.”
41 Baroꞌ kebala pemimpen sidaꞌ Yahudi blaboh merunya ke Isa, nema Ya madah direꞌ, “Ku mah ruti te udah turon ari sruga.” 42 Jakoꞌ sidaꞌ, “Nadai piyaꞌ Ya toꞌ Isa, anak Yusop, te apai inai Ya kita klala? Ngapa Ya madah direꞌ udah turon ari sruga?” 43 Sawot Isa ke sidaꞌ, “Nang kitaꞌ temoꞌ merunya.
44 Datai ke sikoꞌ mah niseꞌ te tauꞌ datai ke Ku enteꞌ nadai debaiꞌ Apai te ngutos Ku, abaꞌ Ku kaꞌ ngidop sidaꞌ ageꞌ de pemadoꞌ dunia toꞌ. 45 Adai datules alam kitab nabi, ‘Ugaꞌ urang deajar uleh Tuhan Allah.’d Ugaꞌ urang te udah ninga abaꞌ nrimaꞌ pengajar Apai, datai ke Ku. 46 Nyaꞌ nadai breti adai urang te udah medaꞌ Apai, proꞌ Ya te datai ari Apai mah te udah medaꞌ Ya. 47 Ku kaꞌ madah ngau pengamat ke kitaꞌ, urang te pecayaꞌ ke Ku, ya tauꞌ jong idop abaꞌ Tuhan Allah sengabot.
48 Ku mah ruti te ngasoh ensia idop. 49 Puyang jagang kitaꞌ udah makai ruti ‘manna’ de tanah luah te baengkerangan abaꞌ sidaꞌ nyau mati. 50 Uleh ruti te pengamat te turon ari sruga, entoꞌ adai ditoꞌ. Ngenap urang te makai ruti toꞌ, ya nadai ngamoꞌ mati. 51 Ku mah ruti te ngasoh ensia idop te udah datai ari sruga. Enteꞌ urang makai ruti toꞌ, ya tauꞌ jong idop abaꞌ Tuhan Allah sengabot. Abaꞌ iseꞌ Ku toꞌ mah ruti te Ku breꞌ kah, isaꞌ kebala urang de dunia toꞌ tauꞌ jong idop abaꞌ Tuhan Allah sengabot.”
52 Ninga nyaꞌ, kebala sidaꞌ Yahudi betengek abaꞌ sama direꞌ abaꞌ madah, “Kati urang toꞌ tauꞌ mreꞌ iseꞌ Ya depakai kita?” 53 Kebaꞌ sawot Isa ke sidaꞌ, “Ku kaꞌ madah ngau pengamat ke kitaꞌ, enteꞌ kitaꞌ nadai makai iseꞌ Ensia te datai ari Tuhan Allah abaꞌ nginom darah Ya, kitaꞌ nitauꞌ jong idop abaꞌ Tuhan Allah sengabot. 54 Urang te makai iseꞌ Ku abaꞌ nginom darah Ku, ya tauꞌ jong idop abaꞌ Tuhan Allah sengabot abaꞌ Ku kaꞌ ngidop ya ageꞌ de pemadoꞌ dunia toꞌ. 55 Nema iseꞌ Ku toꞌ pemakai te pengamat abaꞌ darah Ku toꞌ aiꞌ inom te pengamat. 56 Ngenap urang te makai iseꞌ Ku abaꞌ nginom darah Ku, urang nyaꞌ suteꞌ abaꞌ Ku, abaꞌ Ku suteꞌ abaꞌ urang nyaꞌ. 57 Apai te idop ngutos Ku abaꞌ Ku idop uleh Apai, piyaꞌ gaꞌ urang te makai iseꞌ Ku abaꞌ nginom darah Ku, urang nyaꞌ kaꞌ idop uleh Ku. 58 Ku ruti te pengamat te turon ari sruga, nadai upa ruti ‘manna’ te depakai uleh puyang jagang kitaꞌ. Nema sidaꞌ te makai ruti ‘manna’ nyaꞌ, sidaꞌ tetap mati gaꞌ upa ensia bukai. Uleh ngenap urang te makai ruti toꞌ tauꞌ jong idop abaꞌ Tuhan Allah sengabot.”
59 Ugaꞌ toꞌ depadah Isa de Kapernaom pas Ya ngajar de rumah te jalai sidaꞌ Yahudi nyemah Tuhan Allah.
Mayoh urang te gah nrudi Isa badoꞌ nrudi Ya
60 Udah ninga te deajar Isa, mayoh daentara kebala urang te gah nrudi Ya madah, “Pengajar toꞌ pedeh datrimaꞌ, adai naꞌ mah urang te tauꞌ nrimaꞌ?” 61 Isa tauꞌ badaꞌ sidaꞌ tengan merunya alam ati tegal pengajar Ya nyaꞌ, kebaꞌ Ya madah ke sidaꞌ, “Kitaꞌ tesingong piyaꞌ ninga pengajar Ku nyaꞌ? 62 Enteꞌ piyaꞌ, pesti kitaꞌ ngai medaꞌ Ensia te datai ari Tuhan Allah bebalek ageꞌ ke sruga teban asal Ya! 63 Roh Kudos mah te mreꞌ idop, uleh kuasa ensia sama skaleꞌ nadai beguna. Kebala pengajar te Ku padah ke kitaꞌ, nyaꞌ datai ari Roh Kudos abaꞌ nyaꞌ te ngasoh kitaꞌ idop. 64 Uleh daentara kitaꞌ adai te nadai pecayaꞌ.” (Isa madah piyaꞌ nema Ya tauꞌ badaꞌ ari semaru sapa te nadai pecayaꞌ abaꞌ sapa te kaꞌ nyual Ya ke kebala urang te areh ke Ya.) 65 Baroꞌ Ya madah, “Nyaꞌ mah te nyuroh Ku udah madah ke kitaꞌ, enteꞌ Apai nadai nyadi urang datai ke Ku, datai ke sikoꞌ mah niseꞌ urang te tauꞌ datai ke Ku.”
66 Blaboh ari nyaꞌ mayoh urang te gah abaꞌ Isa, badoꞌ nrudi Ya.
Simon Petros madah Isa te suci te datai ari Tuhan Allah
67 Baroꞌ Isa nanyaꞌ kedua blas muret Ya, “Kati kitaꞌ, kaꞌ nudi Ku gaꞌ?” 68 Sawot Simon Petros, “Pak, kami nadai kaꞌ nudi Wan, nema kebala pengajar Wan nyaꞌ ngasoh kami tauꞌ jong idop abaꞌ Tuhan Allah sengabot; 69 abaꞌ kami udah pecayaꞌ abaꞌ tauꞌ badaꞌ, enteꞌ Wan mah te Suci te datai ari Tuhan Allah.” 70 Isa madah ke sidaꞌ, “Ku kedireꞌ mah te udah mileh kitaꞌ te dua blas toꞌ. Uleh sikoꞌ daentara kitaꞌ nyaꞌ Ibles Kepalaꞌ bala sitan.” 71 Te jakoꞌ Isa nyaꞌ Yudas, anak Simon Iskariot salah sikoꞌ ari dua blas muret Isa; ya mah te kaꞌ nyual Isa.