Isa abaꞌ kebala menyadeꞌ Ya
7
Udah nyaꞌ Isa bejalai ngelileng wilayah Galelia, Ya ngai ke wilayah Yudia, nema kebala pemimpen sidaꞌ Yahudi den kaꞌ munoh Ya. 2 Pas tengan nyaꞌ, nyau kaꞌ semak ari besai sidaꞌ Yahudi, te dasebot ari besai Langkau Daon.ab 3 Kebala menyadeꞌ Isa te laki madah ke Ya, “Angkat ke Meh ke Yudia, isaꞌ kebala muret Meh medaꞌ kebala tana te nyaroh ari Tuhan Allah te Meh pulah. 4 Nema enteꞌ Meh kaꞌ deklala urang, niseꞌ guna napok kebala utai te Meh pulah. Pulah ke kebala utai nyaꞌ, isaꞌ kebala urang tauꞌ badaꞌ sapa Meh.” 5 Kebala menyadeꞌ Isa madah piyaꞌ nema sidaꞌ nadai pecayaꞌ ke Ya. 6 Kebaꞌ Isa nyawot sidaꞌ, “Entoꞌ, bedau naꞌ senta Ku, uleh kitaꞌ tauꞌ angkat kmaya kitaꞌ kaꞌ. 7 Kebala urang Dunia nadai areh ke kitaꞌ, uleh areh ke Ku, nema Ku madah kebala te dapulah sidaꞌ nyaꞌ jat. 8 Angkat mah kitaꞌ ke teban te jalai urang ngeramai ari besai nyaꞌ. Ku ngai kiyaꞌ, nema bedau naꞌ senta Ku kiyaꞌ.” 9 Udah Isa madah piyaꞌ ke kebala menyadeꞌ Ya, Ya nadai angkat ari Galelia.10 Uleh nyau kebala menyadeꞌ Isa angkat ke teban te jalai urang ngeramai ari besai nyaꞌ, diyau-diyau Ya angkat kedireꞌ kiyaꞌ isaꞌ nadai daketauꞌ urang. 11 Kebala pemimpen sidaꞌ Yahudi ngigaꞌ Isa de teban te ramai nyaꞌ abaꞌ madah, “Dini weh Ya?” 12 Mayoh urang diyaꞌ blaboh begisek tentang Isa. Adai te madah, “Ya urang bayek.” Adai gaꞌ te madah, “Nadai, Ya nesat urang mayoh.” 13 Uleh datai ke sikoꞌ mah niseꞌ urang te brani becakap sareng tentang Ya, nema sidaꞌ takot ke kebala pemimpen.
Isa ngajar de Yerosalem
14 Tengan sidaꞌ ngeramai ari besai nyaꞌ, Isa tamaꞌ ke Rumah Kudos Tuhan Allah abaꞌ ngajar diyaꞌ. 15 Kebaꞌ kebala pemimpen sidaꞌ Yahudi ampal abaꞌ madah, “Kati urang toꞌ tauꞌ panai piyaꞌ weh, bataꞌ Ya nadai kalaꞌ belajar!” 16 Isa nyawot sidaꞌ, “Apa te Ku ajar kah toꞌ nadai ari Ku kedireꞌ, uleh ari Ya te ngutos Ku. 17 Urang te bamat-amat mulah kedekaꞌ Tuhan Allah, kaꞌ tauꞌ badaꞌ pengajar Ku toꞌ ari Tuhan Allah abaꞌ nadai ari Ku kedireꞌ. 18 Urang te ngajar nunaꞌ pemiker direꞌ, urang nyaꞌ mintaꞌ puji urang, uleh te Ku ajar nyuroh urang muji Ya te ngutos Ku, nyaꞌ mah kelaiꞌ enteꞌ Ku toꞌ kenaꞌ abaꞌ kitaꞌ tauꞌ mah pecayaꞌ ke apa te Ku ajar kah. 19 Piyaꞌ ni Musa, te udah mreꞌ kebala Prator Tuhan Allah ke kitaꞌ? Uleh datai ke sikoꞌ mah niseꞌ kitaꞌ te nunaꞌ perintah nyaꞌ. Enteꞌ kitaꞌ nunaꞌ perintah nyaꞌ, ngapa kitaꞌ kaꞌ brusaha munoh Ku?” 20 Baroꞌ urang banyau nyaꞌ nyawot Ya, “Wan toꞌ desarong sitan; niseꞌ urang te kaꞌ brusaha munoh Wan.” 21 Isa madah ke sidaꞌ, “Proꞌ suteꞌ tana te nyaroh ari Tuhan Allah te Ku pulah ke de ari Sabat, abaꞌ kitaꞌ ampal. 22 Musa mreꞌ prator isaꞌ kitaꞌ desunat abaꞌ kitaꞌ nyunat urang de ari Sabat! (Tunaꞌ sunat nyaꞌ nadai datai ari Musa, uleh ari puyang jagang kita.) 23 Enteꞌ kitaꞌ tauꞌ nyunat urang de ari Sabat, isaꞌ kitaꞌ nadai ngelangar Prator Tuhan Allah te datules Musa, ngapa kitaꞌ nganoꞌ Ku nyemoh ugaꞌ tuboh sikoꞌ urang de ari Sabat? 24 Nang nyalah urang nunaꞌ apa te pedaꞌ, uleh enteꞌ kitaꞌ nyalah urang alah adel.”
Kebala urang nanyaꞌ amat naꞌ mah Isa nyaꞌ Al Maseh?
25 Udah nyaꞌ dua tiga ikoꞌ sidaꞌ Yerosalem madah, “Nadai naꞌ Ya toꞌ te kaꞌ sidaꞌ bunoh? 26 Abaꞌ pedaꞌ kitaꞌ, Ya ngajar ngau bibas de mua urang banyau abaꞌ sidaꞌ niseꞌ madah utai ke Ya. Nang-nang kebala pemimpen kita nyau bamat-amat tauꞌ badaꞌ, enteꞌ Ya Al Maseh? 27 Kita udah tauꞌ badaꞌ ari ni asal urang toꞌ, uleh pas Al Maseh datai, niseꞌ urang te tauꞌ badaꞌ ari ni asal Ya.”
28 Pas Isa ngajar de laman Rumah Kudos Tuhan Allah, Ya madah, “Amat mah kitaꞌ nglala Ku abaꞌ kitaꞌ tauꞌ badaꞌ ari ni asal Ku; uleh Ku datai nadai tegal kedekaꞌ Ku kedireꞌ, uleh Ku dautos Ya te kenaꞌ te nadai kitaꞌ klala. 29 Uleh Ku nglala Ya, nema Ku datai ari Ya abaꞌ Ya mah te ngutos Ku.”
30 Sidaꞌ brusaha nangkap Isa, uleh niseꞌ te negoꞌ Ya, nema senta Ya bedau temoꞌ.
31 Uleh daentara urang banyau nyaꞌ adai mayoh urang te pecayaꞌ enteꞌ Isa nyaꞌ Al Maseh. Sidaꞌ madah, “Ya toꞌ mah Al Maseh nema Ya udah mulah tana te nyaroh.” 32 Kebala urang ari klumpok Parisi ninga apa te de cakap kebala urang banyau tentang Isa, kebaꞌ nyaꞌ sidaꞌ abaꞌ kebala kepalaꞌ imam nyuroh kebala penyaga Rumah Kudos Tuhan Allah nangkap Ya. 33 Kebaꞌ jakoꞌ Ya, “Ageꞌ stegal mah Ku abaꞌ kitaꞌ, udah nyaꞌ Ku kaꞌ pulai ngusong Ya te udah ngutos Ku. 34 Kitaꞌ kaꞌ ngigaꞌ Ku, uleh kitaꞌ nadai tauꞌ nemu Ku, nema kitaꞌ nitauꞌ datai ke teban te jalai Ku.” 35 Kebala pemimpen sidaꞌ Yahudi becakap abaꞌ sama direꞌ, “Kikai naꞌ mah Ya kaꞌ angkat, te ngasoh kita nitauꞌ betemu abaꞌ Ya? Nadai naꞌ Ya kaꞌ angkat ngusong kebala urang kita te merantau de Yunani, abaꞌ ngajar sidaꞌ Yunani? 36 Apa bah maksot te depadah Ya toꞌ, ‘Kitaꞌ kaꞌ ngigaꞌ Ku,’ abaꞌ, ‘Kitaꞌ nitauꞌ datai ke teban te jalai Ku?’ ”
Aiꞌ te ngasoh idop
37 Pemadoꞌ ari besai, nyaꞌ mah ari te ma penteng, Isa diri abaꞌ madah ngau goꞌ te sareng ke urang banyau te de Rumah Kudos Tuhan Allah nyaꞌ, “Urang te awos, datai jaꞌ ke Ku abaꞌ nginom! 38 Upa te datules alam Kitab Suci, urang te pecayaꞌ ke Ku, ‘ari alam ati ya branyot sengabot aiꞌ te ngasoh idop.’ ”c 39 Te Isa maksot ke nyaꞌ Roh Kudos te kaꞌ datrimaꞌ ngenap urang te pecayaꞌ ke Ya; tengan nyaꞌ Roh Kudos bedau naꞌ datai, nema Isa bedau dajunyong tingeꞌ de sruga.
40 Mayoh urang ninga apa te depadah Isa, abaꞌ daentara sidaꞌ adai te madah, “Urang nyaꞌ pesti nabi te kita entang.” 41 Adai gaꞌ te madah, “Ya nyaꞌ Al Maseh.” Uleh adai gaꞌ te madah, “Nadai, Al Maseh nadai datai ari Galelia! 42 Nema alam Kitab Suci datules, enteꞌ Al Maseh toꞌ pureh raja Daot abaꞌ ari kuta Betlehem, kuta te jalai raja Daot diyau.” 43 Kepanyai kebala urang banyau diyaꞌ blaboh betengek abaꞌ sama direꞌ tentang Isa. 44 Adai sidaꞌ te kaꞌ nangkap Isa, uleh niseꞌ te brani negoꞌ Ya.
Kebala pemimpen Yahudi ngai pecayaꞌ
45 Udah nyaꞌ kebala penyaga Rumah Kudos Tuhan Allah angkat ngusong kebala kepalaꞌ imam abaꞌ urang ari klumpok Parisi. Pas sidaꞌ datai kiyaꞌ, kebala kepalaꞌ imam abaꞌ urang Parisi nanyaꞌ, “Ngapa kitaꞌ nadai ngemaiꞌ Ya?” 46 Sawot sidaꞌ, “Bedau kalaꞌ adai urang te ngajar upa Ya!” 47 Baroꞌ kebala urang Parisi madah, “Nadai kitaꞌ udah datesat Ya gaꞌ? 48 Gah nadai kitaꞌ ninga pemimpen kita abaꞌ urang Parisi te pecayaꞌ ke Ya? 49 Uleh urang banyau te pecayaꞌ ke Isa nitauꞌ badaꞌ Prator Tuhan Allah te datules Musa, sidaꞌ dakutok Tuhan Allah!”d
50 Diyaꞌ adai gaꞌ Nikudimos salah sikoꞌ urang ari klumpok Parisi. Meliyaꞌ teh ya datai malam ngusong Isa. Ya nanyaꞌ ke urang Parisi te ke bukai: 51 “Enteꞌ nunaꞌ Prator Musa, tauꞌ nadai kita ngukom urang, sebedau ninga ya becakap abaꞌ mresa apa te dah dapulah ya?” 52 Sawot sidaꞌ, “Wan urang Galelia weh? Presa kah Kitab Suci abaꞌ wan tauꞌ badaꞌ enteꞌ niseꞌ nabi te ari Galelia.”
Urang inoꞌ te detangkap basah besinah