8
Uleh Isa angkat ke buket Saiton.2 Lam-lam ari suteꞌ, Ya angkat ke Rumah Kudos Tuhan Allah, abaꞌ urang banyau datai ngusong Ya. Diyaꞌ Ya dudok abaꞌ ngajar sidaꞌ. 3 Baroꞌ kebala urang te ahli de alam Prator Tuhan Allah te datules Musa abaꞌ kebala urang ari klumpok Parisi datai ngemaiꞌ sikoꞌ inoꞌ ke Isa. Inoꞌ nyaꞌ te tangkap basah besinah. Sidaꞌ mukong inoꞌ nyaꞌ diri de mua urang, 4 baroꞌ madah ke Isa, “Guru, urang inoꞌ toꞌ tetangkap basah besinah. 5 Enteꞌ nunaꞌ Prator Musa, urang te upa toꞌ alah datikam ngau batu sampai mati.a Uleh kati enteꞌ menurot pemiker Wan?” 6 Sidaꞌ nanyaꞌ piyaꞌ nema sidaꞌ kaꞌ encuba Ya, isaꞌ sidaꞌ tauꞌ nyalah Ya. Uleh Isa proꞌ nensam abaꞌ nules ngau jari Ya de tanah. 7 Tengan kebala pemimpen mukong Ya nyawot, Isa ngangkat palaꞌ abaꞌ madah ke sidaꞌ, “Sapa daentara kitaꞌ te ngasa direꞌ nadai kalaꞌ mulah dusa, nyaꞌ mah te dulau nikam inoꞌ toꞌ ngau batu.” 8 Udah nyaꞌ Isa nensam ageꞌ abaꞌ nules de tanah. 9 Udah sidaꞌ ninga Isa madah piyaꞌ, sidaꞌ angkat sikoꞌ-sikoꞌ blaboh ari tetuwai. Tingal Isa abaꞌ inoꞌ nyaꞌ kedireꞌ mah te ageꞌ diyaꞌ. 10 Baroꞌ Isa diri abaꞌ nanyaꞌ inoꞌ nyaꞌ, “Ni sidaꞌ te tadeꞌ teh? Niseꞌ sidaꞌ te kaꞌ ngukom deꞌ weh?” 11 Inoꞌ nyaꞌ nyawot, “Niseꞌ, Wan Pak.” Baroꞌ Isa madah ke ya, “Ku nadai gaꞌ ngukom deꞌ. Angkat, abaꞌ blaboh ari entoꞌ, nang mulah dusa ageꞌ.”]
Isa mah trang dunia
12 Udah nyaꞌ Isa becakap ageꞌ ke urang banyau, jakoꞌ Ya, “Ku mah trang dunia; ngenap urang te nrudi Ku nadai kaꞌ bejalai de teban te petang nema de ya adai trang te ngasoh idop.” 13 Baroꞌ kebala urang ari klumpok Parisi nyawot Ya, “Wan besaksi tentang direꞌ Wan kedireꞌ, apa te Wan saksi ke nyaꞌ bulaꞌ.” 14 Sawot Isa, “Amat mah Ku besaksi tentang direꞌ Ku kedireꞌ, uleh apa te Ku padah ke nyaꞌ kenaꞌ, nema Ku tauꞌ badaꞌ, ari ni penatai Ku abaꞌ kikai Ku angkat. Uleh kitaꞌ nitauꞌ badaꞌ ari ni penatai Ku abaꞌ kikai Ku angkat. 15 Kitaꞌ nyalah Ku nunaꞌ pemiker urang, uleh Ku nadai nyalah urang. 16 Enteꞌ Ku nyalah urang, cara Ku nyalah urang nyaꞌ kenaꞌ, nema Ku nadai nyalah urang kedireꞌ, uleh Ku abaꞌ Apai te ngutos Ku. 17 De alam Prator Musa depadah, enteꞌ adai dua urang saksi madah utai te sama, breti nyaꞌ kenaꞌ. 18 Te mreꞌ kesaksian tentang Ku adai dua, Ku abaꞌ Apai te ngutos Ku.” 19 Baroꞌ sidaꞌ nanyaꞌ ke Isa, “Dini Apai Wan nyaꞌ?” Sawot Isa, “Kitaꞌ nadai nglala Ku abaꞌ Apai Ku. Enteꞌ kitaꞌ bamat-amat nglala Ku, pesti kitaꞌ nglala gaꞌ Apai Ku.”
20 Ugaꞌ nyaꞌ depadah Isa, pas tengan Ya ngajar de Rumah Kudos Tuhan Allah, semak kebala badah pesemah. Uleh niseꞌ urang te nangkap Ya, nema bedau naꞌ senta Ya detangkap.
Isa bukai ari dunia toꞌ
21 Isa madah ageꞌ ke ugaꞌ urang banyau nyaꞌ, “Ku angkat lah nudi kitaꞌ abaꞌ kitaꞌ kaꞌ ngigaꞌ Ku, uleh kitaꞌ kaꞌ mati tengan dusa kitaꞌ bedau deampon. Abaꞌ ke teban Ku angkat, kitaꞌ nitauꞌ datai kiyaꞌ.” 22 Baroꞌ kebala pemimpen sidaꞌ Yahudi nanyaꞌ ke sama direꞌ, “Kati Ya nyaꞌ, kaꞌ munoh direꞌ? Nyaꞌ ngasoh Ya madah, Kita nitauꞌ datai ke teban te jalai Ya angkat?” 23 Uleh Isa madah ke sidaꞌ, “Penatai kitaꞌ ari baroh, penatai Ku ari atau; kitaꞌ ari dunia toꞌ, Ku nadai ari dunia toꞌ. 24 Ku madah ke kitaꞌ, kitaꞌ kaꞌ mati tengan dusa kitaꞌ bedau deampon. Enteꞌ kitaꞌ nadai pecayaꞌ Ku toꞌ mah Ya, kitaꞌ jong mati alam dusa.” 25 Baroꞌ sidaꞌ nanyaꞌ Ya ageꞌ, “Sapa bah Wan?” Sawot Isa, “Ku mah Ya te udah Ku padah ke kitaꞌ blaboh ari semaru. 26 Tunaꞌ sa adai mayoh kebala utai te kaꞌ Ku padah ngau Ku nyalah kitaꞌ; uleh Ya te ngutos Ku, tauꞌ de pecayaꞌ. Abaꞌ apa te Ku tinga ari Ya, nyaꞌ mah te Ku padah ke dunia.” 27 Uleh sidaꞌ nadai nyarok enteꞌ Isa becakap tentang Apai te de sruga. 28 Kebaꞌ nyaꞌ Isa madah ke sidaꞌ, “Enteꞌ kitaꞌ ningeꞌ Ensia te datai ari Tuhan Allah, baroꞌ mah kitaꞌ tauꞌ badaꞌ, Ku toꞌ mah Ya te kitaꞌ entang. Abaꞌ kitaꞌ tauꞌ badaꞌ apa te Ku pulah kah nadai nunaꞌ kedekaꞌ Ku kedireꞌ, uleh Ku proꞌ madah apa te deajar Apai ke Ku. 29 Apai te ngutos Ku adai abaꞌ Ku sengabot. Ya nadai kalaꞌ ngengaꞌ Ku kedireꞌ, nema Ku slareh mulah apa te nyuroh ati Ya gaga.”
Pengajar te kenaꞌ ngebibas kita
30 Udah Isa madah ugaꞌ nyaꞌ, mayoh urang pecayaꞌ ke Ya. 31 Baroꞌ Isa madah ke kebala sidaꞌ Yahudi te pecayaꞌ ke Ya, “Enteꞌ kitaꞌ idop nunaꞌ apa te Ku ajar, kitaꞌ bamat-amat muret Ku, 32 kitaꞌ kaꞌ nyarok pengajar te kenaꞌ abaꞌ kitaꞌ kaꞌ dabibas uleh pengajar te kenaꞌ nyaꞌ.” 33 Sawot sidaꞌ, “Kami toꞌ pureh Abraham abaꞌ nadai kalaꞌ jadi ulon urang. Ngapa Wan madah, ‘Kitaꞌ kaꞌ dabibas?’ ” 34 Sawot Isa ke sidaꞌ, “Ku kaꞌ madah ngau pengamat ke kitaꞌ, ngenap urang te mulah dusa, jadi ulon dusa. 35 Abaꞌ ulon nadai jong diyau de rumah tuan ya, uleh anak tuan nyaꞌ slareh diyaꞌ. 36 Kebaꞌ nyaꞌ, enteꞌ Anak ngemibas kitaꞌ, kitaꞌ bamat-amat bibas.”
Pemimpen sidaꞌ Yahudi te ukai pureh Abraham
37 Isa madah ke sidaꞌ, “Ku tauꞌ badaꞌ kitaꞌ toꞌ pureh Abraham. Uleh kitaꞌ kaꞌ munoh Ku nema kitaꞌ ngai nrimaꞌ pengajar Ku. 38 Apa te udah Ku pedaꞌ ari Apai Ku nyaꞌ mah te ku ajar kah. Uleh kitaꞌ mulah apa te kitaꞌ dinga ari apai kitaꞌ.” 39 Sawot sidaꞌ, “Puyang jagang kami Abraham.” Baroꞌ Isa madah, “Enteꞌ kitaꞌ bamat-amat pureh Abraham pesti kitaꞌ mulah te dapulah Abraham. 40 Ku madah ke kitaꞌ pengajar te kenaꞌ, te Ku tinga ari Tuhan Allah. Uleh kitaꞌ kaꞌ munoh Ku. Abraham nadai mulah piyaꞌ. 41 Kitaꞌ mulah apa te dapulah uleh apai kitaꞌ kedireꞌ.” Sawot sidaꞌ, “Kami ukai anak ampang, proꞌ Tuhan Allah mah sikoꞌ-ikoꞌ Apai kami.”
42 Baroꞌ Isa madah ke sidaꞌ ageꞌ, “Enteꞌ amat Tuhan Allah nyaꞌ Apai kitaꞌ, pesti kitaꞌ kaꞌ ngaseh Ku. Nema Ku datai ari Ya abaꞌ entoꞌ Ku udah adai ditoꞌ. Ku datai ukai penekaꞌ Ku kedireꞌ, uleh Ya te ngutos Ku ke dunia toꞌ. 43 Kitaꞌ nadai nyarok apa te Ku padah, nema kitaꞌ ngai nrimaꞌ apa te Ku ajar kah. 44 Ibles Kepalaꞌ bala sitan nyaꞌ mah apai kitaꞌ, abaꞌ kitaꞌ kaꞌ nunaꞌ penekaꞌ apai kitaꞌ nyaꞌ. Blaboh ari meliyaꞌ ya mah te munoh ensia, abaꞌ ya nadai kalaꞌ mulah utai te kenaꞌ nema niseꞌ te kenaꞌ de ya. Ya gah ngemulaꞌ nema piyaꞌ mah sipat ya. Ya mangah ngemulaꞌ abaꞌ ya apai ari ugaꞌ utai te bulaꞌ. 45 Uleh Ku madah apa te kenaꞌ ke kitaꞌ, nyaꞌ nyuroh kitaꞌ nadai pecayaꞌ ke Ku. 46 Daentara kitaꞌ niseꞌ te tauꞌ mreꞌ bukti enteꞌ Ku udah mulah dusa. Enteꞌ Ku madah te kenaꞌ, ngapa kitaꞌ nadai pecayaꞌ ke Ku? 47 Enteꞌ kitaꞌ daempu Tuhan Allah, pesti kitaꞌ mrati apa te depadah Tuhan Allah. Uleh kitaꞌ ngai mrati apa te padah Ya nema kitaꞌ ukai empu Ya.”
Isa lamaꞌ adai sebedau Abraham
48 Baroꞌ kebala pemimpen sidaꞌ Yahudi madah, “Amat mah te jakoꞌ kami, Wan sidaꞌ Samaria te nyau gila abaꞌ desarong sitan!” 49 Isa nyawot sidaꞌ, “Ku nadai desarong sitan, Ku ngehormat Apai Ku uleh kitaꞌ kurang ajar ke Ku. 50 Ku nadai mintaꞌ puji urang, uleh adai Sikoꞌ te kaꞌ isaꞌ Ku dapuji abaꞌ Ya mah te jadi Akem. 51 Ku kaꞌ madah ngau pengamat ke kitaꞌ, urang te nunaꞌ apa te Ku ajar, nadai ngamoꞌ mati.” 52 Baroꞌ kebala pemimpen sidaꞌ Yahudi madah ageꞌ, “Entoꞌ kami yaken, enteꞌ Wan desarong sitan. Nema Abraham udah mati abaꞌ upa piyaꞌ gaꞌ kebala nabi. Uleh Wan madah, enteꞌ urang te nunaꞌ pengajar Wan, nadai ngamoꞌ mati. 53 Wan miker direꞌ lebeh ari Abraham puyang jagang kami? Abraham nyau mati abaꞌ kebala nabi sigeꞌ nyau mati! Wan piker Wan toꞌ sapa?” 54 Sawot Isa, “Enteꞌ Ku muji direꞌ, nyaꞌ niseꞌ reti. Uleh te muji Ku nyaꞌ Apai Ku, te depadah kitaꞌ Allah kitaꞌ. 55 Uleh kitaꞌ nadai nglala Ya, Ku nglala Ya. Enteꞌ Ku madah direꞌ nadai nglala Ya, breti Ku bulaꞌ sama upa kitaꞌ. Uleh Ku nglala Ya, abaꞌ Ku slareh nunaꞌ apa te jakoꞌ Ya. 56 Puyang jagang kitaꞌ Abraham gaga amat nungoꞌ penatai Ku ke dunia toꞌ abaꞌ ya udah medaꞌ abaꞌ ya gaga.” 57 Baroꞌ kebala pemimpen sidaꞌ Yahudi madah ke Isa, “Umor Wan bedau naꞌ limaꞌ puloh taon, abaꞌ Wan madah direꞌ udah medaꞌ Abraham?” 58 Isa nyawot sidaꞌ, “Ku kaꞌ madah ngau pengamat ke kitaꞌ, sebedau Abraham adai, Ku udah adai.” 59 Ninga apa te depadah Isa, sidaꞌ mutek kebala batu kaꞌ ngau nikam Ya, uleh Isa selabok abaꞌ nudi Rumah Kudos Tuhan Allah.